1Raja-raja Uram 2

Daud biryi Salomo biti sirya kobdob ebdeibmou uram deyok

2:1-12

1Daud sirya dibkwamoua dam kubmou talak aryi, er mi Salomo bisi ato ebdeibmou, 2“Kan kanya wisibdobminci, ninyi sal nang aryi ukutotoa ilil kumci mikib kuboka kuraming to kubdobdum. Nira sirya dibkwaman, ara nun kam kuramib ninyi nirya aryi, tukwetam tubto tamuboka binkwamib to, binkwamana sirya dam kubmar. 3Ani, tonda Musa deici aryi Er Iya Erebdobnyi biryi, ‘Ukubkwandum-ukuna mem,’ en uram ebdeiamwe to kuboka kunubkwandum. Ba, kan wa iboka, kanci dantam-dantam busul yibinkwandim tam ara teleb asa aryi, busul kiboka kan teneiaminyi to kuboka dobdobkwandim. 4Ato kunubminyi ba, Er Iya Erebdobnyi biryi, ‘Kan deibdoba mabwe aryi Israel mutuk sien nang bun sokon aryi mitika ton sengdena kum uca, iya suncok talebmurubde binkwaming dinyi karebkwankin,’ eanou. Ara, sunci Er Imtamnyi urasintam aryi teleb kanya akwe boboka Er ebdeianci to kunubde bimunyi ura, ‘A karebkwankin,’ eanou to karebkwansir,” ebmou.

5“Tonda, Zeruya mi Yoab biryi Israel nang yin doun sien nang bitinyi asi obmou. Sun si ara Ner mi Abner ab, Yeter mi Amasa ab asi oamwe. Ara, mar boboka ordana kum li bok, erci sunsi mar boboka oamwe. Ba, sun ining lubdoba ara er yan deici babyi, mirikna deici babyi akdanamwe. Ato kuboka oamwe dinyi ara kanbabyi sirya bikumwe. 6Ati, kanci er wisi dankwandaryi dibkwande tam ara teleb asa aryi dibcob. Eda, kanci ersi, ‘A ikin dinyi karebkwana ara kikiman,’ teneibminci, karebkwandum.

7Bok, Barzilai Gilead ateinyi er mabwe ara kanci kanyi teleb asa aryi sunsi boukwe kiboka dibnilibkwandum. Ara, nisi kan du Absalom biryi, ‘Obnicei,’ tenen baronmase tum aryi, sun kanyi teleb asa aryi nisi nabokabnici, du dongobdanei ati, sunbabyi ato kubkwandum. 8Tonda, Er Iya Erebdobnyi urasintam aryi, niryi Bahurim ateinyi Benyamin yalanyi si Gera mi Simei bisi, ‘Kum obkwankin,’ eanse. Ara, Mahanaim atei banmase bok, erci iya ilila sumna suanou. Ani, Yerusalem atei tamuroryanganmase tum aryi, me Yordan kin yuryandoka bisik dibdobmanouci er kisok luknubdongoboka, ‘Nai sienyi, ni minob eanse malyi uram dibnilibminyei,’ eboka molobmou ba, ‘Niryi imtamnyi si deici aryi ebkun, kansi ninyi on ya aryi ona kum kubkwankin,’ eanse. 9Bok, Niryi Simei bisi, ‘Yerusalem atei aryi anaboka yuk mutuk yibana mem,’ eanse uram kekena kum kubwe. Ati, ikin bordeirin dinyi aryi lobdeibminyei. Ba, teleb asa aryi wisi danaboka dibcob. Eda, ersi, ‘Ato ikin asi karebkwan,’ tenena dinyi ara kan bikmarim. Ani, kanda bingni dinyi ara iya diboka bingdum.”

10Ura, Daud sirya dibmou. Dibmou ura, Yerusalem mutuk, Daud atei asi tukwe dongobmai.

