1Samuel Uram 25

Er Samuel dibmou deyok

25:1

1Er Samuel dibmou ba, sun Israel nang nirya buluboka engeramnyi ani, er mining ai umbura mutuk si Rama dam tukwe dongobmai. Ba, Daud bira anaboka, yini mutuk si Paran dam bindobmou.

Daud ab, Nabal ab, Abigail ab deyok

25:2-44

2A talak ara sal tentok il weik wa nun Maon dam iramwe. Anyi bira bona ilinto boramunyi kuramwe. Anyi er bisam domba yubwa 3.000 baryi winiramwe. Ani, kambing yubwa 1.000 baryi winiramwe. Ura, uki tentok tum aryi atei si Karmel dam er bisam domba otong kombinmou. 3Anyi si ara Nabal. Ba, er ner si ara Abigail. Er ner ara bukdob bingna dinyi bikdob ner nun kuramwe. Ani, er urasin ababyi urasin telebto ner nun kuramwe. Ucab, er akenyi bira yarib ilintonyi nun kuramwe. Ani, yu ababyi tingting ilintonyi nun kuramwe. Anyi bira Kaleb deibdobanyi kuramwe. 4Er Daud yini mutuk aryi kekenmou uca, “Nabal er bisam domba otong komar,” ena kekebmou. 5Kekebmou ura, Daud biryi ninyi takubaryi bokdonokoka ato ebdeibmou, “Sun Nabal bisi Karmel dam bimunyi ura, ‘Daud biryi, “Teleb!” ebmasir,’ ebkwandarur. 6Tonda, ‘ “Kan ab, sun ai ninyi nirya ab, yina bulung asa ton kum kubkwandum. Ani, u yisina kum kubkwansir. Eda, iya teleb akwe kunkwandum!” ebmasir,’ ebkwandarur. 7‘Ani, ukuryok a talak aryi, “Domba otong kungmar,” ena kekebman. Kan bisam winin nang ara ni ab tonkwa kunmab nang aryi kansi ebebengna kum kubkwamakib. Ani, nunci sun dinyi asi Karmel dam aryi ton kum wanikwamasib. 8Ura, kan milin nang asi asibderum. A ebman to akwe ebkwamang. Ati, a nang asi boukwe kibdum sun yanganmang ara weik li aryi yanganmang. Ati, nun a yanmab nang ab, kan mi Daud babyi asi kan dam a kuabci dinyi ton karebsurum,’ ebkwandarur,” ebmou.

9Ura, er Daud biryi a bokdonokmou nang aryi, er ebmou to nirya Nabal bisi bindoka ebmai. Ura, er uram tamurdeirina kekebde tikmai. 10Uca, Nabal biryi ato ebmou, “Daud bira unanyi do?” ebmou. Ani, “Isai mi ara una Isai do? Anyi bira ni kum bingnun. A mutuk dam, uku talak ara sun taleboka kuramingnyi nang takloboka baronung ara ilinto ati ebman. 11Ni bisam otong kungmaning nang ati, roti ab, me ab, domba obdeibmana ab asi, ni kum bingsunun nang yanmarum asi karebsitinyi do? Da kum karebsunun,” ebmou.

12Ura, Daud a bokdonokmou nang tamuboka Daud bisi binmai. Ura, “Ato ebsiriba, yandobib,” ebmai. 13Ba, Daud biryi er atei nang a erbinmai nang asi ato ebmou, “Ninyi on ya yuk-yuk dourondarur!” ebmou. Ba, sun ya yuk-yuk doubdobmai. Ani, Daud bibabyi ninyi on ya doubdobmou. Ura, ninyi yubwa 400 baryi Daud milibmai. Ba, yubwa 200 baryi nang ara sun bona-bona atei deibmaia kalikmai.

