1Raja-raja Uram 10
10
Syeba mutuk sien ner aryi sienyi Salomo bisi dirbinmou uram deyok
10:1-13
(2Taw. 9:1-12)
1Syeba mutuk sien ner aryi kekeramwe uca, “Sienyi Salomo bira etekdob bingna dinyi Iya Erebdobnyi biryi karebwe ba, bikwe,” eramnyi uram kekeramwe deyok aryi kemdeirin uram minob bikman kum dinyi akwe bindoka asiboka ukurdenmou. Ara, “Etekdob bingna dib bikwe do?” tenen ukurdenmou. 2Erci, yin doun nang ab, er wa irmilin nang ab ilinto iniboka bobmouci, er bisam unta yabwe aryi dengna weik keil si emas ab, perak ab, dengna weik dengnaming keil yala yuk-yuk ab, co yung tong telebto erande dinyi yala yuk-yuk ab nirya bobmaci, er Salomo dam bindoka Yerusalem atei yanmai. A ner Salomo atei sirya binmou ura, er teneramwe to kuboka Yerusalem atei boyandoka sienyi Salomo bisi karebmou. Ura, Syeba mutuk sien ner biryi, “Ukuboka-ukuboka asibdetinyi,” teneramwe dinyi nirya asibmou. 3Uca, a ner aryi Salomo bisi asirdenmou dinyi nirya asi lak ebmou. Salomo er walwal dinyi ton kum kubmou. 4Ura, Syeba mutuk sien ner aryi, Salomo diboka bingdon dinyi ab, er kun ai doramwe dinyi ab asi nirya er asing aryi eibmouci, bikmou. 5Tonda, er kwaning lukoka co lamna deici deirina ab, er ai wa in nang buramnyi to ab, er ai me ilikoka kwaning yuramnyi ninyi aryi kuramnyi to dinyi ab, me yiramnyi dinyi ab, er Nai Iya Erebdobnyi dama deiboka uk daramnyi to asi nirya Syeba atei sien ner aryi asing eibmouci, er dib teneboka er ilil dobdobmouci, kisal dakmanto kum kubmou. 6Ura, a ner aryi sienyi Salomo bisi ato ebmou, “Kan bingni dinyi ab, kan deyok ab ati, ninyi aryi ni dam nungnung ara dib do? Tola do? teneranse. 7Bok, ni atei aryi kan deyok ati nungkunung dinyi ara niryi diba tenena kum kunun aryi, ni damnyi yandoka ni asing aryi sirya eibkin. Diba, kan bingna dinyi ab, kan taleboka telebto kuboka ai dorum dinyi nirya ara ni kekeranse to nirya bisibkaboka, kum kekeranse dinyi ababyi nirya kubmarim,” ebmou. 8“Tonda, kan nerabwe babyi, kan wa irmilin nang babyi, kan kisal dangna aryi sun kanya teleb asa aryi kan arukminyi to kuboka kunurdeirikunung. 9Kan Nai Iya Erebdobnyi biryi kanyi deibkouci, er sienyi kibkwande eboka wibkou, ara Israel mutuk sienyi kibdeibkouci, sun sien nang buraming sokon karebkou; ara kanci iya teleb dinyi ab, u dikum dinyi ab akwe kubmurubde binkwandim,” akiryi Erci kansi Israel sienyi kibdeibkou 10Ura, Syeba mutuk sien ner biryi sienyi Salomo bisi dengna weik keil si emas er ikin ara 4.000 kilogram baryi ab, dengna weik keil yala amuma-amuma ab, tong telebto erande dinyi totoa ilinto ab boyandokaburyi, er tenen dinyi nirya lak eboka karebmou. A sienyi Salomo bira minob talak ara tong teleb erande dinyi bona-bona ara ilinto ton kum boyangaramnyi ba, taleramwe. Eda, Syeba mutuk sien ner biryi karebmou bona ab, tong teleb erande dinyi ab ara ilinto karebmou.
11Tonda, Ofir mutuk aryi sienyi Hiram co ngun-ngun deici aryi Salomo biti keil si emas ab, dengna weik co si cendana ab, dengna weik keil yala yuk-yuk ilinto boyangaramwe. 12Ba, a boyangaramwe co cendana ara sienyi biryi Iya Erebdobnyi ai dam lika ab, er ai lika ati doboka doamwe. Ani, tonda sun mot semni nang ati kecapi ab, gambus ab kiknibdeiamwe. Akiryi, a co cendana ara yuk nang aryi ilinto boyangana kum kuramnyi. Ba, tonda a talak ara a ilinto co ababyi ton eirina kum kuramnyi.
13Ura, sienyi Salomo biryi Syeba atei sien ner asi, erti yanman ninyi ati er bona kareramwe to kuboka karebmou. Ani, tubto Syeba sien ner aryi yuk bona ababyi molobtabakmou ba, karebmou. Salomo biryi a ner asi ato kuboka karebmou ba, a ner er milin nang ab er atei bindobmai.
