1Raja-raja Uram 3
3
Salomo biryi er bingdona dinyi ati Imtamnyi bisi molobmou uram deyok
3:1-15
(2Taw. 1:1-13)
1Salomo ab, Mesir atei sienyi ab aryi, “Nun ninyi bun dakdankwanim,” eboka sirya sisikmarei ura, Salomo biryi Firaun nermabwe asi, er ner kiboka dobdobkwamwe ati tentok dobdobmou. Dobdobmou ura, Salomo biryi a ner Daud atei Yerusalem bobde yibindobmou. Ba, Daud atei tiya a kurandei talak aryi, Salomo biryi lika doboka Er Iya Erebdobnyi ai ab, Salomo kuramwe ai ab nirya doboka aknabdongobmou.
2Bok, a talak ara sun Israel ninyi aryi, mutuk konkon talyi keta ai asi Imtamnyi biti ninyi dama deiboka molorkiringnamnyi. Ara, Iya Erebdobnyi biti ninyi dama deiboka molon ai ton kum doamnyi aryi, ato kuramnyi. 3Ba, Salomo biryi Er Iya Erebdobnyi bisi kanyi deiboka er nai Daud ebdeiamwe to kunuboka akatei taleramwe. Eda, erci bisam domba ab lembu ab, tonda tong teleb dinyi boboka uk daboka dama deiboka mutuk konkon asi tuba molorbaramwe.
4Uki tentok tum weik sienyi biryi, “Er Imtamnyi biti dama deibkwan,” tenen ilila mutuk kon, Er Imtamnyi biti dama deiboka moloramnyi mutuk kon si Gibeon dam asi molorbinmou. Binmou ura, Salomo biryi bisam lembu 1.000 baryi obokaburyi, Er Imtamnyi biti dama deirin keil lamna dub deibmouci, molobmou. 5A Gibeon mutuk dam aryi Er Iya Erebdobnyi biryi er Salomo bisi lengdera deici aryi ebdeibmou, “Nisi, ‘Molobdobkwan,’ tenebmarim dinyi ara ur molobdobdum. Ba, Niryi kansi karebkwamakin.” 6Uca, Salomo biryi ato ebmou, “Kan wa inanyi ni nai Daud biryi Kan urasintam aryi malyi dinyi ton kuna kumci, Kan ebdeibmanto akwa busul kuboka kunuramwe deyok aryi, Kanci ersi Kan boukwe weik kimni dinyi lak kibdeiamoumwe. Ara, er sienyi kiboka taleamuryi, buramwe sokon asi arub tum aryi er mi sienyi tikmararyi bukde. 7Ni Nai Iya Erebdobnyi, ni kamnyi tuba kunman asi, sienyi kibman kum bok, ukura Kanci nisi sienyi kibdeibnirim ba, ni nai Daud unubne. 8Akiryi, Kan wa irmilinanyi bira Kanci wibumwe atei nang ilinto nukman kumto sun kankan noutam-tam asi tikne. 9Ba, Kanci wibumwe atei nang ninyi weik aryi, niryi sunsi diboka talebman kum. Ati, Kanci nira kan wa irmilikinanyi bisi, ‘Malyi dinyi ab, teleb kun dinyi ab diboka bingni kanya asi Erci karebnute,’ tenebman dinyi karebnurum. Ba, Kanci wibumwe atei nang ilinto asi, niryi sun malyi kun dinyi ati tentok-tentok liliboka sunsi ikin dinyi karebkwan,” eboka molobmou.
10Salomo er molona Er Imtamnyi biryi kanya teleb kuboka dobmouci, 11ersi ato ebmou, “Kanci, kan kam kun dinyi asi, ‘Uki weik kibdeibnurum, bona bon dinyi karebnurum, kan ordana nang asi muna kirdongona karebnurum,’ eboka kum molobmarimci, ‘Kanci wibumwe atei nang asi bingna deici aryi sun kubmangnyi to kuboka sunsi ikin karebnyi ura, diboka talebkwan,’ eboka molobmarim. 12Akiryi, kan molobmarim to Niryi karebkwamakin. Ara, Niryi kansi bingni dinyi tabakdongoboka karebkwankin ba, sun minob kubde ban nang ab, aminda kubde ban nang ab bingni dinyi ara mitik kiboka, kan bingni dinyi asi weik kibdeibkwankin. 13Tonda, kanci kum molobmarim dinyi ababyi Niryi karebkwankin. Ara, kan kam kuboka sienyi kibkwandim talak aryi bona weik talebokabminci, tukwetam sien nang nirya aryi kansi erebdeibkwanking. 14Ara, kanci kan nai Daud biryi Ni erdeirin dinyi ab, Ni, ‘Ato kubdum-ato kuna mem,’ en dinyi ab asi talebnuruboka kunubde baramwe to kunubminyi ura, Niryi kan kam kun dinyi tabakdongoboka karebkwankin,” ebmou. 15Ura, Salomo mabmou ani, bukalabokaburyi, kanyi wisibdobmou ura, ato teneibmou, “Er Iya Erebdobnyi biryi lengdera deib aryi ebdeibmanir a,” tenebmou. Ura, Yerusalem atei tamurbinmouci, Er Iya Erebdobnyi biryi, “Ukubdarur-ukuna mem,” erdeirina co sangkol dam bindoka tikmouci, Er Imtamnyi biti uk daboka dama deirin dinyi ab, “Lebsute,” tenen dama deirin dinyi ab deiboka molobmou. Ba, erci ilila kwalina kwaliboka, er wa irmilin nang ati yibkarebmou.
