1Raja-raja Uram 4
4
Salomo er amwetam kuboka wa in nang sun sien nang si sekeibwe uram deyok
4:1-20
1Ura, Salomo biryi Israel mutuk nirya sienyi kiboka taleamwe. 2A taleamwe ba, er amwetam kuboka wa iramnyi ninyi sun sien nang ara ninyi amolbaryi wiboka sien nang tikeibnin yibinamwe. A nang sun si ara
Zadok mi si Azarya bira sun imam nang sienyi tikeiamwe.
3Ba, ninyi si Sisa mabwe si Elihoref ab, Ahia ab ara sekretaris negara tikeiamwe.
Ba, Ahilud mi si Yosafat bira Israel mutuk co bok talenanyi tikeiamwe.
4Ba, Yoyada mi si Benaya bira yin doun nang sun sienyi panglima tikeiamwe.
Ba, Zadok ab, Abyatar ab ara imam wa in nang sienyi tikeiamwe.
5Ba, Natan mi si Azarya bira a mutuk kalingna nang sun sienyi tikeiamwe.
Ba, Natan mi si Zabud bira imam wa kareamuryi, sienyi Salomo er kwit kiamwe.
6Ba, Ahisar bira sienyi Salomo kun ai kalingna nang sun sienyi tikeiamwe.
Ba, Abda mi si Adoniram bira il wa in nang dimni nang sun sienyi kibdeiamwe.
7Tonda, Israel mutuk bok atei yuk-yuk sienyi kiboka taleamnyi nang ninyi amolbaryi asi sienyi Salomo biryi tikeiamwe. Sun a tikeibnin yibinamwe nang nirya aryi sienyi Salomo ab, er ai ninyi nirya ab ati yina boyangaramnyi. Ara, sun anda tikeiamwe sien nang aryi wala tentok dordongon tok ara sienyi biti yina boyangaramnyi. 8Sienyi Salomo biryi Israel mutuk bok sun atei yuk-yuk talebkwamnyi sien nang tikeibnin yibinamwe. Sun a tikeibnin yibinamwe nang si ara,
Ben-Hur bira Efraim mutuk kon tam kalingna sienyi tikeiamwe.
9Ba, ninyi si Ben-Deker bira Makas atei ab, Saalbim atei ab, Bet-Semes atei ab ani, Elon-Bet-Hanan atei kalingna sienyi tikeiamwe.
10Ba, Ben-Hesed bira Arubot atei ab, Sokho atei ab, Hefer atei nirya kalingna sienyi tikeiamwe.
11Ba, Ben-Abinadab bira Dor kon atei nirya talen sienyi tikeiamwe. Ani, Ben-Abinadab bira Israel mutuk sienyi Salomo nebnyi si Tafat doamwe.
12Ba, Ahilud mi si Baana bira Taanakh atei ab, Megido atei ab talen sienyi tikeiamwe. Ba, Bet-Sean atei ara Yizreel atei me youkwetam kuboka Sartan atei wiliba dam atei ababyi erci taleamwe. Ara, Bet-Sean aryi kuboka Abel-Mehola ab ani, me koubkaboka Yokmeam nirya erci taleamwe.
13Ben-Geber bira Ramot-Gilead atei sienyi tikeiamwe ba, a mutuk taleamwe. Ani, sun Manasye deibdoba yalanyi si Yair ai ninyi mutuk ababyi taleamwe. Ani, Argob mutuk Basan atei yubwa 60 baryi atei ababyi erci sienyi kiboka taleamwe. Anda 60 atei nirya ara keil aryi weik lika doboka aknabdongoamnyi. Ani, akatei weik bisik bublan ara keil si tembaga aryi kikniboka tiringdamnyi atei asi taleamwe.
14Ba, ninyi si Ido mi Ahinadab bira Mahanaim atei sienyi tikeiamwe ba, akatei sienyi kiboka taleamwe.
15Ba, Ahimaas bira Naftali yala ninyi mutuk sienyi tikeiamwe ba, a mutuk sienyi kiboka taleamwe. Ba, Ahimaas bira Israel mutuk sienyi Salomo nebnyi si Basmat doamuryi, akatei sienyi kiboka taleamwe.
16Ba, Husai mi Baana bira Asyer yala ninyi mutuk ab, Alot atei ab sienyi tikeiamwe ba, a bitinyi atei sienyi kiboka taleamwe.
17Ba, Paruah mi si Yosafat bira Isakhar yala ninyi mutuk sienyi tikeiamwe ba, a mutuk sienyi kiboka taleamwe.
18Ba, Ela mi Simei bira Benyamin yala ninyi mutuk sienyi tikeiamwe ba, a mutuk sienyi kiboka taleamwe.
19Ba, Uri mi si Geber bira Gilead atei sienyi tikeiamwe ba, akatei sienyi kiboka taleamwe. A sienyi kiboka taleamwe mutuk ara Amori mutuk sienyi si Sihon ab, Basan mutuk sienyi si Og ab taleandei atei asi er tentok aryok akatei taleamwe.
20Ba, sun Israel mutuk ninyi ab, Yehuda mutuk ninyi ab yubwa kuramnya ara me wininga ato kuramnyi. Ba, sun kwaning babyi me babyi teleb asa akwe kuboka yibde baramnyi.
