1Samuel Uram 28

Er Saul biryi din ninyi kanya namni ner bisi En-Dor atei dam binmou deyok

28:1-25

1A talak aryi Filistin yin doun nang aryi Israel nang mar bobmai. Ura, weik sienyi Akhis biryi Daud bisi ato ebmou, “Kan ab, kan atei ninyi ab ara ni yin doun nang ab, tonkwa ninyi mar bobkwandum ati bikandum,” ebmou. 2Ba, Daud biryi ato ebmou, “Yo teleb, kan ebmarim to, ni kan wa inanyi biryi ukubmanyi asi bikwandim,” ebmou. Uca, Akhis biryi ato ebmou, “Ukuna ati, ‘Ni ab kuboka iya kalingkwanirim,’ ebkise,” ebmou.

3A talak ara Samuel sirya dibmou. Ba, Israel nang engenmai ani, er mining ai umbura, Rama dam tukwe dongobmai. A talak ara Saul biryi din nang kanya namni nang ab, asing kerket ninyi ab, kunumna kunurminingna ninyi ab asi yakdonokmou.

4Ura, Filistin nang yin doboka anabmaici, mutuk Sunem dam bindoka ai dobmai. Ba, Saul bibabyi Israel nang nirya asi bulubdeibmou ura, anaboka Gilboa dam ai bindoka dobmai. 5Er Saul biryi Filistin yin doun nang asing eibmou ura, er ilil aryi sirim talebmou. 6Ba, Saul biryi Er Iya Erebdobnyi bisi asibdenmou. Uca, Er Iya Erebdobnyi biryi lengdera deici babyi, sekni yamin deici babyi, Imtamnyi uram ermurun nang nabi nang deici babyi ton lak kum ebmou. 7Ura, Saul biryi er wa irmilin nang asi ato ebmou, “Ninyi dibdob nang kanya asi nabkwamar ner ton ingkirikdarur. Ba, erci nabdeibnici ura, a din nang kanya aryi, ‘Ukubkwandim,’ eboka lilibdeibkwanir ati ebman,” ebmou. Uca, er wa irmilin nang aryi ato ebmai, “En-Dor dam asi din nang kanya namni ner tentok kurur,” ebmai. 8Ura, er kanya teneiramwe ani, sien nang ongon aling ara ongona kum kubmou. Eda, talyi nang ongon aling ongobdobmouci, ninyi bitinyi inibdobmou ura, tonkwa a ner asi binmai. A lukunda banmai ani, a ner dam binmai. Ura, Saul biryi ato ebmou, “Ni kwin, kanci niti dibdob nang kanya ton nabdeibnurum. Ara, niryi anyi kanya asi nabdeibnurum ebninyi kanya asi nabdeibnurum,” ebmou. 9Uca, a ner aryi ato ebmou, “Saul biryi, ‘Asing kerket ninyi ab, dibdob nang kanya namni ninyi ab ara ni talebse mutuk dam ara kuna kum,’ eboka yakdonokwe ena ara ton bikumwe do? Kanda, ‘Obnung,’ tenen unati lak kimanirim do?” ebmou. 10Ba, Saul biryi Er Iya Erebdobnyi si aryi iya dib en uram aryi ato ebmou, “Er Iya Erebdobnyi kam kururnyi si aryi ebkun ara a deyok ati kansi kum obkwanking,” ebmou. 11Ba, a ner aryi ato eboka asibdenmou, “Unanyi kanya asi ‘Nabdeibnute,’ tenebmarim do?” ebmou. Uca, Saul biryi, “Samuel kanya asi nabdeibnurum,” ebmou. 12Ba, a ner aryi Samuel asing eibmou ura, uram weikanun iboka nabmou. Ura, a ner aryi Saul bisi, “Kanda Saul bok, tola ati kwemanirim!” ebmou. 13Ba, sienyi Saul biryi a ner asi ato ebmou, “Kan ilil kukina mem! Kan unatoa asi asing eibdim da?” ebmou. Uca, a ner aryi ato ebmou, “Tukwe umbura aryi anaboka, weleyanganmar keica nun asi asing eibman,” ebmou. 14Ura, Saul biryi a ner asi ato ebmou, “Unatoanun asi asing eibmarim do?” ebmou. Uca, a ner aryi, “Wisinyi nun uca, cang ongon aling ongobmar tok yanganmar asi asing eibman,” ebmou. Ba, Saul bira, “Samuel a kunum yangar,” tenebmouci, luknubdongoboka molobmou.

