1Samuel Uram 14

1Uki tentok tum aryi Saul mi si Yonatan biryi er miliramwe kamnyi yin dobmounyi bisi ato ebmou. “A mi, nun Filistin nang yin doun nang otam kalimna yandoka mabmanga asi binkwinim,” ebmou. Er nai Saul bisi, “Ukubkwaman,” eboka molona kum cok binmou.

2A talak ara Yonatan er nai Saul bira Gibea mutuk bukamwe kubkub mutuk si Migron dam asi co si delima deyok dam bukmou. Ba, Saul er ab tonkwa kunmai nang yubwa ara yubwa 600 baryi dikum kunmai. 3A tum aryi Ahia bira Er Iya Erebdobnyi ai wa in nang ongoraming aling si Efod boyanmou. Anyi Ahia bira Ahitub mi kuramwe. Ahitub ab, er weit Ikabod ab ara imam Eli mi Pinehas biryi deiamwe mabwe. Akiryi Israel nang nirya kum bikmai talak uca, Yonatan biryi Filistin nang ibinmou.

4Ani, mutuk kon wanwanumna ara keil bitinyi bukamwe. Ton otam keil kon si ara Bozes kon eramnyi. Ba, ton atam keil kon si ara Sene eramnyi. Asi Yonatan biryi a bitinyi keil kon kwakni diniboka Filistin nang yin doun nang dinatam yandoka mabmai asi orbinkwamouci, dungkiringdenmou. 5Ton keil kon ara Mikhmas atei eitam kuboka bukamwe. Ba, ton keil kon ara outam Geba mutuk sungdoryanamwe dikum asi bukamwe.

6Ura, Yonatan biryi er milinanyi yin doubmounyi bisi ato ebmou, “A mi, a mutuk kon dinibokabnimiryi Er Imtamnyi bisi molona kum kunung ninyi asi orbinkwinim. Er Iya Erebdobnyi milibkwamasirca, Erda ninyi milina ara er mambul ton kum kurur. Ninyi ilinto babyi, ninyi mitikanun babyi er mambul ton kum kururnyi bica ati milibkwamasirca,” ebmou. 7Uca, er yin doubmounyi biryi ato ebmou, “Ur kan tenebmarim to kunubkwanim. Iya dib ebman, nibabyi, ‘Milibkwamasirca,’ tenebman,” ebmou. 8Ucab, Yonatan biryi ato ebmou, “A mutuk kon diniboka ninyi asi, ‘Eibsunung,’ tenen lak kimdarbinkwanim. 9Ba, sunci nunsi, ‘A yandoka tiklobdurum, nunsi sun dam yankwayeb,’ ebsingnyi ura, sun dam welebana kum kubkwanim. Eda, a tikmanimnyi dikum akwe tiklobokwanunum. 10Ucab, sunci, ‘A weleyarurum,’ ebsingnyi ba, welebinimnyi ura, Er Iya Erebdobnyi biryi nunti karebsici ba, sunsi obkwamanimnyi ati ebsingiryi,” ebmou.

11Ura, a bitinyi nang sun Filistin nang yin doun nang dam bindoka lak kibdanmarei. Uca, Filistin nang aryi a bitinyi nang ati ato ebmai, “Ibrani ninyi keil deyok makdobmaringci, kalikmasiring ani, anaboka yibaring o dibdendarur!” ebmai. 12Ura, Filistin yin doun nang aryi Yonatan ab, yin doubmounyi ab asi ato ebmai, “Kulaboka obkwansib ati, a weleyarurum,” ebmai. Ura, Yonatan biryi a yin dobmouci, milibmounyi bisi ato ebmou, “Welebinkwanim ati, ni kurongmanyi to akwe milibnurum. Ato ebmang ara Er Iya Erebdobnyi biryi Israel nang taruk dam karebkwinsir ati ebmanga,” ebmou. 13Ura, Yonatan minob welebinmou ba, er yin dounanyi aminda welebinmou. Ura, Yonatan welebindoka a ninyi nirya ninyi on ya aryi ya bubum dakloboknin banmou ba, er yin doubmouci, milibmounyi bira aminda tam aryi sungwe-we ebdeiboknin binmou. 14Yonatan ab, yin doubmouci, milibmounyi ab aryi a ordana yuma mar deyok koubmareici, oboka erebdobmarei. A obmarei ninyi yubwa 20 baryi obukmarei. Kiklina ara wa tomol tentok akwe iraminga kikliboka obukmarei. 15Ura, Er Iya Erebdobnyi biryi ai dobmai dam babyi, sun wa in dam babyi sun kankan dam nirya ara lilim bumum ebmou ba, sun Filistin nang nirya sun ilil kubmou. Ani, yin doun nang babyi, ninyi bublan tiringdongoramnyi ai kalingnamnyi nang nirya sirim talebmouci, mutuk ababyi lulukmou.

