1Samuel Uram 20

Daud ab, Yonatan ab dib en uram aryi, “Iya boukwe kimdankwanim,” eboka uram sisikmarei deyok

20:1-43

1Ura, Daud bira Nayot mutuk si Rama dam aryi cukoka Yonatan bisi binmou. Binmou ura, ato ebmou, “Niryi kan nai bisi una kuboka malyi kibdongobse ati, mar ibnouci, obkwanir da?” ebmou. 2Uca, Yonatan biryi Daud bisi ato ebmou. “Ato dinyi ara taklobdum, kum obkwankir. Ni nai bira mitik deyok babyi, weik deyok babyi ara nisi, ‘Ukubkwaman,’ ena kum kubmanuturyok, er kanya manunuk ara kum obkute. ‘Ukubkwaman,’ ebturyok asi kunubkwamote ati ebman. Ati, Daud kan obkwamakute deyok atikwe nisi kunusa kum doknute,” ebmou. 3Uca, Daud biryi Yonatan bisi ato ebmou, “Kan nai bira ato tenebmakir, ‘Ersi lak ebnyi ura, Daud bisi minob teleb kimdur ati, kum ebkwan. Ersi eranyi ura, er kanya malyi kubcei,’ tenebmakir.” Bok, Er Imtamnyi Kam Kururnyi si deici aryi kan keken dam iya dib sirik uram ebkun. “Ni obkwamanir uki ara mitikanun kubmar,” ebmou.

4Ba, Yonatan biryi Daud bisi ato ebmou. “Kanci da ebminyi tok nirya ni kunubkwaman,” ebmou. 5Ura, Daud biryi Yonatan bisi ato ebmou, “Ambutum ara ukuryok wala dobkwamar ati, ni ab, kan nai weik sienyi ab tonkwa bukoka yina yibtinimnyi bok, ‘Kanda bindobdum,’ ebniminyi ura, bai da mabmanyi ba, amcitum berekwande. 6Kan nai biryi niti, ‘Daud bira dan binmar?’ eboka asibdekici ura, ato ebkwandum. ‘Daud bira nisi diboka ebdarabdeibmarci, binmar. Ara, er atei Betlehem dam asi sun ai ninyi nirya buluboka weik kwalina li tentok dobci tok kwaliraming li dobkwamar ati, nabmang ba, binmar,’ ebkwandum. 7Uca, weik sienyi biryi, ‘Yo teleb,’ ebci ura, ni kum obkwamanici ati kubmariryi. Uca, er yu wekci ura, nisi obkwamanici ati kubmariryi. 8Ni ab, kan ab Er Iya Erebdobnyi urasin dam aryi, ‘Kanyi deibdankwanim,’ ebdanoumwe. Ati, Yonatan kanci nisi kanyi deibnoumwe dinyi ukuca lak kibnurum. Ara, mitik ton da lebesekdananimnyi ura, kanci nisi kan nai dam bobana ara malyito ati, kanci nisi ur onina teleb,” ebmou. 9Uca, Yonatan biryi ato ebmou, “Ni kwit ato enmarim ara taklobdum se! Ni nai biryi kansi obkwamakute ura, niryi kan dam lak enmanto kum ebmakitinyi,” ebmou. 10Ura, Daud biryi ato asibdenmou, “Kan nai biryi yu asa aryi erekdobkici ura, unanyi biryi nisi eryankwamanurur do?” ebmou. 11Uca, Yonatan biryi Daud bisi ato ebmou, “Ukura, wa in dam binkwinim,” ebmou ura, wa dam binmarei.

