1Samuel Uram 10
10
1Ura, Samuel biryi tong teleb co me yung kin meyok dobtaleboka, Saul kisok dub asi dikeibmou. Dikeibmou ura, u kunkunubdobmouci, ato ebmou, “Er Iya Erebdobnyi biryi kansi, Er mabwe Israel yala ninyi sun weik sienyi kiboka talebkwandim ati wibmakir. Ba, kanci Iya Erebdobnyi Er mabwe Israel nang asi kalingmiliraminci, sun mar ordan nang kankan dam aryi lemdeinkwandim ati, me kisok deici dikeiboka tikeibmakir. 2Arub ara kanci nisi a takloboka biniminyi talak ara Benyamin yala nang mutuk dam asi mutuk si Zelzah dam, Israel nang sun kwin Rahel tukwe dongoamnya dam aryi, sal bitinyi ebdankwamarum. Ebdamunyi ura, a bitinyi nang aryi ato ebkwamakiring, ‘Kan bisam keledai ingkiringmarima ara eiboka dobdobkwamarim. Kan nai bira a bisam keledai wanikwa dinyi ati kanya kum sungdur. Eda, kan nong asi boukwe kukurur. Ara, ato tenekurur, “Ni mi asi una kubwe do?” tenekurur.’ 3Ati, banmaminyi ani, mutuk si Tabor dam asi co si tarbantin tikanca dam tingbinkwandum. Biminyi ura, ninyi winiryi Er Iya Erebdobnyi biti Betel dam bindoka dama deibkwamangiryi bisik dam welebangnyi asi ebdankwamarum. Tonyi bira bisam kambing mi winiryi bobanmarur. Ba, tonyi bira roti kwaning inin winiryi bobanmarur. Ba, winiryinyi bira anggur du me kin moyok si buyung tentok bobmarur. 4A nang ab ebdamunyi ura, kibdobkingiryi, roti kwaning tokol bitinyi karebkwamaking. 5Ukuboka karebkingnyi ura, Er Imtamnyi mutuk Gibea dam binkwamarim. A mutuk ara Filistin mutuk yin doun nang kuramingnyi atei asi binkwamarim. A weik atei wengbiminyi ura, Er Iya Erebdobnyi uram ermurun nang nabi nang yubwa tentok dama deirin mutuk kon aryi, mot lilim eboka semna keica si gambus ab, rebana ab, suling ab, kecapi ab douboka bomenekmangnyi nang ab ebdankwamarum. A ninyi ara Imtamnyi uram ermurun nang ato kuboka yangankwamanung. 6Ukubde yanganmangnyi asi Iya Erebdobnyi kanya kan dam koukwe olokici ura, sun kankan dam yungbindoka sun kunmangnyi to kubkwamarim. Ukubminyi ura, kanbabyi sun to akwe kiboka kanya dangubkwamakir. 7Ni a ebmakin to dinyi kunubci ura, kan taruk dam akubci dinyi ara kan tenebminyi to kunubdum. Ba, Er Iya Erebdobnyi biryi kansi milibkwankir. 8Ni kum yanmanyi talak kan minob Gilgal dam binkwamarum. Diboka bikandum, ni kan dam yandoka ninyi dama deiboka bisam oboka nong nirya uk dan dinyi ab, ‘Lebsurur,’ tenen dama deirin dinyi ab dama deibkwaman. Uki tabaryi bindoka dibde kunmaniminyi ba, ni yanyi ura, kan kubkwandim dinyi ara, ‘Ato kubkwandum!’ eboka eterebkwankin,” ebmou.
9Sirya ato ebdeibwe ura, dangurongkwe uca, Er Imtamnyi biryi er Saul kanya yuk kanya kibdeibmou. Ba, “Ukubkwandim,” ebmou dinyi nirya a tum aryok kunubdeibmou. 10Sirya Gibea dam binmarei ura, Er Imtamnyi uram ermurun nang nabi nang yubwa tentok er ab ebdanmai. Er Saul bibabyi Er Imtamnyi Kanya koukwe olokmou ura, Er Imtamnyi uram ermurun nang kankan dam aryi sun to akwe kibmou. 11Ba, sun Imtamnyi uram ermurun nang kunmai to dinyi akwe Saul erbabyi ukubmurubmou. Ba, minob Saul asing eiriramnyi ninyi ara sun kanya ilil kubmou. Ura, ato ebdanin yibinmai, “Kish mi bok asi ato kubmar do? Er Saul bibabyi Er Imtamnyi uram ermurunanyi kurur darib?” ebmai. 12Ato kubmou asi asing eibmai nang kankan tentoknyi biryi ato ebmou, “Saul ab, Er Imtamnyi uram ermurun nang ab ara sun nai bira unanyi do? Ura, Saul bibabyi Er Imtamnyi uram ermurun nang yalanyi kurur darib?” ebmou.
