1Samuel Uram 18
18
Daud ab Yonatan ab deyok
18:1-5
1Er Daud ab, Saul ab sirya uram sisikmarei ura, Daud ab Yonatan ab sun kanya tentok kiboka, “Nun kanyi deibdanoumwe,” eboka antanibdobmarei. Ba, Yonatan bira Daud bisi boukwe kibmou. 2A tum ara Saul biryi Daud bisi iniboka er nai Isai dam kamdeirbana kum kubmou. 3Ba, Yonatan biryi Daud bisi, “Nira kansi kanyi deibkise,” eboka sisikdobmarei. 4Ura, er Yonatan biryi er ongon aling ongobmoua asi, kwiriboka Daud biti karebmou. Ara, mar ordan aling ab, ninyi on ya ab, ninyi on mar ab, sabya ab kwiriboka karebmou.
5Er Saul biryi Daud bisi, “Kanda mar ordan sienyi kibkwandim,” ebmou. Ba, ninyi ercok oramwe deyok aryi Daud bisi yin doun nang sienyi kibdeibmou. Ato kubmou ara ninyi nirya ab, yin doun nang nirya ab sun kanya teleb kubmou.
Saul biryi Daud bisi yu bobmou deyok
18:6-16
6Uca, Daud bira Filistinyi Goliat obmouci, yanmou. Ura, sun Israel mutuk nerabwe nirya aryi bilul si rebana toto, gerincing toto aryi bilul oboka mot sebmaici, Saul bisi erebdeibmai. 7A nerabwe mot semaici, mot bokdobdandoka ato ebmai,
“Saul bira ninyi yubwa mitik kum orur bok,
Daud biryi ninyi orur ara yubwa nukman kumto orur,”
eboka mot sebmai.
8Ato eboka mot sebmai deyok aryi Saul yu wekmou. Ara, “Daud bira ninyi yubwa ilinto orur. Ba, Saul bira yubwa mitikto orur,” ebmai. Ato eboka mot sebmai deyok aryi, Saul er kanya ato tenebmou, “Ninyi yubwa ilinto orurnyi bisi weik sienyi kibkwandarya. Ati, nira mitikanun kibdeibmaning ara talya aryi ni sienyi kum kibkwan,” tenen aryi er yu wekmou. 9A talak ara Saul biryi Daud bisi tulum bobmou.
10Ani, mabmou berekwe ura, Saul er ai umbura asi ninyi on balang douboka yibarkiringmou. Uca, Er Iya Erebdobnyi biryi isa kanya er koukwe olokeibmou. Ba, a talak ara Daud bira bilul kwebde buronmou. 11Asi Saul biryi, “Daud bisi oboka abilinga ab kulubdeibkun,” tenen ninyi on balang aryi dorongnamwe uca, mentebmou. Ukuboka, Daud bisi Saul biryi liki bitinyi dinyi ababyi mentem eboka yuk dikum kisibdobmou ba, mentebmou.
12Er Daud bira Er Iya Erebdobnyi miliramwe aryi Saul er ilil kuramwe. Saul bira Er Iya Erebdobnyi miliramwa ara sirya taklobmou. 13A deyok aryi Saul biryi Daud er dam kuramwa ara takloboka yin doun nang yubwa 1.000 baryi nang sienyi kibdeibmou ba, yin doun nang bobde menengnamwe. 14Daud bira Iya Erebdobnyi miliramwe aryi er ninyi mar ordanmangnya nirya ercok ninyi orkiriramwe.
15Ba, Saul biryi Daud bisi diramwe uca, Daud mikib mitik kum kuramuryi, ninyi mar boramwe. 16Ba, sun Israel nang ab, Yehuda yala nang ab aryi Daud bisi kanya deiramnyi. Ara, sun yin doun nang asi mikib kimdeiriramwe aryi ato kuramnyi.