16Ura, Gibea-Benyamin yala mutuk Saul bisi kalikmaici, diblilibmai nang aryi dinmai ara ninyi yubwa nirya kwemdanmaia lilim ebmou. Ara, weik me kwan aryi o bina-a yana kiboka, walum-waluma dorande to kunmai asi asing eiboka lilim kekebmai. 17Ura, Saul biryi er ab tonkwa kunmai yin doun nang asi ato ebmou, “Nun atei ninyi ton da binmanunga ati, ninyi olong lelemna yuk-yuk nirya da dirdenmandarur,” ebmou. Ura, diblilibde yibanmai uca, Yonatan ab, er yin douramunyi ab a tonkwa kum tikmai. 18A kum tikmarei ura, Saul biryi Ahia bisi ato ebmou, “Er Imtamnyi ai wa in nang imam nang ongoraming aling si Efod boyarum!” ebmou.#14:18 Ara, yamin deirin keil si Urim ab Tumim ab Er Imtamnyi ai wa in nang imam nang ongon aling taramtam kibde boramnyi. Ba, a keil asi asibne uca, “Ukubmar,” eboka lak eramwe keil a kiramnyi deyok aryi, “A ongon aling boyarum,” ebmou. Sun Israel nang kankan dam ara Er Imtamnyi ai wa in nang imam nang ongoraming aling ara sun da ton kum ongoramnyi. Eda, er Ahia tentok ongoramwe deyok aryi ato ebmou. 19Er Saul biryi a Imtamnyi biti dama deirin ai wa inanyi bisi erdongou talak aryok, Filistin nang ai dobmai dikum asi lilim ilinto ebmurubde bau. Ba, Saul biryi a Imtamnyi ai wa inanyi bisi ato ebmou, “A taklobdum, kum asibdenkwanim,” ebmou. 20Ura, er Saul ab tonkwa kunmai ninyi nirya bulubmai. Buluboka binmai ani, a lilim ilinto eboka ordanmai dam bindoka dinmai uca, sun mining atei ninyi mamun ya bubum dangdaronmai asi asing eibmai. 21Ani, tonda Ibrani nang asi Filistin nang dam kuramiryi yin doun nang kiamnyi nang ara Saul ab, Yonatan ab milibmai ninyi kankan dam yandobmai. 22Ani, Israel nang ton nang Efraim mutuk kon dam minob inibmamunyi ura, “Filistin ninyi cukoka bai burorbanmang,” ena kekenmai uca, yuryanmai. Ani, sunbabyi Saul ab, Yonatan ab, Israel yin doun nang yuk nang ab antanibdobmaici, Filistin nang asi dombinmai. 23A tum ara Er Iya Erebdobnyi biryi Israel nang milibmouci, Israel nang lebdeibmou. A obdanin binmai ani, mutuk si Bet-Awen dam bisibmaici, dobindoka sirya obdanmai.

Yonatan bisi sumna dinyi lebdeibmai deyok

14:24-46

24A tum aryi sun Israel nang aryi Saul bisi erci, “Ur subdarur ebsici ba, subkwayeb,” tenen titik-titik ebokmai. Ba, ato ebmou, “Kiting kum wekabci bok, utotoa yibkwamaranyi ab, niryi ni mar ordan nang asi sunbabyi kisok kum dakmanyi bok asi, yina minob yibkwamaranyi bira subman,” ebmou. A deyok aryi sun nirya yina si tebmaici, sun mitang weik kubmou. 25Ato kubmai ura, a ninyi nirya co kankan bai binmaici, diramnyi uca, limbum tukwe umbura du mouamwe asi asing eibmai. 26Bindoka diramnyi uca, a limbum du mouamwa asi nunuboka me nunubde sangmou asi asing eibmai. Bok, ninyi tentok aryi taruk likoka ton kum yibmai. Ara, minob uca yina yibdinyi bira submou deyok aryi doboka yina kum kubmai.

