1Samuel Uram 17

Er Goliat biryi Israel nang asi mar boramwe deyok

17:1-11

1Sun Filistin nang aryi ninyi mar ibinkwamaici, Yehuda yala nang mutuk asi weik atei si Sokho kan Azeka kan mutuk si Efes-Damim dam bulubmai. 2Ba, Saul ab, Israel nang ab ababyi mutuk si Tarbantin mutuk lu bulubmaici, ai dobmai. Ura, sun mar ibinkwamai ati, Filistin nang dam tam kuboka yanmai ura, ninyi deici liliboka mar deibmai. 3Filistin nang ara atam mutuk kon kibdobmai ba, otam mutuk kon ara Israel nang kibdobmai. Mutuk lu ara noutam kibdeibmai. 4Filistin yin doun nang kankan ara mar ordana bikdobnyi tentok anabmou. Anyi si ara Goliat, er atei ara Gat ateinyi kuramwe. Ba, er nong cang ara kiklina 3 meter baryi kuamwe. 5Ba, er kisok kaluna ara keil si perak aryi kikniamyi kisok kaluna asi kalubmou. Ba, er ongon aling ara yin doun nang ongon aling si zirah ongobmou. Ba, a ongon aling ara kila lamang daramwe aling asi ongobmou. A ongon aling ikin ara 57 kilogram baryi kuamwe, ara keil si tembaga aryi kikniamnyi. 6Ba, er yan limna ara keil tembaga aryok kikniamnya aryi limdoramwe. Ani, er takonya ara keil tembaga teleboka kikniamnya aryi limdoramwe. 7Ba, er ninyi on mar bok ila ara aling wiraming co las atoanun asi douramwe. A mar bok ikin ara 7 kilogram baryi kiamwe. A mar ara keil tembaga aryi kat co dukdongoboka kikniamyi. Ba, er mar u limdon co las dounanyi bira boboka menengnamwe.

8Anyi Goliat tikoka sun Israel nang yin deibmaici, wekmai asi, ato ebmou. “Sunda unati nunsi mar iyankwamasurumci yandoka wekmarum da? Nira Filistin ateinyi kunun ba, sunda Saul wa irmilin nang kundarur ara bikmarum do? Sun kankan dam aryi ninyi tentok wibmunyi ba, ni ab obdankwanim. 9A wibmamunyi bira ni dam yariba, ni ab obdankwanim. Ordanmanimnyi ani, erci nisi obnici ura, sun Filistin nang ara sun Israel nang amwetam kuboka sun wa in nang kibkwaming. Ba, niryi anyi bisi obnyi ura, sunda nun Filistin nang il don nang kiboka nun ebmabyi tok kunun nang kibkwandum,” eboka bul yungmou. 10Ani, tubto a Filistinyi Goliat biryi ato ebmou, “Arub ara sun Israel nang a yin deibmarum ninyi asi sal tentok karebnindarur. Ba, ni ab, er ab nun bitinyi obdankwanim,” ebmou. 11Ura, Goliat uram kekebmaici, Saul ab sun Israel nang ab sun kanya lukdanmai ura, sun kanya ilil mitik kum kubmou.

Daud biryi Saul atei doboka kuramwa dam binmou deyok

17:12-39

12Daud bira Isai mi kuramwe. Sun Yehuda yala nang atei si Betlehem dam Efrata atei asi kuramwe. Er Saul sienyi kiamwe talak ara Isai mabwe inbaryi deiamuryi, wisi danmou. 13Er Isai mabwe nebdob nang winiryi ara Saul milibmaici, ninyi mar ibinmai. A mabwe yumanyi si ara Eliab ba, a damnyi si ara Abinadab ba, winirinyi si ara Syama. 14Ba, Daud bira kelenyi kuramwe. Ba, er du yabwe nebdob nang winiryi ara Saul ab ninyi mar ibinmai. 15Ucab, Daud bira Saul ab mar ibana kum kubmai. Eda, er nai bisam kambing toto, domba toto Betlehem dam akwe tamuboka tuba winiroryangaramwe.

16Er Goliat Filistinyi bira belekuna mar iyanabna, sintam mar iyanabna kimnamwe. Ani, uki yubwa 40 baryi tuba-tuba mar iyangaramwe.

