1Tawarikh Uram 29

Er Imtamnyi ai dobkwamnyi ati dengna weik dinyi ilinto bulubmai uram deyok

29:1-9

1Weik sienyi si Daud biryi Israel ninyi nirya asi ato ebmou, “Ni mabwe ilinto deibse bok, Er Imtamnyi biryi ni mi Salomo bisi wibmar. Ba, erda ukuryok neronmar mi deyok aryi, erci, ‘Wa ato ibniryi ukubkwan,’ kum tenebmar. Ani, a sienyi kiboka ibkwande wa ara ilila wa ibkwande. Ba, erci akai dobkwande ara ninyi kun atei kuma eda, Er Iya Erebdobnyi, nun molonanyi ai dobkwande. 2Ba, ni Nai, Er Imtamnyi ai dobkwaming dinyi ara ni dam kubwe to sirya kiknibdeiboka wibdeibse. A wibdeibse keica ara dengna weik keil si emas ab, perak ab, keil si tembaga ab, kat keica si besi ab, co ab sirya wibdeibse. Tonda, dengna weik keil yuk-yuk ab, keil permata bol amuma-amuma ab, yuk keil si pualam ab sirya wiboka kiknibminikse. 3Ba, nira Er Imtamnyi ai asi kanyi deibse ati, ni mining dinyi aryi dengna weik keil si emas ab perak ab ni ai deibse ara Er Imtamnyi ai dobkwaming ati karebse. 4Ara, Ofir mutuk keil emas teleb ara sirya 100.000 kilogram deibse. Ani, tabtabingna kum keil perak 240.000 kilogram sirya deibse. A deibse emas ab, perak ab ara akai dobingiryi, ai umbura tam kuboka abilinga asi nunuboka makdongobkwaming ati deibse. 5Ara, sun ai don nang aryi emas aryi emas bona kiknibkwaming, Ura, perak aryi perak bona kikniboka akai dobkwaming. Ati, unanyi biryi arub aryi ur demang Er Iya Erebdobnyi biti dama deiboka karebkur do?” ebmou.

6Ura, sun a wekmai ninyi ab, Israel yala sien nang ab, sun ai ninyi du nang ab, yin doun nang 1.000 baryi kalingna nang sienyi ab, yin doun nang 100 baryi kalingna nang sienyi ab, weik sienyi wa irmiliramnyi nang ab aryi, “Nunbabyi bulubkwamab,” ebmai. 7Ura, Er Imtamnyi ai dona ati sun a weik sien nang aryi ato kuboka bulubmai. Emas 170.000 kilogram baryi ab, perak 340.000 kilogram baryi ab, perunggu 620.000 kilogram baryi ab, kat keica si besi 3.400.000 kilogram baryi ab bulubmai. 8Tonda, sun dengna weik keil permata amuma-amuma talen nang aryi Lewi deibdoba Gerson yalanya si Yehiel bisi bulubmai. Ba, Yehiel bira Er Imtamnyi ai wa iramuryi, co bok deirinanyi kiamwe ati ersi dengna weik keil permata asi bobindoka karebmai. 9Ura, sun yuk-yuk taleramnyi bona Er Imtamnyi biti ur demang dama deiboka karebmai. A deyok aryi, sun kanya kilkil ilinto kubmou. Ba, Daud bibabyi er kanya kilkil mitik kum kubmou.

Daud biryi Er Imtamnyi mot sebmou deyok

29:10-19

10Ura, Daud biryi sun a wekmai ninyi kankan aryi, ato kuboka Er Imtamnyi biti mot sebmou,

“Nai Iya Erebdobnyi nun abwe yabwe Yakub yala ninyi iya molorankeinyi.

Kansi si weik iya erankeinyi.

11 # Mat. 6:13 Nai, Kanda Iya weiknyi kurum.

Kan mikib ilintonyi kurum.

Kanda Erebdob Sienyi kurumci,

tukwetam kurur dinyi ab, imtam kurur dinyi ab ara Kan dinyi kurur.

12Ba, bona talen dinyi ab, milil dinyi ab ara Kanci karesurum.

Ukutotoa nirya ara Kan dinyi kurur.

Kan taruk aryok bona talen dinyi ab, mikib dinyi ab karerum.

Nai, kanci ninyi wa kareboka mikib kimdeirum.

13Nai Imtamnyi, ukura nunci Kansi, ‘Nun Nai, nun babya,’ eboka kibdobmakibci,

Kansi si weik ebmakib.

14Ani, ni ab, ni yala nang ab ara nunci ukutotoa nun yuk doboka Nai Kansi karena kum kunub.

Eda, Nai, ukutotoa nirya Kan dinyi akwe kurur.

Nunci Kan dam karebmab dinyi ara Kanci kareransirim dinyi akwe Kanti karebmab.

15Ba, Nai nunda Kan urasin dam ara tingyangan nang kunub.

Ani, nunda nun abwe yabwe kuramnyi to nunbabyi tingyangan nang kibubwe.

Nun tukwetam kunub ara kanyi dem kuninto kunubci, dininto kunub.

16Nun Nai Iya Erebdobnyi, nun talenub dinyi dengna weik bona ara,

Nai, Kan si iya teleb si asi ai dobkwayeb ati a bulurdeiryanmab.

