1Samuel Uram 23

Er Daud biryi Kehila ninyi asi mar boboka lebdeibmou deyok

23:1-13

1Er Daud bisi ato ebmai, “Filistin nang aryi Kehila atei mar bobmangci, gandum yabla yalyi kwebkwamunguryi, sekoka deiriramungwa nirya arabdobmang ati bikandum,” ebmai. 2Ura, Daud biryi Er Iya Erebdobnyi bisi ato eboka asibmou, “Nai Iya Erebdobnyi, niryi Filistin nang asi ur orbinkwan do?” eboka asibmou. Uca, Er Iya Erebdobnyi biryi Daud bisi ato ebmou, “Sun Filistin nang asi ur obkaboka, Kehila ninyi asi ur lemdeirirbirum!” ebmou. 3Uca, Daud milibmai nang aryi ato ebmai, “Yehuda mutuk a kunmab ababyi ilil kunmasir ati, Kehila dam bindoka Filistin nang ab ordanmabyi ura, wanok ilil kubkwansir ton a bikamibiryok?” ebmai. 4Ura, Daud biryi Er Imtamnyi bisi tubto asibdenmou ba, Er Iya Erebdobnyi biryi ato ebmou, “Ur anaboka Kehila dam Filistin nang asi mar ibirum. Niryi kansi Filistin nang kan taruk dam karebkinyi ba, Filistin nang obkiribkwamarim,” ebmou. 5Ura, Daud ab, er tam nang ab anaboka Kehila dam Filistin nang asi mar ibinmai. Ura, Daud biryi Filistin nang obukokaburyi, sun bisam yabwe nirya daluboka bobde yandobmai. Ukuboka Kehila ninyi asi Daud biryi lebdeibmou.

6Ura, ninyi si Ahimelekh mi Abyatar bira efod aling doubmou tok, cukoka minob Kehila dam Daud bisi binmou.

7Uca, Saul bisi, “Daud Kehila dam yandoka kunmar,” en uram ebmai ba, kekebmou. Ura, ato ebmou, “Er Imtamnyi biryi niti karebnir, lika doboka, bublan tirikdob atei umbura erbiramnyi bokarerdaryanmar, tamuboka kum binkwamar,” ebmou. 8Ura, er Saul biryi er atei yin doun nang nirya nabmou. Ba, yanmai ura, Kehila atei ninyi ab, Daud ab asi mar ibinmai.

9Ba, Daud kekenmou uca, Saul biryi ersi, “Obkwan,” ebmou. Ura, Er Imtamnyi biti ninyi dama deirin ai wa inanyi imam si Abyatar bisi ato ebmou, “Imtamnyi ai wa in nang ongoraming aling si efod nisi karebnurum,” ebmou. 10Ura, Daud biryi Er Iya Erebdobnyi bisi ato ebmou, “Nai Israel nang Nun Nai, Imtam kurumnyi, Ni deyok ati, Saul biryi Kehila ninyi obkiribkwamararyi mar moun yinmar asi kekebman. 11-12Ati, Saul biryi nisi iyanganmanir ara dib do?” ebmou. Uca, Er Iya Erebdobnyi biryi, “Dib iyankwamakir,” ebmou. Ani, Daud biryi tubto asibmou, “Ni tam ninyi ab, ni ab asi Kehila ninyi aryi Saul taruk dam dobkarebkwamasing do?” ebmou. Uca, Iya Erebdobnyi biryi, “Yo, Saul taruk dam dobkarebkwamasing,” ebmou. 13Ura, Daud ab, er atei ninyi yubwa 600 baryi ab anabmai. Ara, Kehila aryi yuk mutuk binmai. Er Saul bisi, “Daud Kehila dam kum kunmar,” ebmai ba, Saul Kehila atei mar ibana kum kubmou.

Er Daud yini mutuk si Zif dam kunmou deyok

23:14-28

14Ura, Daud yini mutuk bindoka keil siling umbura dam kuroramwe. A mutuk si ara Zif dam kuroramwe ba, Saul ingkiringnamwe. Ara, Er Imtamnyi biryi, “Saul eiboka obcei,” tenen Daud bisi inibdeibokamwe ba, yini mutuk kuroramwe.

