1Raja-raja Uram 8

“Ukubdarur-ukuna mem,” en uram co sangkol boboka Er Imtamnyi ai deirirbinmai uram deyok

8:1-13

(2Taw. 5:2–6:2)

1Ura, weik sienyi Salomo biryi, “Ukubdarur-Ukuna Mem,” en uram deirin co sangkol, Daud atei, Sion aryi Imtamnyi ai doboka deibkwamai ati, sun Israel nang asi naboka, “Yerusalem atei yandarur,” ebmou. Ara, sun Israel sien wisi-wisi nang ab, Israel yala yuk-yuk sien nang ara Israel sun sien nang ab asi nabmou. 2Ba, sun Israel nang nirya aryi weik sienyi Salomo urasin dam buluryanmai. Ara, wala si Etanim wala tabaryi#8:2 A uki tum aryi sun Israel nang aryi weik kwalina, “Hari Raya Pondok Daun,” kwalibmai. dobmou ura, Salomo doamwe Er Imtamnyi ai bublan kukwabman ati weik kwalina kwalibkwamaici, buluryanmai. 3Ba, sun Israel wisi-wisi sien nang sirya yanmai ura, sun Imtamnyi biti dama deirin nang imam nang aryi a co sangkol dobtalebmai. 4Ura, “Ukubdarur-Ukuna Mem” en uram deirin co sangkol ab, malyi dinyi beterdongona mem bona-bona ab, ai Kemah Suci ai aryi doboka bobmaici, Salomo biryi ukuryok dobmou Imtamnyi ai asi bobinmai. Ara, sun Iya Erebdobnyi ai wa in nang ab, Lewi yala nang ab aryi ato kuboka bobmai. 5Bok, “Ukubdarur-ukuna mem” en uram co sangkol dam bulubmai nang ara sienyi Salomo ab, sun Israel nang nirya ab aryi Er Iya Erebdobnyi urasintam tikmaici, bisam kambing ab, bisam lembu ab oboka Er Iya Erebdobnyi biti dama deiboka molobmai dinyi ara nukman kumto kubmou. 6Ura, sun Er Imtamnyi ai wa in nang aryi, Er Iya Erebdobnyi biti dama deiboka molon co sangkol Er Imtamnyi ai bobindoka deibmai. Akai dongtam ai ara iya malyi dinyi beterdongona kum ai, malaikat ol atoanun kiknibdeiboka akubkweteamwe amwetam nong asi bobindoka deibmai. 7Ba, a co sangkol deirin ai ara ninyi malaikat ol atoa kiknibdeiamwe aryi dinatam-dinatam alibtam kuboka kalubdongoamwe. 8A co sangkol maloua camni co ara cang weik aryi, Er Iya Erebdobnyi biti molon co sangkol deirin ai umtam kuboka asi er urub belerbinamwe. Ba, a co er urub ara baitam yibanmangnyi ninyi aryi ara kum eiramnyi. Ato kuboka doamwe co ara ukubabyi tuba a kubwe tok. 9Ba, a co sangkol umbura ara Horeb kon aryi Musa biryi keil bitinyok kibdongoamwe. A keil bitinyi deici ara Er Iya Erebdobnyi biryi sun Israel nang, Mesir atei aryi boyibaramwe talak aryi, Er Imtamnyi biryi sunsi, “ ‘Ato kubdarur-ato kuna mem,’ kunubmunyi ura, Niryi kisal dakwansin,” eboka sekeiamwe.

10Ura, sun Iya Erebdobnyi ai wa in nang imam nang aryi malyi dinyi beterdongona kum ai aryi anaboka yangai talak aryi, Er Imtamnyi ai um nirya asi duwa aryi wekmouci, kunuk-kunuk ebdongoboka libdobmou. 11Ba, a duwa biriman deici aryi Er Iya Erebdobnyi yanmouci, akai nirya milil arabmou. Ba, sun Imtamnyi ai wa in nang a tikman kum kubmou aryi, Imtamnyi biti molorbaramnyi to kuboka sunci ton kum molorbinmai.

12Ura, Salomo biryi Imtamnyi bisi ato eboka molobmou,

“Nai Iya Erebdobnyi, Kanci kiting imtam kibdeibumwe.

Bok, Kanda duwa kunuk kankan asi kuna teleb kurankir.

