1Samuel Uram 22

Er Daud bira Adulam keil siling umbura kunmou deyok

22:1-5

1Ura, Daud cukoka Adulam atei dam keil siling umbura dam bindobmou. Ba, er du yabwe ab, er ai ninyi nirya ab kekenmai uca, “Daud bira Adulam keil siling umbura wekdoburyi, kurorur,” ena kekebmai. Ura, Daud bisi dirbinmai. 2Ba, mambul kanya bon nang bon nang ab, yuk nang dinyi dengdeirina kum ati, “Obtibyi,” tenen domkiringnamnyi nang ab, sun kanya sulbalyi kuboka, see tenen kanya boramnyi nang ab, a keil siling umbura ebdandoka bulubdobmaici, wekdobmai. Ura, Daud bira a nang sun kisok bonanyi kibmai. A ninyi yubwa ara 400 baryi dikum kuramnyi.

3Ani, Daud a keil siling umbura dam aryi kuboka Moab mutuk si Mizpa dam binmou. Ura, Moab sienyi bisi bindoka ato eboka molobmou, “Nai sienyi, ni nai ab, ni kwin ab ara kansi kamdeiryankwan. Ba, kan ab tonkwa kuroramunyi ba, Ni Nai Imtamnyi biryi nisi da kubdeibnici to nun akwe ara aminda iniryankwan,” ebmou. 4Ba, Moab sienyi biryi teleb ebmou ura, er nai ab, er kwin ab iniboka Moab sienyi bisi kamdeirbinmou. Ba, er kwin ab, er nai ab ara Moab sienyi ab kuroramnyi. A kuroramnyi talak ara Daud bira mutuk kon dam ai dobde kuramwe.

5Uca, Er Imtamnyi uram ermurunanyi nabi si Gad biryi Daud bisi ato ebmou, “Kan a mutuk kon dam ai dobde kuna mem. Eda, Yehuda yala nang mutuk asi birum,” ebmou. Ba, Daud anaboka bai mutuk si Keret dam binmou.

Nob dam aryi Er Imtamnyi ai wa in nang asi obukmai deyok

22:6-23

6Er Saul kekeramwe uca, Daud ab, er ab tonkwa miliboka yibaramnyi nang ab bindoka kuramnyi mutuk sirya bikmou. A talak ara Saul bira Gibea dam mutuk kon dam co si tamariska deyok dam ninyi on co balang douboka bukmou. Ba, er dam wa in nang ara er bukmoua dam a tikmai. 7Ura, er wa in nang, er dam tikmai nang asi ato ebmou. “Benyamin yala nang se, kekendarur! Daud Yehuda yalanya Isai mi biryi sunsi er mutuk ab, anggur wa ab eterebkwansir do? Ani, erci sunsi mar ibana nang yubwa 1.000 baryi nang ab, 100 baryi nang ab bomenengban nang kibdeibkwansir do? Ato tenen kum! 8Ton sangkuna sunda nisi, ‘Obkwayeb,’ tenen uram sisikdobdauci, Ni mi Yonatan bira Daud tam kibdobwe dinyi lak kum ebnindau do? Sun ni tam nang ara ninyi tentok ababyi nisi boukwe kiboka ni tam ton kimdona kum kibnindau. A talak ara ni mining mi aryi Daud tam kibdoburyi, ni obkwanir ati, bisik ingkiringdur ara teneibdendarur!” ebmou.

9Uca, ninyi si Doeg Edom yalanyi Saul er wa in nang kankan dam a tikmou aryi ato ebmou, “Isai mi Daud bira, Ahitub mi Ahimelekh bisi Nob atei dam yanmo asi ni asing eibmonwe,” ebmou. 10Ura, Ahimelekh biryi Daud a yanmou deyok ati, Iya Erebdobnyi bisi, “Daud bira una kubdobkwamote do? eboka molobmou. Ani, erci yina roti kwaning ab, er oamunyi Filistinyi Goliat douramwe ya ab karebmou asi asing eibmase,” ebmou. 11Ura, weik sienyi biryi, “Ahitub mi Ahimelekh bisi Nob dam inirbindarur,” ebmou. Ba, Er Imtamnyi ai wa inanyi imam Ahimelekh ab, er ai ninyi ab, Nob atei kuramnyi imam nang nirya weik sienyi dam iniboka boyanmai.

