1Samuel Uram 9

Er Saul bisi me kisok dikeiboka sienyi tikeibmou deyok

9:1–10:16

1Ninyi tentok Benyamin yalanyi si Kish bona bonanyi kuboka si erebdobnyi kuramwe. Anyi bira Afiah deibdoba aryi Bekhorat deiamwe. Ba, Bekhorat biryi Zeror deiamwe ba, Zeror biryi Abiel deiamwe. Ba, Abiel biryi Kish deiamwe. 2Ba, Kish biryi er mi si Saul deibmou. Er Saul bira kamnyi, urasin telebtonyi nun kuramwe. Sun Israel nang kankan ara er urasin ertoa ton kum kuramnyi eda, er tentok urasin telebnyi nun kuramwe. Ani, er takonya ara yuk Israel nang takonya bisibkaboka erebdobnyi nun kuramwe.

3Ba, Saul er nai Kish bisam keledai ner akwe wanikiribmou deyok aryi er mi Saul bisi ato ebmou, “Kamnyi ton inibdobminyi ura, ni bisam keledai ingkiringbinurum,” ebmou. 4Ura, sal kabir ton inibdobmou ura, mutuk Efraim kon bisik ingkirikde binmarei. Ani, Salisa mutuk ababyi ingkirikde binmarei uca, a keledai kum eibmarei. Ani, mutuk si Sahalim mutuk dam ingkiringmarei uca, kum eibmarei. Ani, Benyamin yala nang mutuk ingkiringmarei uca, kum eibmarei. 5Ani, mutuk si Zuf dam binmarei ura, Saul biryi er milibmounyi bisi ato ebmou, “Atei tamuboka bindobkwanim. Ni nai bira a ingkiringmanim bisam asi kanyi kum deibmar. Eda, nunsi er boukwe ati, mambul kiringmasirarya,” ebmou. 6Uca, er milibmounyi biryi Saul bisi ato ebmou, “Minob bana mem, eda akatei ara Er Imtamnyi wa inanyi ton kurur. Anyi ebmaci tok kunurande ati nun a yanmanim dinyi ara lak ebkwamasirarya ati, anyi bisi asibdenimiryok binkwanim,” ebmou. 7Ura, Saul biryi er milibmounyi bisi ato ebmou, “Anyi dam binkwamanimnyi ura, unatoa bobinkwamanim da? Nun roti kwaning kibmanumwa ara sirya kum danmar. Er Iya Erebdobnyi wa inanyi dam bobinkwamanim keica ara ton kum bobmanim akiryok,” ebmou. 8Uca, er milibmounyi biryi tubto ato ebmou, “Perak aryi kikniraming keil uang tentok a kibmasin asi Er Iya Erebdobnyi wa inanyi bisi bobindoka karebnimnyi ba, nun ingkiringmanim dinyi lak ebkwamasir,” ebmou. 9Er Iya Erebdobnyi uram ermurun nang nabi nang ara a talak ara asing kerket nang eramnyi. 10Ura, Saul biryi er milibmounyi bisi, “A ebmarim to ara teleb ati, Er Imtamnyi wa inanyi bisi binkwanim,” ebmou. Ura, anaboka Er Iya Erebdobnyi wa inanyi bisi binmarei.

11Ura, weleboka weik atei bisik dandanya tingbinmarei ura, kam nerabwe me kweryanganmai asi ebdanmai. Ura, ato eboka asibmarei, “Asing kerketnyi bira a kunmar do?” ebmarei. 12Uca, a kam nerabwe aryi ato ebmai, “Yo, a kunmar, ukuryok a wengbar ati ola birurum. Arub ara a weik atei ninyi mutuk kon dam bisam on li doboka me yinkwamangci ninyi bulunkwamang. 13Weik atei sirya birurumnyi ura, mutuk kon weleboka yina kum yirbinabci uca, minob er dam binkwandurum. Er kum binmaci ura, yina minob kum yibkwamang ati, ebmab. Ara, erci a kwalina asi kisal dakci ura, a bulubmangnyi ninyi yina yibkwamang. Ati, ukuca er dam birurum ba, minob eibkwansir,” ebmai. 14Ba, weleboka eikatei sirya binmarei ura, Samuel bisik dam mutuk kon welebauci, bau asi ebdanmai.

