2Tawarikh Uram 12
12
Mesir mutuk Sisak ninyi aryi Yerusalem atei mar bobmai deyok
12:1-16
(1Raj. 14:21-31)
1Ura, Rehabeam sienyi kibmouci, er taleamwe mutuk atei nirya sasibmouci, sienyi ab, Israel ninyi nirya ab Er Iya Erebdobnyi biryi, “Ukubkwandarur-ukuna mem,” ebdeiamwe uram luba kibmai. 2Ura, Rehabeam sienyi kiboka taleamwe talak kwalina amubaryi dinyi kimbinmou. Ura, Mesir sienyi si Sisak biryi Yerusalem atei mar bobmou. Ara, Er Iya Erebdobnyi bisi takloboka, yuk kanya bobmai deyok aryi, Er Iya Erebdobnyi biryi mundu lobmou ba, Mesir nang aryi mar bobmai. 3Ura, Mesir sienyi Sisak ab, Mesir nang nirya aryi kongkong ena yubwa 1.200 ab, kuda bisam deici bukoka mar iyangan nang yubwa 60.000 baryi nang ab, ur Mesir yin doun nang nirya ab, Libia mutuk yin doun nang ab, Suki mutuk yin doun nang ab, Etiopia yin doun nang ab, ninyi yubwa nukman ilinto antaniboka mar iyanmai. 4Ura, Yehuda yala nang weik atei doramnya nirya yandoka mar bobmai. Ura, anda atei nirya ninyi obde yanmai ani, Yerusalem atei dam yanmai.
5Ura, Mesir sienyi biryi mar iyanganmai deyok ati, weik sienyi Rehabeam ab, Yehuda mutuk sien nang ab Yerusalem dam buluboka uram sisingmai. Asi Imtamnyi uram ermurunanyi si nabi Semaya sun dam yanmou ura, ato ebmou. “Er Iya Erebdobnyi bira ato ebmar, ‘Sunci Ni takloboka yuk kwemdeina kanyi bobdobdau ati, Nibabyi Mesir sienyi Sisak mar bobmasir dinyi lemdeirina kum kubkwamasin,’ ebmar,” enmou. 6Ba, Israel sien nang ab, Yerusalem weik sienyi ab luknubdongoboka, “Er Iya Erebdobnyi ebmasir to ara diba,” ebmai. 7Ura, Er Iya Erebdobnyi dinmou uca, sun kanya luknubdongobmai dinyi asing eibmou. Ura, Er Iya Erebdobnyi biryi Semaya deici aryi ato ebmou, “Sun kanya luknubdongobmang ati, Niryi sunsi kum danardeirina kum kubkwan. Mesir sienyi Sisak mar bobmara deici liknibdongoboka, Yerusalem atei ninyi asi kum danardeirina kum kubkwan. 8Eda, Mesir nang aryi sienyi kibingnyi ura, Israel ninyi ara sun wa irmilin nang kibkwaming. Ukubingnyi asi dibdenkwaming, Ni Imtamnyi biryi talebni ba, kuna asi teleb kum? Tukwetam nang aryi sienyi kiboka talebni ba, kuna asi teleb kum?” ebmou.
9Ura, Mesir mutuk sienyi Sisak mar iyanmouci, Yerusalem atei mar bobmou. Ura, Yerusalem atei Er Iya Erebdobnyi ai deiriramnyi bona ab, weik sienyi ai deiriramwe bona ab nirya daluboka dobdobmai. Ani, mar ordanmanaryi mar u limdon ting ilinto Salomo biryi emas aryi kikniboka deiamwe ting ababyi dobdobmai. 10Ukubmai ba, Rehabeam biryi ting kiknin nang asi arukmou ba, mar u limdon ting kiknibmai ura, sienyi er ai lika bublan dam kalingdamnyi nang sienyi bisi karebmou. 11Ba, a weik sienyi Er Iya Erebdobnyi ai wengyangaci ura, a ting bon nang aryi boyanmangnyi ani, tubto boboka a ting deirin ai sun kalingdamnyi ai deirirbaramnyi. 12Ukuboka sienyi biryi luknubdongobmou deyok aryi, Er Iya Erebdobnyi biryi yu bobmou dinyi kum danmou. Ba, a sienyi bisi Mesir nang aryi ona kum kubmai. Ara, Yehuda mutuk dam ara telebto kun dinyi ton tuba anda kuramnyi deyok aryi Er Imtamnyi biryi nirya kum danardeirina kum kubmou.
13Ba, Rehabeam bira Yerusalem atei sienyi tuba taleamwe. Rehabeam kwalina 41 baryi kimbau ura, sienyi kiamwe. Ba, Yerusalem atei sienyi kiamwe talak kwalina ara 17 baryi kwaliamwe. Akatei Yerusalem ara Israel mutuk weik atei da doramnya kankan aryi, Er Iya Erebdobnyi biryi, “Ni si erenkwaning atei,” tenen wiamwe atei kiamwe. Ba, Yerusalem atei sienyi Rehabeam er kwin si ara Naama Amon mutuk ner aryi deiamwe. 14Rehabeam biryi Er Iya Erebdobnyi uram diboka kununa kum uca, malyi dinyi akwe kunuramwe. 15Ba, Rehabeam er yuma kubde yanamwe aryi kuboka, sirya kurbinamwe dinyi nirya ara nabi Semaya kerek sengna umbura kerek sekamwe. Ani, kunumna asing eirinanyi si Ido kerek sengna umbura kerek sekamnyi. Ani, sun deibdanin binamnyi ninyi si ababyi a kerek sengna umbura kerek sekamnyi. Ba, Rehabeam ab, Yerobeam ab ara tuba mar bordarandei. 16Ani, Rehabeam bira dibmou ura, Daud minob kuramwe atei dam tukwe dongobmai. Ura, er mi si Abia unuboka sienyi kibmou.
Currently Selected:
2Tawarikh Uram 12: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