Salomo biryi mambul dinyi asi teleb kuboka lilibdeibmou uram
3:16-28
16Uki tentok tum aryi, ninyi dona kum uca, talyi yortamni nerabwe bitinyi er sienyi Salomo urasin dam boyanmarei. 17Ura, ton ner aryi ato ebmou, “Nai, ni ab, a ner ab ara neik ai tonkwa kuronunum. Akai aryi yuk nang ababyi ton nun ab tonkwa kuna kum. A kununum talak aryi, niryi yuma sal mi deibdobse. 18Ba, uki bitinyi mabisibmanoumwe ura, a ner ababyi sal mi deibdobmou. Akiryi, a deirironmanoumwe ai ababyi yuk ninyi ton kum bukmai, eda nun bitinyok deirinmanoumwe. 19Ba, lukunda mabmanoumwe talak aryi, a ner er mi ara erdamnyi tiklim darabdeibmou uca, dibmou. 20Ura, ni mabmonwe talak, erda bukalabokaburyi, ni mi asi dobdobmou, ni dam mabdeibmanou bok. Ni mi ara er man amsuna doboka deibmou ura, er mi dibmo mi ara ni man sokon ai mardeiriryanmano. 21Ura, belekuna ara bukalabokabnuryi, ni mi doboka, ‘Moum dinibkwan,’ tenen dortaleranwe uca, dibmo mi asi dobtalebmonwe. Ba, mi urasin bita dibdenmonwe uca, a dobmonwe mi ara ni mi kuma asi dobtalebmonwe.” 22Ura, ton ner aryi, “Tola! Kam tuba bukmar mi ara ni mi. Dibmar mi ara kan mi!” ebmou. Ba, yuma dobtalebmou ner aryi ato ebmou. “Kum, dibmar mi ara kan mi. Ba, kam tuba bukmar mi ara ni mi,” ebmou! Er sienyi urasin dam aryi sunci ato ebdanmarei. 23Ura, er sienyi Salomo biryi ato ebmou, “Sunci sirya ebdanmarurum, ‘Kam bukmar mi ara ni mi. Ba, dibmar mi ara kan mi!’ ebdanmarurum sirya bikmasin,” ebmou. 24Sienyi sirya ato ebmou ura, er wa irmilin nang asi, “Ninyi on ya boyandarur,” ebmou. 25Ba, sienyi biryi ato ebmou, “Kam tuba bukmar mi asi ya sekoka tibmunyi ura, ton ner dinatam, ton ner dinatam kiboka bokeibdarur,” ebmou. 26Ato ebmou uca, er mi dam ner aryi, “Se, ni mi ya sekoka obcei,” tenen kanya bobmouci, ato ebmou, “Nai, a mi ona mem! Eda, ni ka ner ati ur karebdum,” ebmou. Uca, er mi dibmou ner aryi ato ebmou, “Erbabyi, nibabyi kum dobkwamanimnyi to, a kam tuba bukmar mi asi, ur ya sekdum,” ebmou. 27Ba, Salomo biryi ato ebmou, “A mi on kum! Yuma ner asi karebdarur! Ara, er kwin nong,” ebmou. 28Ba, sun Israel nang nirya ara er Salomo biryi ato kubmou dinyi asi kekeboka bikmaici, sun ilil weik kubmou. Ara, “Er Imtamnyi biryi bingdon dinyi karebwa ara Salomo kanya dongobmaci ura, erci malyi kun nang ab, teleb kun nang ab sun kubmanto kuboka sunsi ikin dinyi babyi, caknam dinyi babyi karenkwande,” ebmai.
Currently Selected:
1Raja-raja Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
