1Samuel Uram 6
6
Er Iya Erebdobnyi co sangkol Israel nang sun dam nang ati tamubkarebmai deyok
6:1–7:1
1Ani, wala tabaryi Er Iya Erebdobnyi co sangkol ara Filistin nang mutuk deiamnyi. 2Ura, Filistin nang aryi sun kwemdeina molon ai wa in nang ab, aminda kunubkwanci dinyi minob bingna mirei bingna nang ab asi nabmai ura, ato ebmai, “Er Iya Erebdobnyi co sangkol ara una kuboka Israel nang sun dam nang asi bobinkwayeb do? Boboka sun dam nang asi bobinkwamibyi to eterebsindarur,” ebmai. 3Uca, sun Filistin nang aminda kunubkwanci to minob bingna nang aryi ato ebmai, “Sunci Israel nang co sangkol bobinkwamamunyi ura, talyi te baning bobana mem. Eda, malyito kuramoubwe dinyi ati lebsou dinyi dengna bindoka, Er co sangkol damnyi bisi dekwamamunyi dinyi ton bobmunci, binkwandarur. Ba, sun nong torok deisurur ara kum dandobsici ba, sunci, ‘Diba, nun malyito kuramoubwe aryi ikin dinyi kareboka weneransou,’ tenebkwandum,” ebmai. 4Ato ebmai ura, sunci ato eboka asibmai, “Nunci malyito kuramoubwe dinyi lebkwansir dinyi ati, Ersi dekwayeb dinyi ara unatoa dekwanub do?” ebmai. Uca, Filistin nang moloramnyi kwemdeina deyok liliboka bingnamnyi nang aryi sunsi ato ebmai, “Sun Filistin weik atei sien nang amubaryi kundarur to kuboka keil si emas aryi torok atoanun amubaryi kikniboka bobindarur. Tonda, emas aryi koura atoanun amubaryi kikniboka bobindarur. Ara, sun nong bol akwe torok kum mousurur, eda sun koubdoba babyi, sien nang babyi, ur nang babyi ikin dinyi wenesurur ati, ato ukubkwandarur,” ebmai. 5“Ara, sun torok deisurura atoa ab, sun koubdoba yisurura koura atoa ab kikniboka, Israel nang sun Nai Er Iya Erebdobnyi biti, ‘Nai Imtamnyi, Kanci Iya Erebdobnyi kurur,’ ebkwandarur. Ukubmunyi ura, Erci sun kwemdeina ab, sun mutuk nirya orminingsurur dinyi ab ara kum dankwansir. 6Sunda unati Mesir ninyi ab, sun sienyi Firaun ab aryi kanya kat biribokamnyi to sunbabyi, unati kanyi kat biribokdau do? Er Iya Erebdobnyi biryi Mesir ninyi asi malyi kimnamwe ba, ‘Ur bindarur,’ eboka mundu lobdeibmai. Ba, Israel nang anaboka yandamnyi ara ton bingdarur do? 7A deyok aryi bisam asi biribdongoboka kongkong eboka boyibaraming keica ukuryok dinyi aryi bobinkwandarur. A bisam lembu kamyoa bitinyi mi moum tuba yinmariryi, ikin weik co takubdeiboka wa kum ibmangnyi bisam asi bobinkwandarur. A bisam lembu bitinyi asi kongkong eboka boyibaraming keica biribdongobmunyi ura, bobinkwandarur. Ba, a bisam bitinyi sun mabwe ara sun kwin yabwe ab bobana mem. Eda, atei a takdongobkwandarur. 8Ukubmunyi ura, Er Iya Erebdobnyi co sangkol ab, sun malyito kuramunyi dinyi lebkwansici ati, dama karebkwamamunyi emas keil ab ara a kongkong ena deici, deibkwandarur. Ba, a emas dongon co sangkol ara co sangkol yuk kikniboka dongobmunyi ura, Er Iya Erebdobnyi co sangkol deibmamunya lingkwa tam kuboka deibdongobkwandarur. Deibdongobmunyi ura, a bisam bitinyi aryi kongkong ena biribdongoboka takdongobmamunyi ba, sun yuk a co sangkol bobinkwandurung. 9A bisam bitinyi aryi a co sangkol bobanmaringnyi asi diblilibokmamunyi ba, Bet-Semes mutuk bisik biringnyi ura, Er Iya Erebdobnyi biryi orminingdansiriryi. Uca, Bet-Semes bisik kum bobiringnyi ura, Er Iya Erebdobnyi biryi kum orminingdansiriryi. Eda talyi yuka aryi kuransiriryi,” ebmai.
