1Samuel Uram 27

Er Daud Filistin nang kankan kunmou deyok

27:1-12

1Daud er kanya dam aryi ato teneibmo, “Da kuranyi ani, uki tentok tum ara Saul taruk dam aryi obnicei. Ati, nun mar ordan dam atei Filistin mutuk ni lilim inirorbinkwan. Ba, Saul Israel mutuk ingkiringnanici ababyi kum eibkwanir,” tenebmou. 2Ura, er Daud ab, er milin nang yubwa 600 baryi nang ab anaboka, Gat mutuk weik sienyi Maokh mi si Akhis bisi binmai. 3Ura, Daud ab, er ai ninyi ab sienyi si Akhis bisi Gat mutuk dam sun nermabwe yuk-yuk ab binkuramnyi. Ba, Daud bira er nerabwe bitinyi doamwe, nerabwe ab tonkwa bindoamyi. Ton ner si ara Ahinoam Yizreel mutuk ner doamwe. Ba, ton ner si ara Abigail Karmel ner doamwe. A ner ara Nabal doamwe ner asi youak dakamwe. 4Ura, Saul bisi, “Daud bira Gat mutuk bindobwe,” ebmai ura, ersi kum dombinmou.

5Ura, Daud biryi Akhis bisi ato ebmou, “Kansi yandoka sul bobdongobkise ara ni boukwe ati, mitikto atei nun mutuk lu doramingnyi atei asi da nuknurum. Ba, ni akatei bindoka kuronkwan. Weik atei kan sienyi atei dam a kunun ara unati kunun da? Talyitam a yandoka kunun,” ebmou. 6Ato ebmou ba, Akhis biryi a tum aryok, “Atei si Ziklag bindobdum,” eboka nukmou. Ato eboka nukmou ba, Ziklag atei bindoka kuramwe. Ato kuamwe deyok aryi, Ziklag atei ara Yehuda yala nang weik sien nang atei kibiryi ukubabyi tuba kunung. 7Ba, Daud a Filistin nang mutuk dam kwalina tentok, wala dumbaryi akatei kuamwe.

8Ani, Daud ab, er ab tonkwa a kuramnyi nang ab anaboka Gesur mutuk ninyi ab, Girzi mutuk ninyi ab, Amalek mutuk ninyi ab asi arabdobmai. A arabdobmai mutuk ara Telam mutuk tam kuboka, Syur mutuk aryi kuboka Mesir mutuk sekdongoboka arabdobmai. 9A mutuk ninyi nirya Daud biryi obkiribmou, nerabwe babyi, sal babyi obkiribmou. Ura, kambing ab, domba ab, lembu ab, keledai ab, unta ab, sun ongon aling ab nirya dalubmai. Ura, Daud bira sienyi Akhis dam yanmou. 10Ura, Daud biryi ato tenebmou, “Akhis biryi, ‘A talak ara dan atei mar bobumwe do?’ ebnici ura, ‘Ato ebkwan,’ tenebmou. ‘Yehuda yala nang mutuk Negeb dam ab, Negeb mutuk Yerahmeel yala ninyi atei nang mutuk ab, Negeb mutuk akwe Keni nang atei ab asi, mar boboka ninyi ilinto obse,’ ebkwan,” tenebmou. 11Daud kanya ara, “Ninyi ton takdongobnyi asi, binton Akhis bisi bindoka, ‘Daud biryi ukurur,’ ena ara li,” tenebmouci, sal babyi, nerabwe babyi, nirya obkiribmou. Ninyi kam ton kum kubmai. Daud er Filistin dam kuramwe ara ato teneamuryi, ninyi nirya orkiriramwe. 12Ura, sienyi Akhis biryi Daud bisi, “Er atei Israel nang ara li teneramnyi ba, ni dam tingdoryau. Ati, ni dam kurandiryi iya ni wa inanyi kunkwande,” tenebmou.

Currently Selected:

1Samuel Uram 27: MTG

Highlight

Copy

Compare