1Raja-raja Uram 9
9
Er Imtamnyi biryi Salomo dam asi liki bitinyi dinyi lak kibdanmou uram deyok
9:1-9
(2Taw. 7:11-22)
1Ura, sienyi Salomo biryi Er Iya Erebdobnyi ai Bait Allah ai sirya dobmou. Sirya dobmou ura, er kun ai ab asi, “Ato kuboka dobkwan,” teneamwe to kuboka sirya dobmou. 2Ba, Er Iya Erebdobnyi biryi Salomo dam asi liki bitinyi dinyi Gibeon mutuk dam yandoka lak kibdanmou. 3Er Iya Erebdobnyi biryi Salomo bisi ato ebdeibmou, “Ni urasin dam kan molon dinyi ara sirya kekebkisiryi, kan dobumwe ai ara Ni si weik eboka molonin ai kibdobse. Ba, Ni si akai dam iya kubkwande. Tonda, Ni dirnilin dinyi ab, Ni kanya ab ara iya akai dam kubkwande. 4Kan deyok ara kanci kan nai Daud kuramwe to Ni urasin dam asi inina dongna kum uca diboka kuraminci, Nisi dib teneboka, Ni ebdeianyi to asi kunubkwantumwe. Tonda, Niryi kanti erdeirikin dinyi asi diboka kekeboka kunubde biminyi ura, 5Niryi kansi Israel mutuk sienyi kiboka talen dinyi ara iya ati karebkwankin. Ara, kan nai Daud deici aryi ato ebdeianse, ‘Kan deibdoba mabwe yala aryi suncok Israel mutuk sienyi kiboka talenkwaming,’ ebdeianse. 6Bok, kan ab kan mabwe ab ara Nisi dong kibnumunci, Ni erdeirin uram nirya asi talernuruna kum uca, sunci yuk kwemdeina-yuk kwemdeina kutam ikdongoboka molobmunyi ura, 7Niryi sun Israel ninyi ati karebsise mutuk dam aryi bai donokwansin. Ani, Niryi Niti si weik eboka molonin ai kibdobse ai taklobkwan. Ba, sun yuk dinatam-dinatam atei nang aryi sun Israel nang asi ina ngilikokabsingiryi, akwi tubminikwansing. 8Ba, akai ara sici kibminikne ba, a kubminikanyi ai dam yibangnyi ninyi ara ngalukoka ilil dobdobingiryi, ato ebkwaming, ‘Unatoa ati Er Iya Erebdobnyi biryi akai ab, akatei nang asi ato dinyi taklobwe ba, ato kubwe do?’ 9Ba, sun ninyi aryi ato ebkwaming, ‘Ara, Israel ninyi aryi sun Nai Er Iya Erebdobnyi biryi Israel nang sun abwe yabwe asi Mesir mutuk aryi boboka binamwe. Bok, sun Israel ninyi Ersi takloboka yuk kwemdeina asi talebnuruboka molonung. A deyok aryi, Er Imtamnyi biryi sun kankan dam aryi sunsi malyi kurminingni dinyi karebwe,’ ebkwaming,” Er Imtamnyi biryi Salomo bisi ato eboka ebdeibmou.
Salomo biryi Israel mutuk atei ilinto doramwe deyok
9:10-28
10Ura, sienyi Salomo biryi Er Iya Erebdobnyi ai ab, er sienyi ai ab sirya dobmou talak kwalina 20 baryi bisibmou. 11A bitinyi doamwe ai ara Tirus mutuk sienyi si Hiram biryi ai don dinyi nirya miliamwe ba, doamwe. Akai dona ati miliamwe co si ara co aras ab, co sanobar ab, emas keil ab, ani sienyi Salomo moloamwe to nirya miliamwe ba, doamwe. A deyok aryi sienyi Salomo biryi Tirus mutuk sienyi si Hiram bisi Galilea mutuk asi weik atei 20 baryi karebmou. 12Ba, sienyi Hiram er mutuk Tirus aryi kuboka a karebmou atei-atei diryanmou. Uca, a karebmou atei-atei nirya ara er kanya teleb kum kubmou. 13Ura, Tirus mutuk sienyi Hiram biryi Salomo bisi ato ebmou. “Ni kwit, andato atei asi karebmanirim darib?” ebmouci, anda karebmou atei asi, “Kabul,” eboka si doamwe. Ara, “Iya ukutotoa ton kuna kum atei,” eboka si dobmou. Asi, uku talak ababyi, “Kabul,” eboka doamwe si akwe tuba enung. 14Ato kubmou bok, Tirus mutuk sienyi Hiram biryi sienyi Salomo biti emas 4.000 kilogram baryi kareamwe.