17Er Isai biryi er mi Daud bisi ato ebmou, “Kan du yabwe ati gandum du koubne ikin takubaryi ab, roti kwaning inin takubaryi ab sun mar ordanmanga dam ola bobirum!” ebmou. 18“Ani, bisam sapi moum yung aryi kikniraming dinyi si keju takubaryi ara mar deyoknyi biti bindoka karebkwandum. Kan du yabwe ab ebdamunyi ura, ‘Sunda una kubsei da?’ eboka asibdenkwandum. Ba, kan du yabwe aryi, ‘Nunda ukubde kunub,’ ebingnyi ura, ni dam ebde yarum. 19Er weik sienyi Saul ab, sun Israel nang ab ara mutuk si Tarbantin ebok, Ela lu ebok, kimnung mutuk asi Filistin nang ab tuba ordanmanga dam asi bobirum,” eboka bokdonokmou.

20Mabmou ani, berekmou ura, anda keica boboka anabmou. Ba, er bisam kambing toto, domba toto, ara yuk bisam kalingnanyi bisi, “Kaliknurum,” eboka deiblobmou. Ura, er nai Isai ebmou to kuboka bobinmou. Ani, Israel nang ai doboka kuramnya dam tingdongorbau ura, sunda anaboka Israel nang ab, Filistin nang ab ordankoui ati luna mumuboka mar ibinmai. 21Ura, Israel nang babyi Filistin nang babyi, sun mar obdankwamai to, leleboka ib wanwanubdanmai. 22Er Daud Israel nang dam sirya binmou ura, a bobanmou dinyi ara Israel yin doun nang sun aling atei kalikmounyi biti bindoka karebmou. Ura, er Daud bira ola cukoka ordankwamaici, bindoka wekmaia dam aminda binmou. Ura, “Nun atei nang ton da obmanunga?” tenen dirbinmou. 23Uca, Daud er du yabwe ab uram tonkwa sisingdabyi talak ara Goliat Gat ateinyi, Filistin nang kibdobmai mutuk tam aryi minob nyemyangaramwe to kuboka nyemyanmou. Ba, er Goliat yandoka enmou uram asi Daud bira bukoka biti kekerongmou. 24Bok, sun Israel nang ara er Goliat asing eibmaici, sun ilil ati cukoka binsekdobmai. 25Ura, sun Israel nang aryi ato ebmai, “A yanganmaranyi sirya eibmarim do? Anyi bira nun Israel nang asi malyi kimyanganmasira. Ati, unanyi biryi anyi bisi obdinyi bira nun atei weik sienyi biryi er bona ilinto a obmarinyi bisi karebkwande. Ani, er nebnyi ababyi anyi bisi karebkwande. Ani, anyi obmarinyi er ai ninyi ara tukwe dengna kum dengkwanung,” ebmai.

26Uca, Daud biryi er dam tikmai ninyi asi ato ebmou, “Sun Filistin nang nirya ab, sun Israel nang asi dumyangasururnyi ab obdinyi bira una kubkwanung da? Ani, Filistinyi unatonyi biryi Er Imtamnyi kam kururnyi tam nang asi malyi kimyangasurur da?” ebmou. 27Uca, er dam tikmai nang aryi, “Yo, Goliat obdinyi bira weik sienyi bona ab, er nebnyi ab karebci ba, dobkwande,” ebmai.

28Ura, Daud er du dounyi Eliab kekenmou uca, er weit Daud biryi ato ebmou ura, er yu wekmou. Ura, ato ebmou, “Kanda unati yanganmomwe do? Ani, kan bisam kambing ab, domba ab mitikanun akwe unanyi bisi takloboka yanmarim da? Kan dukuta ab kan yu ab ara ni bikmakin. Ani, kan a yanmarim ara, ‘Ordana asi ni ton eibtinyi,’ tenen yanmarim ara bikmakin,” ebmou. 29Uca, Daud biryi, “Ni una kubman ati, enmarim da? Nira asirdena atikwe asibdeabna!” ebmou. 30Ura, er nong dangubokwe ura, er dam tikmai nang asi minob asibmou to akwe tubto asibmou. Uca, sunbabyi minob ebmai to akwe tubto ebmai.