12Bindoka Yonatan biryi Daud bisi dib en uram aryi ato ebmou, “Er Iya Erebdobnyi, Israel ninyi molonubnyi urasin dam aryi ambutum kum, amdi kum, a kuabde kiting ara ni nai er bobmaci kanya kalikdenkwaman. Asirdenyi uca, Daud kansi yu kum bobmakici ura, erda kansi kanya deibmakici ura, uram teleb ebdeibkwamakunun. 13Ucab, ni nai biryi kansi yu bobmakiriryi, ‘Obkwan,’ ebci ababyi, kansi uram ebdeibkwamakunun. Ba, kan lilim da inibdobmaminyi ura, kum obkwankurur. Ucab, minob kansi, ‘Obkwamakir,’ kum ebmanyi ura, Er Iya Erebdobnyi biryi nisi obkwanir. Kan lilim inibdobmaminyi dikum ara Er Iya Erebdobnyi biryi ni nai minob miliramwe to kanbabyi milina teleb. 14Ni ab, kan ab aryi Er Iya Erebdobnyi biryi busul kimsurur to dib en uram aryi, ‘Busul kuboka boukwe kimdankwanim,’ ebdananoumwe to kununkwanim. 15-16Uca, ni dibnyi talak ara nunci, ‘Boukwe kimdankwanim,’ ebdananoumwe dinyi ara ni mabwe asi taklobminyei. Eda, iya boukwe kimkwandum. Ani, Daud, kan mar ikunung nang asi Er Iya Erebdobnyi biryi nirya obkiribci ura, Ni Yonatan deibdoba ara oboka kum danardeirina mem. Kanci ni mabwe asi kum danabdeibminyi ura, Er Iya Erebdobnyi biryi kansi wenebkwankir,” ebmou. 17Ura, Yonatan biryi Daud bisi boukwe kimnamwe ara er mining damnyi boukwe kimdaninto kuramwe. A deyok aryi liki bitinyi dinyi, “Iya dib en uram aryi, kansi boukwe kimkunun ebnurum,” eboka molobmou.

18Ba, Yonatan biryi Daud bisi ato ebmou, “Ambutum ara ukuryok wala dobmaci ba, me yiramib tum berekwamar. Ati, kan kum wengyanmaminyi ba, kan bukmanto sokon lo kubmaci asi asing bikwamakir. 19Bok, amcitum ara ingkirikwamakirca ati, min tum domakou ba, inibdobmoumwe ai akwe yandoka keil kon dam asi kekebde kunkwamarum. 20Ba, amcitum ara niryi utoa bisik eninto kuboka mar liki winiryi a keil lingkwa asi dobkwamanun. 21Dobnyi ura, ni milibmanici kamnyi biti ato ebkwan, ‘Ni mar winiryi dam atam ingyanmang,’ ebnyi ba, dam a ingkiringca ara Er Iya Erebdobnyi biryi lebdeibmakici aryi kum obkwamakici ati ebmaniryi. 22Ba, ni milibmanici kamnyi bisi, ‘Ni mar era do dobne ati, dorbirum!’ ebnyi ba, era do ingkiring bici ara kansi obkwamakici ati, Er Iya Erebdobnyi biryi, ‘Obkwamakir ati, ola bindobdum,’ ebmakiriryi. Ati minob anaboka bindobkwandum. 23Ba, ni ab, kan ab minob, ‘Boukwe kimdankwanim,’ ebdanoumwe dinyi asi, Er Iya Erebdobnyi biryi ni ab, kan ab nun noutumang kurandiryi kalingkwansir,” ebmou.

24Ato ebmou ura, Daud bira bai inirorbinmou. Ura, ukuryok wala sirya dobmou ba, weik sienyi Saul yibde bun co lamna bukoka yinmou. 25Ura, sienyi Saul bira er minob buramwe to kuboka abilinga baribdongoboka bukmou. Ba, Yonatan bira er nai ab urasin wamwanubdandoka bukmarei. Ba, Abner bira sienyi barwe dinatam bukmou. Uca, Daud buramwe sokon ara lo kubmou. 26A tum ara Saul er kanya ara, “Daud arub kum yanmar ara malyi dinyi ton da betebdongobdanmar ati, kum yanande,” tenebmouci, Daud kum binmou deyok ati, asirdena kum kubmou.

