1Samuel Uram 30

Amalek atei ninyi aryi Daud atei Ziklag uk dabmai deyok ati, erbabyi sunsi oboka uk dabmou deyok

30:1-25

1Uki winiryi tum aryi er Daud ab, er atei ninyi ab banmai ani, sun atei si Ziklag dam binmai. Bindoka diramnyi uca, Amalek ninyi aryi Negeb mutuk ab, Ziklag mutuk ab asi yandoka mar bobmai. Ba, Ziklag atei ara ninyi taleboka tabwe debmaici, ai uk dabsekmai. 2Ba, sun nerabwe ab, akatei ninyi wis ninyi ab, kam ninyi ab, nirya taleboka tabwe debmai. Ona ara tentok ababyi ton kum obmai. Eda, a ninyi nirya kam kibmaning boboka binmai. 3Er Daud ab, er atei ninyi ab yandoka dinmai uca, Ziklag atei nirya uk dabmai asi asing eibmai. Ani, sun nerabwe ab, sun nermabwe mabwe ab tabwe deboka bobinmai asi atei olong dem yandoka saklobmai. 4Ura, Daud ab, er ab yanmai ninyi ab ara engenmai ani, sun mitang kuboka sun asimaka ababyi kum dandobmou. 5Ani, Daud nerabwe bitinyi ababyi taleboka bobde binmai. A nerabwe si ara Ahinoam Yizreel mutuk ner ab, Abigail Nabal doamwe ani, er sulyi dakamwe ner, Karmel mutuk ner ab asi bobinmai. 6Sun nerabwe ab, mabwe nermabwe ab nirya bobinmai ba, sun engen kanya bobmaici, Daud bisi, “Keil kulabkwayeb,” tenen keil donmai. Ba, Er Iya Erebdobnyi biryi Daud kalikmou deyok aryi mentebtabmai. Uca, Daud bira er Nai Er Iya Erebdobnyi biryi kanya dabum ebdeibmou ba, “Imtamnyi bisi dib kurur,” tenen dinyi er kanya dabum ebmou.

7Ura, Imtamnyi biti ninyi dama deirin ai wa inanyi imam Ahimelekh mi si imam Abyatar bisi ato ebmou, “Sekni yamin deibkwan ati, sekni yamin deirin keica si efod boyarum,” ebmou. Ba, Abyatar biryi efod aling Daud bisi boyanmou. 8Ura, Daud biryi efod deici aryi Iya Erebdobnyi bisi asibmouci, ato ebmou, “Nun atei ninyi bobinmang ninyi asi dombinkwan do? Ba, dombinmanyi ani, dam seknebkwaman do?” eboka asibmou. Uca, Imtamnyi biryi ato ebmou, “A bobinmang ninyi asi bindoka lebdeibkwamarim ati, ur dombirum,” ebmou. 9Ura, Daud ab, ninyi yubwa 600 baryi nang ab, anaboka binmai ani, me si Besor dala tingbinmai. Ura, aminda banmai nang ara a me dala bindoka taklobmai. 10Ba, Daud ab, ninyi yubwa 400 baryi nang ab akwe dombinmai. Uca, ninyi yubwa 200 baryi nang ara sun mitang kubmou aryi me Besor koubman kum kubmou ba, a me kin dam bindoka tamubmai.

11-12Ura, a mutuk dam aryi Mesirnyi ton eibmai ura, iniboka Daud dam bobinmai. Ura, roti ab, me ab, kue kwarang du aryi kiknibmai kue tentok ab, kismis kue bitinyi ab karebmai ba, yibdobmou. Sirya yibdobmou ba, er nong mikib kubmou. Anyi bira uki winiryi kwaning ab, me ab kum yiamwe. 13Ura, Daud biryi anyi bisi asibmou, “Kanda unanyi wa inanyi da? Ani, kanda dan ateinyi da?” ebmou. Uca, anyi biryi, “Nira Mesirnyi bok, Amaleknyi tentok nun asi er wa inanyi kunun. Uca, ni nai, anyi biryi u yinmanou talak takloboka bindobnou. 14Nunci Negeb mutuk Kreti ninyi ab, Yehuda mutuk ab, Negeb mutuk Kaleb yala nang mutuk ab ani, Ziklag atei uk dongobkaboubwe,” ebmou. 15Ba, Daud biryi ato eboka asibmou, “A uk dongoboka ninyi taleboka bobei ninyi binmang bisik eterebnutum do?” ebmou. Uca, anyi biryi ato ebmou, “Er Imtamnyi kam kururnyi si deici aryi, ‘Kum obkwamakin,’ ebniminyi akwe ara, ‘A bisik binmang,’ eboka eterebkwamakin,” ebmou. 16Ba, anyi biryi Daud bisi, “O bisik binmang,” eboka eterebmou. Ura, Daud bindoka diramwe uca, a ninyi nirya atei yuk-yuk kuramnyi to binmai. Binmai ura, Filistin nang bona ab Yehuda yala nang mutuk bona ab daluboka binmai yina yinmaici, weik kwalina kwalinmai asi asing eibmou. 17Asi ambutum berekmou ura, Daud belekuna kobdob aryi a ninyi asi orbunmou asi, kiting wekmou. Ninyi ton bai bukoka barona kum kubmai, eda nirya obkiribmou. Ucab, kam nang yubwa 400 baryi nang asi bisam kuda deici bukoka bindobmai. 18Ura, Daud biryi Amalek ninyi aryi bona ab, ninyi ab daluboka bobde binmai dinyi asi tubto dalubobde yandobmou. Ani, er nerabwe bitinyi ababyi nirya erdamnyi dobde yanmou. 19Ara, mitik bona babyi, weik bona babyi, sun mabwe babyi, sun nermabwe babyi, utotoa dalubmai bona nirya Daud biryi tubto dalubdobmou. 20Ura, Daud biryi yuk nang dinyi bisam kambing ab, domba ab, lembu ab ababyi nirya bulubdeibmou. Ba, er milibmai nang aryi aminda boboka yangai ura, er Daud menekmou. Ura, yuk bona ara a milibmai nang aryi Daud bisi ato ebmai, “A dinyi ara Daud kan dinyi,” eboka ersi bokeibmai.