15Ba, Saul biryi, “Daud obkwan,” tenen ingkiringnamwe deyok aryi Daud er ilil kuramwe. Er Daud yini mutuk si Zif dam mutuk si Koresa dam kuramwe. 16A kuramwe talak ara Saul mi Yonatan bira Koresa dam Daud bisi yanmou. Ura, Daud bisi Er Iya Erebdobnyi bisi, “Dib,” tenen dinyi sasibdeibmouci, ato ebmou. 17“Kan ilil kuna mem. Ni nai Saul biryi kansi kum obkwamakir. Eda, kansi Israel nang sun weik sienyi kibkwandim. Ba, kan amwetam bunanyi bira ni kibkwan. A deyok ara Saul sirya bikwe,” ebmou. 18Ura, Yonatan ab, Daud ab Iya Erebdobnyi urasin dan aryi, “Ukubkwanim,” ebdanmarei. Ura, Daud bira Koresa dam a kuramwe. Ba, Yonatan bira er atei bindobmou.

19Ba, Zif nang mikbaryi kuboka Saul bisi Gibea dam erbinmaici, ato ebmai, “Daud bira nun kunub mutuk kon Koresa dam keil siling umbura bindoka kurorur. A mutuk kon si ara Hakhila kon me youkwetam kuboka mutuk lu asi bindoka kurur. 20Ati, nai weik sienyi, ‘Daud talebdobkwan,’ tenebminyi ura, nun dam ur yarum! Yaminyi ura, nunci ersi kan taruk dam karebkwamakib,” ebmai. 21Uca, Saul biryi ato ebmou, “Nisi boukwe kibmanurum ati, Er Iya Erebdobnyi biryi sunsi kisal dakwansir. 22Ukura ur Daud bisi ingkiringbindarur. Ara, dib a mutuk kurur do? Ani, unanyi biryi er asing eibwe do? Er Daud bira etekdob weik aryi kwemdeirongnandanyi enunga bingnun ati ebman. 23Er bindoka inibdanci dikum nirya liliboka ingkirikwandarur. Ingkiringmamunyi ani, eibmunyi ura, nisi eryankwanindarur. Ba, ni ab, sun ab tonkwa binkwayeb. Yehuda mutuk tukwe kalimna kuranci ura, a mutuk ninyi kunung yubwa nirya libokabniryi, ingkirikoka taleboka obkwan,” ebmou. 24A ebmou uram kekebmai ura, mutuk Zif dam sun minob binmai. Ba, Daud ab, er milin nang ab ara yini mutuk si Maon dam mutuk lu, me youkwetam kunmai.

25Ura, Saul ab, er yin doun nang ab ingkiringyanganmai ura, Daud bisi, “Saul ingkiringyanganmakir,” ebmai. Ba, Daud bira anaboka keil sin diniboka yini mutuk si Maon dam bindoka kuronmou. Uca, Saul kekebmou ura, Maon mutuk ingkirikde binmou. 26Uca, Daud ab, er milin nang ab ara mutuk kon otam kalimna kibdobmai. Ba, Saul ab, er yin doun nang ab ara atam kalimna kibdobmai. Ba, Daud ab er milin nang ab asi, Saul ab er milin nang ab aryi Daud bisi iyanmai. Ba, Daud ab er milin nang ab ola cukoka bindobmai. 27Uca, er uram borkiringna nang Saul dam yanmaici, ato ebmai, “Nun Israel nang asi Filistin nang aryi atei tam ou oryangasing ati, weik sienyi, kanda tamuboka minola atei birum,” ebmai. 28Ato ebmai ba, Saul bira Daud bisi dombanmoua takloboka tamubmouci, Filistin nang asi ibinmou. A deyok aryi a mutuk si ara ukubabyi, “Lemdaron Mutuk Keil Kon,” enung.

Currently Selected:

1Samuel Uram 23: MTG

Highlight

Copy

Compare