2Tawarikh Uram 13
13
Abia biryi Yerobeam bisi mar bobmou deyok
13:1–14:1
1Ura, Israel nang mutuk sienyi bira Yerobeam weik sienyi kiboka taleamwe. Ani, kwalina 18 baryi kimbau ura, Abia biryi Yehuda mutuk nang weik sienyi kiboka talebmou. 2Abia bira kwalina winiryi Yehuda yala nang sienyi kibmouci, Yerusalem kuramwe. Abia er kwin bira Gibea mutuknyi si Uriel nebnyi Mikhaya biryi deiamwe. Ani, Abia Yerusalem atei sienyi ab, Israel yala nang sienyi Yerobeam ab mar bobdanmarei. 3Ura, Abia biryi yin doun nang ninyi ordana co biriamwe nang akwe wiboka yubwa 400.000 baryi nang kiknibmou. Ba, Yerobeam bibabyi yin doun nang ninyi ordana co biribdob nang akwe yubwa 800.000 baryi kiknibmou. 4Ura, Abia bira Efraim mutuk dam mutuk kon si Zemaraim dub welebmouci, ato eboka uram dobmou. “Yerobeam ab, Israel nang ab ni uram kekendarur o! 5Israel ninyi moloraminyi, Er Iya Erebdobnyi biryi, ‘Israel yala nang sienyi kibde binkwaming ara Daud deibdoba akwe sienyi kiboka iya talebde bankwaming,’ eboka uram talak eamwe. Ara, iya dangbisina kum uram ebdeiamwe ara kum bingdarur do? 6Uca, Nebat mi Yerobeam kanda, minob talak ara Daud mi Salomo er wa irmilinanyi kiamumwe ani, ukura kan nai kiamumnyi Salomo bisi mar ibmarim atiba. 7Utotoa diboka bingna kum nang, manmalyito nang bobuluboka, ni nai Rehabeam, Salomo mi bisi bindoka tatabmai. A talak ara er nerkatana kum kubmou talak aryi sun uram asi tatasina kum kuansou. 8Ba, ukura sun tenebmarum ara Er Iya Erebdobnyi biryi taleburyi, Er wa inanyi Daud yala ati, karebwe mutuk asi arabdobkwamarum do? Sunda yin doun nang yubwa ilinto ab, Yerobeam biryi bisam sapi yim emas aryi kiknibdeiamwe kwemdeina asi sun molonindarurnyi kiboka molondarur dinyi ab ati mar bobkwamasurum do? 9Sunci Er Iya Erebdobnyi ai wa ina kikiman imam nang Harun mabwe ab, Lewi yala nang ab asi yakdonokdau. Ukura sunci yuk mutuk nang kuraming to talyi nang asi bisam sapi yim ukuryok nenmaca boyarinyi ab, domba bisam tabaryi boyarinyi ab asi kwemdeina ai wa inanyi kimdeirindarur. A kwemdeina ai wa in nang ara kibdeibdau wa inung ara Er Imtamnyi wa inunga kuma, eda kwemdeina wa inung. 10Bok, nunda nun Nai, dib Imtamnyi, Iya Erebdobnyi nun tanglona kum kubkwayeb. Ani, Imtamnyi ai wa in nang ara Harun mabwe aryi imam wa inung. Ba, Lewi yala nang ara sun wa irmiliraming. 11Ba, belekuna ab, sintam ab nirya tuba-tuba Iya Erebdobnyi biti bisam oboka nong nirya uk daraming. Ani, tong teleb co yung uk daraming. Ani, Iya Erebdobnyi biti kareboka dama deirin roti ababyi co lamna deici lilirdeiriraming. Ani, lukunda inibci ura, tabtabingna kum emas aryi kiknibdeibyi uk ubna dinirdongoraming. Nunda, Nun molonubnyi, Er Iya Erebdobnyi biryi ebdeibwe to kalikoka kununub. Uca, sunda, Er Iya Erebdobnyi bira taklobdau. 12Dindarur, nun tam ara Er Iya Erebdobnyi biryi menekwamasir. Ba, Er ai wa in nang imam nang ara bilul si nafiri lilim kwemingnyi ura, sunsi mar bobkwinsib. Ati, Israel nang se, sun Nai Er Iya Erebdobnyi, sun abwe yabwe moloraminyi bisi mar bona mem. Sunci Er Imtamnyi bisi mar bobkwamarum ara telebto dinyi ton kum dobkwamarum!” ebmou.
13Uca, Israel mutuk sienyi Yerobeam biryi yin doun nang ton bokdonokmou ba, Yehuda yala nang dongtam kuboka mar bobkwamai ati binmai. Ba, yin doun nang ton yubwa ara urasin deibmai tam kuboka mar iyankwamai nang kiboka wibmou. 14Ura, Yehuda yala nang sun dongtam dirtamurderamnyi uca, dongtam babyi, sun taramtam babyi Israel mutuk nang iyanganmai. Ura, Yehuda yala nang aryi, Imtamnyi ai wa in nang imam nang aryi nafiri lilim erongnyi ura, ton nang ara Er Iya Erebdobnyi bisi ngolokoka molobmai. 15Ura, Abia ab, er yin doun nang Yehuda yala nang ab ara mar iblulu bindoka obdanmai. Ba, Er Imtamnyi biryi Yehuda yala nang milibmou ba, Yerobeam ab, er yin doun nang Israel nang ab asi muna oboka erebdobmai. 16Ba, Israel nang ton nang ara bai bukoka baronmai bok, Er Imtamnyi biryi Yehuda yala nang taruk dam karebmou ba, oboka erebdobmai. 17Ukuboka Abia ab, er yin doun nang Yehuda yala nang ab aryi, Israel nang Yerobeam tam yin doun nang asi obai yubwa ara ninyi ordana co biriamwe yin doun nang akwe 500.000 baryi obmai. 18A talak Yehuda yala nang aryi Israel mutuk nang asi muna obmai ara sun abwe yabwe moloraminyi, Er Iya Erebdobnyi bisi likniramnyi deyok aryi sun muna oboka erebdobmai. 19Ura, Abia Yerusalem sienyi biryi Israel sienyi Yerobeam domou ba, yuk mutuk binmou. Ura, Yerobeam taleamwe weik atei asi, weik atei Betel ab mitik-mitik atei ab, weik atei Yesana ab mitik-mitik atei ab, weik atei Efron ab mitik-mitik atei ab nirya arabdobmou. 20A talak Abia Yerusalem weik sienyi kiamwe talak ara Yerobeam mikib dorona kum kuramwe. Ani, Yerobeam bisi Er Iya Erebdobnyi biryi obmou ba, dibmou.
21Uca, Abia bira mikib kibtabakde baramwe. Ura, Abia biryi er nerabwe 14 baryi doamwe. Ba, er mabwe sal akwe ara 22 baryi deiamwe. Nermabwe ara 16 baryi deiamwe. 22Ba, sienyi Abia eramwe uram babyi, er ukuramwe dinyi babyi, liliboka sekyi ara nabi Ido kerek sengna umbura asi liliboka kerek sekamnyi.
Currently Selected:
2Tawarikh Uram 13: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