27Ucab, Yonatan bira Israel nang aryi Er nai Saul bisi, “Yina yibmarinyi bira subdum,” ebmai ba, submou dinyi kum bikmou. Akiryi Yonatan er doubmou kama aryi a limbum du asi me nunubde sangmou asi likoka mutuboka yibokmou. Ba, er asing ara katabum ebmou. 28Uca, a ninyi bin tentok aryi Yonatan bisi ato ebmou, “Kan nai biryi ninyi nirya asi submararyi ato ebmar. ‘Arub aryi utotoa yibdinyi bira subman,’ ebmar ba, sun kanya, ‘Se,’ tenenmang,” ebmou. 29Uca, Yonatan biryi ato ebmou, “Ni nai biryi er mutuk Israel nang asi sirya obukmararyi ato kubmar ake. Ura, ni asing dibdenindarur, a limbum me mitikanun doboka yirongdanwe uca, ni asing wandangubnir ati dibdenindarur. 30Ato kum ebmote ura, arub aryi nun mar ordan nang yina daluboka takloabting dinyi yironkwamating. Bok, eda, ‘Yina si umbura dongona mem,’ ebmar deyok aryi yina kum yinkwamang. Ani, arub ara Filistin nang asi ninyi weik kum obkwamab,” ebmou.

31Ato ebmou ucab, a tum ara Filistin nang asi Israel nang aryi mutuk Mikhmas dam aryi obde binmai asi, mutuk Ayalon dam bindoka sirya orbinmai. Akiryi Israel nang nirya yina si tebmai aryi sun nong mitang kubmouci, diblalakman kanya deibmou. 32Ba, sun Israel nang aryi bona daluronmaici, kankana kusungdanmai. Ani, bisam domba ab, kambing ab, lembu ab, lembu mi ab ara kankana kusukdandoka, oboka ining ab tub ab asi yik yironmai. 33Ura, ninyi ton Saul bisi yandoka ato ebmai, “Kan atei ninyi ara Iya Erebdobnyi bisi manmalirdongonmangci, bisam ining yinmang ara bikmarim do?” ebmai. Ura, Saul biryi ato ebmou, “Sunci malyito kunmarum. Ati, uku talak aryok ilila keil asi bongoboka ni dam boyandarur,” ebmou.

34Ura, Saul biryi ton ato ebmou, “Sun Israel nang nirya bokwalwalabdandoka, ninyi yuk-yuk nirya ara bisam lembu ab, domba ab ni dam boyandarur. Boyamunyi ura, a dikum aryi obsinyi ba, yibkwandum. Ucab, Er Iya Erebdobnyi dam asi ining yik yiboka beterdongona ara mem,” ebmou. Ato ebmou ura, Israel nang nirya yuk-yuk bisam lembu boyanmai ura, a tum lukunda aryi anda lembu obmai. 35Ura, Saul biryi Iya Erebdobnyi biti dama deirin keil dungna, aminda ababyi labde bankwamnyi ati, yuma kobdob keil dungna labkalibmou.

36Ani, Saul biryi Israel ninyi asi ato eboka arukmou, “Arub lukunda ara Filistin nang asi dobkirikoka nirya orkiringmabyi ba, kiting deibkwande. Ba, akatei ninyi ton kam kubkwaming,” ebmou. Ba, sunci ato ebmai, “Kan ebminyi tok nun kunubkwamab,” ebmai. Uca, Er Imtamnyi ai wa inanyi biryi ato ebmou, “Ukuna kum kuabibiryok Imtamnyi ai dam bindoka molobibiryok asi binkwayeb,” ebmou. 37Ura, Saul biryi Er Imtamnyi bisi ato eboka asibdenmou, “Kanci Filistin nang asi dobkirikoka Israel nang taruk dam ur karebkwamasirim do?” eboka asibmou. Uca, a tum ara Saul molobmou dinyi asi, uram ton kum ebmou. 38Ura, Saul biryi ato ebmou, “Sun Israel nang asi, ‘Ukubkwayeb,’ eboka bomenengnandum ninyi nirya ni dam buluryandarur. Ba, arub aryi sun manmalibmarum dinyi diboka lilibdenkwayeb. 39Ni mi Yonatan biryi manmalibdongobmar bok, Er Iya Erebdobnyi si deici aryi Israel nang lebkwande ati, ni mi Yonatan bisi obibyi ba, dibkwande,” ebmou. Ato ebmou uca, Israel nang tentok ababyi uram ton kum ebmai.