31Er Daud ebmou uram sirya kekebmai ura, Saul bisi ebdongobmai. Ba, Saul biryi, “Daud bisi nambindarur,” ebmou. 32Sirya naboka yanmai ura, Daud biryi Saul bisi ato ebmou, “Nai, kanci anyi biti mambul kanya boboka ilil tenena mem. Niryi Filistinyi anyi Goliat bisi mar bobkwaman,” ebmou. 33Uca, Saul biryi Daud bisi ato ebmou, “Kanci anyi ab obdankwamarurum ara kikiman kum. Anyi er kam talak aryi ninyi onanyi kiamwe uca, co biribunyi bica. Ba, kanda ukuryok kamnyi kunmarim ati ebman,” ebmou. 34-35Uca, er Daud biryi Saul bisi ato ebmou, “Nai weik sienyi, nira ni nai bisam domba toto, kambing toto kalikde kunun. Uca, bai bisam singa ab, beruang ab aryi domba yandoka, ‘Oyibkun,’ tenen kuci asi, dobkirikoka kulabnyi ba, barur. Ukuboka domba lemdeirinun. Ani, yu bisam singa ab, beruang ab aryi oryanganici asi, ngang talebdongoboka ngang kotonglonun ba, dirur. 36Ara, singa babyi, beruang babyi ni kan wa irmilinanyi biryi onun. Ati, Filistin nang den bam sengna kum nang ara a bisam onun to kubkwaman. Ara, Filistin nang aryi Er Imtamnyi Iya kam kururnyi tam mar ordan nang asi malyi kimnung ati ebman,” ebmou. 37Ani, Daud biryi ton ato ebmou, “Kam si singa ab, beruang ab aryi yan turut tarangmanica ababyi, Er Iya Erebdobnyi biryi lemdeirinurur. A lemdeirinurur to akwe a ilila Filistinyi taruk dam aryi lebdeibkwamanirarya,” ebmou. Uca, Saul biryi Daud bisi ato ebmou, “Er Iya Erebdobnyi biryi kalikwamakir ati ur mar ibirum,” ebmou. 38Ura, Saul biryi Daud bisi er mining yin doun nang ongoraming ongon aling ongobdeibmou. Ani, kisok kaluna tembaga aryi kikniamnyi kisok kaluna kalubdeibmou. Ura, kat ongon aling ongobdeibmou. 39Ura, Daud biryi ordankwamangiryi, ongoraming ongon aling umbura asi ninyi on ya kikibdongobmouci, tikoka ninyi ona kiklibdenmou. Uca, ato ongon aling ara er ton minob ongordena kum kuramwe aryi yibinman kum kubmou. Ura, Daud biryi Saul bisi ato ebmou, “Ni akaling ni ongobman kum aryi walwal kubnir ati kwiriblobkwan,” ebmou. Ura, a ongon aling kwiriblobokmou.

Daud biryi Goliat bisi obmou deyok

17:40-58

40Daud er a ongobmou aling nirya kwiriblobmouci, er bisam kalingnamuryi, douramwe kama demang tentok doubdobmou. Ura, me dala bindoka, kisok-kisok keil akwe amubaryi bubdobmou ura, mitik aling karakna kibdobmou. Ba, keil du dobkwamou tabwe ara taruk doubdobmouci, Goliat bisi ibinmou. 41Uca, Goliat bira mar lisikwandura tenen limdon co las dounanyi menekeibmouci, dam yanganmou asi eibmou. 42Ura, Goliat diramwe uca, Daud bira kamnyi deyok aryi er ninyi on mar ukeiboka, “Atonyi biryi obnutum do?” ebmou. Uca, Daud er urasin teleb deiboka, er asing lomlom enmou asi asing eibmou. 43Ura, Filistinyi Goliat biryi Daud bisi ato ebmou, “Nira kam kibdeibmanirimci, kama aryi yakdonokwamanirim ati, kama douyanganmarim do?” ebmou. Ura, Filistin nang sun kwemdeina si deici aryi Daud bisi submou. 44Tubto Filistinyi Goliat biryi Daud bisi ato ebmou, “Ni ab obdankwamanim. Ba, kan tub ara maka toto bisam toto karebnyi ba, yibdobkwamaking,” ebmou.

