1Raja-raja Uram 5

Salomo biryi Er Imtamnyi biti dama deiboka molon ai dobkwamwe ati kiknibminikmou uram deyok

5:1-18

(2Taw. 2:1-18)

1Tirus weik sienyi Hiram bira sienyi Daud er kwit kuramwe. Ba, Salomo bira er nai unuburyi, sienyi kibwe en uram asi Hiram sirya kekebmouci, Erci er wa in nang asi Salomo bisi, “ ‘Teleb aryi sienyi kibumwe,’ erbindarur,” eboka bokeibmou. 2Ba, Salomo bibabyi Hiram bisi, uram ebdeiboka, er wa in nang bokeibmou ba, Hiram bisi binmai. 3Binmai ura, sunci Hiram bisi ato eboka kibdobmai, “Erebdob sienyi Hiram! Kanda bikmarim ara nun mutuk atei nang dinatam-dinatam aryi ni nai Daud bisi mar boramnyi. Akiryi, Er Iya Erebdobnyi biryi ersi, er mar ordana nang asi muna kirdongon dinyi ton kum kareramwe. Ato kuramwe aryi ni nai Daud bira sunsi tuba-tuba mar boramwe. A deyok aryi erci, Er Iya Erebdobnyi biti dama deiboka molon ai ton kum doamwe. 4Bok, uku talak ara ni mar ordana nang babyi, iya mambul don dinyi babyi ni dam ton kum kurur. Ara, ni Nai Er Iya Erebdobnyi biryi ni kun ai dinatam-dinatam nirya kalingnurur,” ebmou. 5Ura, “Er Iya Erebdobnyi biryi ni nai Daud bisi, ‘Niryi kan mi asi sienyi tikeibkwan ara kan unubkwankir ba, erci Niti dama deiboka molon ai dobkwande.’ Akiryi, erebdob sienyi Hiram, nira Salomo biryi Imtamnyi biti molon ai dobkwan,” ebman. 6“Sienyi, kan sirya bikumwe, ni atei nang ara kan atei Sidon atei nang co kwemna diboka bikyi to, kum bingnung. Ati, kan mabwe asi ebmimba, Libanon mutuk co mek asi niti kwebdeibkwaning. Ba, ni mabwe ara niryi, ‘Sunsi milibdarur!’ ebkwan. Ba, kan mabwe ati dengna ara kanci, ‘Ukubaryi dekwandim,’ ebminyi tok sunsi niryi dekwan,” ebmou.

7Salomo biryi ato ebdeibmoua asi Hiram er kanya teleb kubmouci, erci ato ebmou, “Er Iya Erebdobnyi teleb! Ara Erci er Daud bisi bingni dinyi diboka iya bikwe mi karebumwe ba, sienyi kiboka ilila atei talebwe,” ebmou. 8Ba, er Hiram biryi Salomo molon dinyi dekeiboka ebdeibmou, “Kan molon dinyi sirya kekebmanaryi, kan molobmarim to kiknibminikwankin. Niryi Libanon mutuk co mek ab, yuk mek ato co ab asi, kan molobmarim to kiknibminikwankin. 9Ni wa irmilin nang aryi a co asi Libanon mutuk aryi kuboka me katum dam boyankwaming. Asa diksum aryi, co tukwe-tukwe biti koubokabingiryi, me dongobdongobkwaming ba, kan ebdeiaminyi me katum dam boyandoka deibkwande. Ba, a co koubne yubwa asi yokokabingiryi, kan wa irmilin nang ati karebingnyi ura, bobindoka dobkwaming. Kan wa irmilin nang asi niryi molobkwaman ara sunci ni wa irmilin nang nirya ati kwaning boyankwanung.” 10Ba, Hiram biryi Salomo bisi Libanon mutuk co mek ab, yuk teleb co yala ab nirya er moloamwe to kuboka karebmou. 11Hiram wa irmilin nang nirya ati kwaning yirkaren tam ara er Salomo biryi Hiram bisi nungna 322.500 kilogram gandum kwaning ab, minyak zaitun me 4.400 liter ab, kwalina kwalibni tok yirkareramwe 12Ba, Er Iya Erebdobnyi biryi Salomo bisi, “Etekdob bingna karebkwankin,” ebdeiamwe to kuboka karebmou. Akiryi, Hiram ab, Salomo ab teleb akwe kuboka wa ibde binmarei. Ibde binmareici, sunci, “Ukubkwanim-ukubkwanim,” ebdeibdanmarei.

13Ba, sienyi Salomo biryi sun Israel nang kankan dam aryi, il dimni nang 30 baryi nang asi ato kubdarur ebmou. 14Ura, erci er il dimni nang 10.000 baryi asi ato ebmou, “Sun Libanon mutuk dam bindoka wala tentok wa inmamunyi ani, wala bitinyi ibmunyi ura, ton nang unurbinkwaming,” ebmou. Ba, Adoniram bira sun wa in nang sienyi kibdeibmou.

15Tonda, Salomo er ai dobkwamwe dinyi ati mutuk kon dam aryi memeboka minikwamnyi nang ara ninyi 80.000 baryi. Ba, akai dona ati co bon nang babyi, keil bon nang babyi ara 70.000 baryi kiknibminikamwe. 16Ba, a wa iramnyi nang kalingnanyi kiboka, “Ukuboka ibkwayeb,” en nang ara 3.300 baryi wiboka tikeibmou. 17Salomo biryi a wa in nang asi, “Ilila keil teleb asi telebdarur,” eboka arukmou. Ba, ilila keil akwe asi Er Imtamnyi ai yuma nunukoka tingdeirin keil ati teleboka kiknibminikmai. 18Ba, Salomo wa irmilin nang ab, Hiram wa irmilin nang babyi, sun Gebal atei nang ab aryi keil ab, co ab asi, Er Imtamnyi ai dona ati kiknibminikmai.

Currently Selected:

1Raja-raja Uram 5: MTG

Highlight

Copy

Compare