Salomo sienyi tikamuryi, ukuramwe dinyi deyok
4:21-34
21Ura, Salomo biryi Israel mutuk sienyi kiamuryi, taleamwe mutuk ara me si Efrat aryi kuboka Filistin mutuk ab ani Mesir mutuk wiliba o nirya taleamwe. Ba, sun yuk mutuk-yuk mutuk sien nang nirya aryi sienyi Salomo uram kekeramiryi, tukwe dingna kareramnyi. Ara, sienyi kiamuryi, kam tuba kuramwe talak nirya ara ersi ato kuramnyi.
22Ba, sienyi Salomo ab er wa in nang ab yiramnyi kwaning ara namin tepung teleb 5.000 liter baryi ab, ur tepung 10.000 liter baryi ab asi yiramwe. 23Ani, minta weik lembu bisam 10 baryi ab, sapi bisam 20 baryi ab, domba bisam 100 baryi ab yiramnyi. Ani, rusa bisam ab, kijang bisam ab, minta yo maka ababyi yiramnyi. 24Sienyi Salomo biryi Israel mutuk sienyi kiboka taleamwe. Ara, me si Efrat kouboka atam Tifsah mutuk ninyi aryi kuboka Gaza ninyi o nirya taleamwe. Ba, a taleamwe atei ninyi nirya ara teleb asa akwe kuramnyi. 25Ani, sun Yehuda mutuk ninyi ab, Israel mutuk ninyi ab ababyi sun mabwe silib yuk-yuk ara co anggur wa ab, co ara wa ab iboka yiramiryi iya mangkau asa akwe kuramnyi. Ara, me utam mutuk Dan atei ninyi aryi kuboka me youkwetam kuboka Bersyeba atei ninyi nirya ara iya mangkau asa akwe kuramnyi.
26Ani, tonda sienyi Salomo bira er yin doun nang babyi, mar boboka ordarban bisam si kereta kuda babyi deiriramwe. Mar boboka ordan bisam ara ai 40.000 baryi doboka deiriramwe. Ba, yin doun nang bisam kuda deici bukokabingiryi, mar boboka ordana co biribdob nang ara 12.000 baryi kiknibminikamwe. 27Ba, Israel mutuk bok atei yuk-yuk sienyi kiboka taleamnyi nang ninyi amolbaryi asi sienyi Salomo biryi tikeiamwe. Sun a tikeibnin yibinamwe nang nirya aryi sienyi Salomo ab, er ai ninyi nirya ab ati yina boyangaramnyi. Ara, sun anda tikeiamwe sien nang aryi wala tentok dordongon tok ara sienyi biti yina boyangaramnyi. 28Tonda, anda tikeiamwe sien nang aryi sienyi Salomo er bisam kuda ati gandum ab, jerami ab boyangaramnyi. A yina ara ninyi ur dem bon kuda babyi, kongkong eboka ninyi boyiban kuda babyi ati boyangaramnyi.
29Ba, Er Imtamnyi biryi sienyi Salomo bisi etekdob bingna dinyi ab, bukdob bingna dinyi kareamwe ara iya bukdobto kuboka kareamwe. A karebmou bingni dinyi ara me wininga kurande ato kuboka karebmou. 30Ba, sienyi Salomo er bikamwe ara sun yaletam mutuk sien nang ab, Mesir mutuk sien nang bingni dinyi ara outam kiboka bukdobto bikamwe. 31Ani, sienyi Salomo er bingni dinyi ara yuk mutuk-yuk mutuk sien nang bingni dinyi ara outam kibkaboka eitam bikamwe. Sun bingna outam kibdeiamwe mutuk sien nang ara Ezrahi mutuk ninyi si Etan outam kibdeiamwe. Ani, tonda Mahol mabwe Heman ab, Kalkol ab, Darda ab bingni dinyi ababyi outam kibdeiamwe. Ato kuboka bikamwe deyok aryi, yuk mutuk-yuk mutuk ninyi nirya aryi er si bikamnyi. 32Ba, sienyi Salomo biryi bikdob bingni dinyi ara yubwa 3.000 baryi sekamwe. Ba, mot ara yubwa 1.000 baryi liamwe. 33Ani, tonda erci Libanon mutuk kon tingdaramwe co si aras ab, keil dub tingdaramwe sungsunga si hisop deyok ab ati uram eramwe. Tonda, a mutuk kuramwe kamyoa nirya deyok ati uram eramwe. Ara, maka deyok ab, mekinaia deyok ab, tukwe ai kuramwe kamyoa deyok ab ati uram eramwe. 34Ba, sun yuk mutuk ninyi nirya aryi sienyi Salomo etekdob bingni dinyi bikamuryi, eramwe dinyi kekeryangaramnyi. Kekeryangaramiryi, sun yuk-yuk mutuk sien nang aryi ersi bona-bona boyandoka tukwe dengna dengnamnyi. Ara, Er Imtamnyi biryi sienyi Salomo bisi a bingni dinyi kareamwe ba, bukdobto kuboka bikamuryi, eramwe dinyi ati dengnamnyi.
Currently Selected:
1Raja-raja Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
