1Samuel Uram 4
4
1aBa, Samuel uram ara Israel nang mutuk nirya bikmai.
Er Iya Erebdobnyi biryi, “Ukuna mem-ukubkwandarur,” ebdeiamwe uram kerek sengna deiamnyi co sangkol asi Filistin nang aryi ukula dobmai deyok
4:1b-22
1bSun Israel nang ara Filistin nang asi mar bobkwamai ati, anaboka mutuk si Eben-Haezer dam bindoka keis ol ai doboka mabmai. Ba, Filistin nang ababyi Afek mutuk dam yandoka keis ol ai doboka mabmai. 2Ura, Filistin nang ara Israel nang mar iyankwamai tam asi urasin deiboka lelebmai. Ordanmai ani, sun Israel nang asi Filistin nang aryi ninyi yubwa 4.000 baryi obmai. 3Ordanmai ani, atei yanmai ura, Israel nang wis yoka nang aryi ato ebmai, “Unati Er Iya Erebdobnyi biryi nunsi arub kum milibmasir ba, Filistin nang aryi obkiribsing do? Er Iya Erebdobnyi biryi, ‘Ukubdarur-ukuna mem,’ ebsou uram co sangkol umbura deibubwa asi Silo dam borbinkwayeb. Boyabyi ba, Er Iya Erebdobnyi nun kankan dam lak kibdariryi, nunsi milibsici ba, Filistin nang asi obkwayeb,” ebmai. 4Ura, sun Israel nang aryi ninyi ton Silo dam bokdonokmai. Ara, Er Iya Erebdobnyi imtam yin doun nang sienyi biryi, “Ukubdarur-ukuna mem,” ebdeiamwe uram deirin co sangkol borbinkwamai ati bokdonokmai. A co sangkol deici ara Er Imtamnyi uram erban nang malaikat nang ol atoa dina-dina kaluboka a co sangkol deici kiknibdeiamnya dam asi, Er Iya Erebdobnyi a deici kuramwe. Ba, Eli mabwe Hofni ab, Pinehas ab ababyi Silo dam kunmarei asi binmai ura, sunci a co sangkol boyanmarei. 5A, “Ukubdarur,” en uram deirin co sangkol sirya Israel nang kuramnyi atei boyanmai. Ura, Israel nang ngangkaboka lubmai ara mutuk burum-burum ebmou. 6Ba, sun Filistin nang kekenmai uca, Israel nang ngangkaboka lubmaia lilim kekebmai ura, sunci ato ebmai, “Sun Ibrani nang lunmanga lilim enmar ara una kunmang do?” ebmai. “Uca, Iya Erebdobnyi biryi, ‘Ukubdarur-ukuna mem,’ en uram deirin co sangkol Israel nang sun ai dobmanga dam yandoka deibmangci lunmanga,” ebmai asi kekebmai. 7Ura, sun Filistin nang aryi, “Sun nai Iya Erebdobnyi bira sun atei yandoka dobmanga dam sirya a kunum yanmar. Ati, nun Filistin nang sirya obkiribkwamasing. Minob talak ababyi ato ton kum kunung to asi kubmang,” ebmai. Ura, sun kanya ilil kubmou. 8Tonda ato ebmai, “Nun sirya obkiribkwamasing, unanyi biryi sun Nai Iya Erebdobnyi mikib ilintonyi biryi obkwamasici asi lebdobsute do? A Iya Erebdobnyi bira yini mutuk dam aryi Mesir mutuk ninyi asi obminikoka wenen dinyi mitik kum weneramunyi bica ati, nunbabyi ukubkwamasir. 9Ukubsicei ati, Filistin nang se, sal kikniboka kanya wisibdobibiryi, mikib yabdobkwayeb. Ba, sun Ibrani nang aryi nunsi wa dimna nang kurandau to kuboka sunbabyi sun wa in nang kibibyei. Ati, sal kikniboka sasibdobibiryi sun si mar bobkwayeb,” ebmai. 10Ato ebmai ura, sun Israel nang asi mar bobmaici, ninyi ilinto obmai. Ba, Filistin nang aryi Israel nang asi “Obkwayeb,” tenen domai. Bok, a ninyi ara cukoka sun atei yandoka dobmai ai dam bindobmai. A tum ara Israel yin doun nang yubwa 30.000 baryi nang asi obmai. 11Ani, “Ukubdarur-ukuna mem,” en uram deirin co sangkol ababyi tomoboka bobde bindobmai. Ani, Eli mabwe Hofni ab, Pinehas ab ababyi oboka binmai.
