1Raja-raja Uram 7

Salomo atei deyok

7:1-12

1Salomo biryi Er Imtamnyi ai sirya dobmou ura, er kubkwamwe ai dobkalibmou. Dobde baramwe ani, sirya dobdongobmou uki nungna ara kwalina 13 baryi kwalibwe ura, er ai sirya dobdongobmou. 2Sienyi Salomo biryi atei dobdanamuryi, “Balai Hutan Libanon,” eboka si doamwe. A doamwe ai cangtam kiklina ara 44 meter baryi kikliamwe. Ba, bumang tam ara 22 meter baryi kikliamwe. Ba, akai abyokomna cang ara 13,5 meter baryi kikliboka doamwe. Ba, akai abyokomna ara Libanon mutuk co si mek aryi lelebdeiamuryi, doamwe. 3Ba, akai aruma tam ara co si mek aryi doamwe. Ba, akai abyokomna alibtam ara co mek aryi siklibdongoboka doamwe. Ba, akai er abyokomna co ara 15 baryi aryi neiktoto sekoka lelebdeiamuryi, doamwe. A nirya antaniboka nungna ara 45 baryi kikniamwe. 4Tonda, mitik bisik bublan winiryi botobkwetebnin yibinamwe. Ara, kwanimtam bisik babyi, siriktam bisik babyi, winiryi-winiryi kiboka botoamwe. Ba, a botoamwe bisik winiryi nirya ara neiktoto akwe kuboka botobkwetebnin yibinamwe. 5Ba, a mitik-mitik bisik bublan botobkweteamwe kiklina nirya ara segi empat akwe kuboka doamwe. Ba, otam mitik bisik bublan babyi, atam mitik bisik bublan babyi ara ebwanwanubdanandei. 6Tonda, erci yuk ai doamwe. Akai si ara, “Balai Saka,” eboka doamwe. Ba, akai er cangtam kiklina ara 22 meter baryi kikliboka doamwe. Ba, er bumang tam ara 13,5 meter baryi kikliboka doamwe. Ba, akai bisik yangantam kuboka asi, abyokomna yuk murubdongoboka doamwe. Ani, akai bisik wengbana ara kweitata dakamwe. 7Tonda, yuk ai doamwe si ara, “Balai Singgasana,” eboka doamwe. Ara, uram sisikoka, “A kubmarim to dinyi ara teleb, a kubmarim to dinyi ara malyi,” eboka uram sirya sengkweten ai doamwe. Ba, akai aruma tam aryi kuboka tukwe lamna nirya ara co mek abilinga aryi doamwe. 8Ba, Salomo er ai nong ara a winiryi doamwe ai atoanun doamwe. Akai ara weik uram ati wekoka sisingni balai ai aryi lumuntam bok yuk keta asi doamwe. Tonda, a neiktoto ai akwe bok, Mesir sienyi nebnyi asi Salomo doamwe ner kun ai ati yuk doamwe.

9A doamwe ai abilinga nirya ara dengna weik keil aryi doamwe. Ba, akai baitam babyi, aitam babyi, ai dongtam babyi, akai yuma talingna outam aryi kuboka ai aruma tam nirya ara ai don ya si pahat aryi a keil asi neiktoto sekoka doamwe. 10Akai yuma talingna tam nunukoka ikamwe keil ara ilila keil dengna weik keil aryi yuma nunukoka iknin yibinamuryi, doamwe. Ba, anda ilila-ilila keil sun kiklina ara 3,5 meter baryi ab, empat meter baryi ab keil aryi kikliboka doamwe. 11Akai asi nunukamnyi keil alibtam ara dengna weik keil aryi sekoka neiktoto kibdeboka abilinga doamuryi, Libanon mutuk co mek aryi lelebdeiboka doamwe. 12Salomo ai dam keta ab, Er Imtamnyi ai dam keta ab, Er Iya Erebdobnyi ai umbura wengbinkwaman ati bindoka buramnyi keta a nirya ara keil ila winiryi lelebdeiamwe. Ba, alibtam dungna doamwe ara co mek las tentok aryi doamwe. Ba, a winiryi ai keta ara lika doboka aknabdongoamuryi, doamwe.

Er Imtamnyi ai mil dangna keil tembaga aryi doamnyi deyok

7:13-51

(2Taw. 2:13-14; 2Taw. 3:15–5:1)

13Ura, sienyi Salomo biryi er arungnanyi bisi, “Tirus mutuknyi si Huram borbirum,” eboka arukmou. 14Erda sulyi ner aryi deibdoba mi kuramwe. Er kwin bira Naftali yala ner kuramwe ba, er nai bira Tirus ateinyi kuramwe. Ba, er nai bira tembaga deyok asi bingni dinyi bita bikamuryi, tembaga in wa ai inanyi kuramwe. Ato kunanyi kuramuryi, sienyi Salomo dam yandoka sienyi wa iramwe.