13A talak aryi, niryi Er Iya Erebdobnyi iya kubkwandim ai sirya dobkin.”

Er Iya Erebdobnyi biryi Daud bisi, “Ato kuboka karebkwankin,” ebdeiamwe to kuboka karebmou deyok

8:14-21

(2Taw. 6:3-11)

14Ura, sienyi Salomo dangubokmouci, sun Israel mutuk ninyi nirya ara Er Imtamnyi kisal dangna ati a tikoka kalikmai asi Salomo biryi sunsi kisal dakmou. 15Ura, Salomo biryi sun Israel nang asi ato ebmou, “Er Iya Erebdobnyi, Israel mutuk ninyi sun Nai bisi si weik ereboka kibdobkwayeb. Er mikib aryi akai sirya dobde. Ani, Erci ni nai Daud bisi minob uca ebdeiamwe to kuboka sirya kunubmar. 16Ara, ‘Sun Israel nang asi Mesir atei aryi boyananse. A talak aryi, Ni si weik eboka moloryangan ai dobkwanse atei ati, Niryi yuk atei-yuk atei yala nang tukwe dangna ara wimna kumci eda, Israel mutuk nang asi wianse. A wibse ura, Ni mabwe sun Israel nang sienyi kiboka talebkwamunyi bira Daud bisi wiboka wa kareanse,’ ebdeibmou.” 17Salomo biryi tubto ato ebmou, “Ni nai Daud biryi Israel nang aryi nun Nai Iya Erebdobnyi bisi si weik eboka moloryangan ai asi dobkwan,” teneramwe. 18-19Ba, Er Iya Erebdobnyi biryi ersi ato ebdeiamwe, “Kanci, ‘Ni si weik eboka moloryangan ai dobkwan,’ tenen teneibumwe dinyi ara telebto teneibumwe bok, a, ‘Dobkwan,’ tenen teneibumwe ai ara kanci kum dobkwandim, eda kanci deibkwandim mi nong aryi, Ni si weik eboka moloryangan ai dobkwande,” ebdeiamwe. 20“Ura, Er Iya Erebdobnyi biryi ebdeiamwe to kuboka sirya kunubdeibmou. Ara, niryi sirya Israel ati sienyi kiboka ni nai Daud unubse. Ani, Israel nang sun Nai Iya Erebdobnyi bisi si weik eboka moloryangan ai sirya dobse. 21Er Iya Erebdobnyi ai umbura tam ababyi, ‘Ukubdarur-ukuna mem,’ en uram kibdongoboka deirin co sangkol deirin ai ababyi sirya yuk dobse. A co sangkol umbura ara keil ila bitinyi asi Er Iya Erebdobnyi biryi nun abwe yabwe asi, ‘Ato ukubkwansin,’ eboka sekeiamwe keil kuramwe. Ara, Er Imtamnyi biryi sun Israel nang asi Mesir atei aryi bobde yanamwe talak aryi sekeiamwe,” Salomo biryi sun Israel nang asi ebmou.

Salomo biryi Er Imtamnyi bisi molobmou deyok

8:22-53

(2Taw. 6:12-42)

22Ura, Salomo biryi sun Israel nang wekmaia noutam tingyanmouci, Er Iya Erebdobnyi biti dama deirin keil lamna dubtam urasin deiboka taruk lakokmou ura, ato eboka molobmou, 23“Nai Iya Erebdobnyi, Israel nang aryi, ‘Nun Nai,’ eboka molokunungnyi! Im dangna tukwe dangna ara iya Kantonyi da ton kum kunung. Sun Israel nang aryi sun kanyi Kansi deiboka, ‘Nun Nai,’ eboka molokunung nang asi, ‘Ato dinyi karebkwansin,’ ebdeiaminyi to luba kum kimnandim, eda busul kuboka kunubdeiboka karerum. 24Ara, arub tum aryi Kan wa inanyi, ni nai Daud bisi, ‘Ato kuboka karebkwankin,’ ebdeiamoumwe to kuboka kunubdeibsirim. 25Ara, ‘Kan deibdoba mabwe yala aryi diboka-diboka Ni urasin dam aryi kan kurum to teleb akwe kubingnyi ura, suncok Israel mutuk sienyi kiboka talenkwaming,’ ebmoumwe. Nai Iya Erebdobnyi, Israel nang sienyi, Kan wa inanyi ni nai Daud bisi, ‘Ato kun dinyi karebkwankin,’ ebdeiamoumwe dinyi ababyi arub aryi kunubdeibdum. 26Ati ura, Nai Israel Sienyi, Kan wa inanyi ni nai Daud bisi Kan ebdeiamoumwe to kuboka nirya kunubdeibdum.

