1Samuel Uram 15

Saul weik sienyi sirya minob kiamwe bok, yuknyi unubmai deyok

15:1-35

1Er Samuel biryi Saul bisi ato ebmou, “Er Iya Erebdobnyi biryi nisi ato eboka bokdonokmanir, ‘Saul bisi me kisok dikeiboka wa karebnyi ba, Er Iya Erebdobnyi mabwe Israel nang sienyi kibkwande ati ersi erbirum,’ eboka bokdonokmanir ba, kan dam eryanmakin. Ara, kansi Er Iya Erebdobnyi, imtam yin doun nang sienyi biryi ebdeibmakir to ebkun ara kekerum. 2Ara, sun Israel nang Mesir aryi anaboka yangaroramnyi bok asi, Amalek ninyi aryi bisik sekamnyi. Ati, Niryi Amalek ninyi asi sunbabyi dekeibkwan. 3Ati, ukura sunci anaboka Amalek ninyi asi mar ibindarur. Ura, akatei kurur dinyi nirya boukwe kuna kum asa aryi obkiribokdarur. Ara, sal ababyi, nerabwe ababyi, mabwe ababyi, moum tuba yinmangnyi mabwe ababyi, bisam lembu ababyi, domba ababyi, unta ababyi keledai ababyi nirya obdarur!” ebmou.

4Ura, Saul biryi er atei ninyi nirya naboka mutuk Telaim dam bulubdeibmouci, mar ibinkwamai yin doun nang lilibdeiboka wibmou. Ura, Israel nang tukwe bisik kuboka mar ibinkwamai nang yubwa 200.000 baryi wibmou. Ba, Yehuda yala nang yubwa 10.000 baryi wibmou. 5Ura, Saul bira weik atei Amalek atei binmou ura, a mutuk bakan nirya ninyi sakoka bindobmanto bisik ara, “Bisik sekdarur,” ebmou. 6Ura, Saul biryi Keni yalanyi bisi ato ebmou, “Sun Keni yala ninyi ara anaboka yuk mutuk bindobdarur. Niryi sunsi Amalek ninyi oniryi sunbabyi obsinyei. Ara, sun Israel nang Mesir mutuk aryi kuboka yangaronmai asi sunci, ‘Nun kwit yabwe,’ tenen teleb kibmandau ati ebman,” ebmou. Ato ebmou ura, Keni yala ninyi asi Amalek ninyi kankan dam kuramnyi ninyi anaboka bindobmai. 7Ura, Saul ab, er atei nang ab aryi Amalek ninyi asi mutuk si Hawila aryi obde binmai ani, Mesir mutuk yaletam kuboka mutuk si Syur dam bindoka sirya obukmai. 8Amalek sienyi si Agag bira kam kibman talebmai. Talebmai ura, er atei ninyi nirya ara ya sekoka obkiribmai. 9Uca, er Saul ab, er atei ninyi ab aryi Amalek sienyi si Agag ab, bisam domba ab, kambing ab, bisam lembu teleb ab, dengna weik bona ab ara kum danardeirina kum kubmai. Eda, manmalyi bona ab, manmalyi bisam ab asi kum dandeibmai.

10Ura, Er Iya Erebdobnyi uram aryi Samuel bisi ato ebmou, 11“Niryi Saul bisi weik sienyi tikeibse. Bok, Nisi taklobokabnouci, Ni uram kununa kum kubnou aryi Ni kanya ara, ‘Anyi bisi talyi sienyi tingdeiriranse,’ tenenun,” ebmou. Ba, Samuel er kanya u yibmou. A deyok aryi lukunda murub nirya, Er Iya Erebdobnyi bisi molormurunmou tok asi berekmou. 12Ani, Samuel belekuna kobdob ara anaboka Saul bisi banmou uca, ersi ato ebmai, “Saul bira Karmel atei dam binmararyi, ‘Ni aminda si ererdeirinkwaning,’ teneboka asing dina kikniboka tingdeirbinmar. Sirya kiknibci ura, Gilgal bisik tam kuboka binkwamar,” ebmai.

13Ura, Samuel banmou ani, Saul dam binmou. Ura, Saul biryi ato ebmou, “Er Iya Erebdobnyi biryi ebdeibwe uram kununman bok yarim ati, Erci kansi kisal dangkina teleb!” ebmou. 14Ato ebmou bok, Samuel biryi ersi, “Kambing ab, domba ab uram a enmara kekenman. Ani, tonda bisam lembu lilim enmara kekenman ara una kubkwamarim ati boyanmarim do?” ebmou. 15Uca, Saul biryi ato ebmou, “Israel ninyi aryi Amalek ninyi bisam kambing toto, domba toto, lembu toto teleb dinyi ara, ‘Nun Nai Iya Erebdobnyi bisi dama deibkwayeb,’ eboka a nirya kum onmaici, kam tuba takdongobmai dinyi aryi lilim enmar. Ba, yuk bisam yabwe nirya ara obkiribmai,” ebmou. 16Uca, Samuel biryi Saul bisi ato ebmou, “Yo, sirya ebmarim! Ura, Er Iya Erebdobnyi biryi kanti, arub lukunda aryi nisi ebdeibmar to ebkwinkin,” ebmou. Ba, Saul biryi ato ebmou, “Ur ebnurum!” ebmou.

