1Samuel Uram 16

Daud bisi me kisok dikeiboka sienyi tikeibmou deyok

16:1-13

1Ura, Er Iya Erebdobnyi biryi Samuel bisi ato ebmou, “Saul biti boukwe kimdum talak ara ukura uki unabaryi kubde bar da? Anyi bira sun Israel nang sienyi kimna ara ni li kunururnyi kurur. Ati, kan bisam yang umbura asi tong teleb me yung dikdongoboka, Betlehemnyi si Isai bisi birum! Ara, er mabwe asi bin tentok Niryi wiboka Israel weik sienyi kibdeibkwan ati, ebman,” ebmou. 2Uca, Samuel biryi ato ebmou, “Saul kekeboka ni obnicei ati, ni una kuboka er Isai bisi erbinkwan do?” ebmou. Uca, Er Iya Erebdobnyi biryi ato ebmou, “Bisam lembu ukuryok nenmaca asi bobiminci, ‘Nira Er Iya Mikibnyi bisi dama deiriryanman,’ ebkwandum. 3Ebminyi ura, a dama deinmaminya dam asi Isai nabminyi ura, Niryi kansi ukubkwamarim to nirya eterebkwamakin. Ara, anyi bisi me likeiboka, Ni wa inkwanici ati, wa karebkwandum,” ebmou. 4Ura, Samuel bira Er Iya Erebdobnyi biryi ebmou to kunuboka, Betlehem atei binmou. Ura, sirim asa aryi Betlehem atei weik nang ab ebdanmai ura, sunci ato ebmai, “Kanda uram teleb boyanganmasirim do?” ebmai. 5Ba, erci ato ebmou, “Yo diba, nira Er Iya Erebdobnyi biti dama deibkwamanci yanganman. Ati, sunda Er Iya Erebdobnyi biti sun nong, kwit kibdamunci, a dama deiboka uk yalibkwamana dam yandarur,” ebmou. Ura, erci Isai ab, er mabwe ab me likeiboka sun nong bol asi beterdongona kum bol kibdeibmouci, “Er Iya Erebdobnyi biti dama deiboka uk yalina dam yankwandarur,” eboka nabmou.

6A nabmou ninyi ai wengyanmai ura, Eliab#16:6 Eliab bira Isai mi dunyi kuramwe. bibabyi yanmou. Ba, Samuel biryi asing eibmou ura, ato tenebmou. “Diba, Er Iya Erebdobnyi biryi me likeiboka wibmaranyi a yangar,” tenebmou. 7Uca, Er Iya Erebdobnyi biryi Samuel bisi ato ebmou, “Urasin teleb ab, nong erebdob ab ati, dibdeboka wimna mem! Ato nang ara, ‘Ni li,’ tenenun ati ebman. Sun ninyi sirik aryi, ‘Teleb,’ tenebmamunyi dinyi kuma, eda Ni Imtamnyi biryi, ‘Teleb,’ tenebnyi to asi wibkwanun. Ninyi sirik ara alib bol aryi teleb kubmaca ati, ‘Teleb,’ teneraming. Uca, Ni Iya Erebdobnyi bira kanyatam dinyi asi asing eirinun,” ebmou.

8Ura, Isai biryi er mi Abinadab bisi nabmouci, “Samuel urasin dam yarum,” ebmou ba, kunubmou. Uca, Samuel biryi ato ebmou, “Anyi bibabyi Er Iya Erebdobnyi biryi ton kum wibwe,” ebmou. 9Ura, Isai biryi Syama bisi naboka, “Samuel urasin dam yarum,” ebmou. Uca, Samuel biryi, “Anyi bibabyi Er Iya Erebdobnyi biryi kum wibwe,” ebmou. 10Ukuboka Isai er mabwe tabaryi nirya Samuel urasin dam namou. Uca, Samuel biryi Isai bisi ato ebmou, “Kan mabwe a nirya ara Er Erebdobnyi ton wimna kum kubwe,” ebmou.