15Ura, Huram biryi ilila abyokomna bitinyi tembaga aryi kiknibmou. Sun cang kiklina ara 8 meter baryi kiknibmou. Ba, a abyokomna kisok kaluna ara 5,3 meter baryi kiknibmou. 16Ba, a abyokomna bitinyi sun kisok kaluna ngang dam asi kweirya ati kisok bukeibmou. A kikniamwe kweirya cang ara 2,2 meter baryi kiknibmou. 17Ani, a keil tembaga abyokomna dub ngang dam ara tembaga aryi wiboka ngang karakeibnin yibinmou. 18Tonda, co delima du lumuna bitinyi aryi lumuboka karakeibnin yibinmou. Ara, a abyokomna ngang karangna delima du nirya ara 200 baryi lumubmou. 19Ba, a abyokomna dub asi sikil keta larande to kuboka kiknibdeibmou. Ba, a sikil keta cang ara 1,8 meter baryi kiknibmou. 20Ara, a bitinyi abyokomna dina-dina kisok dub nong asi deibmou. 21Ba, a kiknibmou abyokomna tembaga ara weik uram sisingni ai si balai atei dam keta tam kuboka asi tikeiboka dobmou. Ura, siriktam abyokomna si ara, “Yakhin,” eboka si donmou. Ba, kwanimtam abyokomna ara, “Boas,” eboka si dobmou. 22A bitinyi abyokomna sirya tikeibmouci, sikil keta atonun kiknibdeibmou aryi doboka bukeibnin yibinmou.

23Ura, Salomo arukmou to kuboka Huram biryi tembaga aryi utotoa ilingdongon me kwebde deirin meyok sangkol kikniamwe. A me deirin sangkol sibarya otam aryi kuboka atam kiklina ara 4,4 baryi kikniamwe. Ba, er lulu aryi kuboka a sangkol sibarya tam ara 2,2 baryi kikniamwe. Ba, er a nirya aknardongona cang ara 13,2 baryi kikniamwe. 24Ba, a me deirina sangkol lulu ara labu du atoanun aryi yakna bitinyi lelebdeibnin yibindoka kikniamwe. 25A me deirin sangkol ara tembaga aryi kikniboka bisam lembu atoanun 12 baryi kikniamwe deici asi bukeiamwe. Ara, ton winiryi bisam lembu sun urasin ara me utam deiboka bukeiamwe. Ba, ton bisam lembu winiryi ara kitingbantam urasin deiboka bukeiamwe. Ba, ton winiryi bisam lembu ara me youkwetam urasin deiboka bukeiamwe. Ba, ton winiryi bisam lembu ara yaletam urasin deiboka bukeiamwe. 26A me deirin sangkol er bukam ara 7,5 sentimeter baryi kikniamwe. Ba, sibarya ara co keta oboka akurande to kuboka kikniamwe. Ba, a deirin sangkol me dongoramnyi ara 40.000 liter baryi dongoramwe.

27Ani, tonda Huram biryi kereta takubaryi kikniamwe. Anda kikniamwe kereta sun cang ab, sun ila ab ara 1,8 meter baryi kikniamwe. Ba, sun lulu tam aryi kuboka sibarya dangdang cang ara 1,3 meter baryi kikniamwe. 28Anda kereta nirya ara co las aryi kikniboka doamwe. Ba, er sibarya tam babyi lulu tam babyi nirya co las aryi uturuboka kikniamwe. 29A daraboka doamwe co las deici ara yu kam singa ab, bisam sapi ab, malaikat atoanun si kerub ab eitam-outam nirya uturuboka kikniamwe. Ani, a ilila baskom bisik asi co keta kibdongoboka diribkwetebnin yibinamwe. 30Ba, anda kereta sun roda ara tembaga aryi dumbaryi-dumbaryi yuk-yuk kikniamwe. Ba, sun kubkub ara a sangkol barimna ati co kwakwa dumbaryi dina-dina dibnin yibinamwe. Ba, sangkol barimna ati ikweleamwe kwakwa deici baitam ara uturuboka co keta kikniamwe. 31Ba, a dumbaryi kwakwa urub ara a sangkol baribkwamwe ati ton co kwakwa barimna aryi kuboka ton kwakwa barimna dukdongobdanin yibinamuryi, telebto kikniamwe. A sangkol barimna eitam beleamwe cang ara 44 sentimeter baryi belerbinamwe. Ba, a co outam cang ara 22 sentimeter baryi ikweleamwe. Ba, er a moyok sibarya dam ara kweirya ati uturuboka kikniamwe. 32Ba, sun roda dangdang cang ara 66 sentimeter baryi kikniamwe. Ba, sun roda ara a co sangkol amwetam asi kikniamuryi, yangaamwe co las ab denebdeiamwe. 33Ba, anda roda ara kereta yan serek atoanun kikniamwe. A dumbaryi kikniamwe roda nirya ara tembaga aryi nunuboka kikniamwe. 34Kereta amwetam ara dumbaryi barimna outam belerbinamwe ara kereta ab a co barimna ab laboka kikniamwe. 35Kereta dub alibtam belerbinamwe cang ara 22 sentimeter baryi kikniamwe. 36A kereta barimna ab, a daraboka doamwe co las deici ara yu kam singa ab, malaikat atoanun si kerub ab, co palem ab, co palem keta atoanun uturuboka eitam-outam nirya kikniamwe. 37Ato kuboka a takubaryi kereta nirya ara tembaga aryi uk nunuboka meter kiklina neiktoto akwe kiknibmou. Ara, sun nong weik babyi sun sengdona babyi nirya ara neiktoto akwe sekoka kiknibmou.