27Ani, ukuryok wala yuma tum sirya bisibmouci, uki bitinyi tum ara Saul dinmou uca, Daud sokon lo tuba kubmou ura, er mi Yonatan bisi ato eboka asibdenmou. “Isai mi ara ambutum babyi arub babyi kum yanmar ara unati do?” ebmou. 28Uca, Yonatan biryi er nai Saul bisi ato ebmou, “Daud bira Betlehem binkwamararyi nisi molobmanirci ato ebmar. 29‘Nun ai ninyi nirya bulubibyi ura, kwalina li doboka bisam obkwamab ati, ni du yabwe ab, ni weit yabwe ab aryi nisi nabmaning. Ati, kanci nisi boukwe kimnaniminyi ura, mundu lobnimimnyi ba, ni ai ninyi asi dirbinkwan,’ eboka molobmanirci, binmar. Ati, er Daud bira nai weik sienyi kan ab tonkwa yin me kum yiryanmar,” ebmou.

30Ato ebmou uram kekebmouci, er mi Yonatan bisi ato ebmou. “Luba talebdob mi, talyi yortamni ner mi. Kanda Isai mi Daud tam kimdorum ara kan mining damnyi ab, kan kwin mabur ab asi, talbalirdongorum ara ni bingkunun. 31Ati, Isai mi Daud kam kuranci talak ara Yonatan kan ab, kan sienyi kiboka talena ab ababyi diboka kum sasibkwande. Ati, ukuca ninyi ton arukmimba, Daud bisi iniboka boyanung. Ba, Daud bisi obkwan,” ebmou.

32Uca, Yonatan biryi er nai Saul bisi ato ebmou. “Erci una kubkou ati obkwamarim da?” ebmou. 33Ba, er nai Saul biryi Yonatan bisi, “Obkun,” tenen balang aryi dorongnamwe uca, mentebmou. Ura, Yonatan er kanya aryi, “ ‘Daud bisi obkwaman,’ tenebmarci, mentebnir,” tenebmou. 34Ura, Yonatan yu wekmou ba, me tonkwa yibde bunmai ara takloboka sakwetebindobmou. Ba, Yonatan bira wala yuma dobmou tum aryi bitinyi tum ara, “Daud bisi Saul biryi talya obkwande,” tenenmou aryi yina ton kum yinmou.

35Belekuna kobdob ara Daud bisi “Ukubkwamanun,” ebmou to kuboka, er wa arungnanyi ab anaboka Daud kunmou mutuk binmarei. 36Ura, Yonatan biryi er wa arungnanyi bisi ato ebmou, “Ni mar dobkun ati, cungdum,” ebmou. Ba, anyi cungbau ura, Yonatan biryi a cungbanmou a kisok dubdub mar dobmou. 37Anyi cungmou ani, mar ingbinmoua dam tingbau uca, Yonatan biryi ato ebmou. “Dam a dikum kuma, era oso dikum ingbinmar!” ebmou. 38Ura, Yonatan biryi ato ebmou, “Tinglona mem, ola kwiniboka yarum,” ebmou. Ba, anyi biryi kunuboka mar ola kwiniboka er nai bisi boyanmou. 39A mar kwinirbinmounyi bira, “Ato ati ebmanir,” kum tenebmou. Eda, Yonatan ab, Daud ab ara minob ebdandobmarei akiryi sun bikdanmarei. 40Ura, Yonatan er wa arungnanyi bisi, “Ni yin atei minob bobirum,” ebmou. 41Ba, a er wa arungnanyi bira Yonatan yin boboka atei minob bobinmou. Ura, Daud bira keil dongtam da inibmou aryi anaboka tingyanmou. Ura, er kisok liki winiryi luknubdongoboka Yonatan bisi kibdobmou. Ura, iribdandondobmareici, engeboka u mulakdandobmarei. Ura, Daud er kanya aryi, “Sienyi Saul biryi, ‘Obkwan,’ tenebmanir,” tenebokmou. 42Ura, Yonatan biryi Daud bisi ato ebmou, “Er Iya Erebdobnyi si deici aryi, minob dib en uram ebdananoumwe aryi, ni ai ninyi babyi, kan ai ninyi babyi, Er Iya Erebdobnyi biryi iya kalikmurubde binkwansir,” ebmou. 43Sirya, ato ebmou ura, Daud er atei bindobmou. Ba, Yonatan bibabyi er atei bindobmou.

Currently Selected:

1Samuel Uram 20: MTG

Highlight

Copy

Compare