1Samuel Uram 12
12
Samuel biryi, “Niryi sun kalingnanyi kiboka taleansunwe to kum kubkwansin. Ukura yuknyi biryi sun kalingnanyi kiboka talebkwansir,” eboka Israel nang asi molobmou deyok
12:1-25
1Er Samuel biryi sun Israel nang nirya ati ato ebmou, “Sunci nisi molonindarur dinyi ara sirya kekesununci, sun mutuk weik sienyi kiboka talebkwansiranyi sirya tikeibsise. 2Ati, ukura a tikeibmasin weik sienyi biryi sunsi taleboka kalikwansir. Nira sirya wisi danman ati, ni mabwe sirya nebsekyi ara sun kankan dam a kununga eirindarur. Ni kam talak aryi sun kalingsinanyi kiboka kalingnansise tok asi arub ara sirya tum berekde. 3Ni a tikman ati, Er Iya Erebdobnyi urasin dam ab, niryi kisok tam me dikeiboka wa karebsinyi urasin dam aryi ni ebman dinyi asi, ‘A malyito uram ebmarim,’ ena ton ebkwamunyi ura, ur ebdarur. Niryi unanyi bisam lembu asi ukula daluboka dobdanwe do? Ani, unanyi bisam keledai asi ukula daluboka dobdanwe do? Unanyi dinyi asi tula kirikde yiranwe do? Ani, unanyi bisi yu kuboka manmalirsiniranwe do? Unanyi biryi bula dobmanou aryi ni asing kuboka ngang dakdongobkwaman do? Anda dinyi nirya ukurantinyi ura, sunbabyi tubto tamubkarebkwamasitinyi,” ebmou. 4Uca, sunci ato ebmai, “Kanci nun dinyi tula kirikde yina ton kum kuramoumwe. Ani, kanci nunsi ton kum keresurum. Ani, yuk ninyi aryi kansi bula doboka, ‘Ukubdeibsurum,’ eboka utotoa ton kum kareryanankungwe,” ebmai. 5Uca, erci ato ebmou, “Sunci nisi utotoa ton, ‘Ukubsurum,’ eboka ton kum karenindarur. Ato kuantinyi ura, Er Iya Erebdobnyi ab, Saul me kisok deici dikdongoboka wa karebmananyi ab aryi sun asing eianiringnyi ura, arub aryi, ‘Dib ukuamwe,’ ebkwandurunga,” ebmou. Ba, sunci ato ebmai, “Yo, Er Iya Erebdobnyi sirya kekebmakir,” ebmai.
6Ura, Samuel biryi sun Israel nang asi ato ebmou, “Sun abwe Musa ab, Harun ab, tikeiboka sun abwe yabwe asi Mesir dam aryi iniboka boyanamunyi, Er Iya Erebdobnyi urasin dam aryi ato ebmarum ara sirya bikmasir. 7A deyok aryi sun ab, sun abwe yabwe ab asi, Er Iya Erebdobnyi biryi lemdeisurur dinyi ati, Er Iya Erebdobnyi urasin dam asi ni ab, sun ab tonkwa lilirbinkub. 8Ara, sun abwe kisok Yakub Mesir mutuk yandoka kuramwe. Uca, sun abwe yabwe aryi Er Iya Erebdobnyi bisi moloramyi. A deyok aryi Musa ab, Harun ab asi wiboka bokdonokmou. Ba, Mesir dam aryi iniboka boyanandei. Boyanmarei ura, ‘A mutuk dam asi kunkwaming,’ tenen yandoka kabdeiandei. 9Kabdeiandei uca, sun Nai Er Iya Erebdobnyi bira molona luba kibmai. Ato kubmai ba, Er Iya Erebdobnyi biryi sun mar ordana nang Hazor mutuk yin doun nang sienyi Sisera ab, Filistin nang ab, Moab weik sienyi ab sun taruk dam karebokmou. 10Ba, sun abwe yabwe aryi Er Iya Erebdobnyi bisi ato eboka uram doramnyi. ‘Nunda Kansi takloboka kwemdeina si Baal ab, Asytoret ab asi molonub ara malyi dinyi kunub. Ati, Nai Iya Erebdobnyi, Kanci nun mar ordan ninyi aryi talebsei ara taruk lobdeibsurum. Lobdeibsiminyi ura, Kansi tubto tamuboka molonkwankib ati ebmab,’ ebmai. 