11Ba, er Daud Israel mutuk sienyi kiboka taleamwa kwalina nungna ara 40 baryi taleamwe. Ba, Hebron atei sienyi kiboka taleamwa ara kwalina tabaryi taleamwe. Ba, Yerusalem atei sienyi kiboka taleamwa ara kwalina winiryi taleamwe. 12Ura, Iya Erebdobnyi biryi Salomo bisi sienyi tikeibmou ba, er nai unubmouci, akatei talebmoua ara katabum eboka talebmou.

Salomo Israel mutuk sienyi tikmouci, ukubde binmou deyok

2:13-46

13Ura, Salomo ab, Adonia ab, ara Daud mabwe kurandei. Salomo er kwin si ara Batsyeba kuramwe. Ba, Adonia er kwin si ara Hagit kuramwe. Uki tentok tum ara Adonia biryi sienyi Salomo er kwin si Batsyeba bisi binmou. Ba, Batsyeba biryi Adonia bisi ato eboka asibdenmou. “Kanda mar te mururdana ati yanandim do?” ebmou. Uca, Adonia biryi, “Diba, mar te mururdana ati yanman” ebmou. 14Ura, Adonia biryi Batsyeba bisi ato ebmou. “Ni uram kan dam ton ebkwan,” ebmou. Uca, Batsyeba biryi, “Ur ebdum!” ebmou. 15Ura, Adonia biryi Batsyeba bisi ato ebmou. “Sun Israel ninyi nirya ara, ‘Ni Adonia bisi Israel mutuk sienyi kiboka talebkwande,’ teneanungwe ara kanbabyi sirya bikamoumwe. Bok, Er Iya Erebdobnyi biryi ni weit Salomo bisi Israel mutuk sienyi tikeibwe. 16Ato kuboka tikeibwe deyok ati ukura niryi kansi molon dinyi tentok molobdobkwabman dinyi asi karebkwamanirim,” ebmou. Uca, Batsyeba biryi ersi ato ebmou, “Nisi molobdobkwan tenebmarim dinyi ur molobdobdum,” ebmou. 17Ura, ato eboka molobdobmou, “Kanci sienyi Salomo bisi molobminyi dinyi ara, ‘Ni li kum,’ ebkwamakir. Ati, Sunem atei ner si Abisag bira Adonia biti karebmimba, dobdobkwande,” eboka molobdeibnurum ebmou. 18Uca, Batsyeba biryi ersi ato ebmou, “Teleb, niryi kan molon dinyi sienyi Salomo bisi molobliknibkwamakin,” ebmou.

19Ura, Batsyeba biryi Adonia molon dinyi sienyi Salomo bisi molobliknibkwamou ati sienyi bisi binmou. Sirya binmou ba, sienyi Salomo biryi er kwin bisi kisok luknubdongoboka kibdobmou. Kibdobmou ura, er bun sokon burbinmouci, er wa in nang asi, “Ni kwin bukwamar sokon kiknibdeibdarur!” ebmou ba, kiknibdeibmai ura, er mi sienyi bun sokon dinatam siriktam kuboka asi bukmou. 20Sirya bukmarei ura, er kwin Batsyeba biryi sienyi Salomo bisi ato ebmou. “Mitik molonanun kansi molobkwaman bok, a molobkwaman dinyi ara kanci, ‘Niryi kum karebkwankin,’ kum ebkwamarim,” ebmou. Ba, sienyi Salomo biryi er kwin Batsyeba bisi ato ebmou, “Niryi kan molon dinyi karebkwamakin ati, ur molobdobdum,” ebmou. 21Ura, er kwin biryi ato eboka molobmou, “Sunem atei ner si Abisag bira kan du Adonia biti karebmimba, er ner kiboka dobdobkwande,” eboka molobliknibmou. 22Ato eboka molobliknibmou bok, sienyi Salomo biryi er kwin bisi ato ebmou, “Unato ati Sunem atei ner si Abisag demang asi Adonia biti karebdum,” molorlikninmarim do? Adonia bira ni du bica. A mutuk sienyi kiboka talen dinyi ababyi molobliknibdum! Ani, er tam kibdei nang si imam Abyatar ab Zeruya mi Yoab ab wa dona dinyi ababyi molobliknibdum! ebmou. 23Ura, Er Iya Erebdobnyi si deici aryi sienyi Salomo biryi diba ati ato ebmou, “Niryi Adonia bisi kum obnyi ura, Er Imtamnyi biryi nisi ikin weik dinyi karebnurur. 24Ati, Er Iya Erebdobnyi iya kam kururnyi biryi Israel mutuk sienyi tikeibniraryi, ni nai Daud a mutuk sienyi tikamuryi, buramwe sokon bukeibmanir. Ani, Er Imtamnyi biryi minob uca ni nai Daud bisi, ‘Kan mabwe aryi Israel sienyi kiboka talebde binkwaming,’ ebdeiamwe to kuboka nisi karebmanir. Ati, arub aryok Adonia obkwaman,” ebmou. 25Ura, sienyi Salomo biryi Yoyada mi Benaya bisi, “Adonia obdum!” ebmou.