10Ura, a ninyi aryi, “Ukubkwandarur,” ebmai to kuboka, bisam lembu bitinyi mi tuba moum dininmoua asi doboka kongkong ena asi biribdongobmai. Ucab, a bisam mabwe ara atei taklobmai. 11Ura, Er Iya Erebdobnyi co sangkol ab, emas aryi sun nong bol malyi kuramwe dinyi ab, koura atoa kiknibmai dinyi ab ara co sangkol yuk kikniboka dongobmaici kongkong ena deici deibdongoboka takdongobokmai. 12Takdongoboka dirongmai ba, a bisam lembu bitinyi ara a co sangkol boblobmarei tok mutuk si Bet-Semes bisik weik bisik boboka likmarei. A bisam lembu bitinyi ara dina-dina bisik kiringdena kum uca, u dikum akwe bobinmarei. Ba, Filistin mutuk sien nang ara aminda diblilibokmai asi Bet-Semes dam binmai. 13A tum ara Bet-Semes ninyi ara roti kikniraming keica si gandum kinmaici, dinmai asi sun co sangkol bisam lembu bitinyi aryi boyangarei asi asing eibmai ura, sun kanya kilkil mitik kum kubmou. 14A bisam yabwe ab, kongkong ena ab ara ninyi si Yosua wa dam mutuk Bet-Semes dam bobinmarei ura, a bindoka tiklobmarei. A dikum ara ilila keil bukamwe asi a bisam bitinyi nirya oboka, a kongkong ena co kiknibmaia aryi dakoka uk sekmaici, Er Iya Erebdobnyi biti dama deiboka uk dabmai. 15Ura, sun Lewi yala nang aryi kongkong ena deici aryi Er Iya Erebdobnyi co sangkol ab, sun malyito kuamnyi dinyi ati, lebsurur tenen dengna dongobmai co sangkol ab dobkwetebmai. Dobmai ura, ilila keil deici deibdongobmai. Ura, Bet-Semes ninyi a tum aryok Er Iya Erebdobnyi biti bisam domba ngang sekmai ura, domba nong nirya uk dabmai. Ba, tonda domba mita ab, ining ab ara Imtamnyi biti dama deibmaici, ton tam kalimna ara sun yibmai. 16Ato kuboka Er Iya Erebdobnyi biti dama deibmai dinyi asi Filistin mutuk sien nang amubaryi nang aminda diblilibmai nang ara asing eibmai ura, a tum aryok sun atei Ekron tamuboka bindobmai.
17Sun manmaliamnyi ba, sun nong susa ilinto kuramwe dinyi Er Iya Erebdobnyi biti dengna boyanmai dinyi ara Asdod aryi tentok, Gaza aryi tentok, Askelon aryi tentok, Gat aryi tentok, ani Ekron aryi tentok kuboka kikniboka boyandoka lemdaron dinyi dekmai. 18Ani, koura ababyi neiktoto kuboka a amubaryi weik sien nang sun lika doboka weik atei nirya babyi, mitik-mitik atei babyi nirya yuk-yuk tentok-tentok kikniboka boyanmai. Ura, Bet-Semes ara Yosua mutuk asi ilila keil bukamwa deici asi Er Iya Erebdobnyi co sangkol deibdongobmai. A ukuamnyi dikum ara ukubabyi tuba kubwe.
19Ba, Bet-Semes ninyi yubwa 70 baryi nang aryi Er Iya Erebdobnyi co sangkol umbura dibdongobdenmai deyok aryi, a ninyi nirya Er Iya Erebdobnyi biryi obkiribmou. Er Iya Erebdobnyi biryi ikin wenen dinyi ilinto karebmou deyok aryi anda ninyi nirya se teneboka engebmai. 20Ani, Bet-Semes ninyi aryi ato ebmai, “Unanyi bisi Er Iya Erebdobnyi, malyi dinyi beterdongona memnyi urasin dam asi iya sasiboka tikokte do? Sasiboka tikokmantonyi ton kum kurur. Ati, Er Iya Erebdobnyi malyi dinyi beterdongona memnyi co sangkol ara dan mutuk asi deirirbitibyi do?” ebmai. 21Ura, Kiryat-Yearim ninyi asi ninyi ton bokdonokmaici, uram ato ebdeibmai, “Er Iya Erebdobnyi co sangkol ara Filistin nang aryi sirya nun dam boyanmang ati, boryandoka sun atei dam bindoka deibdarur,” ebmai.
Currently Selected:
1Samuel Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
