1Raja-raja Uram 6

Salomo biryi Er Imtamnyi biti dama deiboka molon ai si Bait Allah doamwe uram deyok

6:1-38

(2Taw. 3:1-14)

1Ura, sun Israel nang Mesir atei aryi kuboka yandamiryi kuramnyi talak ara Salomo biryi Israel mutuk sienyi kiboka taleamwe. A yandoka kuramnyi talak kwalina ara 480 baryi kimbinmou. Ba, sienyi Salomo biryi Israel mutuk sienyi kiamuryi, taleamwe ara kwalina dumbaryi kimbinmou. A kimbinmou kwalina bitinyi kwalibloboka ara wala si Ziw dobmou. A talak aryi sienyi Salomo biryi Er Iya Erebdobnyi biti dama deirin ai dobkalibmou. 2Sienyi Salomo biryi, “Er Iya Erebdobnyi biti dama deirin ai dobdarur,” eboka diamwe ba, doamwe ai cang dika kiklina ara 27 meter baryi doamwe. Ba, bumang dika kiklina ara 9 meter baryi ba, abyokomna cang kiklina ara 13,5 meter baryi doamwe. 3Ba, Er Imtamnyi biti dama deirin ai er taramtam dika babyi, dongtam dika babyi ara 9 meter baryi doamwe. 4Ba, akai dangdang asi mitik-mitik bisik botordeirina ara ninaboka neik dam-dam asi botobkwetebnin yibinamwe. 5Ba, akai dinatam-dinatam eitam dongtam nirya ara tabangdongon ai wiliboka-wiliboka dobde weleamwe. Ara, liki winiryi dobde weleamwe. 6Ba, tukwetam ai, yuma wiliboka doamwa ai weika ara kiklina 2,2 meter baryi doamwe. Ba, noutam ai kiklina nirya ara 2,7 meter baryi doamwe. Ba, winiryi ai kiklina nirya ara 3,1 meter baryi doamwe. Akiryi outam ai abilinga kiklina ara bukam kibdeiboka doamwe, ara tabangdongon ai co mousi-mousi aryi Er Imtamnyi aitam deibdongobnin yibinamwe. 7Ba, akai talingna sirya tikeibmou talak aryi, akai dobkwamuryi, boboka bulubdeiamwe keil aryi doboka dobkalibmou. Ba, sun bing dangni dinyi si martil ab, besi ya ab aryi akai kum dobmai. Ara, “Akai doramingiryi, congom-congom ebde doramingnya lilim asi kekebingnyob,” tenen ati, anda ya keil telena atikwe bobindoka teleramnyi. 8Tukwe kobdob ai bisik ara akai siriktam kuboka botoamwe. Ba, sun ninyi ara a bisik kuboka noutam ai wengyanaryok, lamna winiryi dungna ai wengbaramnyi. 9Akai sirya dobmouci, aruma ara co mek aryi dobmou. 10A weik ai kubkub dinatam-dinatam babyi, dongtam babyi nirya tabangdongon ai sirya doboka aknabdongobmouci, tukwetam ai lang babyi, noutam ai lang babyi, im dub ai lang babyi akai lang nirya kiklina ara 2,2 meter baryi doamwe. Ba, tabangdongon ai aruma ababyi co mek aryi dobdongobmou.

11Akai sirya dobmou ura, Er Iya Erebdobnyi biryi Salomo bisi ato ebmou, 12“A dorum ai deyok ati ebkwinkin. Ara, kanci Ni dam akwe kubokabminci, Niryi ebdeiankinyi to asi nirya kunuboka, yuk-yuk dinyi asi kum moloraminyi ura, Niryi minob uca kan nai Daud bisi ebdeianse to kuboka kan dam kunubdeibkwankin. 13Ara, ato, Niryi kan dorum ai asi, sun Israel mutuk nang kankan kuboka, sunsi iya kum deiblobkwan,” ebmou.

14Salomo akai sirya dobdongobmouci, 15akai umbura eitam-outam co mek aryi tabakoka dobmou. Bok, ai tukwe yangamni tam ara co mek yuk yala lase aryi taboka dobmou. 16Ba, akai umbura aryok asi dongtam ara eitam-outam kuboka co mek lase aryi wilibdandoka doamwe. Ba, akai aryok asi dongtam ai kiklina nirya ara 9 meter baryi. Akai ara iya beterdongona kum ai dobmou. 17Ba, weik noutam ai kiklina ara 18 meter baryi. 18Akai umtam ara co mek aryi abilinga tabakoka doamwe ba, mitik keil ababyi lak eibman kumto kuboka doamwe. Ara, a co mek abilinga iamwe deici asi labu du ab, co keta orande si mekar atoanun uturubdandoka telebto kiknibde yibinamwe. 19Akai umtam nong ara Er Iya Erebdobnyi biryi, “ ‘Ukubdarur en uram,’ deirin co sangkol deirin ai dobdarur,” ebmou ba, dobmai.