Bok, a nirya ara Nai Imtamnyi Kan dinyi kururci, nunsi karesurum.

17Nai, Kansi ninyi yuk-yuk sun kanya dumderum, ni bikman.

Ani, Nai Kanda kanya teleb boandinyi bisi teleb kukurur.

Ba, ni kanyi teleb asa ab, ‘Nai Kanci nisi dekeibnutum,’ tenena kum dinyi ab aryi a bona Kan dam boyandoka deibman.

Ba, kan mabwe kanya teleb asa aryi sun bonung bona Nai Kansi dama deiboka karebmang dinyi niryi eibman.

18Nai Iya Erebdobnyi, nun abwe yabwe Abraham ab, Ishak ab, Yakub ab aryi molorankeinyi.

Kanci Kan mabwe arub kanyi deibmaking to iya Kansi kanyi deibkwanking.

Ati, Nai, ni molobne Kan dam iya kubkwaming.

19Nai, Kanci ni mi Salomo bisi kanyi teleb karebdum.

Ba, erci, Nai Kan ebdeiaminyi uram ab, yan memen uram ab, iya talebnurubkwande.

Ba, ni mi Salomo biryi Kan molon ai dobkwande ati bulubdeibse dinyi asi erci dobkwande.” Ato eboka Daud biryi Er Imtamnyi bisi molobmou.

Salomo Israel weik sienyi kibmou uram deyok ab, Daud dibmou uram deyok ab

29:20-30

20Daud sirya Er Imtamnyi bisi molobmou ura, sun a wekmai ninyi asi ato ebmou, “Sun Nai Imtamnyi, Er Iya Erebdobnyi bisi si weik ebdarur!” ebmou. Ba, sun a wekmai ninyi nirya aryi sun abwe yabwe moloraminyi Er Iya Erebdobnyi bisi si weik eboka mot sebmai. Ura, sun nirya sun kutam ikdongoboka Er Imtamnyi bisi molobmaici, weik sienyi bisi kibdobmai. 21Ura, ambutum toa ara a buluboka wekmai nang nirya Er Iya Erebdobnyi biti bisam ilinto oboka dama deiboka nong nirya uk dabmai. A oboka dama deibmai bisam yubwa ara yim bisam sapi 1.000 baryi ab, yim bisam domba 1.000 baryi ab, ukuryok nenmou bisam domba 1.000 baryi ab bobindoka keil lamna dub deiboka dama deibmaci uk dabmai. Tonda, anggur du yung ababyi bobindoka dama deibmaici, bisam ab tonkwa uk dabmai. 22Ura, a uki tum ara sun kanya karyi asa aryi Er Iya Erebdobnyi urasin dam yina yibmai. Ura, a tum aryok a wekmai ninyi aryi, “Daud mi Salomo bisi Israel nang weik sienyi kibmar,” eboka liki bitinyi dinyi lak ebmai. Sirya ato ebyi ura, Er Imtamnyi si deici aryi Salomo bisi me kisok dikeiboka weik sienyi tikeibmai. Ba, Zadok bira Er Imtamnyi ai wa inanyi imam tikeibmai. 23Ura, Salomo er nai Daud iramwe wa weik sienyi unubmouci, Er Iya Erebdobnyi biryi, “A sokon bukwandim,” eamwe to kuboka burbinmou. Ba, Salomo iramwe wa nirya ara ton tanglona kum uca, eda nirya iramwe. A deyok aryi sun Israel ninyi nirya ara er uram kekeramnyi. 24Ba, sun yuk wa dobdob nang ab, Daud mabwe ton mabwe ab ara Salomo weik sienyi kibmou ba, dib weiknyi tenebmai. 25Ura, Er Iya Erebdobnyi biryi Israel nang kankan dam aryi, Salomo bisi erebdob si karebmou. Ba, Salomo Israel ninyi weik sienyi kibmou ara yuk nang Israel weik sien nang da kimnamnyi to kumci, mikib weik sienyi kiboka si erebmou.

26-27Ba, Isai mi Daud bira Israel ninyi sienyi kiamwe ara kwalina uki 40 baryi kwaliamwe. Ba, Hebron atei sienyi kiamwe ara kwalina uki tabaryi kiamwe. Ani, Yerusalem atei sienyi kiamwe talak ara kwalina uki 33 baryi kiamwe. 28Ba, Daud bira bona ilinto taleramuryi, er otong ara kul akwe kuamwe. Daud wau loboka dibwe ura, er mi Salomo er nai weik sienyi kiamwe wa unubmou.

29Ba, Israel ninyi weik sienyi Daud er kubde baramwe nirya kerek sengnamnyi nang ara nabi Samuel ab, nabi Natan ab, nabi Gad ab aryi sun eiramnyi to kuboka sekamnyi. 30A kerek sengna sengdongoramnyi to ara Daud kuramwe to ab, er kunuramwe to ab, er wa ibde baramwe to ab, er weik sienyi kiboka taleamwe to ab ati sekyi. Tonda, er sienyi kiamwe talak aryi kunuramwe dinyi ab, Israel ninyi dam laki kimnamwe dinyi ab, Israel ninyi kuramnyi atei asi lak kuramwe dinyi ab nirya a kerek sengna umbura sekyi.

Currently Selected:

1Tawarikh Uram 29: MTG

Highlight

Copy

Compare