38Ani, Huram biryi kereta yuk-yuk akaboka weik baskom takubaryi kiknibmou. A takubaryi baskom sun noutam cang ara 1,8 meter baryi kiknibmou. Ba, a baskom dingibkwamwe me ara 800 liter baryi me dingina kikimanto kuboka kiknibmou.

39Ura, Harum biryi Er Imtamnyi ai siriktam kuboka ara kereta amubaryi deibmou. Ba, kwanimtam kuboka ababyi kereta amubaryi deibmou. Bok, a sangkol weik dinyi ara Er Imtamnyi ai kitingbantam siriktam asi deibmou.

40Ani, Huram biryi kuali toto ab uk sici don sekop toto ab, bisam ining kwen moyok toto ab kikniamwe. Huram biryi sienyi Salomo biti Er Iya Erebdobnyi ai deibkwamwe bona nirya ara ato kuboka kiknibmou. 41Ara, weik abyokomna bitinyi kiknibmou. Kiknibmouci, a abyokomna bitinyi asi kisok bukeibmou. Ura, a abyokomna bitinyi kisok dub ara tembaga aryi wiboka sun kisok kalubdeibnin yibinmou. 42Ura, delima du 400 baryi akiryi a abyokomna bitinyi sun ngang asi delima du lumuna bitinyi lumuboka karakeibnin yibinmou. A kikniamwe delima ara a abyokomna bitinyi alib asi teleb kalubdeiamwa dub asi kalubdeiamwe. 43Ani, kereta ara takubaryi kikniamwe. Ura, a kikniamwe takubaryi kongkong ena dub asi me ilingna ati deirin baskom yuk-yuk akaboka takubaryi kikniamwe. 44Tonda, tembaga aryi ilila me deirina kikniamwe. Ara, tembaga aryi bisam lembu amolbaryi baryi kikniamwe ura, ilila me deirin sangkol ara a bisam lembu amolbaryi deici asi deiboka bukeiamwe. 45Tonda, kuali ab, uk sici don sekop ab, bisam ining kwen moyok ab kikniamwe. Huram biryi sienyi Salomo biti Er Iya Erebdobnyi ai deibkwamwe bona nirya ara ato kuboka kiknibmou. Ura, a bona nirya ara tembaga aryi lubdanamnyi ba, mil dangdamwe. 46Sienyi Salomo biryi minob uca ato eboka arukamwe. “A Er Iya Erebdobnyi ai ati bona-bona nirya me Yordan duman Sukot atei ab, Sartan atei ab noutumang tembaga kiknina mutuk dikum kiknibdarur,” eboka arukamwe. 47A tembaga aryi kikniamwe bona nirya ara ilinto deyok aryi sienyi Salomo biryi, “Sun ikin ara unabaryi kubwe do? tenen kiklibdendarur,” eboka arungna kum kubmou. Ara, tembaga yubwa ilinto deyok aryi ikin kikliboka nungna ara nuksekman kumto kubmou.

48-50Ani, sienyi Salomo biryi Er Iya Erebdobnyi ai deibkwamwe bona-bona ababyi emas aryi kiknibmou.

Ara, Er Imtamnyi biti tong teleb dinyi uk dan co lamna ara emas aryi deneboka dobmou.

Er Imtamnyi biti roti dama deirin co lamna.

Pelita ara bublan dam aitam kuboka malyi dinyi beterdongona mem ai asi deiamwe. Pelita amubaryi ara siriktam deiamwe. Ba, ton amubaryi ara kwanimtam deiamwe.

Atei keta toto ab

Pelita toto ab

Souna toto ab

Me kwen moyok toto ab

Bisam ining kwen moyok ab

Me yin moyok

Uk kalum deirina toto

Tong teleb co kemenyan toto ab suwa

Uk sirika don suwa

Akai bisik bublan babyi, akai umtam bublan darana ab

A bona nirya ara emas aryi kikniamwe.

51Sienyi Salomo biryi Er Iya Erebdobnyi ai sirya dobmou. Ura, er nai Daud biryi Er Iya Erebdobnyi biti dama kareramwe bona-bona nirya ara bona deirin ai deibmou. Anda bona ara perak ab, emas ab, yuk bona-bona nirya ab neik ai akwe deibmou. Ato kuboka sienyi Salomo biryi Er Iya Erebdobnyi ai ab, er kun ai ab sirya dobmou.

Currently Selected:

1Raja-raja Uram 7: MTG

Highlight

Copy

Compare