27Bok, Nai Imtamnyi, dib ati nun ab tonkwa tukwetam kubkwayeb do? Im weika, imtam nong kobdob ababyi Kanda deknebkwankurura aryi, Nai Kanda nun ab tukwetam kubman kum. Ani, niryi Kan Imtamnyi biti dama deiboka molon ai ati dobse ai ara wanok aryi Kan kubman kum. 28Ati, Nai Iya Erebdobnyi, niryi kan urasin dam yandoka moloronman dinyi kekebnurum! 29Kanci kitingtam lukunda akatei tam dibderum, Kanci ato ebdeiamoumwe to, ‘Ni si akatei kubkwande,’ akatei dam aryi Kan wa inanyi molon dinyi kekebdum. 30Akatei dam aryi Kan wa inanyi ab, Kansi, ‘Nun Nai,’ eboka molokunung nang, Israel mutuk nang ab aryi molonmab dinyi kekebsurum. Kan ai imtam aryi nun molona kekebsiminci, nun malyi kun dinyi kilibsurum.

31-32Tonda, ninyi tentok aryi er kwit bisi malyi kun dinyi kubdongoante ati, anyi biryi Imtamnyi Kanti dama deiboka molon keil ai dam yandoka subdankwamoute ara imtam aryi Kanci kekebokabtumci, kubmating to kuboka sunsi wenebkwamatumwe. 33Tonda, Kan mabwe sun Israel mutuk nang asi sun mar boboka ordana nang aryi sunsi muna kibdongobting ara sunci Kan urasintam asi malyi kurdongorankiting deyok aryi ato kubdongobting. Uca, sunci Kan urasin dam yandobtingci, Kan si ereboka sun malyi kun dinyi akai dam aryi Kansi molobdobting. 34Ura, imtam aryi Kanci sun molona kekeboka sun malyi kun dinyi kilibtumci, sunsi sun abwe yabwe ati kareamoumwe mutuk tukwetam tubto tamubdeibtumwe.

35Sunci, Kan urasintam asi malyi kuna ati, im eibman kumci mo ton kum cebte ura, sunci akai dam yandokabtingiryi, Kan si weik eboka sun malyi kun dinyi taklobting. 36Ura, Kanbabyi sun molona imtam aryi tanglona kumci kekeboka Kan mabwe Israel mutuk nang sun malyi kun dinyi kilibkwamatumwe. Ara, Kanci teleb bisik sun binkwanting bisik asi, ‘A bisik binkwandarur,’ ebtumwe. Ani, Kanci sunti karebumwe ba, sun mutuk tukwe kibwe mutuk tukwe ab ati mo karebtumwe. 37Ani, akatei nang asi iya mambul weik don dinyi dobdobting. A mambul don dinyi ara sampar youn kum, sun gandum asi orminingni belbela ab kwising ab kum eibte. Ani, sun mar ordana nang kum aryi, Kan mabwe atei dam iyandokabtingci dalubting. Tonda, sunsi yuk weik youn da talebte. 38Ba, ninyi tentok kum, Kan mabwe Israel mutuk nang nirya kum aryi akatei dam yandoka luknubdongoboka sun taruk lakoka molobkiting. 39Ura, Kanbabyi tanglona kum uca, Kan iya kurum atei imtam aryi sun molona kekebtumwe. Tonda, sun molona kekeboka, sun malyi kun dinyi kilibtumwe. Ura, Kan tentok aryi ninyi kanya yuk-yuk asi bingdum deyok aryi sun yuk-yuk malyi kuanting to kuboka wenebkwamatumwe. 40Ba, Kanci sun abwe yabwe ati kareamoumwe mutuk tukwe dam kuramingiryi, sunci Kansi ilil teneboka kunkwanting.

