1Samuel Uram 11

Saul biryi Yabesh mutuk ninyi asi lebdeibmou deyok

11:1-15

1Er Nahas Amon mutuk sienyi ab, er yin doun nang ab aryi, Yabesh-Gilead ninyi asi mar bobkwamaici, anaboka weik atei lika bisik bublan dam keis ol ai yanmaici, doboka mabmai. Ba, Yabesh ninyi aryi Nahas bisi ato ebmai, “Kanci nunsi, ‘Ato kubkwamasin,’ en dinyi ton ebdeibsiminyi ba, kan ebminyi to lamlamak eboka kununkwayeb,” ebmai. 2Ucab, Amon atei sienyi Nahas biryi sunsi ato ebmou, “A ebkun dinyi asi kunubmunyi ura, ukubkwansin en dinyi lak ebkwamasin. Ara, ato, sun asing siriktam asing asi kwebkaboknin yibinkwamasin. Ukubsinyi ura, sun Israel nang nirya asi alyi kibminiknyi ba, sun alyi kubkwande,” ebmou. 3Ucab, Yabesh atei weik nang aryi ato ebmai, “Uki ton karebmasiminyi ba, Israel nang kunung dikum nirya ebde yibinkwayeb. Ba, nun lebdobmasintonyi ton kum eibibyi ura, kansi, ‘Ur nun asing kwebsurum,’ eboka bokarerdaryankwayeb,” ebmai. Ura, Saul bisi ninyi bokdonokmai ba, ninyi ton Saul bisi Gibea dam ebde binmai.

4Ura, ninyi bokeibmai ninyi ara Saul atei Gibea dam bindoka a uram ebmai ura, sun Israel nang nirya ngolokoka engena weik engebmai. 5A talak ara Saul bira wa dam binmou ani, er bisam lembu dongtam kuboka aminda yanganmouci, ato eboka asibmou, “Anda ninyi ara una kubmar ati engenmang da?” ebmou. Uca, yuk ninyi aryi ersi ato ebmai, “Yabesh ninyi aryi ato ebde yanmang, ‘Moab sienyi Nahas biryi siriktam asing kwebkaboksinyi ba, kwanimtam asing demang kuboka, nun wa il don ninyi kibkwandum,’ ebmar uram kekebmang ati engenmang,” ebmai. 6Ba, Saul ato uram kekebmou ura, Imtamnyi Kanya koukwe olokmou. Ura, er yu ara uk angnanda ato kubmou. 7Ato kubmou ba, er bisam lembu yim ton, ner ton doboka obmou. Ura, sekoka Israel nang kuramnyi tok nirya deibmouci, ninyi ton bokarebde yibindarur! Bokarebde yibanmamunyi ura, “Ato ebkwandarur,” eboka uram deibmou. “Unanyi biryi Samuel ab, Saul ab asi kum milibdinyi bira ni bisam lembu a oboka kalibmanto, sun bisam lembu ababyi oboka kalibkwanung,” ebmou. Ba, Iya Erebdobnyi biryi Israel nang asi ilil kanya kibdeibokmou ba, ninyi nirya anaboka mar ibinmai. 8Saul biryi Bezek dam bindoka mar ordan ninyi olong lelebmaia diramwe uca, Israel nang ara yubwa 300.000 baryi lelebmai. Ba, Yehuda yala ninyi ara yubwa 30.000 baryi lelebmai asi asing eibmou. 9Ninyi a bokdonokmai nang asi ato ebdeibmai, “Yabesh-Gilead ninyi asi ato ebkwandarur! ‘Ambutum kiting tingyangaci ura, sun lebkwamasiranyi yankwamar,’ ebkwandarur,” ebmai. A uram ebdeibmai ba, erbinmai nang sirya yandobmai ura, Yabesh atei ninyi sun kanya teleb kubmou. 10Ura, Yabesh ninyi aryi, “Saul ab, er yin doun nang ab nunsi ola lebkwamasurur,” tenen Nahas bisi ato ebmai, “Ambutum ara kanci nunsi, ‘Ukubkun,’ tenebsiminyi to ur da ukubkwamasirim ati, boboka karerdaryankwamab,” ebmai.

11Ura, mabmai ani, ambutum berekmou ura, er Saul biryi mar iban nang leleboka olong yuk-yuk wimou ara olong winiryi wibmou. Belekuna kiting kum deiabwe bok, a wibmou nang aryi sun mar ordan dam ninyi Amon ninyi asi sun keis ol ai yandoka doboka wekmaia dam asi mar iboka dalubmai. Ura, onmai ba, bokwalwalaboka tentok-tentok baronmai ninyi ababyi doboka obkiribmai. Ba, akatei ninyi, ninyi singsing tentok ababyi ton kum kubmou.

12Ura, akatei ninyi aryi Samuel bisi ato ebmai, “Unanyi biryi, ‘Saul bira nun atei sienyi kimna kikiman kum,’ ebyi do? Ato ebunyi bira nun dam boyamunyi ba, obkwayeb,” ebmai. 13Uca, Saul biryi ato ebmou, “Arub aryi Er Iya Erebdobnyi biryi Israel nang asi lemna dinyi karebmasir ati, sunci ninyi ona mem,” ebmou.

14Ani, Israel nang ati Samuel biryi ton ato ebmou, “Nun Gilgal dam bindoka weik atei sienyi wa yumkuna tingdeirirbinkwayeb,” ebmou. 15Ura, sun Israel nang nirya anaboka mutuk Gilgal dam binmai ura, Er Iya Erebdobnyi urasin dam aryi Saul bisi weik sienyi tikeibmai. Ura, bisam oboka lemna dinyi Er Iya Erebdobnyi biti dama deibmai. Ura, Saul ab, Israel nang nirya ab sun kanya kilkil weik kuboka dama deibmai.

Currently Selected:

1Samuel Uram 11: MTG

Highlight

Copy

Compare