40Ura, erci sun Israel nang asi ato ebmou, “Sun yuk nang ara yuk tam tikdobmunyi ura, ni ab, ni mi Yonatan ab ara yuk tam tikwanim,” ebmou. Uca, sun Israel nang aryi Saul bisi ato ebmai, “Ur kanci, ‘Ato kubkun ara teleb,’ tenebminyi to ur kunubdum,” ebmai. 41Ura, Saul biryi ato ebmou, “Nai, nun Israel nang molokunubnyi, Nai Iya Erebdobnyi, una deyok ati arub aryi ni kan wa irmilinanyi uram lak kum ebmanirim do? Niryi Imtamnyi Kansi manmalibdongobmakunun kum, ni mi Yonatan biryi Kansi manmalibdongobmakurur kum. Ara, Kanci yamin deirin dinyi si Urim deici aryi, ‘A deyok aryi kansi uram kum lak ebmakin,’ eboka lak kibdeibnurum. Uca, Kan uram keken nang Israel nang aryi, malyi dinyi kunubmangnyi ura, Kanci yamin si Tumim deici aryi lak kibdeibdum,” ebmou. Ura, yamin deibmai uca, Saul ab Yonatan ab asi lak kibmou. Ba, yuk Israel nang ara lak kum kibmou. 42Ura, Saul biryi ato ebmou, “Ni kum, ni mi Yonatan kum ati, yamin tubto deibdenkwayeb,” ebmou. Ba, yamin deirirderamnyi uca, Yonatan bisi lak kibmou. 43Ura, Saul biryi Yonatan bisi ato ebmou, “Kanda una kubmarim do? Kan kubmaminyi to nisi lak ebdum!” ebmou. Ura, Yonatan biryi ato ebmou, “Niryi limbum me asi kama aryi likoka taruk aryi doboka yibse. Ati, teleb aryi ni obnindarur,” ebmou.

44Ba, Saul biryi ato ebmou, “Wanoka, ato deyok aryi Er Iya Erebdobnyi biryi nisi ikin dinyi karebkwamanir atiba. Ani, weikto dinyi ara Yonatan kanda obkwankin,” ebmou. 45Uca, sun Israel nang aryi Saul bisi ato ebmai, “Nun Israel nang asi Yonatan erci lebdeibmasir bok, ersi obkwamarim do? Ona mem, taklobdum! Er Iya Erebdobnyi, Kam Kururnyi si deici aryi, ‘Yonatan otong lublub tentok ababyi ton sekoka tukwetam sangna kum kubkwande,’ ebmab. Ara, arub a ukubmar dinyi ababyi Er Iya Erebdobnyi biryi milibmar aryi kunubmar,” ebmai. Ura, Israel nang aryi Yonatan bisi ukuboka lebdeibmai ba, Yonatan kum obmou.

46Ura, Saul bira Filistin nang asi dombanmou uca, Filistin nang ara sun atei dobmai ai dam bindobmai. Ba, Saul bira takloboka atei tamuboka yandobmou.

Saul er ai ninyi ab, er mar ordan ninyi ab ati kerek sekeibmou deyok

14:47-52

47Er Saul bira Israel weik sienyi kiamuryi, er mar ordan ninyi dinatam-dinatam kuramnyi atei nirya mar borkiringnamwe. Er mar boramwe mutuk si ara Moab nang ab, Amon yala ninyi ab, Edom sien nang ab, Zoba mutuk taleamnyi sien nang ab, Filistin nang ab asi mar boramwe. Ba, a mar ibinmaci atei nirya ara erci orkirirongnamwe. 48Saul er mikib tingting deiboka Amalek nang nirya obkiribokmouci, Israel nang asi talyi oboka iniramnyi dinyi lebdeibmou.

49Er Saul mabwe si ara Yonatan ab, Yiswi ab, Malkisua ab deiamwe. Ba, er nebnyi du ner si ara Merab deiamwe. Ba, weit ner si ara Mikhal deiamwe. 50Saul ner si ara Ahimaas nebnyi si Ahinoam doamwe. Ba, Saul er nai weitnyi si Ner, er mi Abner bira yin doun nang sienyi kiamwe. 51Ba, Saul er nai bira Kish ba, Abner er nai si ara Ner kuramwe. Sun nang susuk ara Abiel mabwe kurandei.

52Er Saul kuramwe talak ara Filistin nang ab mitik kum ordaramnyi. Ura, er Saul kuramwe talak aryi mikib ilinto ninyi kuramnyi ninyi ara er dam buluryanmai.

Currently Selected:

1Samuel Uram 14: MTG

Highlight

Copy

Compare