14A talak ara Nabal er wa irmilinanyi tentok aryi Nabal ner Abigail bisi ato ebmou, “Nong kanda, yini mutuk dam aryi Daud biryi nun nai Nabal bisi ninyi ton bokdonokmo. Bokdonokmoci, ‘Teleb ebmakin,’ ebdeibmo ba, eryanmongwe. Uca, nun nai Nabal biryi a nang asi erekoka kerenmou ba, binmang ati bikandum. 15A yanmongwe nang ara nunsi osin nang kum yanmongwe. Eda, a mutuk dam kunub ara nunsi kalingdosunung ba, a mutuk teleb asa kunub. Ani, sun dam a kunmabya ababyi ton kum osunung. Ani, nun dinyi ton da kum waningnub ara sun kalingsunung aryi teleb asa kunub. Ani, nun wa dam kunmabya ababyi ton kum osunung. 16A nang aryi weik lika dobninto kubsici, kitingtam lukunda nirya kalingsunung. Ba, nunda sun dam asi bisam domba kalikde kunub. 17Ato kusunung bok, nun nai Nabal biryi kerenmou ba, binmongwe. Ati, kan kubkwindim obnun asi kanya teneirongdum. Nun nai ab nun ai ninyi nirya tamuboka yandoka obsingnyei ati, ebman. Nabal bira er kisok kat ati, yuk nang aryi, ‘Ato uram ebdum,’ kum erkarenung ati ebman,” ebmou.

18Ura, a ner Abigail bira ola nun roti tokol yubwa 200 baryi ab, anggur me kin aling bitinyi ab, domba alya amubaryi ab, gandum kitin amubaryi ab, anggur du alakeiboka kikniraming kue ab kwarang aryi kiknin kue yubwa 100 baryi ab kiboka bisam keledai deici deibdongobmou. 19Ura, er akenyi kum bikmou talak aryi, a ner Abigail er ai wa in nang asi, “Sun minob menekoka banmandarur! Ba, ni aminda yangankwaman ati,” ebmou.

20Ura, a ner bisam keledai deici bukoka mutuk lingkwa baribdoro binmou. Ani, bindoka diramwe uca, Daud ab, er milin nang ab a ner er banmou bisik yanganmai asi ebwanwanubdanmai. 21Minob kum anabmai talak aryi Daud biryi ato ebmou, “Talyi il donun, Nabal er dinyi-er dinyi nirya a mutuk dam kalingnun aryi utotoa ton waningdena ton kum kurur. Niryi ersi telebto kurdeirinun bok, yu kanya bobmanir ara unati do? 22Nabal ai ninyi nirya asi kum obmaniryi, uki dakbisibci ura, Imtamnyi biryi nisi da obnurur,” ebmou.

23Abigail bira Daud sirya asing eibmou ura, bisam keledai deici bukmoua aryi minob sakweteboka, er kutam ikdongobmouci, kisok luknuboka kibdobmou. 24A ner er kisok luknubdongobmou ura, ato ebmou, “Nabal biryi yu kuboka kan ninyi bokeibmom nang asi kerebmo deyok ara nisi da kubkwinirim to nun ababyi teleb. Ani, uki ton kareabnurum ba, ni uram ebkun asi kekerum. 25Nai, kanci Nabal biti, ‘Uram ton a ebmanir,’ tenen teneina mem. Er si Nabal eboka si dobyi ara lub kanya bobdobnyi biti, mininga, er si ababyi, ‘Nabal,’ enung. A tum ara kan ninyi bokdonokmomwa ni kum bikmase. 26A deyok aryi, niryi Er Iya Erebdobnyi si deici aryi, ebkun: Ara, Er Iya Erebdobnyi biryi Nabal bisi obmar to kuboka, kan mar ikunung nang asi obkwande. Ati, kanci kan yu bokunung nang asi, ‘Obminyei,’ tenen lebdeibmakir. Ati, niryi nai kansi, luknubdongoboka molobmakin. 27A deyok aryi ni kan nebnyi kanti a boyanganman roti ara kan milibmaking nang ati karebdum. 28Ni Kanci ebdeibmoumwe to kum kunubmou ati libnurum. Nai kanci, a kubde baruma nirya ara talyi yu asa aryi ninyi kum orum. Eda, Iya Erebdobnyi bisi miliboka mar borum ati ebman. Akiryi kan ab, kan deibdoba ab aryi sien nang kiboka Israel nang talebkwandum. 29Unanyi biryi nai kansi, ‘Obkun,’ tenen ukunmote ababyi Er Iya Erebdobnyi biryi suwa libdobkwankurura. Ucab kan mar ordan nang ara Er Iya Erebdobnyi biryi tabwe youbkwandur. 30Er Iya Erebdobnyi biryi Er tenerur to, kan dam erdeikurur to kuboka kansi Israel sienyi kibkwandim. 31Kansi yu kuranking nang asi sunbabyi, ‘Dekeibtinyi,’ tenen kanya bona mem. Ara, kanci, ‘Malyi dinyi kununa mem,’ erum ati ebman. Aminda aryi Iya Erebdobnyi biryi wa karebkici ba, sienyi kibminyi ababyi ni takniminyei,” ebmou.

