1Samuel Uram 24

Daud biryi, “Saul kum obkwan ati, ur a kurandur,” ebmou deyok

24:1-23

1Daud a mutuk akiryi kuboka, En-Gedi mutuk kon dam bai asi keil siling umbura kuroramwe. 2Ura, Saul bira Filistin nang asi mar ibinmou ani, atei yanmou ura, Saul bisi ato ebmai, “Daud bira yini mutuk En-Gedi dam kurur,” ebmai. 3Ura, Saul biryi Israel yin doun nang winmou ani, ninyi dubsi aci tenen nang akwe yubwa 3.000 baryi wibmouci, Daud ab er milin nang ab asi mutuk si, “Bai Bisam Kambing Kon,” ingkirikde binmai. 4Ani, bisik dam domba ai doramnyi ai dam binmai. A dikum ara keil siling um ton akamwe. A keil siling um asi Saul bira, “Deibar binkwan,” tenen wengbinmou. Uca, Daud ab, er milin nang ab ara dinatam kalimna a bukmai bok, wengbinmou. 5Ura, Daud er milin nang aryi ato ebmai, “Ukura, Er lya Erebdobnyi biryi kansi, ‘Niryi kan mar ordananyi kan taruk dam aminda karebkwankin,’ eankou tum sirya arub berekde. Ati, kanci, ‘Ukubkun,’ tenebminyi to ur kunubdum,” ebmai. Ura, Daud minob bukalabkaboka, nimalyi kebum eboka, er Saul alib ongon aling kubkub asi kwilikdobmou. 6Er Daud kanya dukduk eramwe bok, Saul ongon aling kubkub asi Daud biryi sekdobmou. 7Ura, er milin nang asi ato ebmou, “Niryi anyi bisi oboka malyito dinyi kunubmanto bok, Er Iya Erebdobnyi biryi nisi lebdeibmanir ba, ersi kum obman. Er Iya Erebdobnyi biryi me kisok likeiandinyi bira ona kum kubkwanub. Eda, talerlilirdena demang taleblilibdenkwanub. Ara, anyi bira Er Iya Erebdobnyi biryi me kisok likeibunyi bica ati, niryi malyi dinyi da kum kubdenkwaman,” ebmou. 8Ura, er Daud biryi er milin nang asi, “Saul obingnyei,” tenen ato eboka uram sekmou.

Ato kubmou ura, Saul a keil siling um aryi anaboka tingbinmou ura, bindobmai.

9Ura, Daud bibabyi a keil siling um aryok anaboka lak tingbinmou. Ura, Saul bisi aminda tam aryi uram dobmou. “Nai, sienyi,” ebmou. Ba, Saul tamuboka diramwe uca, Daud oyandoka kisok tukwe luknubdongoboka, kutam tukwe ikeiboka kibdobmou. 10Ura, Daud biryi Saul bisi ato ebmou, “Kanda unati yuk nang aryi, ‘Daud mar moun yikurur,’ ekunung do? 11Nira, kansi tulum ton kum bobkise. Tulum borankitinyi ura, kansi arub keil siling umbura aryi, Er Iya Erebdobnyi biryi ni taruk dam sirya karebmanir bok, kum obmakin asi bikwandum. Ani, yuk nang ara, ‘Ur obkub,’ enmaking bok, ‘Ni boukwe ati, Er Iya Erebdobnyi biryi me kisok likeiboka tikeibunyi bica,’ tenen aryi, ‘Anyi kum obkwayeb,’ ebmakin ba, takmakib! 12Nai, kan ongon aling kubkub sekoka a doubdobmakin asi dibderum! Kansi ni taruk aryi kum obmakinci kan ongon aling asi sekoka doubdobmakin ara bikwandum. Niryi kansi yu boboka, kansi malyi dinyi kum bordongokunun. Kanda nisi yu boboka, ‘Obtinyi,’ tenen domkiringnurum ucab, nira kum okunun. 13Nibabyi, kanbabyi ara Er Iya Erebdobnyi biryi nun kuranimnyi dinyi lilibkwansir. Ucab, ni taruk aryi kansi ton kum obkwamakin. 14Nun nai yabwe wisi nang aryi kebdeiboka ato enung, ‘Malyi dinyi kunuraming nang ara malyi dinyi akwe kunuraming,’ enung to nibabyi malyi dinyi ton kum kunun deyok aryi ni taruk aryi kansi da kum obkunun. 15Kan Israel nang weik sienyi bira unanyi biti mar iyanmarim do? Ani, kanda unanyi biti domyanmarim do? Nira dibdob kam kibdeibmanirim do? Ani, nira amnyi atoa kunun ati, domkiringnurum do? 16Ati, Er Iya Erebdobnyi biryi ni ab, kan ab deyok lilibkwansir. Er Imtamnyi biryi nisi lemdeinurur ba, kanci nisi ona kum kubnoumwe. Ara, Erci, teneboka kubdeiboksou uca, ni kum obnoumwe asi bikwandum,” ebmou.

17Er Daud ato enmou ani, sirya ebmou ura, Saul biryi ato ebmou, “A mi, Daud kan uram do?” ebmou. Ura, Saul uram doboka engebmou. 18Ura, Daud bisi ato ebmou, “Kanda nisi, ‘Obtinyi,’ kum tenenurum ara telebto kurum. Ucab nira kansi, ‘Obtinyi,’ tenekunun ati, malyito dinyi kunun. 19Niryi kansi arub aryi lak ebkun ara nisi kanci teleb-teleb kunurum. Er Iya Erebdobnyi biryi kansi, ‘Obdur,’ tenen bokarerbinmanou bok, kum obmanirim. 20Sun mar ordan ninyi, sun dam sibura yukmangnyi bok asi, ona kum uca, ton tanglonung do? Arub aryi lobdeibnirim ba, baron ati, Er Iya Erebdobnyi biryi kansi dekwankir. 21A deyok aryi dib sirik, kanci Israel nang weik sienyi kibminci, talebkwandim ara lulungna kum uca sasibkwande. 22Ati, kanci Er Iya Erebdobnyi si deici aryi ni ai ninyi ab, ni deibdoba mabwe ab asi, ‘Kum obkiribkwan,’ ebdum,” ebmou. 23Ba, Daud biryi dib en uram aryi Saul bisi ato ebmou, “Saul yala aminda oboka kum danardeirina kum kubkwan,” ebmou. Ura, Saul bira atei bindobmou. Ba, Daud ab, er milin nang ab ababyi, keil siling um sun kuramnyi ai tubto wengdorbinmai.

Currently Selected:

1Samuel Uram 24: MTG

Highlight

Copy

Compare