11Ura, Samuel biryi Isai bisi ato ebmou, “Kan mabwe nirya ara a kunum do? Ton da kunmang do?” ebmou. Uca, Isai biryi ato ebmou, “Ni mi kelenyi bira kum yanmar, bisam kambing toto, domba toto kalikde kunmar,” ebmou. Ba, Samuel biryi tubto Isai bisi ato ebmou, “ ‘Nambindarur,’ ebdum. Er kum yanabci talak ara yina kum yibde bunkwinim ati ola inirbinung,” ebmou. 12Ura, “Inirbindarur,” ebmou ba, inirbinmai. Iniboka yanmai ura, diramwe uca, er nong bol yuk bol deibmou. Ani, anyi urasin teleb aryi er asing ara lomlom ebmou asi asing eibmou. Ura, Er Iya Erebdobnyi biryi Samuel bisi ato ebmou, “Anyi biti ebmomwe, tikokabminci anyi bisi me dikeiboka kisal dangna dinyi karebdum,” ebmou. 13Ura, Samuel biryi er du yabwe kankan aryi bisam domba kisok yang umbura tong teleb co yung dikdongoboka bobmou aryi, Daud bisi kisok dikeiboka kisal dakmou. Ba, a tum aryi kuboka, er kubde baramwe talak nirya ara Er Iya Erebdobnyi kanya Roh kudus Daud er kanya dam iya sasiboka koukwe olokamwe ba, kuramwe. Samuel biryi Daud bisi sienyi sirya tikeibmou ura, mutuk si Rama dam binmou.

Er Daud bira Saul minob sienyi kiboka kuramwe atei dam kunmou deyok

16:14-23

14Minob ara Saul sienyi kiamwe ba, Imtamnyi Kanya Roh Kudus er koukwe olongnamwe. Uca, uku talak ara Imtamnyi Kanya ara Saul takloboka bindobmou. Ba, ukura isa kanya asi Er Iya Erebdobnyi biryi unubdongobmou ba, Saul koukwe olokmou. 15Ato kubmou deyok aryi Saul er wa irmiliramnyi nang aryi Saul bisi ato ebmai, “Er Iya Erebdobnyi kanya ara taklobkiraryi, isa kanya asi kan koukwe olokir ati bikdum. 16Ati minob kan wa irmilikunub nang ara yakdonoksiminyi ura, taruk aryi oraming bilul kwemna bikdob nang asi unubdum. Er Iya Erebdobnyi biryi Er kanya koukwe olongkina kum kubkiriryi, isa kanya asi koukwe olokici ura, aminda unubminyi biryi bilul si kecapi kwemnanyi biryi bilul kwemaci ura, kan namin asa kubkwandim,” ebmai. 17Uca, Saul biryi er wa irmilin nang asi ato ebmou, “Ni bilul kecapi kwemkwaniranyi inirbinmanumunyi ani, iniboka boyanindarur,” ebmou. 18Ura, er wa irmilinanyi ninyi tentok aryi ato ebmou, “Niryi dib ebkun ara Betlehem ateinyi si Isai er mi tentok asi bilul kwemna bingdur asi asing eibse. Anyi bira ninyi mar ordana mikib weiknyi nun kurur. Ani, erda yin dounanyi kururci, uram sisingna ababyi bikdobnyi nun kurur. Ani, er urasin ababyi telebnyi nun kurur asi Er Iya Erebdobnyi ersi milirur,” ebmou.

19Ura, Saul biryi Isai dam asi ninyi ton bokdonokmouci, uram ato ebdeibmou. “Isai kan mi bisam kambing kankan ab, domba kankan ab kururnyi Daud bira nisi bokdonoknururum,” ebmou. 20Ba, Isai biryi Daud bisi, bisam keledai deici asi roti ab, anggur me ongomna tentok ab, kambing mi tentok ab, “Saul dam bobirum,” ebmou. Ura, deibmou ba, Saul dam bobinmou. 21Ukuboka Saul dam bobinmou ura, Daud bira Saul er wa irmilinanyi kibmou. Ura, Saul biryi Daud bisi boukwe mitik kum kuramwe aryi er yin dounanyi kibmou. 22A deyok aryi Saul biryi Isai bisi ninyi ton bokdonokmouci, ato ebdeibmou. “Daud bira ni kanya teleb kubmanir ati iya ni milinanyi kibkwanir. Ati, kanci mundu lobnurum,” ebmou. 23Ba, kurandei talak aryi, Imtamnyi biryi isa kanya asi Saul koukwe olokiabci talak ara Daud bilul kwemnamwe. Ba, Saul kanya teleb kuboka namin kanya boramwe. Ato kuramwe deyok aryi, isa kanya yangdonongdamwe.

Currently Selected:

1Samuel Uram 16: MTG

Highlight

Copy

Compare