1Samuel Uram 3
3
Er Iya Erebdobnyi biryi Samuel bisi nabmou deyok
3:1–4:1a
1Er Samuel kamnyi bira Er Iya Erebdobnyi ai wa inanyi si Eli biryi, “Ukubkwandum-ukubkwandum,” eboka etereramwe ba, wa iramwe. A talak ara Er Iya Erebdobnyi bira sun dam lak ton kimdandoka uram ababyi ton kum eramwe.
2A talak ara Eli bira wis danamwe ba, er asing kuamwe. Ba, uki tentok tum lukunda ara er man sokon tuba mabmou. 3Bok, a talak aryi Samuel bira Er Iya Erebdobnyi co sangkol deiamnya dam ai tuba mabmou. A lukunda berengkatana kum kuabwe talak ab ani, akai uk ubna ardeiriramnyi dinyi asi tangardeirina kum kuabwe. 4Uca, a talak aryi Er Iya Erebdobnyi biryi ato eboka nabmou, “Samuel! Samuel!” eboka uram dobmou. Uca, Samuel biryi, “Yo, Nai!” ebmou. 5Ura, Samuel bukalabkaboka Eli bisi binmouci, “Nai kanci nabmanirim do?” ebmou. Uca, Eli biryi, “Ni ton kum nabmakin ati, tubto marorbirum,” ebmou. Ba, tubto marbinmou. 6Bindoka maabwe uca, Er Iya Erebdobnyi biryi Samuel bisi tubto nabmouci, ato ebmou. “Samuel! Samuel!” ebmou. Ba, Samuel bukalabkaboka, Eli bisi bindoka ato ebmou. “Nai, kanci nabmanirim do?” eboka asibmou. Uca, Eli biryi, “A mi, ni ton kum nabmakin ati, ai marbirum,” ebmou ba, Samuel tubto marbinmou. 7Samuel bira Er Iya Erebdobnyi kum bingnamwe. Ani, Er Iya Erebdobnyi uram ersi ton kum erderamwe deyok aryi ato kubmou. 8Ani, Er Iya Erebdobnyi biryi tubto liki winiryi dinyi nabmou. Ba, tubto bukalabkaboka er nai Eli bisi bindoka, “Nai kanci nabmanirim do?” ebmou. Uca, Eli er kanya aryi, “Ara, Er Iya Erebdobnyi biryi a mi nabmar,” tenebokmou. 9Ura, Eli biryi Samuel bisi ato ebmou, “Ka tubto namkici ura, ato ebkwandum. ‘Yo, Nai Iya Erebdobnyi, Kan tenebmarim to ur ebdum, ni kan wa inanyi kekenman,’ ebkwandum,” ebmou. Ura, Samuel tubto marbinmou. 10Bindoka maabwe talak ara Er Iya Erebdobnyi akai dam lak tingyanmou. Ura, minob enmou to kuboka tubto, “Samuel! Samuel!” eboka nabmou. Uca, Samuel biryi, “Nai, ni kan wa inanyi kekenman. Ati, Kan tenebmarim to ur ebdum,” ebmou.
11Ura, Er Iya Erebdobnyi biryi Samuel bisi ato ebmou, “Niryi sun Israel ninyi asi ilil tenen dinyi kunubkwan. Ba, Ni uram lilim aryi amol dina-dina o dii enmaci ba, kwebdankwaming ati, kanda minob bikandum. 12A ilil dinyi kununmanyi tum aryi, ‘Eli ab, er mabwe ab asi ukubkwan,’ ebdeibse uram yuma aryi kuboka sirya ebse to kunubkwan. 13Ara, er mabwe malyi kun dinyi sirya biksiryi ersi, ‘Kan mabwe aryi Nisi malyi kimnururung bok, kanci, “Mem,” ena kum kurum. Akiryi, kan mabwe ara obkiribnyi ba, iya kam ton kum kubkwaming,’ ebse to kunubkwan. 14A deyok aryi Eli ai ninyi asi iya dib en dinyi aryi ato ebdeianse, ‘Sun malyi kun dinyi ati, kilibsurur tenen bisam oboka Niti dama deibkwandum dinyi ab, yin dinyi Niti dama deibkwandum dinyi ab ara ukubmamunyi bok, a dinyi aryi sunsi malyi dinyi iya kum kilibkwansin,’ eanse to kunubkwan,” ebmou.
15Ato ebmoua sirya kekebmou ura, Iya Erebdobnyi ai bublan kukmou. Ura, Samuel ersi kunumna kunubdeibmou dinyi asing eibmou to asi, er nai Eli bisi lak ena ara ilil kubmou ba, er dam nungna kum kubmou. 16A deyok aryi Eli biryi Samuel bisi nabmou ura, ato ebmou, “A mi Samuel a,” ebmou. Ba, Samuel biryi, “Nai uran do?” ebmou. 17Uca, Eli biryi, “Er Iya Erebdobnyi biryi kansi una ebmakir do? Erci kan dam ebmar to kilingdongna mem lak ebdum. Uram bum tentok ababyi Er ebmar to lak kum ebminyi ura, Er Iya Erebdobnyi biryi kansi ikin dinyi karebkicei,” ebmou. 18Ba, Samuel biryi Er Iya Erebdobnyi ebmou to nirya ton inina kum uca, Eli dam asi Er ebdeibmou to nirya lak ebmou. Ba, Eli biryi ato ebmou, “Erda Iya Erebdobnyi kurur ati, Erci, ‘Ukubkun,’ tenebci to teleb aryi ni ai ninyi dam asi ur da kunubsurur,” ebmou.
19Ura, a talak ara Samuel sirya nebdongobnin banmou talak aryi Er Iya Erebdobnyi biryi Samuel er dam tuba miliramwe. Ba, Er Iya Erebdobnyi biryi Samuel dam asi, “Ukubkwan,” ebmou uram tentok ababyi ton tangdongona kum uca, nirya kunubmou. 20Akiryi sun Israel nang Dan yala akiryi kuboka Bersyeba yala ninyi nirya Samuel bira Er Iya Erebdobnyi uram ermurunanyi nabi er kikiman tenebmai. 21Ani, Silo dam aryi Er Iya Erebdobnyi lak kibdandoka, Samuel ab uram sisikmarei.
Currently Selected:
1Samuel Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