Daud biryi Saul nebnyi dobmou deyok
18:17-30
17Ura, Saul biryi Daud bisi ato ebmou. “Er Iya Erebdobnyi biti mar bormilibminyi ura, Ni nebnyi du ner Merab a dobdobdum. Dobminci kanda mar ordana mikibnyi kibnurum,” ebmou. Saul kanya ara, “Ni taruk aryi Daud ona akum, eda, Filistin nang aryi obkwanunga,” tenen ato ebmou. 18Uca, Daud biryi Saul bisi ato ebmou, “Nira una yalanyi kunun? Ani, ni nai yala ab, ni du weit ab ara Israel yala nang kankan aryi iya mitikto yala nun kunub ati, ni una kuboka weik sienyi nebnyi dobniryi sienyi er ka kibtinyi do?” ebmou. 19Ura, Saul nebnyi Merab bira Daud bisi kabdeibmou. Uca, Daud biryi muruboka atei si Mehola ateinyi Adriel bisi kisibdongobmou ba, a ner Adriel dobmou. 20Ato kubmou dinyi Saul bisi ebdongobmai ura, Saul nebnyi weit ner si Mikhal biryi, “Daud ni dobkwan,” tenebmou. Uca, er nai Saul bibabyi, “Teleb,” tenebmou. 21Ara, Saul bira ato tenebmouci, ebmou, “Mikhal dobci uca, Filistin nang aryi obkwanunga,” tenen Daud bisi teneboka nenebdeibmou. Ura, Saul biryi Daud bisi liki bitinyi dinyi ato ebmou. “Arub aryi kanda ni ka sirya kibkin,” ebmou. 22Ura, Saul er wa irmilin nang asi iniboka bokdonokmouci, ato ebdeibmou. “Weik sienyi Saul ab, er wa irmilin nang ab aryi kansi iya kanyi deibkeici, boukwe kukunung. Ati, weik sienyi nebnyi ur dobminci, er ka kibdum,” ebmai. 23Ba, Saul er wa in nang aryi Daud bisi sirya ato ebmai. Uca, Daud biryi ato ebmou, “Sun tenebmarum ara weik sienyi er nebnyi dona ara caknam deyok tenebmarum do? Nira bona ton kum boniryi luknubdobnyi kunun ara bingnindarur do?” ebmou. 24Ura, Saul weik sienyi bisi, “Ato ebmar,” ebmai. 25“Uca, Saul er kanya aryi, ‘Ato kubnyi ba, Filistin nang aryi Daud bisi obkwaming,’ tenebmou ura, ato ebmou, ‘Dengna kum dekwandim. Eda, Filistin nang yubwa 100 baryi oboka den bam sekwandim ara ni nebnyi du ner Merab dengninto a kunum kubkwanirim,’ ebmakir,” ebmai. 26Ura, Saul er wa in nang aryi ato ebmai ba, Daud biryi, “Teleb, sienyi Saul er nebnyi dobkwan,” ebmou.
27Ba, sienyi Saul nebnyi ara Daud bisi kardeirina kum kubmou talak aryi, Daud ab er atei ninyi ab minob anaboka Filistin nang asi bindoka ninyi yubwa 200 baryi obmouci, den bam sekoka sienyi Saul dam boyanmai. Ba, Saul biryi er nebnyi si Mikhal Daud bisi kabdeibmou ba, Daud dobmou. 28Ato kubmou deyok aryi Saul biryi, “Diba, Daud bira Er Iya Erebdobnyi milirur,” tenebmou. Ani, “Israel ninyi nirya ara Daud bisi kanyi deibyi,” tenebmou. 29Ba, Saul biryi Daud bisi er kam kuramwe talak ara tuba ilil kurmururamuryi, iya mar iyamwe.
30Ba, Filistin nang asi mar ibinmangnyi tum ara Daud biryi ninyi mitik kum oramwe. Ba, Saul er yin doun nang ara ninyi mitikanun oramnyi. A deyok aryi Daud si ara ererdeiriramnyi.
Currently Selected:
1Samuel Uram 18: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