15Uca, Saul ambutum yankwamou deyok aryi Er Iya Erebdobnyi biryi Samuel bisi minob ato ebmou, 16“Ambutum belekuna ara a kuabde kiting yakna kimdongoci ura, Niryi Benyamin yalanyi tentok aruknyi ba, kan ab ebdankwamarurum. Anyi ab ebdarurumnyi ura, ersi me kisok likeiboka wa karebminyi ba, anyi biryi Ni uram keken nang Israel nang weik sienyi kiboka talebkwande. Ani, Ni uram keken nang Israel nang asi Filistin nang aryi mar bonung ba, sun mambul dinyi donung ara Ni eirinun. Ani, sun engenunga ara kekenun ati, a tikeibmaminyi biryi sunsi lebdeibkwande ati ebman,” ebmou.

17Er Samuel biryi Saul asing eibmouci, ebdanmarei ura, Er Iya Erebdobnyi biryi ato ebmou, “Ni ebmanunyi bira atiba, anyi biryi Ni uram keken nang asi kalikoka talebkwande,” ebmou. 18Ato ebmou ura, a talak aryi Saul weik bisik bublan kuboka Samuel yanmou ura, ato ebmou. “Asing kerketnyi atei ara dan dikum da?” 19Ura, Samuel biryi Saul bisi ato ebmou, “Asing kerketnyi bira nitiba. Ukura kan minob menekoka mutuk kon welebirum. Arub ara ni ab kan ab yina tonkwa yibkwamanim. Ba, ambutum belekuna ara niryi kansi, kan kanyatam tenerum to dinyi karebkiniryi, ur birum eboka mundu lobkwamakin. 20Amdi tum aryi kan bisam keledai wanikmomwe asi ukubabyi kum dobmarim ara, ‘Iya wanikman do?’ tenen kanya mambul kukina mem, sirya dobmangci, atei bobinmang. Ucab, unanyi bisi sun Israel nang, ‘Sienyi kibkwayeb,’ tenen sun kanya teleb kurur do? A dinyi ara kan ai ninyi nirya kankan aryi kansi sienyi karebkwamakin,” ebmou. 21Ucab, Saul biryi ato ebmou, “Nibabyi Israel yala nang kankan iya mitikto yala, Benyamin yalanyi kunun, uca, Benyamin yala a kunung ninyi nirya aryi ni yala asi, ‘Iya malyito yala kunung,’ tenesunung yalanyi bok asi unati ato ebnirim da?” ebmou.

22Ato ebmou ura, Samuel biryi Saul ab, er milibmou kamnyi ab asi, “Ninyi du dongon ai dam iniboka bobinmou.” Ba, ninyi bulubmai dam asi binmarei. Binmarei ura, a li doboka wekmai dam asi nabmai nang yubwa 30 baryi nang bukmaia sokon erebdob sokon dam asi eterebmai ba, burbinmarei. 23Ura, Samuel biryi yun wa karebmai ba, yunmai ninyi asi ato ebmou. “Niryi kareabne dinyi ara nibiramnyi tubto doboka minob deibkwanurum,” ebmou. 24Ura, a yunanyi biryi yan alya dobtaleboka Saul dam deirirbinmou. Ura, Samuel biryi ato ebmou, “A kubmar dinyi asi kanti deiryanmakir ati ur yibdum. ‘A kwalina tum aryi yibkwande,’ tenen kanti deiankunwe dinyi a kunum. Ati, ‘Ur yibdum,’ ebmakin. Ni ninyi mitik kum nabman ati ebman,” ebmou. A tum ara Saul bira Samuel ab yina tonkwa ukuboka yibmarei.

25Mutuk kon dam aryi Saul ab, Samuel ab yina ukuboka sirya yibmarei ura, weik atei dam yuryanmarei. Weik atei dam sirya yanmarei ura, im dub ai bukoka uram sisikmarei.

26Mabmarei ani, berekwe ura, belekuna kobdob bukoka, kiting tingyau ura, Samuel biryi Saul im dub ai mabmou asi ato ebmou. “Bukokdum, ura kambinkwinkin,” ebmou. Ba, Saul bukokmou ura, sun tonkwa anaboka weik atei binmarei. 27A yurbinmarei ani, a weik atei kubkub dam barei ura, Samuel biryi Saul bisi ato ebmou, “Kan milibmakir kamnyi bisi, ‘Kanda minob menekoka barum,’ ebdum. Ba, kanda Er Iya Erebdobnyi biryi ebmar to ebkwankin ati,” ebmou.

Currently Selected:

1Samuel Uram 9: MTG

Highlight

Copy

Compare