2Tawarikh Uram 11
11
1Ura, Israel nang aryi Yehuda yala sienyi Rehabeam obmandanmai ba, Yerusalem atei yandobmou. Ura, Yehuda yala nang ab, Benyamin yala nang ab, mar ordana co biribdanamwe yin doun nang yubwa 180.000 baryi akwe wiboka bulubmou. Ara, erci ato tenebmou, “Israel yala yoka nang yuk, Yehuda yala nang yuk kimna malyito, eda antaniboka kubtibiryi, ni kikwe sienyi kibtinyi,” tenebmou ura ato kubmou. 2Uca, Er Iya Erebdobnyi biryi Imtamnyi uram ermurunanyi si nabi Semaya deici asi, 3Yehuda yala nang sienyi Salomo mi si Rehabeam ab, Israel yala ninyi nirya ab, Benyamin yala ninyi ab keken ai asi ebkwamou to ara ato ebdeibmou. 4“Ato kubdeibman dinyi ara Niryi ukubsinibman ba, sun molobmarum dinyi kununa kum kubsir. Ati, sunci yin doboka sun kwit yabwe asi mar bona mem. Sun nirya ur anaboka sun atei yuk-yuk bindobdarur!” ebmou. Ba, Er Iya Erebdobnyi uram kunuboka, Yerobeam bisi mar bona kum kubmaici, sun atei yuk-yuk bindobmai.
Sienyi Rehabeam biryi er yala atei akwe sasiboka dobtabakmou deyok
11:5-23
5Ura, sienyi Rehabeam bira Yerusalem atei iya a kuramuryi, Yehuda yala ninyi ab, Benyamin yala ninyi ab kuramnyi atei akwe atei lika sasiboka dobnin yibinmou. 6Yehuda yala nang atei sasiboka dobmou atei si ara Betlehem ab, Etam ab, Tekoa ab, 7Bet-Zur ab, Sokho ab, Adulam ab, 8Gat ab, Mares ab, Zif ab, 9Adoraim ab, Lakhis ab, Azeka ab, 10Zora ab, Ayalon ab, Hebron ab, Yehuda yala nang kuramnyi weik atei nirya ab, Benyamin yala nang kuramnyi weik atei nirya ab, ara lika wiboka bublan dam kalingni atei akwe kibmou. 11Ura, anda weik atei nirya ara lika dobokaburyi, ongobmou ura, yin doun nang sien nang atei yuk-yuk aniboka kabdeibnin yibinmou. Ura, a yin doun nang sun yina babyi, yingying en me babyi, anggur du yin me babyi kiknibdeibnin yibinmou. 12Ani, mar ordan mar lisirona ati ting babyi, ninyi ordan co balang babyi, anda weik atei nirya akiboka kiknibdeibnin yibinmou. Ura, Rehabeam biryi anda weik atei nirya sasiboka dobnin yibinmou. Ukuboka Yehuda yala ninyi atei nirya ab, Benyamin yala nirya ab erci talebmou.
13-14Ba, Yerobeam ab, er mabwe ab aryi, Er Iya Erebdobnyi ai wa in nang imam nang ab, Lewi yala nang ab asi ato ebmai. “Sunci Er Iya Erebdobnyi ai imam wa ina mem,” eboka uram sekandei deyok aryi, sun atei yuk-yuk ab, sun bisam winibde kun mutuk yuk-yuk ab ara takloboka, Yehuda yala nang atei ab, Yerusalem atei ab, Rehabeam taleamwe atei akwe yandobmai. 15Ba, Yerobeam bira kwemdeina molon dikum mutuk konkon dam asi, kwemdeina molon ai wa in nang yuk wiboka, er kwemdeina toto, isa ner toto, bisam sapi yim mi atoa er mining kiknibdeiboka molon ai wa in nang kibdeiamwe ba, wa iramnyi. 16Ba, sun Israel nang ton nang ara Lewi yala nang milibmaici, Yerusalem atei yandobmai. A yandobmai nang ara sun kanya aryi, “Nun Nai Iya Erebdobnyi, nun abwe yabwe moloraminyi bira taklobibyei,” tenebmaici ingkirikde yanmai. Yandoka Er Iya Erebdobnyi, sun abwe yabwe moloraminyi biti bisam kambing domba oboka dama deiboka si weik ebmai. 17Ukuboka Yehuda yala sasibmaici, Salomo mi si Rehabeam Yerusalem atei sienyi kibmou. Kwalina winiryi ara Daud ab, Salomo ab ukurandei to akwe kunubde yangaramnyi.
18Ani, Rehabeam biryi Daud mi si Yerimot nebnyi Mahalat dobmou. Tonda, Isai mi si Elhiab nebnyi Abihail dobmou. Elhiab bira Isai mi aryi deiamwe. 19Ba, Rehabeam a dobmou ner Mahalat biryi deibmou mabwe si ara Yeush ab, Semarya ab, Zaham ab deibmou. 20Sienyi Rehabeam biryi tubto Absalom nebnyi Maakha dobmou. A ner ab deibmarei mabwe ara sal dumbaryi deibmarei. Sun si ara Abia ab, Atai ab, Ziza ab, Selomit ab deibmarei. 21A sienyi Rehabeam bira yuk da doramwe nerabwe ara iya kanyi deirina kum kuramwe, eda Absalom nebnyi Maakha bisi kanyi deiriramwe. A sienyi Rehabeam er nerabwe doramwa yubwa ara 18 baryi doamwe. Ba, aminda dortabangni nerabwe yubwa ara 60 baryi doamwe. Ba, er mabwe deiriramwe yubwa ara sal 28 baryi deiamwe. Ba, nerabwe ara 60 baryi deiamwe. 22Ura, Rehabeam biryi er ner kanyi deiamwe ner Maakha biryi yuma deiamwe mi si Abia bisi tikeibmouci, anda mabwe sun sienyi kibdeibmou. Ato kubmou ara, “Abia bira aminda Yehuda weik sienyi kibkwande,” tenebmouci, ato kubdeibmou. 23Ura, Rehabeam biryi Yehuda yala nang weik atei nirya ab, Benyamin yala nang atei nirya ab asi, akatei ninyi kalikoka, “Ato kubkwayeb-ato kubkwayeb,” eboka lilirdeirin nang ati er mabwe bokdonokmou. Ura, sun yina ilinto kiknibdeibmou. Ani, sun nerabwe ababyi ilinto kiknibdeibmou.
Currently Selected:
2Tawarikh Uram 11: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