41Tonda, Kan mabwe Israel nang akwe kuma eda, sun yuk-yuk atei nang ababyi, Kan si erebdeiboka molobkwankingnyi ati era mutuk aryi yankwaming. 42Ara, Kan mikib weik dinyi ab, Kanci ilil tenen kiknirum dinyi ab aryi, sunci akai dam yandoka, Kansi moloryankwanking. 43Ba, Kanci, Kan ai imtam aryi sun molona kekeboka karebkwandim. Ba, sun tukwe dangna nang nirya aryi, Kan si bikingiryi, ara Er Imtamnyi biti dama deiboka molon ai dobwe teneboka bikwaming.

44Ani, Kan mabwe Israel mutuk nang aryi sun mar ordan nang ati, ‘Ur mar boboka ibindarur,’ ebkwandim ba, sunci dantam-dantam iyibinkwaming ababyi ara akatei Kanci wibumwe ba, dobse aitam urasin deibmangiryi Kansi molobkwankiting. 45Ba, Kan ai imtam aryi sun molona kekeboka, sun mar ordana nang asi, sun muna kirdongon dinyi karebkwandim. 46Bok, tukwetam nang nirya ara malyi kun nang kunung. Akiryi, sun Kan mabwe Israel nang aryi, Kan urasin dam asi malyi dinyi kubdongobkingnyi ura, Kan yu aryi sunsi deiblobmimba, sun mar ordana nang aryi sunsi muna kibdongoboka, tabwe deboka yuk atei bobindokabingiryi, ninyi dongon ai dongobkwaming. Ara, era mutuk babyi, dam mutuk babyi sunsi bobinkwaming. 47Ara, sun a bobindoka dongoamingnyi ai aryi, ‘Imtamnyi, Kan urasintam asi malyi dinyi kuboubwe,’ teneboka bikdangiryi, Kansi ato eboka molobkwanking, ‘Nunci sirya malyi dinyi kubdongobkubwe,’ ebkwanking. 48Ani, sun boboka dongoamingnyi atei aryi, sun malyi kun dinyi takloboka Kansi tanglona kum uca kanyi deiboka molobkiting ba, Kanci wibokabminci sun abwe yabwe kareamoumwe atei, niryi Kanti si weik ena ati dobse atei tam asi urasin deibtingiryi, Kansi molobkiting. 49Ba, Kan kun ai imtam aryi sun molon dinyi kekebokabtumci, sunsi sun kunubmating to kuboka karebkwamatum. 50Ani, Kanci sunti, ‘Ato kuna mem, ato kubkwandarur,’ ebdeibumwe dinyi asi kum kunuramingiryi, Kan urasintam asi malyi kurdongokunung dinyi ara sunsi kilibkwamatum. Ba, sun mar ordana nang aryi boboka ninyi dongon ai dongorbinamnyi nang aryi, sunsi tuba ati yu kum bobting, eda sunsi boukwe kibdeibting. 51Sunda Israel nang ara Kan mabwe, ati sunsi boukwe kibdum. Mesir atei aryi, sunsi il weik wa dimnamnyi ba, mambul weik doramnyi asi boyanamoumwe ati molobman.

52Nai Iya Erebdobnyi, ni Kan wa inanyi molonun dinyi ab, Kan mabwe Israel nang aryi, ‘Nai, nunsi lebdobsurum,’ Kansi tuba-tuba moloraming dinyi ab kekeboka karebsurum. 53Nai Iya Erebdobnyi, nun abwe yabwe asi Mesir atei aryi kuboka boyangaramoumwe talak aryi, Kan wa inanyi Musa deici asi sirya sunsi ebdeiamoumwe to kuboka, im dangna tukwe dangna nang kankan aryi, sun Israel nang asi wibokabumci, Kan mabwe kibumwe,” sienyi Salomo biryi ato eboka molobmou.