45Uca, Daud biryi Goliat bisi ato ebmou, “Kanda, yin ab, mar ab, taci balang ab aryi iyanganmanirim bok, nira Er Iya Erebdobnyi imtam yin doun nang sienyi, nun Israel yin doun nang sienyi, kan, ‘Li,’ tenerumnyi si deici aryi iyanganmakin. 46Ati, arub tum aryok Er Iya Erebdobnyi biryi ni taruk dam karebnici ba, kansi obokabkiniryi ngang sekwamakin. Ani, arub tum aryok kan obkinyi ba, dibmaminyi tukwi ab, kan atei ninyi yin doun nang tukwi ab ara maka im dub yibarura ab, bai bisam ab ati, oboka karebkwamakin. Ba, im dangna tukwe dangna ninyi kununga nirya aryi, ‘Sun Israel nang aryi molonung Imtamnyi bira dib kurur,’ tenebkwaming,” ebmou. 47Ati, a kunmang ninyi nirya aryi ato tenebkwamang, “Nun Israel nang molonubnyi Er Iya Erebdobnyi bira ninyi on mar ab, ninyi on ya ab aryi douboka sunsi lak oboka nun kum lebdeibkwamasir. Eda, a mar ordana ara Er Iya Erebdobnyi taruk dam ordanmabyi deyok aryi, Erci doboka nun taruk dam karebkwamasir. Ba, nunci sunsi obkiribkwamasib,” ebmou.

48Ura, Goliat bira dam nunukde yangau asi, Daud cukaboka Filistin nang dam tam tingbinmou. 49Ura, Daud er aling umbura te dongoboka, keil du tentok dobdobmou ura, keil dongoboka doraming tabwe umbura dongobmou. Ura, bubatingmou ba, lobkaboka banmou tok, Goliat asok tam asi toloboka wekdobmou. Ba, loki banmou tok, tukwetam bindoka mabmou. 50Ukuboka Daud biryi Goliat bisi nenebdeiboka keil du aryi obmou. Ninyi on ya aryi kum obmou eda, keil du aryi obmou. 51Ura, Daud cukaboka Goliat dibmoua dam tingbindoka, er mining ninyi on ya dobtaleboka ngang seklobokmou. Ura, Filistin nang dinmai uca, sun mar deyoknyi obmou asi asing eibmai ura, cukoka binsekdobmai. 52Ura, Yehuda nang ab, Israel nang ab luboka Filistin nang dobde binmai ani, Gat mutuk ab, Ekron atei lika bublan dam bindoka obkiribmai. Ba, Filistin nang asi a obukde banmaia tukwi yubwa mabdanin banmai ara me bobcabman kumto kubmou. Ara, Saaraim bisik dam aryi kuboka Gad dam aryi kuboka Ekron dam nirya ninyi tukwi asok akwe kubmou. 53Ura, Israel nang aryi Filistin nang asi doboka obde binmai ani, tamuboka sun atei dam luboka wekmai. 54Sirya ukubmai ura, Daud biryi Goliat kisok ara boboka Yerusalem bobinmou. Ba, anyi Goliat er ninyi on keica ara akatei keis ol ai deibmai.

55Er Saul diramwe uca, Daud bira Goliat obkouci er dam tingbau talak aryi er yin doun sienyi si Abner bisi ato ebmou, “Abner, a kamnyi Goliat dam tingbaranyi bira unanyi mi da?” ebmou. Uca, Abner biryi, “Nai sienyi, ni kum bikman,” ebmou. 56Uca, weik sienyi Saul biryi tubto ato ebmou, “Yuk nang asi asibdendarur, unanyi mi da?” ebmou. 57Ani, Daud biryi Goliat sirya oboka yanmou. Ura, Abner biryi Daud inibdobwe ura, Saul bisi Goliat kisok dakoka bobinmarei. 58Ura, Saul biryi Daud bisi ato eboka asibmou, “A mi, kanda unanyi mi do?” eboka asibmou. Uca, Daud biryi, “Nai sienyi, nira kan wa irmilinanyi, Betlehem ateinyi si Isai mi atiba,” ebmou.

Currently Selected:

1Samuel Uram 17: MTG

Highlight

Copy

Compare