15Ura, sienyi Salomo biryi Er Iya Erebdobnyi ai ab, er kun ai ab, Yerusalem atei weik lika ab dobkwamuryi, sun ninyi asi ato kuboka arukamwe ba, doramnyi. Ani, Hazor atei ab, Megido atei ab, Gezer atei ab asi sasibdeibkwamwe deyok aryi ninyi arukamwe ba, weik lika ereboka doramnyi. 16Ba, Gezer atei ara Mesir mutuk sienyi si Firaun biryi mar boboka akatei ninyi asi muna kibdongoamwe. Ani, sun Kanaan mutuk ninyi bok, akatei kuramnyi ninyi ababyi obsekamwe. Akatei ninyi asi oboka muna kibdongoamuryi, uk daboka arabdamwe. Ato kuamwe atei asi, Mesir sienyi nebnyi sienyi Salomo dobmou tum aryi er nebnyi ati akatei kareamwe. 17A kareamwe atei asi sienyi Salomo biryi tubto dobde binmou. Ani, Bet-Horon Hilir atei ababyi erci tubto dobde binmou. 18Ani, Yehuda mutuk asi yini mutuk atei si Tamar ab, Baalat atei ababyi erci tubto dobtabakde binmou. 19Ani, sienyi Salomo biryi yina-yina deirin atei ab, kereta deirin atei ab, a mutuk ninyi bisam kuda bon atei ab dobtabakde binmou. Ani, Yerusalem mutuk ab, Libanon mutuk kon ab asi sienyi Salomo erci taleamwe mutuk asi, “Ato kuboka ai dobde binkwan,” teneamwe to kuboka dobtabakde binamwe. 20Ba, sienyi Salomo biryi anda dortabangdamwe ai doramnyi atei ninyi ara sun Amori atei nang ab, Het atei nang ab, Feris atei nang ab asi, “Akatei ai dobtabakde bindarur!” eboka dimnamwe. Ani, tonda sun Hewi yala ninyi ab, Yebus yala ninyi ab asi dimnamwe ba, doramnyi. 21Sun anda dimnamwe ninyi ara Kanaan mutuk minob a kuramnyi ninyi asi sun Israel mutuk ninyi aryi obde baramnyi ani, takdongoamnyi ninyi asi sienyi Salomo biryi dimnamwe. Ani, anda ninyi ara uku talak ababyi a kubde dimnamwe to kuboka tuba dimnung. 22Bok, sienyi Salomo biryi sun Israel mutuk ninyi nong ara anda ninyi asi il wa dimnamwe to ton kum dimnamwe. Eda, sunsi yin doun sien nang ab, mar boboka ordan kereta sien nang ab, mar ordan bisam kuda bon nang sien nang ab, yuk-yuk sien nang ab asi kareramwe. 23Sienyi Salomo biryi sun ninyi 550 baryi nang asi er ai don ninyi sien nang kibkwamnyi ati wiboka sien nang tikeiamwe.
24Sienyi Salomo biryi er ner kun ai sirya dobmou. Ba, Salomo ner Firaun nebnyi ara Daud atei kuramwe ani, ukuryok sirya dobmou ai yandobmou. A ner ai ara Er Imtamnyi ai doamwe dinatam otam lumun dobmou ai asi yandobmou. Ura, sienyi Salomo biryi anda doamwe ai lika ereboka dobmou.
25Ba, kwalina tentok kwalibni tok ara sienyi Salomo biryi Er Iya Erebdobnyi biti liki winiryi ninyi dama deiriramwe. Er Imtamnyi biti anda deiriramwe dama ara bisam sapi nong nirya uk dan dama deirin dinyi ab, Er Imtamnyi biti, “Lebkwansir,” tenen ati dama deirin dinyi ab, Er Iya Erebdobnyi biti dama deirin keil lamna dub daramwe. Tonda, tong teleb co kemenyan Er Imtamnyi biti uk daramwe. Ato kuboka sienyi Salomo biryi Er Imtamnyi ai dobmou.
26Tonda, sienyi Salomo biryi weik me kwan boyiban weik co ngun-ngun kikniamwe. Ara, Edom mutuk bok mitik atei si Ezion-Geber Elot atei dam weik me Teberau asi, “Kiknibdarur!” eamwe ba, er il wa dimdamwe ninyi aryi kikniamnyi. 27Ba, Tirus mutuk sienyi si Hiram biryi er mabwe, weik co ngun-ngun boyibana co biribdob nang sienyi Salomo bisi dongoamwe. Ba, sienyi Salomo weik co ngun-ngun bon nang asi, “Ato kuboka bobkwandarur,” eboka etereramnyi. 28Ba, sun sienyi Salomo mabwe ab, Tirus mutuk sienyi mabwe ab Ofir mutuk binamnyi. A mutuk binamiryi sienyi Salomo biti emas 14.000 kilogram baryi doboka boyanmai. Ato kuboka Israel mutuk sienyi Salomo biryi Er Imtamnyi ai ab, er mining kun ai ab asi, “Ato kuboka dobkwan,” teneamwe dinyi nirya asi kunuboka sirya dobmou.
Currently Selected:
1Raja-raja Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