11Ato ebmai deyok aryi Iya Erebdobnyi biryi Yerubaal#12:11 Yerubaal yuk si ara Gideon. Hak 6:25-2 dan 7:1 dibdendarur. ab, Barak#Hak. 4:6; 7:1; 11:29 ab, Yefta#Hak. 10:6–12:7 ab, Samuel ab bokdonokmou. Ba, sun mar ordan ninyi kankan dam kuramnyi asi lemdeiryanmai. Lebdeibmasei deyok aryi sun mangkau asa kurandau. 12Ucab, Amon mutuk sienyi si Nahas iyanganmasou asi asing eibmandau ura, ato ebmandau, ‘Weik sienyi tentok nunsi kalikoka talebkwansir,’ eandau. Ucab, sun Nai Iya Erebdobnyi bisi sun sienyi kurur bok asi ato eandau. 13Ura, ato kurandau deyok aryi sun talebkwansir sienyi molororandauci, wibdobdaunyi sun sienyi sirya kibmasir asing eibmarum. Ara, iya dib sirik Er Iya Erebdobnyi biryi sun weik sienyi kiboka talebkwansiranyi tikeibmasir. 14Ati, sun ab, sun sienyi kiboka kalingkwansiranyi ab aryi Er Iya Erebdobnyi bisi ilil kuboka, Ersi moloboka, Er uram kekeboka, Erci mem en dinyi asi malyi kimna mem. Eda, sun Nai Er Iya Erebdobnyi ebdeianci uram akwe kununkwandarur. 15Eda, Er Iya Erebdobnyi biryi ebdeianci uram asi kum kekeramunci, yan yaniramunyi ura, Er taruk aryi sunbabyi, sun talebsounyi babyi asi obkwansir. 16Ati, ukura Er Iya Erebdobnyi biryi ikin ilinto deyok nun sun urasin dam karebkwamasir ati, dinmandarur. 17Ukura roti kikniraming keica si gandum du mouanca kiraming talak kubmar. Ati, niryi Er Iya Erebdobnyi bisi liman ab, mo ab molobnyi ba, karebkwamar. Er Iya Erebdobnyi urasin dam asi, ‘Nun sienyi tikeibdobkwayeb,’ eboka iya malyito dinyi kunundarur,” ebmou. 18Ato ebmou ura, a tum aryi Samuel biryi liman ab, mo ab molobmou. Ba, liman deboka mo cebmou. Ukubmou aryi Israel nang ara Er Iya Erebdobnyi ab, Samuel ab asi sun ilil weik kubmou. 19Sun Israel nang nirya aryi Samuel bisi ato ebmai, “Nun kan wa irmilikin nang aryi, ‘Nun sienyi tikeibdobkwayeb,’ tenen ukuramoubwe uca, malyi dinyi kunurtabangnub aryi dibsekibyei ati, kan Nai Iya Erebdobnyi bisi molobliknibsurum,” ebmai.
20Ura, Samuel biryi Israel nang asi ato ebmou, “Sunci malyi dinyi kunundarur bok, Er Iya Erebdobnyi bisi ilil aryi Ersi tangna mem. Eda, kanya koubtaleboka Ersi moloboka tuba milinkwandarur. 21Talyi kununa kum kubkwamasici kwemdeina ab, lemdeisina kum kubkwamasici kwemdeina ab ati, kanya deirina mem. 22Er Iya Erebdobnyi si ara weiknyi kurur aryi Er mabwe, Er uram keken ninyi kibdeibsou atiba, bai kum donoksurur. 23Niryi Er Iya Erebdobnyi bisi molona kum kubmanyi ura, malyi dinyi kunubnyei ati, sunti Er Iya Erebdobnyi bisi molona kum kubkwansin. Ato kubkwan ara niryi sunsi bisik u dikum eterebkwansin. 24Er Iya Erebdobnyi biryi sun kankan dam aryi ilinto dinyi kunurur ati, Ersi ilil kiboka busul asa aryi Er kikwe kanya deiboka molonkwandarur! 25Ucab, sun tuba malyi dinyi kunuramunyi ura, Er Iya Erebdobnyi biryi sun ab, sun sienyi ab asi oboka kum dandeibkwansir,” ebmou.
Currently Selected:
1Samuel Uram 12: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
