1Samuel Uram 21

Er Daud bira bai bukoka atei si Nob dam bindobmou deyok

21:1-9

1Ura, er Daud bira Nob dam Er Imtamnyi biti dama deirin ai wa inanyi imam si Ahimelekh bisi bindobmou. Ura, er Ahimelekh lukdanmouci, Daud dam ola yanmou ura, ato ebmou, “Kanda ninyi ton kum milibmaking bok, kan yuk yarim do?”#Mat. 12:3-4; Mrk. 2:25-26; Luk. 6:3-4 eboka asibmou. 2Uca, Daud biryi ato ebmou, “Nira weik sienyi biryi ato eboka arukmanir, ‘A uram ara talyi nang keken ai ena mem. Ni ebdeibmanto akwe kunubkwandum,’ eboka bokdonokmanir. Ati, kan dam asi lak kum ebkwaman. A talak ababyi, ‘Ni milibmaning nang kekebingnyei,’ tenen yuk dikum tikeiboka yanabne. 3Ati, kan dam a kuabci keica ukuca karebnurum. Roti kwaning amubaryi kum, kan dam a kuabci to karebnurum!” ebmou. 4Uca, Ahimelekh Er Iya Erebdobnyi ai wa inanyi imam biryi Daud bisi ato ebmou. “Roti sirik ara a ton kum deibman. Eda, Er Iya Erebdobnyi biti wiboka deirin roti asi deibman. Bok, a roti dobkarebkwankinyi ura, kan milibmaking nang ara arub ner ton kum yobmangnyi asi ara karebkwamakin. Ucab, ner ton yobmangnyi ura, kum karebkwamakin,” ebmou.

5Uca, Daud biryi a Imtamnyi ai wa inanyi imam bisi ato ebmou. “Nunda mar ibinkwamabyi ura, nerabwe ab uram ton kum sisingnub. Ato kunub deyok aryi ni milibmaning nang ara sun nong bol malyi dinyi ton kum betebdongobdanmang. Arub ara mar iban tum kuma, ur tum berekmar ababyi sun ton beterdongordana ton kum kubmang aryi sun nong bol debum ebmar,” ebmou. 6Ura, imam Ahimelekh biryi Daud bisi roti sirik da ton kum deibmou deyok aryi beterdongona mem roti asi dobkarebmou. A roti Er Iya Erebdobnyi biti wiboka deirin roti kwaning ara uki berekci tok ara minob dinyi dobkaboka, ukuryok dinyi unurdongoramnyi deyok aryi, a dobmou roti olong ara tubto ukuryok roti unubdongobmou.

7A tum ara ninyi tentok Edom mutuknyi si Doeg bira Saul biryi Er Iya Erebdobnyi wa iboka, er domba kalingna nang sienyi kibdeiamwe ba, kalikde kuramwe. 8Ura, Daud biryi Ahimelekh bisi ato ebmou, “Kanda ninyi on balang kum? Ninyi on ya kum ton deibmarim do? Nira weik sienyi biryi, ‘Ola birum!’ eboka titik-titik erongnu uca, ni yin ab, ni balang ab kum bobdobman ati, kan ton a deiaminyi ura, karebnurum,” ebmou. 9Uca, imam Ahimelekh biryi ato ebmou, “Filistinyi si Goliat kanci mutuk Tarbantin lu aryi obumnyi douramwe ninyi on ya asi deibman. Ara, Imtamnyi ai wa in nang imam nang ongoraming aling si efod dongtam kuboka kaluna aryi kitiboka deibman asi dobdobdum. Yuk dinyi ara ton kum deibse, eda, a kunum deibse,” ebmou. Uca, Daud biryi, “Da yuk dinyi kuma, a kunum karebnurum,” ebmou.

Er Daud bira mutuk Gat dam kunmou deyok

21:10-15

10Ani, a tum aryok Daud bira, “Saul biryi obnicei,” tenen Gat mutuk weik sienyi si Akhis bisi bindobmou. 11Ura, Akhis kalingnamnyi nang aryi sun nai Akhis dam bindoka ato ebmai, “Weik sienyi Daud a kunum yanmar. Ani, kam nerabwe aryi Daud biti mot semaici, bokdobdandoka mot semai ba, kekebubunyi bisi a yanmar. Ara, ato ebde semai,

‘Saul bira ninyi yubwa mitikanun orur.

Uca, Daud bira ninyi yubwa-yubwa ilinto orur,’

eboka mot semainyi a kunum yanmar,” ebmai

12Ba, Daud kekenmou uca, ato ebmai asi kekebmou. Ura, Gat mutuk sienyi Akhis biti, “Nai e, ni obnicei,” tenebmouci, er ilil kubmou. 13A deyok aryi Daud bira kanya teneina bukam asa boraming nang kuraming to tola walina talebmou. Ura, Daud er bam otong dam asi teneboka bakwe si maka yalungdeirdanmouci, bisik bublan dam kirib-kirib ebmou. 14Ura, Gat sienyi Akhis biryi er wa in nang ati ato ebmou, “Anyi luba talebmar ara kum eibmarum do? Anyi unati nisi boyanganmanindau da? 15Luba talen nang ni dam ton kum kunung ati, ni dam boyanmanurum do? Luba talebmarinyi bira ni ai wengyangana kikiman kum,” ebmou.

Currently Selected:

1Samuel Uram 21: MTG

Highlight

Copy

Compare