1Samuel Uram 5
5
Er Iya Erebdobnyi co sangkol ara Filistin nang aryi dalubdobmaici, sun mutuk bindoka deibmai deyok
5:1-12
1Sun Filistin nang aryi Er Imtamnyi biryi, “Ukubdarur-ukuna mem,” ebdeiamwe uram deirin co sangkol kibmaning Eben-Haezer dam aryi dalubdobmaici, Asdod dam bindoka deibmai. 2Filistin nang aryi a co sangkol sirya dalubdobmai ura, boboka sun kwemdeina kibdeiboka moloramnyi dinyi si Dagon ninyi atoa kikniboka moloramnya deyok dam bindoka deibmai. 3Ura, Asdod ninyi mabmai ani, belekuna kobdob bukoka dinmai uca, sun moloramnyi kwemdeina si Dagon ara tobkaboka Er Iya Erebdobnyi co sangkol bindoka deibmaia deici tam yandoka u lumlumukoka mabmou. Ba, a kwemdeina Dagon tomoboka tubto tikeibmai. 4Tubto mabmai ani, belekuna dinmai uca, tubto tobkaboka Er Iya Erebdobnyi co sangkol dam yandoka mabmouci, kisok ab taruk dina-dina ab kotokaboka bisik bublan dam yandoka mabmou. Ba, nong buma demang kubmou. 5Ato kubmou deyok aryi Asdod dam kwemdeina molon ai wa in nang babyi, yuk ninyi kwemdeina molon ai dam a dikum yanirbana kum kuramnyi, eda kablirongnamnyi. Ani, ukubabyi a dikum ara yanina kum uca leimdonung.
6Ura, Asdod ninyi nirya ab a dikum mutuk ninyi asi Er Iya Erebdobnyi biryi ikin wenen dinyi karebmouci, sun nong bol nirya torok mouboka borbotomna karebmou. 7Ba, sun Asdod ninyi dinmai uca, ato dinyi kubmou ura, ato ebmai, “Israel ninyi sun Nai Imtamnyi bira yu mitik kum ati, Er Iya Erebdobnyi co sangkol ara nun nong bol ab, nun kwemdeina Dagon ab asi orburansir ati nun mutuk deirisina nun li,” ebmai. 8Ura, sunci Filistin mutuk sien nang nirya nabmai ba, bulubmai ura, ato ebmai, “Israel ninyi sun Nai Iya Erebdobnyi biryi, ‘Ukubdarur-ukuna mem,’ en uram co sangkol ara una kubkwayeb do?” eboka asibdanmai. Ura, ato ebmai, “Sun Israel nang sun Nai Iya Erebdobnyi co sangkol ara Gat mutuk dam boboka deirirbinkwayeb,” ebmai.
Ura, Israel nang sun Nai Iya Erebdobnyi co sangkol boboka Gat mutuk dam deirirbinmai. 9Uca, a co sangkol deirbinmai atei ababyi Er Iya Erebdobnyi biryi wamlibsiniboka ikin wenen dinyi ilinto karebmou. Ara, wisi ninyi babyi, kam ninyi babyi, mitik mabwe babyi sun nong torok moubmou. 10Ato kubmou ura, a co sangkol boboka Ekron atei dam bodeirbinmai. Uca, Ekron ninyi aryi ato ebmai, “Israel ninyi sun Nai, Er Iya Erebdobnyi co sangkol nun mutuk boyanganmasurum ara orminingkwamasurumci, boyanganmasurum,” ebmai. 11Ato ebmai ura, Filistin mutuk weik sien nang nirya bulubdeibmai ura, ato ebmai, “Israel ninyi sun Er Iya Erebdobnyi co sangkol neik bisik boboka deirbindarur. A co sangkol deirindarur mutuk nirya ara Er Iya Erebdobnyi biryi ikin wenena weneboka, ninyi torok mouboka, mitik kum orminingdur ba, dinung. Ati, nun mutuk boyanganmasurum ara nun mutuk ninyi ab, nun mutuk ab orminingyanganmasurum,” ebmai. 12Ba, kam tuba kuramnyi ninyi nirya ara torok ilinto mouramwe ba, sun ngolongna ara ilinto ngolongnamnyi.
Currently Selected:
1Samuel Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
