1Samuel Uram 13

Filistin nang aryi Israel nang asi mar bobmai deyok

13:1-22

1Er Saul sienyi kum kibmou talak ara kwalina uki weikto kwalibmou cok sienyi kibmou. Ba, weik sienyi kibmou talak ara kwalina bitinyi kwalibmou. 2Ura, Saul biryi Israel nang yubwa 3.000 baryi wibmou. Ba, ninyi yubwa 2.000 baryi ara Saul ab Betel kon dam mutuk si Mikhmas dam tonkwa kunmai. Ba, tonda yubwa 1.000 baryi ninyi ara Yonatan ab, Benyamin yala nang mutuk si Gibea dam kunmai. Ucab, da ninyi yubwa nirya ara sun atei yuk-yuk bokdonokmou ba, binsekmai.

3Ukubmai ura, Yonatan biryi Filistin nang asi mutuk Geba dam aryi mar bobmou. Ura, a obmou uram ninyi tol ara Filistin ninyi kekebmai. A deyok aryi, “Ibrani ninyi kekebkwanunga,” tenen, Saul biryi buu ena si sangkakala aryi buu ebmou. 4Ura, sun Israel nang nirya asi, “Saul biryi Filistin nang asi ninyi ilinto oboka erebdobmar. Ba, Filistin nang aryi Israel nang asi tamuboka mar bobkwinsing,” ena kekebmai. Ato kubmar ena kekebmai deyok aryi Israel nang nirya anaboka Saul bisi Gilgal mutuk dam mar bormilirbinmai.

5Ba, Filistin nang ara Israel nang ab obdankwamaici, kongkong en yibarande keica yubwa 3.000 baryi kiknibdeibmai. Ani, bisam kuda deici bukoka mar iban nang yubwa 6.000 baryi kiknibdeibmai. Ba, tukwe bisik iban ninyi yubwa ara me kubkub aryi me wininga kilingnande to kuboka bulubmaici, mar iyanmai. Ani, Mikhmas mutuk asi Bet-Awen dam yaletam kuboka ai yandoka doboka mabmai. 6Ba, Israel nang aryi dinmai uca, Filistin nang aryi sirya aknabmai. Ura, Israel nang ara cukoka keil um wengdonmai. Tonda, keil dina-dina noutam bongong da wengdonmai. Ton nang ara keil um akdanamwe umbura wengdonmai. 7Ba, Ibrani nang ton nang ara me Yordan um kum dikum asi kouboka Gad yala nang mutuk Gilead dam bindobmai. Uca, Saul bira mutuk Gilgal dam tuba kunmou ba, Israel nang er milibmai nang ara sun kanya sirim talebmou. 8Er Saul biryi Samuel yangana dibde kuramwe ara uki tabaryi dibde kuramwe. Ucab, Samuel minob talak aryi, “A talak yankwan,” eamwe to kum kunubmou. Eda, Samuel bira Gilgal dam yangana kum kubmou ba, sun Israel nang dibde kunmai ani, boubmou ura, yuk-yuk da binsekdobmai. Ura, Saul er yuk takloboka bindobmai. 9Samuel kum yanmou deyok aryi Saul biryi ato ebmou, “Er Iya Erebdobnyi biti bisam oboka nong nirya uk daboka dama deirin bisam ab, Er Imtamnyi ab antanirdana ati dama deirin bisam ab ni dam boyandarur,” ebmou. Uca, bisam oboka nong nirya uk daboka dama deirin bisam akwe uk daboka dama deibmou. 10Ura, Saul biryi dama deiboka uk sirya daboka kimdongou bok asi, Samuel yangau asing eibmou ura, Saul biryi er dam bindoka kibdobmou. 11Kibdobmou ura, Samuel biryi Saul bisi ato ebmou, “Kan una kunmarim do?” ebmou. Uca, Saul biryi ato ebmou, “Sun Filistin nang ara nun mar bobkwamasingci, mutuk Mikhmas dam yandoka kunmang. Ba, Israel nang ara mambul kanya bobmang. Kanci, ‘A tum yankwan,’ eamoumwe talak yangana kum aryi ni ab, kan ab taklobmasingci, binsekdobmang. 12Ato kubmang deyok aryi niryi Er Iya Erebdobnyi bisi, ‘Nai, ni takniminyei boukwe kibnurum,’ eboka kum molobmanyi bok asi, ‘Filistin nang iyanganmasing ara Gilgal dam yandoka obsingnyei,’ tenen ati, minob arabkaboka dama deibman,” ebmou.