32Uca, Daud biryi Abigail bisi ato ebmou, “Nun Israel nang nun Nai, Er Iya Erebdobnyi biryi bokdonokmakir ba, arub ni ab ebdanmanim. Ati, niryi Er Iya Erebdobnyi bisi kibdobman. 33Ani, kan etekdob ner kurum ati, ‘Teleb,’ ebmakin. Tonda kanci ni yu uram ebmanunyi bisi, ‘Obkwan,’ tenen banmonwe asi seksinibmanirim ati, ‘Teleb,’ ebmakin. 34Ucab, Israel nang molonubnyi Kam kururnyi biryi kansi lebdobkir. Kansi minob kum yanabtum ura, kiting kum tingyanabte talak aryok, Nabal dam sal tentok ababyi kam ton kum kuabting,” ebmou. 35Ura, Daud biryi a ner bobmou yina dobdobmou ura, ato ebmou. “Ur teleb aryi kan atei bindobdum. Kan kanya mambul kukina mem. Kan molobmarim to aminda kunubkwankin,” ebmou.

36A ner Abigail banmou ani, atei bindoka diramwe uca, Nabal er ai umbura luba talen me yin li dobmouci, luba talen me weik sien nang yiraming to kuboka yinmai. Nabal bira luba talebmou aryi karyi asa kunmou akiryi er ner aryi nira ukubman ena kum kubmou tok asi kiting urukmou. 37Ba, a tum belekuna ara Nabal er luba talebmoua kum danardongou ura, er ner aryi er akenyi Nabal bisi nukarebmou. A nungkarerdongou akiryok dukduk sekwetebmouci, nong lulungna kum kubmou. 38Ura, uki takubaryi kunmou ani, Er Iya Erebdobnyi biryi Nabal bisi kulaboka obmou ba, dibmou.

39Er Daud kekenmou uca, “Nabal sirya dibmar,” ebmaia kekebmou. Ura, ato ebmou, “Ni nai Er Iya Erebdobnyi, nisi malyi kianunyi bisi dibde. Niryi anyi bisi ona ara malyito kubtinyei. Eda, Kanci obdima ara teleb. Nabal er mining yu aryi Kan Iya Erebdobnyi biryi tamubdeibdim ba, er mining damnyi kisok tolobdar ara teleb,” eboka mundu lobmou. Ura, Daud biryi, “Abigail inirbinindarur,” eboka bokdonokmou ba, dobkwamwe ati inirbinmai.

40Er Daud wa irmilin nang Karmel dam Abigail bisi yanmaici ato ebmai. “Nunda Daud biryi, ‘Abigail bisi inirbindarur. Ba, ni dobdobkwan,’ ebmar ati iniryanmakib,” ebmai. 41Ba, a ner tikokmou ura, kisok luknubdongoboka, “Ni nai yabwe,” eboka kibdobmou. Ura, ato ebmou, “Teleb, Ni Daud er wa irmilin nang sun yan me ilingna ner kibkwan,”#25:41 A ner Abigail biryi, “Ni teleb aryi Daud er wa irmilin ner kibkwan,” ebmou. Ato ebmou ara Ni Daud dobnici ba, er ner kibkwan ara ni teleb ebmouci, ato ebmou. ebmou. 42Ura, Abigail ola anabdobmou ura, bisam keledai deici bukoka binmou. Ba, er milin nerabwe amubaryi ersi milibmai. Ura, Daud bokdonokmou ninyi milibmai ba, tonkwa binmai ani, Daud dam binmai ura, Abigail Daud dobmou.

43Ani, Daud bikwe Ahinoam Yizreel mutuk ner ton minob doamwe. Ura, a nerabwe bintinibmou. 44Ucab, ton Saul biryi er nebnyi si Mikhal Daud minob doamwe asi doboka Lais mi si Palti Galim mutuknyi biti doboka karebmou.

Currently Selected:

1Samuel Uram 25: MTG

Highlight

Copy

Compare