20Akai umtam ai ara cang dika, bumang dika, abyokomna cang kiklina nirya ara neiktoto kuboka 9 meter baryi akwe kiklibnin yibinamwe. Ba, akai umtam ara tabtabingna kum emas aryi deneboka doamwe. Ura, Er Imtamnyi biti tong teleb co yung uk daboka co mek aryi kikniboka co lamna asi minob ai deibdongobmai. 21Ba, akai umtam wengyangan ai bisik ababyi emas rantai aryi bisik bublan lilirdeirina kaluna aryi biribkweteboka wilibdeiamwe. Ura, minob ai ababyi aitam asi emas aryi deneboka doamwe. 22Akai umtam nirya ab, Er Imtamnyi biti tong teleb co yung uk daboka co lamna ababyi emas aryi deneboka doamwe. A co lamna umtam ai bisik bublan lilirdeirina kaluna tam deibmai.

23Ba, a dongtam um ai ababyi, Er Iya Erebdobnyi uram eryuryangananyi malaikat atoanun bitinyi kiknibde yibinamuryi, maka ol atoanun otam atam lanabkweteboka doamwe. A malaikat atoanun bitinyi kikniamwe si ara kerub. A kikniamwe dinyi ara minyak co aryi doamwe. Ba, lang kiklina nirya ara takubaryi. 24Ba, a kikniboka doamwe keica si kerub sun cang dinatam ol dinatam ol kiklina nirya ara 2,2 meter baryi. Akiryi, kerub dinatam ol dinatam ol antaniboka kiklina nirya ara 4,4 meter baryi doamwe. 25A kerub bitinyi sun cang babyi, sun nong sengdona babyi ara menengbisimdana kumci, kiklina neiktoto dakamuryi, doamwe. 26Ba, a bitinyi kerub lang sun cang kiklina ara 4,4 meter baryi. 27A bitinyi kerub ara noutam kobdoba umtam ai asi kikniboka deiamwe. Ba, a kerub bitinyi ara otam atam deiamwe. Akiryi, sun ol dina-dina kubkub aryi wanwanubdandoka ai abilinga bolibdongobnin yibinamwe. Ton kerub ol aryi a kerub nong asi akubdongoandei. Ba, dinatam ol kubkub ara akai aitam bolibdongoamwe. 28Ba, a malaikat atoanun bitinyi ara emas aryi deneboka kikniamwe.

29Ba, akai minob ai ababyi, umtam babyi nirya ara malaikat atoanun si kerub ab, co korma ab, co keta si mekar ab aryi uturuboka kiknibdanin yibinamwe. 30Ani, yuma ai tukwetam lamna babyi, umtam ai tukwetam lamna babyi, emas aryi deneboka doamwe. 31Ba, dongtam ai asi wengban bisik bublan co zaitun aryi kikniamwe. Ara, bublan tentok uca, bok bitinyi kikniamwe. Ani, a bublan atam, otam, eitam, outam co ara segi lima lubweleamwe. 32Ba, a bisik bok bitinyi deici dinatam-dinatam ara malaikat atoanun si kerub ab, co keta si mekar ab, co palem ab nirya ara emas aryi deneboka uturubdeiboka kikniamwe. 33Ani, weik ai yuma ai wengban bisik bublan ara atam, otam, eitam, outam co ara co zaitun aryi segi empat lubweleamwe. 34Ani, bisik bublan bitinyi ara yuk yala co mek aryi dinatam-dinatam ara akubdeirbaramnyi. 35Ba, a bisik bublan deici dinatam-dinatam nirya ara malaikat atoanun si kerub ab, co palem ab, co keta si mekar ab emas aryi deneboboka uturuboka kikniamuryi, doamwe.

36Er Imtamnyi ai, yuma wengyangan bisik tam ara atei keta yuk kikniboka doamwe. A keta asi, otam babyi, atam babyi, eitam babyi, outam babyi nirya ara keil abilinga deneamwe ara talang winiryi doamuryok, alib ara Libanon mutuk co si mek abilinga aryi doamwe.

37Ba, Iya Erebdobnyi ai yuma nunukoka talingni keil dobkalibmou ara Ziw wala Salomo sienyi kiboka kwalina dumbaryi talak aryi Er Imtamnyi molon ai dobkalibmou. 38Ani, akai asi erci, “Ato kubokabniryi dobkwan,” teneamwe to kuboka sirya dobdongobmou wala ara in wala si Bul, Salomo sienyi kiboka koklombaryi kwalina talak aryi dobmou. Ba, akai doramwe talak aryi kwalina kwalibde binamwe uki nungna ara kwalina tabaryi kwaliburyok, akai sirya dobdongobmou.

Currently Selected:

1Raja-raja Uram 6: MTG

Highlight

Copy

Compare