1Samuel Uram 26

Er Daud biryi Saul bisi liki bitinyi dinyi, “Saul kum obkwan, ur a kurandur,” ebmou deyok

26:1-25

1Sun Zif nang aryi Gibea dam yanmai ura, Saul bisi ato ebmai, “Daud bira Hakhila kon yini mutuk kubkub asi bindoka kurur,” ebmai. 2Ba, Saul ola anaboka, Israel yin doun nang wiboka, mar ordana bikdob nang akwe yubwa 3.000 baryi wibmou. Ura, yini mutuk Zif dam Daud bisi ingkiringbinmai. 3Binmai ani, yini mutuk si Hakhila kon dam bindoka bisik kubkub u dikum asi ai dobmai. Ba, yini mutuk kubkub akwe Daud a kunmouci, kekenmou uca, Saul aminda domyanmou asi bikmou. 4Ura, er mar ibana dirmeimkiringna nang ati, “Dirmeimbindarur,” ebmou. Ba, dirmeimbinmai uca, Saul dib a mutuk dam sirya yanmoua bikmai. 5Ura, Daud ola anaboka Saul mabmou ai dam binmou. Bindoka diramwe uca, Saul bira er yin doun nang sienyi Abner ab mabmarei asi eibmou. A mabmarei ai ara yuk nang ai dinatam-dinatam dobmai. Ba, Saul bira noutumang dikum ai doboka mabmou. 6Ura, Daud biryi Ahimelekh Het mutuknyi ab, er malner Zeruya mi si Abisai, Yoab er weit ab asi ato ebmou, “Saul mabmar ai dam asi, unanyi ab binkwinim do?” ebmou. Uca, Abisai biryi, “Ni ab binkwanim,” ebmou.

7Ura, a lukunda aryi Daud ab, Abisai ab akai dam yandoka, ai doboka mabmaia dam binmarei. Bindoka dirandei uca, ai dinatam-dinatam dobmaia dam noutam asi, Saul bira ninyi on balang kisok dam ikdeiboka mabmou asi eibmarei. Ba, er atei ninyi ab, Abner er kalingnanyi ab ara dinatam-dinatam mabdanmai. 8Ura, Abisai biryi Daud bisi ato ebmou, “Arub ara Er Imtamnyi biryi kan mar ibkounyi kan taruk dam karebkir. Ati, ‘Ur ebdum,’ a balang aryi liki tentok lukoka kwinibdobkun, liki bitinyi kum lukwaman,” ebmou. 9Uca, Daud biryi Abisai bisi ato ebmou, “Er Iya Erebdobnyi biryi me kisok likeiboka wa kareandinyi bira ton kum oraming ati, ona mem. Ba, ikin dinyi nun dam kum yankwansurur,” ebmou. 10Ani, tubto Daud biryi ato ebmou, “Er Iya Erebdobnyi si deici aryi ebkun ara Er Iya Erebdobnyi biryi aminda ersi obkwande ati niryi kum obkun, dib sirik ebman. Aminda er da kuranci ani, dibkwande kum, ninyi mar ordanmangiryi kum, da obnung. 11Niryi Er Iya Erebdobnyi biryi wiboba sienyi tikeibunyi ona ara malyito ati Er Imtamnyi biryi likibna bukam kimdeirina teleb. Ati, ukuca er ninyi on co balang ab, er me yin moyok ngat tukwe aryi kikniraming moyok, ab kisok dam deiboka mabmar asi doboka yanyi ba, bindobkwanim,” ebmou. 12Ura, Daud biryi Saul er ninyi on co balang ab, er me yin moyok ab er kisok dam deibmoua asi dobdobmou ura, bindobmarei. A ninyi nirya ara Er Iya Erebdobnyi biryi wi sul karebmou. Ba, mablukmai talak mitik ton bukoka eirina kum kubmai aryi kum bikmai. 13Ura, Daud bindobmou ani, era otam mutuk kon tingdorbinmou. 14Ura, yin doun nang ab, Ner mi Abner ab asi ato eboka uram dobmou. “Abner kekenmarim do?” eboka uram dobmou. Uca, Abner biryi ato ebmou. “Kanda unanyi biryi weik sienyi bisi namarim da?” ebmou. 15Uca, Daud biryi Abner bisi ato ebmou, “Kanda sal kuma do? Nun Israel nang kankan ara kantonyi bitoa ton kum kunub. Kan sienyi diboka kum kalikdobmarim darib? Ninyi ton kan ai dam a yandoka kan nai sienyi oryanmang cok, ‘Li,’ tenen takmaking ara bikmarim do? 16Kan nai sienyi diboka kum kalikdobmarim ara malyito kubmarim. Er Iya Erebdobnyi si aryi ebkwinkin ara kan nai sienyi bisi Er Iya Erebdobnyi biryi me kisok likeibunyi diboka kum kalikdobmarim. A deyok aryi kanda obkabman cok taklobmakinga. Kan sienyi Er ninyi on co balang ab, er me yin moyok ab ukura dan kubmar tenebmarim do?” ebmou.

