1Samuel Uram 8

Sun Israel nang aryi, “Weik sienyi ton tikeibdobkwayeb,” eboka molobmai deyok

8:1-22

1Er Samuel sirya wisi danmou ura, er mabwe unuboka Israel yala nang taleamiryi sun malyi dinyi liliboka weneramnyi. 2Er Samuel mi yuma mi si ara Yoel deiamwe. Ba, bitinyi mi ara Abia deiamwe. A nang susuk ara Bersyeba atei taleandeici, Israel ninyi sun malyi dinyi lilin nang kiandei. 3Ucab, er mabwe ara sun nai kuramwe to kum kurandei eda, sun yukto kurandei. Er mabwe ara, “Bona weikto deksiting ba, talebdobtinimnyi,” tenen sun yuk nang asi weikto tabakdongoboka molorandei. Ani, telebto lilirdeirina kum uca, suncok yuk dinyi tabakdongoboka lilirandei.

4Ato kurandei deyok aryi sun Israel nang wisi yoka nang buluboka Rama dam Samuel bisi yanmai. 5Yanmai ura, Samuel bisi ato ebmai, “Kanda sirya wisi danmarim ati, kan mabwe ara kan kuramoumwe to kum kururung. A deyok aryi yuk mutuk nang aryi sun weik sien nang tingdeiriraming to kuboka, nunbabyi yuknyi bisi weik sienyi tikeibsurum. Ba, anyi biryi weik sienyi kiboka talebkwansir,” ebmai.

6Uca, Samuel bira sun ebmai uram ara er kanya teleb kum tenebmou ura, Er Iya Erebdobnyi bisi molobmou. 7Ba, Er Iya Erebdobnyi biryi Samuel bisi ato ebmou, “Kanci sun molobmaking dinyi ara kekebdum. Sunci kansi, ‘Anyi nun li,’ kum ebmaking, eda Nisi, ‘Nun li,’ ebmaning. Nisi, ‘Nun sienyi kibsicei,’ tenen ati ato ebmang. 8Niryi Mesir dam aryi iniboka boyangaranse talak aryi Nira takloboka yuk kwemdeina moloramnyi to kuboka kanbabyi, ‘Nun li,’ ekunung. Ara, kanti kum enung, eda Niti enunung. 9Ati, sun molobmang to dinyi biti kekebminyi ura, diboka ato ebkatabdeibkwandum, ‘Weik sienyi kibdinyi bira unatoa karebkwandum da?’ eboka asibdenkwandum,” ebmou.

10Ba, Samuel biryi, “Sienyi ton tikeibsurum,” ebmai nang asi, Er Iya Erebdobnyi biryi ebmou uram nirya sun Israel nang dam lak ebmou. 11“Weik sienyi kiboka talebci atikwe telebto akwe kum kunung. Eda, mambul dinyi ababyi a kurur,” tenebmouci, ato ebmou, “Aminda sun sienyi kibsirinyi biryi sun wa ibkwansir dinyi ara ato kubkwansir, sun mabwe asi er bisam kuda aryi kongkong eboka boyiban nang kibdarur eboka arukwande. 12Ani, ton nang ara yin doun nang yubwa 1.000 baryi nang sun sienyi kibdarur eboka arukwande. Ba, ton yuk nang ara yin doun nang ninyi yubwa 50 baryi nang sun sienyi kibdeibdobkwande. Ba, a nang sun sienyi er wa iboka kimna nang kibdeibdobkwande. Ani, er ninyi on yin totoa, ninyi on ya totoa, er kongkong ena kiknina totoa ababyi, sun a nang aryi kikninkwamingnyi nang kibdeibdobkwande. 13Ba, sun nermabwe ara doboka er tong teleb me yung kiknin nerabwe kibdeibdobkwande. Ani, er yina yun nerabwe kibdeibdobkwande. Ani, tonda er roti kwaning kiknin nerabwe kibdeibdobkwande. 14Ani, sun mutuk teleb anggur kouramunyi mutuk ab, zaitun kouramunyi mutuk ab ara er arabdobsici ura, er wa in nang ati eterebkwande. 15Ani, sun roti kiknin dinyi gandum du dakmamunyi dinyi ab, anggur du dakmamunyi dinyi ab ara sun mutuk talebsou sienyi biryi meici kukoka takubaryi-takubaryi kiboka, dobnin yibinkwande. Ura, olong tentok-tentok doboka er sienyi kiboka talebsou ai dam kobdob wa in nang ab, yuk wa in nang ab asi karebkwande. 16Sun wa dimdamunyi ba, iransingnyi ninyi sal babyi, nerabwe babyi, sun bisam keledai yabwe babyi, teleb-teleb dinyi nirya doboka er dinyi akwe kibsekdobkwande. 17Ani, sun bisam kambing babyi, domba babyi nirya takubaryi-takubaryi doboka er dinyi akwe kibsekdobkwande. Ani, sun nong ababyi nirya er wa in nang akwe kibdeibkwansir. 18Ba, sun sienyi a tikeiamunyi biryi ato kuransici ba, ‘Anyi bira malyito kusurur,’ eboka Er Iya Erebdobnyi bisi moloramunyi ababyi, a talak ara sunsi kum kekebkwansir,” ebmou.

19Uca, sun Israel nang ara Samuel ebmou uram kekena kum kubmaici, ato ebmai. “Kum! Nun sienyi ton tikeibdobkwayeb! 20Ba, nun Israel nang ababyi yuk mutuk ninyi sienyi tingdeironung ba, sienyi biryi talerande to kubdobkwayeb. Ba, a tikeibdamibyi sienyi biryi nun malyi dinyi lilibdeiboka, ninyi atei mar bobanmabya ababyi bomenengkwansurur,” ebmai. 21Ura, Samuel a ebmai uram kekebmou ura, Er Iya Erebdobnyi bisi molobmou. 22Ba, Er Iya Erebdobnyi biryi ato ebmou, “Sun molobmang to kunuboka sun sienyi ur tikeibdum,” ebmou. Ura, Samuel biryi, “Sun atei yuk-yuk bindarur,” eboka bokdonokmou.

Currently Selected:

1Samuel Uram 8: MTG

Highlight

Copy

Compare