21Ura, Daud yanmou ani, yubwa 200 baryi nang mitang kubmou ba, me si Besor kin taklobinmou nang dam tubto yanmou. Ba, a nang aryi anaboka Daud ab, er milibmai nang ab asi bisik diroryanmai. Ba, Daud biryi sun dam binmou ura, sunsi, “Teleb,” eboka kibdobmou. 22Ura, er Daud ab binmai nang kankan, yu nang ab, bona tula kiringna nang ab, aryi ato ebmai, “Nun ab tonkwa kum binmoubwe nang ara tubto dalubdobmab bona ara sunsi karena mem. Eda, sun nerabwe ab, sun nermabwe mabwe ab akwe sunbabyi tamubkarebkwayeb. Ani, sun nerabwe dem asi karebibyi ba, dobde bindobkwaming,” ebmai. 23Uca, Daud biryi ato ebmou, “A ebmarum to ara mem. A ebmarum to kuramibyi ura, nun bona ab, nun atei ninyi ab dalubdobmasungwe to aminda ababyi ukubsunung. Bok, Er Iya Erebdobnyi milibmasirci, a bona ab, nun atei nang ab doboka nun taruk dam tamubkarebmasir. Ati, ato kuramibyi ura, Erci nunsi yu dinyi karebsicei. 24Ati, unanyi biryi sun enmarum uram kekebkwamasir da? Bona dalubdobmongwe asi tubto nunbabyi dalubdobmab bona ara tonkwa binmoubwe nang demang bongdona ara kikiman. Ucab, nun kikwe kum bokdobkwayeb eda, kum binmongwe nang ababyi tonkwa bokdobkwayeb,” ebmou. 25Ato ebmou ba, neiktoto bokdobmai. Akiryi kan dinyi-ni dinyi bokanirdarona ara a tum aryi deyok koubmaici, “lya ukuboka bongdonkwanub,” eboka iya dinyi kibkalibmai. A deyok aryi ukubabyi Israel nang sun iya dinyi kiboka bokanirdanung.

Er Daud biryi Yehuda dam kuramnyi wis yoka nang ati, dengna kum uca, talyi ur karerdan bona deibmou ba, bobinmai deyok

30:26-31

26Er Daud Ziklag dam binmou ura, er kwit yabwe Yehuda mutuk wis yoka nang kuramnyi nang asi, “Er Iya Erebdobnyi bisi mar inung nang asi daluboka bobde yanmasib bona sun ton a deibmasin,” eboka deibmou ba, bobinmai. 27A bona deibmou ba, bobinmai atei si ara Betel kuramnyi nang ab, Ramot me youkwetam kuramnyi nang ab, Yatir atei kuramnyi nang ab, 28Aroer kuramnyi nang ab, Sifmot dam kuramnyi nang ab, Estemoa dam kuramnyi nang ab, 29Rakhal kuramnyi nang ab, Yerahmeel mutuk weik atei-weik atei kuramnyi nang ab, Keni nang mutuk weik atei-weik atei kuramnyi nang ab, 30Horma atei kuramnyi nang ab, Bor-Asan kuramnyi nang ab, Atakh atei kuramnyi nang ab, Hebron kuramnyi nang ab 31ani, dantam-dantam nirya er Daud yibaramwe atei nang nirya#30:31 Saul biryi Daud bisi domkiringnamwe ba, yuk-yuk atei inirkiringdoramwe atei nang ati a bona bokeibmou Ba, a bona a akatei nang ati bobinmai. ati deibmou ba, bobinmai.

Currently Selected:

1Samuel Uram 30: MTG

Highlight

Copy

Compare