12Ura, Benyamin yalanyi tentok ordanmaia dam aryi bai bukoka cungmou tok ani, a tum aryok Silo dam yanmou. Er ongon aling ara kwilingdonmouci, tukwe kisok alironmoua kibmaning Silo dam yandobmou. 13Ba, Eli bira bisik iririkna dam co lamna bukmouci, Er Iya Erebdobnyi biryi, “Ukubdarur-ukuna mem,” en uram deirin co sangkol asi, “Talya wanikwamang,” tenen aryi kanya nebneb ebde dibde bukmou asi anyi yanmou. Anyi biryi yandoka, “Nun atei nang nirya obkiribsing,” eboka nukmou ba, Israel nang a weik atei nirya ngolokoka engebmai. 14Sun a weik atei ninyi nirya ngolokmaia lilim Eli kekebmou ura ato ebmou, “Lilim enmang ara unatoa ati enmang do?” ebmou. Uca, a talak aryok anyi ola Eli dam bindoka, “Filistin nang aryi Israel nang asi obkiribmasing ba, ni yandobne,” ebmou. 15A talak ara Eli bira kwalina yubwa 98 baryi kwalibmou deyok aryi er asing oba liliamwe ba, diboka kum eiriramwe.
16Ura, anyi biryi Eli bisi ato ebmou, “Nira ordanmaba dam aryi bai bukoka yangaronman ani, arub aryok yandabne,” ebmou. Uca, Eli biryi, “A mi ordanmaruma daran do?” ebmou. 17Uca, a uram ebde yanmounyi biryi ato ebmou, “Filistin ninyi aryi kan atei ninyi nirya orbunmasing ba, bai buronmab. Ani, kan mabwe Hofni ab, Pinehas ab ababyi obmang. Ani, tonda Er Iya Erebdobnyi biryi, ‘Ukubdarur-ukuna mem,’ ebdeibsou uram deirin co sangkol ababyi dalubdobmasing,” ebmou. 18Anyi biryi, “Ukubdarur-ukuna mem,” en uram deirin co sangkol dalubdobmasing erdongou akiryok, Eli co lamna deici bukmou ani, weik bisik bublan dinatam kalimna tam kuboka dalukaboka sakmou. Ara, er wis danamuryi, er nong ikin biriamwe akiryi dalukaboka sakmou ba, ngang kotokmouci, dibmou. Ara, Eli er Israel nang taleamuryi, malyi dinyi lilinanyi kiamwa ara kwalina yubwa 40 baryi kwaliamwe.
19A talak ara er mi Pinehas ner mi mundu boamwe ara deirin talak uki weik kubde baramwe. A ner kekenmou uca, “Ukubdarur-ukuna mem,” en uram deirin co sangkol dalubdobmang ena kekebmou. Ani, a ner er akenyi er nai Eli dibde ena kekebmou. Ani, er akenyi, “Pinehas obmang,” ena ton kekebmou. Ura, a ner buryibaramwe uca, a mundu boamwa mi deibkou ati, mi deyok yibkalibmou. A ner ara mi deyok donmoua deici aryi u weik yibmou. 20Ani, mi deyok donmou ara dibmanto kunmou bok, er kalikmai nerabwe aryi er si ato ebmai, “Sal mi deibmarim ati, kan kanya sungkina mem,” ebmai. Ucab, a ner ara kekena kum kubmouci, er kalikmai nerabwe aryi enmai uram ara, “Ato ati, enmaning,” kum tenebmou. 21Ura, a mi si ara Er Iya Erebdobnyi milil ara Israel nang dam kuramwa sirya amibdobde ena ati, “Ikabod,” eboka si dobmou. Ara, “Ukubdarur-ukuna mem,” en uram co sangkol dalubdobmaia ab, er akenyi er nai dibmoua ab, er akenyi obmaia ab ati, a mi si ato eboka dobmou. 22Ani, tonda ato ebmou, “Er Imtamnyi biryi, ‘Ukubdarur-ukuna mem,’ ebdeibsou uram sirya dalubdobing. Akiryi, Er Iya Erebdobnyi milil aryi Israel nang dam ibarya kimkareransou dinyi ara amibdobde,” ebmou.
Currently Selected:
1Samuel Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