15Ura, Samuel biryi Saul bisi ato ebmo, “Kan unati ebebekmanirimci, lak kibte tenen nabmanirim do?” ebmou. Uca, Saul biryi, “Ni Filistin nang aryi obkwiningci, dam aknabde yanganmaning ati nabmakin. Er Iya Erebdobnyi bira, ‘Lebdobnurum,’ eboka namnun uca, nisi uram ton kum dengdeirinurur. Ara, lengdera deib babyi, Imtamnyi uram ermurun nang deici babyi uram ton kum dengdeinurur. Ati, ‘Kanci ukubdobdum,’ ebkwanuruma tenen nabmakin,” ebmou. 16Uca, Samuel biryi ato ebmou, “Er Iya Erebdobnyi bibabyi taklobmakirci, yu bobmakir bok asi, nisi asiryanmanirim ara unatoa ati do? 17Er Iya Erebdobnyi biryi nisi minob ebdeiamwe to kuboka, Erci kan sienyi kibumwa ara doboka Daud bisi sienyi kibdeibkwamar. 18Kanda Er Iya Erebdobnyi uram kum kunubumwe. Ara, Amalek ninyi asi Erci yu ilinto kuamwe dinyi asi, kanci Amalek ninyi asi oboka sun bona kum danardeirina kum kubumwe. Ati, arub kan uram kum kunubmakir. 19Ani, sun Israel nang kan tam kibyi nang ababyi, Imtamnyi biryi Filistin nang taruk dam karebci ba, nirya obkwamasing. Ani, ambutum ara kan ab, kan mabwe ab nirya ni dam yankwamarum. Yamunyi ba, ni ab tonkwa kubkwayeb. Ani, Israel yin doun nang nirya Er Iya Erebdobnyi biryi Filistin nang taruk dam dobkarebci ba, nirya obkiribkwamasing,” ebmou. 20Ura, Saul bira Samuel ato ebmou uram kekebmouci, diblalakmou. Ani, a uki tentok tum ara er mitang aryi yina ababyi yibman kum kubmou.

21Ura, a asing kerket ner Saul dam yandoka diramwe uca, Saul er ilil asok bobdobmou asi eibmou. Ura, a ner aryi Saul bisi ato ebmou, “Ni kam kun dinyi kan taruk dam karebmanuryi#28:21 Minob uca, Saul biryi asing kerket ninyi ara yakamwe aryi, “Obnicei,” tenen aryi ato ebmou., kanci molobmomwe to kunuboka molobman. Ba, kan molobmomwe to kunubmar asi asing eibmarim. 22A deyok aryi niryi kansi ebnyi to kunubkwanurum. Ukura roti tokol tentok karebkin asi yibminci, mikib kubkici ba, bindobdum,” ebmou. 23Uca, Saul biryi, “A yina ni kum yibkwan,” ebmou. Uca, er wa irmilin nang ab, a ner ab aryi ersi tataboka bukeibmai. Ato ebmai ba, kekebmou ura, bukoka roti karebmai ba, ai atolonga bukoka yibmou. 24Ba, a ner er bisam lembu winiramwa ukuryok nenmou asi obmou. Ani, roti kiknin keica tepung doboka iniboka, bungbung erande keica dongona kumkum, roti kikniboka, uk dabdeibmou. 25Ura, Saul ab, er wa in nang ab dam deirirbinmou ba, yibmai ura, sun mikib kubmou. Sirya yibmai ura, a lukunda aryok sun atei bindobmai.

Currently Selected:

1Samuel Uram 28: MTG

Highlight

Copy

Compare