17Uca, Er Saul bira Daud uram bingnamwe deyok aryi ato ebmou, “A mi, Daud kan uram do?” ebmou. Uca, Daud biryi, “Yo, nai sienyi, ni Daud bitiba,” ebmou. 18Ton, ato ebmou, “Kanda unati nisi domkiringnurum do? Niryi kansi una kubkise ati domkiringnurum do? Niryi kansi yu ton kum bobkise. 19Niryi kansi yu kum bokunun deyok aryi ni uram a enmana kekebnurum. Er Iya Erebdobnyi biryi arukankici ba, ni domkiringnaniminyi ura, teleb aryi ni oboka uk dabmaniminya siltong ara Er Iya Erebdobnyi siltong yumna teleb. Ucab, Er Imtamnyi biryi mundu kum loankiriryi, ninyi sirik aryi arukankingnyi ura, Er Imtamnyi biryi subkwande. A deyok aryi nisi, ‘Er Imtamnyi molona takloboka, yuk kwemdeina molorbirum,’ eboka yakdonoknei,” ebmou. 20“Akiryi ni ining Er Iya Erebdobnyi urasin dam ining sakmaninto bok, talyi tukwe dam saknicei. Ara, sienyi anaboka domkiringnurum. Ara, ato ati ebman, sun Israel nang sienyi kanci, nisi domkiringnurum ara bai maka lei ati, mutuk konkon domkiringdaming to kunurum ati ebman,” ebmou.

21Uca, Saul biryi ato ebmou. “A mi Daud, kansi malyito kukunun ati, ur tamuboka yarum. Niryi aminda kansi yu kum bobkwankin. Arub ara nira kan taruk dam sirya dibman bok, lobdeibmanirim ati ebman. Iya dib sirik niryi lubanyi kuna kukunun, ati, ni kanya iya malyi kanya bobse,” ebmou. 22Uca, Daud biryi ato ebmou, “Nai sienyi, kan ninyi on co balang a doubmakin dibderum. Ninyi ton arukminyi ba, doryarur! 23Er Iya Erebdobnyi biryi teleb dinyi babyi, iya busul dinyi babyi, tanglona kum uca ninyi nirya dekeibkwande. Ara, ato ati ebman. Arub ara kan weik sienyi bira Er Iya Erebdobnyi biryi ni taruk dam karebmanou. Bok, Er Iya Erebdobnyi biryi me kisok likeiboka kisal dakandinyi bira talerdena mem deyok aryi takmakin. 24Ani, dib sirik aryi ebkun. Arub tum ara kan kam kuna ara ni urasin dam bikdob dinyi kibmar ba, kum obmakin. Ato akwe ni nong ababyi Iya Erebdobnyi urasin dam bikdob dinyi kurur. A deyok aryi ni mambul donun dinyi ababyi Er Imtamnyi biryi lemdeinurur,” ebmou. 25Ato ebmou ba, Saul biryi Daud bisi ato ebmou, “Ni mi Daud, Er Imtamnyi biryi kisal dangkina teleb. Utotoa-utotoa wa ibminyi ara kan tenebminyi to akwe kununkwankir,” ebmou.

Ura, Daud er banmou mutuk bindobmou. Ba, Saul bibabyi er atei bindobmou.

Currently Selected:

1Samuel Uram 26: MTG

Highlight

Copy

Compare