1Samuel Uram 29

Sun Filistin nang aryi Daud bisi er atei bokdonokmai deyok

29:1-11

1Sun Israel nang aryi Yizreel me u dam yandoka ai dobmai. Ba, sun Filistin yin doun nang nirya bulunmai ani, anaboka mutuk si Afek dam binmai. 2Ura, Filistin mutuk weik sien nang amubaryi nang ara yin doun nang yubwa 100 baryi nang lelebmai olong kankan ton tikmai ba, bobanmai. Ba, ton yubwa 1.000 baryi nang olong kankan ton tikmai ba, bobanmai. Ba, Daud ab, er milin nang ab ara sienyi Akhis noutam tikmou ba, tonkwa aminda kuboka lelebmaici, banmai. 3Uca, Filistin nang yin doun nang sien nang aryi ato ebmai, “Sun Ibrani nang ara unati yandau do?” ebmai. Uca, Akhis biryi, “Sun Israel sienyi Saul er milinanyi Daud bira ni ab tonkwa kununum ara kwalina bitinyi kubnoumwe. Ara, er Daud biryi malyi dinyi ton kum kunurur,” ebmou. 4Uca, Sun Filistin nang yin doun nang sien nang sun yu aryi Akhis bisi kereboka ato ebmai, “Anyi bisi bokeibminci, ‘A mutuk birum!’ eboka arukmimba, binkwande! Ordanmabyi kankan aryi tamuboka obsicei ati er atei birur. Anyi kan milibmakici uca, teleb dinyi ton una kubkwamakir ati kan ab kunmarurum do? Eda, anyi biryi nun Filistin nang obsici ba, kan mundu lobkwamakir ati, anyi yangdonongna kum kubmarim do?” ebmai. 5Ani, tonda ato ebmai, “Nai sienyi, anyi bira Daud tenebmab. Ara, mot semangiryi,

‘Saul bira ninyi yubwa mitikanun orur.

Bok, Daud bira ninyi yubwa-yubwa mitik kum orur,’

enungnyi a kunum tenebmab,” ebmai.

6Ba, Akhis biryi Daud bisi nabmou ura, ato ebmou, “Er Iya Erebdobnyi kam kururnyi si aryi ebkun. Ara, ni ab yin doun nang kankan kununum ara kanda tola uram ena kumnyi kurum aryi ni teleb tenekunun. Ara, ato ati ebman, yuma nisi yanmoumwe talak aryi kuboka, arub tum ababyi malyi dinyi ton kum kunurum ati ebmakin. Ucab, sun Filistin nang weik sien nang nirya ara kanya kum deibkei. 7A deyok aryi teleb asa ur kan atei tamubirum! Bok, sun Filistin sien nang din ai ara malyi dinyi kununa mem,” ebmou.

8Uca, er Daud biryi weik sienyi Akhis bisi ato ebmou, “Niryi malyito dinyi ton kunubse do? Ani, kanci ton asing eibnoumwe do? Yuma kansi yandoka kan wa irmilinanyi kiboka kunun aryi kuboka arub ara malyi dinyi ton kunubse ati, nai kan mar ordan nang asi mar bobana dam milina mem enmanirim do?” ebmou. 9Uca, Akhis biryi ato ebmou, “Niryi tenebman ara, ‘Kanda Er Imtamnyi biryi bokdonokounyi bitonyi deyok aryi ni teleb,’ tenebman. Bok, eda, yuk Filistin nang yin doun nang sien nang aryi, ‘Anyi bira nun ab mar ibana nun li,’ ebmaking. 10Ati, kan ab, a yandobdau nang ab berekci bok asi anaboka bindobkwandarur,” ebmou. 11Ura, mabmai ani, berengdongou talak aryi minob bukoka, Filistin nang mutuk dam binmai. A talak ara Filistin nang ara Yizreel mutuk dam mar ibai talak aryi yandobmai.

Currently Selected:

1Samuel Uram 29: MTG

Highlight

Copy

Compare