26Ura, sienyi Salomo biryi imam Abyatar bisi ato ebmou. “Arub aryi niryi kansi obmakin bok asi taklobmakin. Ara, ni nai Daud urasin dam aryi kanci, ‘Er Iya Erebdobnyi nun molonanyi uram deirin co sangkol boamoumwe. Ani, ni nai doamwe u ara kanbabyi neik tum u doandurumwe deyok aryi niryi kansi kum obmakin.’ Ati, kan mutuk Anatot bindobdum,” ebmou. 27Ato ebmouci, er Abyatar biryi imam wa iramwe dinyi asi sienyi Salomo biryi dobdobmou. Ara, mutuk Silo dam aryi Er Iya Erebdobnyi biryi imam Eli ai ninyi ati ebdeiamwe to kuboka kunubmou.

28Sienyi Salomo biryi a kubmou dinyi asi Adonia tam kiamunyi si Yoab sirya kekebmouci, er ilil kubmou. Ura, Er Iya Erebdobnyi uram keken ai bindoka, Er Imtamnyi biti ninyi dama deirin keil lamna kubkub-kubkub er kisok yang asi bindoka talebdongo tikmou. 29Ura, Yoab bira, “Ato kubmar,” en uram sienyi Salomo kekebmou. Kekebmouci, Yoyada mi Benaya bisi, “Yoab orbirum!” eboka arukmou. 30Ba, Benaya biryi Yoyada bukmou ai binmouci, “Sienyi Salomo bira Er Iya Erebdobnyi ai aryi sakwetebdur ebmakir!” ebmou. Uca, Yoyada biryi, “A tikman ai aryi niryi kum sakweteboka yibinkwaman. Eda, a tikman ai dibkwaman,” ebmou. Ura, Benaya biryi sienyi Salomo bisi tamuryandoka, “Yoab bira akai umbura aryi niryi kum sakwetebkwaman ebmar,” ebmou. 31Uca, sienyi Salomo biryi ato ebmou, “Niryi sirya ebmounwe to kuboka oboka tukwe dongobdum! Ara, Yoab biryi sun malyi dinyi kununa kum nang bok asi oamwe to kuboka erbabyi obdum! Ba, ni ai ninyi aryi a oamwe nang tuba kum teneibkwayeb. 32Ani, Yoab biryi sun iya malyi dinyi kununa kum nang bitinyi bok asi ninyi on ya aryi oamwe. A oamwe dinyi ara Er Iya Erebdobnyi biryi Yoab er yuk ikin takubdeibkwande. Ara, ni nai Daud er yin doun nang sien nang bitinyi asi, ni nai er bingna kum bok oamwe. A oamwe yin doun sien nang bitinyi si ara ninyi si Ner mi Abner Israel mutuk yin doun sienyi ab Yeter mi Amasa Yehuda mutuk yin doun sienyi ab asi oamwe. 33A yin doun sien nang bitinyi oamwe deyok aryi, Yoab ab er deibdoba yala ninyi nirya ab ara iya ikin dinyi takubdeibkwande. Bok, sun Daud ab er deibdoba yala ninyi ab er ai ninyi ab, er sien nang bun sokon ab nirya ara Er iya Erebdobnyi sunsi kalikoka iya teleb asa akwe kubde binkwaming,” ebmou. 34Ba, Yoyada mi Benaya biryi bindoka Yoab bisi obmouci, tukwe dongobmou. Ara, bai yini mutuk er mining ai umbura asi dongobmou. 35Ba, sienyi Salomo biryi Yoyada mi Benaya bisi yin doun sienyi tikeibmou ba, Yoab unubmou. Ba, Zadok bira imam tikeibmou ba, Abyatar unubmou.