13Uca, Samuel biryi Saul bisi ato ebmou, “Kan Nai Iya Erebdobnyi biryi kansi ebdeibkou to kum kunubmarim. Ara, ni Er Imtamnyi dama deirina kikimanyi kum yanman bok asi minob kanda kikiman kum bok, dama deibmarim ara luba aryi kubmarim,” ebmou. “Ara, Erci kansi, ‘Weik sienyi kiboka Israel nang asi iya talebkwandim,’ eboka tikeibkou. 14Ucab, ukura kan weik sienyi kiboka talebumwa ara iya kum talebkwandim. Eda, ukura yuknyi bisi, Er Iya Erebdobnyi biryi Er Kanya deibunyi nun asi, ‘Ni uram keken nang asi weik sienyi kiboka kalikwande,’ eboka sirya wibmar. Ara, kanci Er ebdeibwe to kum kunurum aryi ato kubmar,” ebmou.

15Ato ebmou ura, Samuel bira Gilgal dam aryi Benyamin yala nang mutuk Gibea dam binmou. Ba, Saul bira er ab tonkwa kuramnyi nang asi mar ibinkwamai nang yubwa 600 baryi wiboka lelerdeirinmou. 16Ani, Saul ab, er mi Yonatan ab ani, er ab tonkwa kuramnyi nang ab Geba-Benyamin yala ninyi mutuk kuramnyi. Ba, Filistin nang ara mutuk si Mikhmas dam yandoka keis ol ai dobmaici, kunmai. 17Ani, a Filistin nang sun Israel nang ai umbura bona ukula daluronkwamai ati, bisik winiryi anaboka yanmai. Ton bisik ara Ofra atei eitam mutuk bisik, Syual mutuk ban bisik anaboka yanmai. 18Ba, ton bisik ara kitingbantam Bet-Horon ban bisik tam kuboka anaboka yanmai. Ba, ton bisik ara Zeboim mutuk lu wiliba tam kon mutuk tam yini mutuk ban bisik kuboka yanmai.

19Ura, Filistin nang aryi, “Ibrani ninyi asi ninyi on ya ab, ninyi on co taci ab ara sun kiknina mem,” eamnyi aryi kat dinyi besi aryi kikninanyi ton kum kikniramwe. 20A deyok aryi Israel nang nirya ara Filistin nang asi bindoka bisam lembu aryi tukwe malingnande dinyi ab, tukwe alin sekop ab, ya kala ab, tuna ya ab, yuk-yuk dinyi ab asi ya ketenanyi dam keterbinmai. 21Anda dinyi ketebkwamangnyi ati dengna ara bisam lembu aryi tukwe malingna ketebkwamangnyi ura, keil uang bitinyi asi winiryi-winiryi kiboka dengnamnyi. Ba, ya kala ab, bisam litungdongoraming balang taci ab ara keil uang bitinyi demang dengnamnyi. 22Ato kuramnyi deyok aryi ordankwamai tum ara Israel nang asi Saul ab tonkwa kuramnyi nang ara ninyi on ya ab, te balang ab ton kum doubmai. Eda, Saul ab, er mi Yonatan ab akwe a ninyi on ya doubmarei.

Yonatan ab Filistin nang ab obdanmai deyok

13:23–14:23

23Ura, Israel nang asi mar iyankwamaici, Filistin nang yin doun nang yubwa anaboka mutuk yim si Mikhmas dam maryanmai.

Currently Selected:

1Samuel Uram 13: MTG

Highlight

Copy

Compare