1Samuel Uram 7
7
1Ba, weik atei Kiryat-Yearim ninyi yandoka Er Iya Erebdobnyi co sangkol boboka Abinadab ai mutuk kon dam bobindoka deibmai. Ura, Abinadab mi si Eleazar a co sangkol kalingkwamwe ati Er Iya Erebdobnyi biti wa inanyi imam kiboka wibmai.
Mizpa dam aryi Filistin nang asi obkiribmai deyok
7:2-14
2Er Iya Erebdobnyi biryi, “Ukubdarur-ukuna mem,” ebmou uram kerek sengna deirin co sangkol weik atei si Kiryat-Yearim dam deiamnyi talak ara uki mitik kum deiamnyi. A deiamnyi talak ara kwalina yubwa 20 baryi kwaliamnyi. Ba, sun Israel nang ara Er Iya Erebdobnyi biti, “Se, nun Nai, Kanci nunsi lebdobsurum!” eboka ngolokoka moloramnyi. 3Ura, Samuel biryi sun Israel nang nirya asi ato ebmou, “Sunci yuk-yuk kwemdeina ab, Asytoret ab asi kanya deiboka molondarur ara taklobdarur. Taklobmunyi ura, tamuboka Er Iya Erebdobnyi bikwe kanyi deibmunci, si weik ebmunyi ba, Filistin nang taruk dam kundarur ara Erci lobdeibkwansurur,” ebmou. 4Ura, sun Israel nang kwemdeina si Baal moloramnya ab, Asytoret moloramnya ab ara sirya taklobmaici, Er Iya Erebdobnyi bikwe molobmai. 5Ura, Samuel biryi ato ebmou, “Sun Israel nang nirya mutuk si Mizpa dam akwe bulubmunyi ba, niryi Er Iya Erebdobnyi bisi molobkwansin,” ebmou. 6Ba, sun Israel nang Mizpa dam akwe bulubmai ura, a tum ara yina si teboka me kweboka Er Iya Erebdobnyi urasin dam me dikmaici, ato ebmai. “Nunci Er Iya Erebdobnyi urasin dam malmaliboubwe,” ebmai. Ba, Samuel biryi Mizpa dam aryi sunsi kalingnamuryi, malyi dinyi liliboka wenenanyi kuramwe deyok aryi sun malyi dinyi liliboka wenebmou. 7Ura, Filistin mutuk sien nang kekenmai uca, “Israel ninyi Mizpa dam yandoka buluboka kunmang,” ena kekebmai ura, mar iyanmai. Ba, Israel nang kekenmai uca, “Filistin mutuk sien nang iyanganmasing,” ena kekebmai ura, sun Israel nang sun ilil kubmou. 8Ura, Israel nang aryi Samuel bisi ato ebmai, “Nun Nai, Er Iya Erebdobnyi biryi nunsi lebdeibsici ba, Filistin nang aryi kum obkwansing ati, Er Iya Erebdobnyi molona tangdongona mem. Eda, tuba molormurunmasurum,” ebmai. 9Ura, Samuel biryi bisam domba mi moum tuba yinmoua asi oboka ukubmaning Er Iya Erebdobnyi biti dama deiboka uk dabmou. Ura, Er Iya Erebdobnyi bisi Israel nang ati molobliknibmou ba, er molobmou to kunubdeibmou.
10Er Samuel bira bisam domba mi oboka Er Iya Erebdobnyi biti dama deiboka nong nirya uk danmou talak ara Filistin nang yandoka Israel nang asi mar bobmai. Uca, a tum ara Er Iya Erebdobnyi biryi Filistin nang deici asi liman deboka lilim ilinto ebmou deyok aryi, sun kanya walwalabmai ba, Israel nang aryi Filistin nang asi ninyi ilinto oboka erebdobmai. 11Ura, sun Israel nang Mizpa aryi anaboka Filistin nang asi dombinmai ani, atei Bet-Kar dam bindoka obminikmai. 12Ura, Samuel biryi keil tentok dobtaleboka Mizpa kan Yesana kan asi tikeibmou. Ura, ato eboka si dobmou, “Eben-Haezer,” eboka si dobmou. Nun uram ara, “Er Iya Erebdobnyi milibmasou ani, a dikum sirya sungloryanmasou dikum,” eboka si dobmou. 13Ukuboka Filistin nang ara Israel nang ati kwarabdobmaici, Israel mutuk ton kum wengyangaramnyi. Ani, Samuel kam kuramwe talak ara Er Iya Erebdobnyi biryi Filistin nang asi mar boramwe. 14Ani, weik atei-weik atei Filistin nang aryi oboka arabdamnyi atei nirya Israel nang sun dam nang arabdobmai. Ara, Ekron atei aryi kuboka Gat atei nirya sun dam nang arabdobmai. Ani, Filistin nang mutuk anda atei dam mutuk nirya arabdobmai. Uca, Amori nang ara Israel nang ab ordana kum kuramnyi, eda tonkwa mangkau asa antanibdandoka kuroramnyi.
Er Samuel bira malyi dinyi kunuramnyi ninyi asi lilinanyi kibmou deyok
7:15-17
15Er Samuel kam kuramwe talak nirya ara sun Israel nang taleamuryi, sun malyi dinyi liliramwe. 16Kwalina o kwali-o kwali baramnya nirya ara Samuel bira Betel aryi kuboka, Gilgal aryi kuboka, Mizpa aryi kuboka, Israel nang kuramnyi mutuk nirya yibinkirikoka kalingnamwe. 17Ani, Rama dam tamuboka yanmou. Erda Rama dam asi kuramuryi, Israel nang taleamwe. Ani, Er Iya Erebdobnyi biti dama deirin keil lamna er atei Rama dam kikniamuryi, dama deiriramwe.
Currently Selected:
1Samuel Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