36Ura, sienyi Salomo biryi er wa in nang asi, “Simei nambindarur!” eboka arukmou ba, sirya nambindoka er dam boyanmai. Ura, sienyi Salomo biryi Simei bisi ato ebmou, “Yerusalem atei asi kan ai dobdobminyi ura, yuk-yuk mutuk da yibana kumci, Yerusalem atei akwe kunkwandum! 37Asi kanci Yerusalem atei aryi sakweteboka me Kidron koubkaboka yibiminyi ura, obkingnyi ba, dibkwandim. Ba, kan dina ara kanbiramnyi ikin takubdobkwandim,” ebmou. 38Uca, Simei biryi sienyi bisi ato ebmou, “Teleb, niryi nai sienyi kan ebdeibmanirim to kuboka kunubkwan,” ebmou. Ura, Simei bira sienyi ebdeibmou to kuboka Yerusalem atei bindoka kuramwe.

39A bindoka ai doamuryi, kuramwe kwalina winiryi sirya kwalibmouci, kubde banmou talak ara Simei er wa in nang bitinyi aryi Maakha mi Gad atei sienyi si Akhis bisi, “Yandobmaring,” en uram Simei kekebmou. 40Kekebmou ura, Gad atei sienyi si Akhis bisi bindoka er wa in nang bitinyi ingkiring binkwamouci, kiknibminikdobmou. A kiknibminikmou dinyi ara er boboka yiban bisam si keledai dub er bun sokon kiknibdeibmou. Ura, Simei Gat mutuk bindoka er wa in nang bitinyi boyanmou. 41A kubmou dinyi asi ninyi aryi sienyi Salomo dam ebmai ba, kekebmou. 42Kekebmouci, er wa in nang asi, “Simei nambindarur!” ebmou ba, nambindoka sienyi Salomo dam boyanmai. Ura, sienyi Salomo biryi Simei bisi ato ebmou, “Niryi kansi Er Iya Erebdobnyi si deici aryi, ‘Yerusalem atei akwe kunkwandim,’ eankise. Asi kanci Yerusalem atei aryi sakweteboka yuk mutuk yibiminyi ura, ‘Obkwanking!’ ebdeiankise. Ba, kanci ato eamoumwe, ‘Niryi kan ebdeibmanirim to kuboka kunubde binkwan,’ eamoumwe. 43Bok, Iya Erebdobnyi si deici aryi kansi ebdeiankise uram asi unato ati kum kunubmarim do?” ebmou. 44Ura, sienyi Salomo biryi Simei bisi ato ebmou, “Ni nai Daud bisi iya malyito kuramoumwe yu ara kanbiramnyi bikdanmarim. A malyi kuramoumwe dinyi ara Er Iya Erebdobnyi biryi kanbiramnyi asi ikin takubdeibkwankir. 45Bok, ni Salomo ab ni nai Daud deibdoba yala ninyi ab nirya ara Er Iya Erebdobnyi biryi iya kisal dakmurubde binkwansir,” ebmou. 46Ura, sienyi Salomo biryi Yoyada mi Benaya bisi, “Simei obdum!” ebmou ba, obmou. Ato kuboka Salomo biryi Israel mutuk sienyi kiboka taleamwe ara sasiboka taleamwe.

Currently Selected:

1Raja-raja Uram 2: MTG

Highlight

Copy

Compare