1Samuel Uram 19

Saul biryi Daud bisi tubto domkiringmou ba, bai bisik bindobmou deyok

19:1-24

1-2Weik sienyi Saul biryi er mi Yonatan ab, er wa in nang ab asi, “Daud obdarur!” ebmou. Uca, Saul mi Yonatan bira Daud bisi kanyi deiramwe deyok aryi, Daud bisi ato ebmou. “Ni nai Saul bira kansi obkwamakirci, moun yinmakir ati ambutum belekuna ara yuk dikum nun bindobminyi ura, duknuboka kunkwamarum. 3Ba, ni nai ab tonkwa kan duknuboka kunmaminyi dikum yandoka tiknimiryi kan deyok ati sisingnimnyi uca, er ebkwande obnun. Er ebca kekebnyi ura, kansi yandoka, ‘Ato ebmar,’ ebkwamakin,” ebmou.

4Ura, Yonatan biryi er nai Saul bisi bindoka teleb-teleb ebdeibokmouci, ato ebmou. “Nai sienyi, kanci kan wa irmilinanyi Daud bisi ona mem! Erci kansi malyi dinyi ton kum kubdeibkou. Erci, kansi telebto akwe kurdeirikurur ati ona mem! 5Er Daud bira Filistin nang ab ordanmangnyi ara, ‘Ni obningnyei,’ tenen kanya bona kum kurur. Eda, ‘Ur da obningnyi ababyi malyi,’ tenerur. Ani, Er Iya Erebdobnyi biryi Israel nang nirya asi miliboka ninyi ilinto ordeirur. Ato kurur ara nai, kan asing eibminyi ura, kan kanya karyi kukurur. Bok, una deyok ati malyito dinyi ton kuna kum kubmaranyi bisi obkwamarimci, moun yinmarim do? Anyi bisi obminyi ba, ining sakci ura, kan ikin dinyi bobdeibdaminyei,” ebmou.

6Ba, Saul bira er mi Yonatan ebmou uram kekebmouci, dib en uram aryi, “Er lya Kam Kururnyi si deici aryi, Daud bisi kum obkwan, a teneranwe dinyi kouna yal koubne,” ebmou. 7Ura, Yonatan biryi Daud bisi, “Ni nai sienyi bira ato ebmar,” ebmou. Ura, Yonatan biryi Daud bisi iniboka Saul dam bobinmou. Ura, minob Saul ab tonkwa wa irandei dinyi tubto wa ibde binmarei.

8Ani, mar deyok tubto koubmai ura, Daud biryi Filistin nang asi mar bobmouci, ilinto obkiribmou. Ba, sun Filistin nang er dam aryi bokwalwalabsekmaici, yuk-yuk bai bukoka binsekdobmai.

9Ba, uki tentok tum ara Er Iya Erebdobnyi biryi Saul bisi isa kanya koukwe olokdeibmou. Ba, ninyi on balang douboka er ai bukmou. Ba, Daud bira bilul kwebde bukmou. 10Uca, Saul biryi, “Daud bisi obkun,” tenen balang aryi dorongnamwe uca, mentebmou. Ba, a balang ara abilinga tobdongobmou ura, Daud a lukunda aryok bai bukoka bindobmou.

11Ura, Saul biryi, “Daud kalingbindarur,” eboka er wa in nang bokdonokmou. Ba, “Belekuna aryi obkwanuba,” tenen aryi Daud atei dam mar kurbinmai. Uca, Daud er ner Mikhal biryi, “Ukuca cukoka kum bindobminyi ura, ambutum belekuna ara obkwamaking,” ebmou. 12Ura, er ner Mikhal biryi ai bisik botona bisik kukoka dobkwetebmou. Ba, bai bukoka bindobmou ba, Daud kum obmai. 13Ura, Daud sirya bindobmou ura, Daud er man sokon dam asi ninyi atoa kikniamnyi keica asi deibdongoboka, bisam kambing bol aryi wiamnyi kaluna kisok kalubdeibmou. Ura, nong koukwe ara kaluna aryi kalubdeibmou.

14Ura, Saul biryi, “Daud borbindarur,” eboka bokdonokmou. Uca, Daud er ner aryi, “U yinmar,” ebmou. 15Ba, a ninyi aryi Saul bisi tamuboka yanmai ura, “U yinmar ati, kum boyanamib,” ebmai. Uca, a bokdonokmou ninyi asi ato ebmou, “Tamuboka er man sokon mabmara asi boyamunyi ba, obkwan,” ebmou. 16Ura, a bokdonokmou ninyi bindoka diramnyi uca, Daud mabmoua kuma. Eda, ninyi atoa kikniamnyi keica asi kambing bol aryi wiamnyi kaluna aryi kisok kalubdeibmou asi asing eibmai. 17Ura, “Ukubmar,” eboka Saul dam ebde yanmai. Ura, Saul biryi Mikhal bisi, “Ni ninyi obkwamonwe asi unati bokeibdobmarimci, tola ebmanirim da?” ebmou. Uca, Mikhal biryi er nai Saul bisi ato ebmou, “ ‘Takdongobniminyi ba, ni bindobkwan. Talebdeibmaniminyi ura, kanbabyi obkunun,’ eboka bindobmar,” ebmou.

18Er Daud bira bai bukoka Samuel bisi Rama dam bindobmou. Bindobmou ura, Samuel bisi ato ebmou, “Saul biryi obmanto kunmanir ati yandobne,” ebmou. Ura, Samuel ab tonkwa binmarei ani, Nayot mutuk dam bindoka kunmarei. 19Ba, yuk nang aryi Saul bisi, “Daud bira Rama dam Nayot atei kunmar,” ebmai. 20Ba, Saul biryi, “Daud borbindarur,” eboka ninyi bokeibmou. Ura, bindoka diramnyi uca, Imtamnyi uram ermurun nang yubwa sun nai Samuel ab ilinto kunmai asi eibmai. Ura, Saul a bokdonokmou ninyi ababyi Er Imtamnyi kanya koukwe olokmou. Ba, sunbabyi Er Imtamnyi uram ermurun nang ato dansekmai. 21Ura, Saul bisi, “Kan bokdonokmom ninyi ara Imtamnyi uram ermurun nang dansekmang,” ebmai. Ba, tubto yuk nang bokdonokmou. Uca, a nang ababyi neikto akwe Er Imtamnyi uram ermurun nang dansekmai. Ani, tubto liki winiryi dinyi bokdonokmou ababyi neikto akwe dansekmai. 22Ato kubsekmai ura, Saul er nong Rama dam binmou. Bindoka ilila me sumur tukwe ukoka kweramnyi me dam mutuk si Sekhu dam binmou. Bindoka, “Samuel ab, Daud ab ara dan dikum kunmaring do?” eboka asibmou. Uca, “Rama dam Nayot atei kunmaring,” ebmai. 23Ura, Saul Rama dam Nayot atei bisik banmou akiryok erbabyi Er Imtamnyi kanya koukwe olokmouci, Imtamnyi uram ermurun nang danmou. Ba, Rama dam Nayot atei binmou. 24Er Saul bira Samuel urasin dam binmouci, er ongon aling kwiribloboka Imtamnyi uram ermurun nang uram eraming to bindoka sisikmou. Ura, er nong baning dem asi lukunda kitingtam nirya talyi a maroramwe. Ato kubmou deyok aryi, yuk nang aryi, “Saul bibabyi Imtamnyi uram ermurunanyi kurur do?” eramnyi.

Currently Selected:

1Samuel Uram 19: MTG

Highlight

Copy

Compare