17Ura, Samuel biryi ato ebmou, “Kanci, ‘Ni mitiktonyi bisi Israel yala nang sienyi kibdeibnou,’ tenerum. Ani, Er Iya Erebdobnyi biryi kisal dakoka me kisok dikeibkouci, ‘Israel ninyi talebkwande,’ tenen wa karebkou. 18Ati, Er Iya Erebdobnyi biryi kansi arukmakirci, ato ebmakir, ‘Amalek ninyi malyito dinyi kununung ninyi asi mar bobdum. Mar bobminci, ninyi nirya obkiribdum!’ ebdeibkou. 19Uca, unati Er Iya Erebdobnyi uram asi kum kunubumwe do? Ani, unati Er Iya Erebdobnyi asing dikurura dam aryi Amalek ninyi bona daluboka malyito dinyi kunubumwe do?” ebmou.

20Saul biryi Samuel bisi ato ebmou, “Nira Er Iya Erebdobnyi biryi aruknou to Er uram kunuboka, Amalek ninyi sienyi Agag taleboka boyanmanci, Amalek atei yuk ninyi ara obkiribman. 21Ucab, ni atei ninyi ara bisam domba ab, lembu ab, kambing ab teleb dinyi wiboka, Gilgal dam Er Iya Erebdobnyi biti deibkwamangci, boyanmang,” ebmou. 22Uca, Samuel biryi ato ebmou,

“Er Iya Erebdobnyi biryi a oboka dama deibmamunyi dinyi asi kanyi kum deibkwamar.

Eda, Er uram kekena asi kanya deibkwamar.

Er uram kekena ara bikdob dinyi kurur. Dama deirina ara teleb dinyi kuma.

Ani, Er Iya Erebdobnyi uram kununa asi dib dinyi kurur. Domba kob aryi dama deirina ara malyi dinyi kurur.

23Er Iya Erebdobnyi uram kununa kum kuraming dinyi ara ninyi din nang sambal uram ab, ninyi kir on nang ab asi dib teneraming nang ato kurur.#15:23 Yuk-yuk dinyi uram ara isa ner uram kum, dibdoba sambal uram kum, maka uram kum aryi kunumna kunurdeirina ati ebwe.

Ani, kum taba birirongna ara kwemdeina moloninto kunung.

A deyok aryi kanda Er Iya Erebdobnyi uram asi, ‘Ni li,’ ebmarim deyok aryi

kan weik sienyi kiamoumwa ara, ‘Yuk nang unubkwaming,’ ebmakir,” ebmou.

24Ura, Saul biryi Samuel bisi ato ebmou, “Niryi Er Iya Erebdobnyi ab, kan ab uram dakbisibman. Ara, ni atei nang sun molobmangnyi to kum kunubnyi asi, ‘Ni ilil,’ aryi molobmang to kunubman. Uca, ni malyito dinyi kunubman. 25A deyok aryi ukura ni malyito kunubman dinyi libdobnurum. Ni Er Iya Erebdobnyi bisi si weik eboka molorbinkwan ati, kan ab tamuboka tonkwa binkwanim,” ebmou. 26Uca, Samuel biryi Saul bisi ato ebmou, “Kanci Er Iya Erebdobnyi uram kum kunubmarim ati, ni kan ab tamuboka kum binkwamanim. Ara, kan minob Israel nang weik sienyi kiamoumwe. Bok, Er Imtamnyi biryi, ‘Yuk nang asi unubkwaming,’ ebmakir ati tonkwa kum binkwanim,” ebmou.

27Ura, Samuel, “Baronkun,” tenen dangurongkwe uca, Saul biryi er alib aling talerongdamwe uca, kwiliktalebmou. 28Ura, Samuel biryi ato ebmou, “Er Iya Erebdobnyi biryi kan weik sienyi kiamoumwe wa ara arub aryi sirya dobokabdaryi, malyi dinyi ton kununa kum kururnyi biti karebmar. 29Er Iya Erebdobnyi, Israel nang sun Nai bira ninyi sirik kuma, tola kum ebmar. Ani, Er kanyi kum sukwamar,” ebmou. 30Uca, Saul biryi ato ebmou, “Niryi malyi dinyi kunubman. Ati, Ni ab kan ab tonkwa binkwanim. Ura, Israel weik nang urasin dam ab, ur nang urasin dam ab aryi, kanci nisi si erebdeibnurum. Ba, niryi Er Iya Erebdobnyi bisi si weik eboka molobkwan,” ebmou. 31Sirya ato ebmou ura, Samuel biryi Saul milibmou. Ba, banmarei ani, sirya atei binmarei ura, Saul biryi luknubdongoboka Er Iya Erebdobnyi bisi si weik ebmou.

32Ura, Samuel biryi ato ebmou, “Amalek nang sienyi Agag minob boyandarur!” ebmou. Ba, iniboka yanmai ura, Agag er kanya ara ato tenebmou, “Sun yu wekmoci ni obmanin talak ara sirya bisibmar,” tenebmouci, er kanyi karyi asa yanmou. 33Bok, Samuel biryi ato ebmou, “Kanda, ninyi on ya aryi, sunbabyi sun kwin yabwe yoa ninyi akwe oamoumwe. Ani, kanbabyi kan kwin yoa aryi deibkou bok, a obkwinkin,” ebmou. Ura, Samuel biryi Agag bisi Gilgal mutuk Er Iya Erebdobnyi urasin dam aryi, ya kungang dakoka mitik-mitik kaliblobokmou.

34Ura, Samuel bira Rama mutuk dam bindobmou. Ba, Saul bira er atei Gibea dam bindobmou. 35Samuel dina kabul talak ara Saul biryi urasin ton kum eiriramwe ani, sirya dibmou ati, Saul er boukwe mitik kum kubmou. Ba, Er Iya Erebdobnyi bibabyi, “Saul bisi Israel nang sienyi talyi tingdeiriranse,” tenebmou.

Currently Selected:

1Samuel Uram 15: MTG

Highlight

Copy

Compare