13Er Saul Er Imtamnyi uram ermurun nang kankan yukmou uca, Er Imtamnyi uram ermurun nang boramnyi kanya sirya deibmou ba, mutuk kon dam Er Imtamnyi molon ai bindobmou. 14Ura, Saul ab er miliramwe kamnyi ab asi, Saul er nai weitnyi biryi ato ebmou, “Sun dantam aryi yanmarurum do?” ebmou. Uca, ato ebmarei, “Nunda bisam keledai waniknumuryi, ingkiringnunum uca, kum asing eibnoumwe ura, Samuel bisi binoumwe ani yanmanim,” ebmarei. 15Ura, Saul er mam biryi ato ebmou, “Samuel bira una ebmasou do? Er ebmasici to nuksururum!” ebmou. 16Uca, Saul biryi er mam biti ato ebmou, “Er Samuel biryi yuk uram ara ton kum ebmasou eda, ‘Sun bisam keledai ara eibdobkwamarurum,’ ena akwe tuba-tuba enmasou,” ebmou. “Kanda aminda sienyi kibkwandim,” ebmou uram ara er mam keken dam lak kum ebmou.
Keil im sukoka Saul bisi weik sienyi wibmai deyok
10:17-27
17Ura, Samuel biryi Israel nang asi ato ebmou, “Er Iya Erebdobnyi dam bindarur!” ebmou. Ba, sun Mizpa dam binmai. 18Binmai ura, ato ebmou, “Nun Israel nang molonubnyi, Er Iya Erebdobnyi biryi ato ebmar, ‘Niryi Israel nang asi Mesir ninyi taruk dam aryi taruk lobdongoboka iniboyasise. Ani, yuk-yuk weik atei ninyi aryi il dimnansungwe ba, mambul kanya borandau asi lebdansunwe. 19Ucab, ukura Ni sun Nai Imtamnyi, sunsi mambul dinyi ab, obminikmasin to kuransungwe dinyi ab asi lebdobsise. Bok, lebdobsisinyi bisi, “Nun li,” eboka ato kunindarur. “Nun weik sienyi ton tikeibdobkwayeb,” enindarur. Ato endarur deyok aryi ukura, Ni Iya Erebdobnyi urasin dam aryi, sun yala ab, sun ai ninyi ab, yala yuk-yuk a tingyandarur,’ ebmar,” ebmou. 20Ura, Samuel biryi ato ebmou, “Israel nang yala yuk-yuk a tingyanganmandarur,” ebmou. Ba, tingbanmai uca, anda yala ara sekni yamin deiboka dibde-dibde kimai uca, torbana kum kubmou. Eda, Benyamin yala asi yamin sekni yamin deibaia torbinmou. 21Ura, “Benyamin yala tingyanganmandarur!” ebmou. Ba, Benyamin yala tirbinde-tirbinde kimai uca, Matri deibdoba nang asi sekni yamin torbinmou. Ura, Matri ai ninyi nirya asi, “Nunukoka tingyandarur,” ebmou ba, nunukoka tingbinmai. Ura, akai ninyi sal tentok-tentok tingbin-tingbin kimai. Uca, Kish mi si Saul bisi sekni yamin torbinmou. Ura, dinmai uca, Saul dam a tingna kum kubmou. 22Kum eibmou ura, Er Iya Erebdobnyi bisi, “Anyi bira a wekmaba dam a yanmar do?” eboka asibmou. Uca, Er Iya Erebdobnyi biryi ato ebmou, “Anyi bira bona-bona kankan dam a duknubdobmar,” ebmou. 23Ura, “Ninyi ton cukoka inirbindarur,” eboka bokdonokmai ba, iniboka yanmai. Ura, er atei ninyi kankan dam yandoka tikmou. Ura, anyi bira er atei ninyi takonya ara amwetam kibmou uca, anyi takonya ara imtam ereboka tikmou. 24Ura, Samuel biryi er atei ninyi Israel nang asi ato ebmou, “Er Iya Erebdobnyi biryi wibmaranyi sirya asing eibmarum do? Ara, Israel nang kunuba kankan aryi er tonyi ton kum kunub ati ebman,” ebmou. Ura, sun Israel nang nirya aryi, “Nun weik sienyi iya kam kuboka talebkwansir,” eboka ngangkaboka lubmai.
25Ura, Samuel biryi sun Israel nang asi, weik sienyi tikeibingiryi, er wa ibde binkwanci dinyi kerek sekoka kareraming dinyi asi kerek sekoka Er Iya Erebdobnyi urasin dam Kemah Suci umbura iya malyi dinyi beterdongona mem dikum deibmai. Sirya ukubmou ura, Samuel biryi Israel nang nirya asi, “Sun atei yuk-yuk ur bindarur,” ebmou ba, sun atei yuk-yuk binmai. 26Ani, Er Iya Erebdobnyi biryi Saul kanya dam arukmou ba, er mar ordan nang mikib ilinto nang ab er atei Gibea dam bindobmai. 27Uca, teleb dinyi kununa kum kuramnyi ninyi aryi, sun kanya li kubmou ura, ato eboka er Saul bisi malyi kibmaici, ato ebmai, “Anyi biryi lebdeibkwamasina kuma,” ebmaici, Saul biti, “Nun weik sienyi,” tenen bona ur karen dinyi kum karebmai. Uca, ato ebmai uram ara Saul bira kekebokmou cok, teneboka kum kekeana ato kuboka dokdok ebokmou.
Currently Selected:
1Samuel Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