Karen dinyi ab kisal dangni dinyi ab deyok

8:54-61

(2Taw. 7:1-3)

54Salomo biryi er yan kutam sunsunukeiboka tukwe ikdongobmouci, er taruk imtam lakweleboka Er Iya Erebdobnyi bisi sirya molobmou ura, erci Imtamnyi biti dama deiboka molon ai dam aryi tikokmou. 55Sirya molobmou ura, tikokmouci, sun Israel nang nirya asi kisal dakmou. Ura, erci, uram weikanun ibokaburyi, ato ebmou, 56“Er Iya Erebdobnyi biryi Er mabwe Israel mutuk nang ati teleb asa akwe kun dinyi karebmasir ati, Ersi, ‘Nun Nai,’ eboka kibkwayeb. Ara, Er wa inanyi Musa deici aryi sun Israel nang asi, ‘Teleb asa akwe kun dinyi karebkwan,’ ebdeiamwe. A ebdeiamwe to kuboka arub aryi sirya kunubdeibmar. 57Nun Nai Iya Erebdobnyi bisi molobni ba, Erci nunsi deiblobokabsirirnyi, yuk atei donongsina kumci eda, nun abwe yabwe asi dibniliboka kalingnamwe to kubkwansir, 58bok, Erci nun kanya asi dangubdeibsute ba, Er Imtamnyi biryi tenen dinyi ab, nun abwe yabwe asi, ‘Ukubde binkwandarur!’ ebdeiamwe dinyi nirya ab asi kunubde bitibyi. 59Ba, Nun Nai Iya Erebdobnyi urasin dam aryi a molobmanto kuboka ni ab, Imtamnyi mabwe sun Israel nang ab asi, kitingtam lukunda kisal dakde bisurum. 60Ato kubsiminyi ba, sun tukwe dangna nang nirya aryi, ‘Yuk Imtamnyi da ton kum kurur eda, Er Iya Erebdobnyi tentok kurur,’ teneboka bikwanking. 61Ani, sun Imtamnyi mabwe ara sun kanya tentok bobokabmunci, Er Iya Erebdobnyi bisi moloboka, Er ebdeiansici to kuboka arub ebdeibsir to asi kunubde bindarur,” Salomo biryi sun Israel nang asi ebmou.

Er Imtamnyi biti dama deiboka molorban ai bublan kukmai deyok

8:62-66

(2Taw. 7:4-10)

62Ura, sienyi Salomo ab, sun Israel nang nirya ab aryi, Er Iya Erebdobnyi biti dama deiboka, uk dabmaici molobmai. 63Ba, Er Imtamnyi biryi lemdeirina ati, Salomo biryi Iya Erebdobnyi biti bisam lembu sapi yubwa 22.000 baryi ab, bisam kambing domba 120.000 baryi obmouci, Imtamnyi biti dama deiboka molobmou. Ato kuboka, Salomo ab, sun Israel mutuk nang ab aryi, Imtamnyi ai bublan kukmai.

64A tum aryi, sienyi Salomo biryi Er Iya Erebdobnyi ai Bait Allah ai dam, noutam keta asi malyi dinyi beterdongona kum keta kibdeibmou. Ba, a keta asi erci Imtamnyi biti dama deiboka molobmou. Ara, bisam domba ab, yina-yina ab, lemdarona ati dama deirin dinyi ab deiboka molobmou. Ani, Imtamnyi biti ai dam asi dama deiboka molobmou ara yaletam aryi, Imtamnyi biti ninyi dama deirin keil lamna ara mitik ati akai dam asi deiboka molobmou.

65Ura, a tum aryok, sienyi Salomo ab, sun Israel nang ab nirya aryi, Er Iya Erebdobnyi ai dam asi weik kwalina kwalibmai. A kwalibmaici, kuramnyi uki ara uki tabaryi nirya a kuramnyi. Ba, era atei ninyi ababyi ilinto a kwalina dam yanamnyi. Ara, sun Hamat atei bisik wengban ai aryi kuboka Mesir me youkwa nong atei, era mutuk nang ababyi nirya yandoka bulubmaici, weik kwalina, kwaliramnyi ara uki empat belas baryi. 66Ba, a kuramnyi asi uki inbaryi tum ara sienyi Salomo biryi sun Israel ninyi nirya asi, “Ur bindobdarur,” ebmou. Ba, sun Israel ninyi nirya ara sun kanyi karyi asa aryi anabdobmaici, sienyi Salomo bisi kisal dakmai. Ani, Er Iya Erebdobnyi bisi, “Nun sienyi Salomo kisal dakdum,” eboka molobmai. Ato kuboka sun kanya karyi asa anabdobmai ara Er Iya Erebdobnyi biryi Daud ab sun Israel ninyi nirya ab asi kareboka boukwe kimdamwe dinyi ati kubmai.

Currently Selected:

1Raja-raja Uram 8: MTG

Highlight

Copy

Compare