Salomo er bona talen deyok
10:14-29
(2Taw. 9:13-28)
14Kwalina uki tentok aryok Salomo biti emas boyangaramnyi dinyi, er ikin nungna ara ikin 23.000 kilogram baryi boyanamnyi. 15Tonda sun bona dengtamurdana nang akiryi dengnamnyi dinyi ab, Arab mutuk sien nang ab, Israel yuk-yuk sien nang ab aryi tukwe dengna ati emas boyangaramnyi dinyi ara erci kum nungdamwe.
16Er sienyi Salomo biryi er wa irmilin nang asi ato ebmou. “Mar lilirona ati co ila asi emas keil aryi nunuboka denebmunyi ura, ililanun kiknibdarur!” ebmou. Ba, mar lilirona yubwa 200 baryi emas aryi deneboka kiknibmai. 17Ani, tonda erci, “Emas keil aryi nunuboka co ila asi deneboka mar lilirona mitik dinyi yubwa 300 baryi kiknibdarur!” eboka arukmou. Ba, emas keil dua kilogram aryi kiknibmai. Ani, sienyi Salomo biryi a kiknibmai mar lilirona nirya ara weik ai si “Hutan Libanon Ai” umbura deibmou.
18Tonda, sienyi Salomo biryi sien nang bun sokon asi dengna weik bisam gajah kait si ab, telebto emas ab aryi deneboka ilila bun sokon kiknibmou. 19Ba, a bun sokon ati burbinkwamanaryi er yan yaniboka welebana ara nabaryi labde weleamwe. A sien nang bun sokon dongtam ara bisam sapi kisok yangkol yok atoanun dongtam kisok deirina tam asi kiknibdeiamwe. Ba, dongtam kubkub-kubkub buntam bitinyi ara burbinaryi taruk deirin ai kiknibdeibnin yibinamwe. 20Ba, siriktam babyi, kwanimtam babyi ara a bun sokon laboka dobde weleamwe er nungna nabaryi laboka doamwe dub asi, yu bisam singa atoanun asi amolbaryi kiknibdeiboka bukeibnin yibinamwe. A kikniamwe bun sokon ara yuk-yuk weik atei sien nang ababyi Salomo kikniboka buramwe to ton kum kikniramnyi.
21Salomo er me yin moyok nirya ara emas aryi kiknin dinyi akwe deiriramwe. Ani, “Balai Hutan Libanon,” er ai deiriramwe bona-bona nirya ababyi emas aryi kiknin dinyi akwe deiriramwe. Salomo sienyi kiboka taleamwe talak aryi, keil si perak bona er dengna ara outamtoto dengnamnyi. 22Ara, sienyi Salomo bibabyi er ilila co ngun-ngun deibdob aryi, Tirus atei sienyi si Hiram co ngun-ngun ab aryi sun tonkwa antanibdobnaryi irandei. Ba, a ilila co ngun-ngun aryi uki kwalina winiryi kwalibni tok sienyi Salomo biti emas ab, perak ab, tonda bisam gajah er dengna weik si ab, weinya si kera ab, maka merak ab boyangaramwe. Ara, sienyi Salomo dengna weik keil emas ilinto taleramwe akiryi. 23Ba, yuk tukwetam sien nang bingni dinyi ab, sun bona-bona taleramnyi dinyi ara mitik. Bok, sienyi Salomo bingni dinyi ab, er taleramwe bona-bona ara nukman kumto kuboka taleramwe. 24Ba, sun tukwe dangna kuramnyi ninyi nirya aryi, Er Imtamnyi biryi bingni dinyi Salomo biti kareamwe dinyi asi, “Er eterena eiboka kekebtibyi,” teneboka yangaramnyi. 25A yangaramiryi sunci yuk-yuk boyangaramnyi dinyi ara emas ab, perak ab, yin mar ab, to en keica ab, ongon aling ab, kuda ab, keledai ab asi uki kwalina o kwali-o kwali ban tum nirya ato akwe kuboka boyangaramnyi.
26Ba, Salomo biryi kongkong eboka boyibaraming keica kereta ab, yin doun nang, bisam kuda deici bukoka ordan nang ab kiknibminikamwe. Ura, erci kereta yubwa 1.400 baryi ab, yin doun nang yubwa 12.000 baryi ab deiamwe. A kikniamwe kereta yubwa nirya ara Yerusalem atei deiamwe. Ba, tonda er kuramwe dam mitik atei kereta deirin atei asi deiamwe.
27Er sienyi biryi Yerusalem atei keil sirik yubwa atoanun, erci dengna weik keil perak ilinto kiknibde deiriramwe. Tonda, mutuk lu tam asi mutuk kon tingnande co ara atoanun, erci co aras ilinto miningdamwe.
28Ba, Salomo er bisam kuda ara Kewe mutuk ab, Misraim mutuk ab aryi boyangaramwe. Ara, erti dengni nang aryi sun mutuk dengdaming to kuboka deki boyangaramnyi. 29Ba, Misraim atei aryi dekoka boyangaramwe kereta er nungna ara dengna weik keil yubwa 600 baryi dekamwe. Ba, bisam kuda dengna nungna ara dengna weik keil perak yubwa 50 baryi dekamwe. Sun deici aryi, sunci ato kuboka Het mutuk sien nang ab, Aram mutuk sien nang ati, “Deknindarur,” eamwe.
Currently Selected:
1Raja-raja Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