12Ura, Saul biryi ato ebmou, “Ahitub mi Ahimelekh kekerum!” ebmou. Ba, Ahimelekh biryi, “Yo, nai kekenman,” ebmou. 13Ura, Saul biryi ato eboka asibmou, “Kanci, Isai mi Daud biti roti ab, ninyi on ya ab karebmarimci, Er Iya Erebdobnyi biti asibdemwe ara wa tonkwa ibmarurum ara unati do?” ebmou. 14Uca, Ahimelekh biryi ato ebmou, “Ato ebmarim bok, kan wa in nang kankan aryi unanyi bisi kan kanyi deiboka, Daud bitonyi kurur do? Ucab, Daud bira kan ka kobdoba kurur kan nebnyi er akenyi bica. Kan nong kalingna nang sienyi kibdeibumwe atiba. Ani, kan ai dam kunung ninyi nirya aryi ersi si ererdeirindarurnyi bica ati, ni talyi asinmanirim. 15Niryi Er Iya Erebdobnyi biti asibmonwe ara a kelemna kum asibdenmonwe, eda minob ukubde asinun to asibmonwe. Nai sienyi, ni ai ninyi nirya talyi wenenmasirim. Ni anda deyok weik deyok-mitik deyok ni kum bikman,” ebmou.

16Uca, weik sienyi biryi ato ebmou, “Kan ab, kan ai ninyi ab nirya obkwinsin,” ebmou. 17Ura, er dam tikmai yin doun nang asi, Daud er lilim inirorbanmoa asing eiboka minob nisi kum ebde yanmanungwe. Eda, Daud tam milibmongwe ati, “Er Iya Erebdobnyi ai wa in nang imam nang a taleboka ondarur!” ebmou. Uca, er Saul wa in nang taruk lakoka, Imtamnyi ai wa in nang asi on kanya kum kubmou. 18Ura, sienyi Saul biryi Doeg Edomnyi bisi, “Kanci obdum,” ebmou. Ba, Doeg biryi Er Imtamnyi ai wa in nang nirya ya sekbukmou. A tum aryi Er Imtamnyi ai wa in nang lenan aling tabwe aryi efod aling wiamnyi ba, ongoramnyi nang yubwa 85 baryi obmou. 19Ani, weik sienyi Saul biryi Iya Erebdobnyi ai wa in nang atei si Nob atei ninyi nirya nerabwe babyi, sal babyi, mabwe babyi, alok mabwe babyi, bisam lembu babyi, domba babyi nirya ninyi on ya aryi obsekmou.

20Ucab, Ahimelekh mi si Abyatar bisi kum obmou. Ba, cukoka Daud bisi bindobmou. 21Ura, Abyatar biryi Daud bisi ato ebmou, “Sienyi Saul biryi Er Iya Erebdobnyi ai wa in nang nirya ab ni ai ninyi ab obkiribde,” ebmou. 22Ba, Daud biryi Abyatar bisi ato ebmou. “A yanmase tum ara Edomnyi Doeg a kekenmou aryi sienyi Saul bisi eterebwe sirya bikman. Ni deyok aryi kan ai ninyi nirya obsekmar. 23Ati, ni ab tonkwa kuronkwanim. Ati, kan ilil kukina mem. Kansi obwamakirinyi bira ni obningnyi akwa ara kanbabyi obkwanking. Ati, ni ab mangkau asa kuronkwanim,” ebmou.

Currently Selected:

1Samuel Uram 22: MTG

Highlight

Copy

Compare