1Raja-raja Uram 21

Nabot er anggur co du wa iramwe uram deyok

21:1-29

1Samaria sienyi er Ahab atei dam dinatam ara Yizreel ateinyi si Nabot, er anggur wa iramwe. 2Asi, Ahab biryi Nabot bisi ato ebmou, “Kan anggur wa ara ni ai dam ati niti ebnurum. Ba, niryi ni buna wa kibdobkwan. Niryi kan anggur wa iroramumwa unubkwankin ara minob a irum ato wa kuma eda, ilila anggur wa asi karebkwankin kum? Co bok asi dekwankin kum? Kanci, ‘Yo teleb,’ ebminyi dinyi asi dekwamakin,” ebmou. 3Uca, Nabot biryi ato ebmou, “Nai, a anggur wa tukwe ara ni abwe yabwe anggur wa in tukwe aca, ati niryi kansi kum karebkwamakin. Er Iya Erebdobnyi si deici aryi ebman,” ebmou. 4Ba, Ahab, “Se,” tenen kanya bobokaburyi, urasin malyi deibdobmouci, er ai wengdorbinmou. Ura, bindoka er man sokon dam asi urasin amubtaleboka mabmou. A mabmou tok, yina ababyi si tebmouci, kwaning ton kum yinmou.

5Ura, er ner Izebel yanmouci, ato eboka asibdenmou, “Una deyok aryi kan kanya malyi kubmakiraryi, kwaning ababyi ton kum yibmarim do?” eboka asibmou. 6Uca, erci ato ebmou, “Yizreel ateinyi Nabot bisi, ‘Kan anggur wa in tukwe ara niti karebnurum. Ba, niryi kansi co bok dekwankin kum? A anggur wa unukina ara ilila telebto anggur wa karebkwankin kum?’ ebmonwe. Uca, erci ato ebmanir, ‘Ni anggur wa in tukwe kum karebkwankin,’ ebmanir ba, ni kanyi malyi kubmanir. Ati, a yandoka mabman,” ebmou. 7Ura, er ner Izebel biryi ato ebmou, “Israel mutuk ara kanci sienyi kiboka kum talebumwe darib? Bukokminci, kan karyi asa aryi kwaning yirorum! Niryi kanti Yizreel ateinyi, Nabot anggur wa in mutuk asi kanti karebkwamakin,” ebmou. 8Ebmouci, kerek sekokaburyi, Nabot atei kuramnyi sien nang ab, wisi yoka-wisi yoka sien nang ab asi kerek sekeibmou. Ba, a kerek sekeibmoua deici ara akatei sienyi Ahab si ab, “Sienyi biryi deibmar,” tenen bingni keica si meterai denebdongobokaburyi, sekeibmou. 9A kerek sengna umbura ara ato eboka sekeibmou, “Akatei ninyi a uram ebdeibdanin yibindarur. Ara, ato, akatei ninyi nirya kwaning si teboka bukmunci, sun kankan dam aryi Nabot bira sun urasin dam ersi nunukoka bukeibkwandarur. 10Ani, yu ilila nang ninyi bitinyi boyandoka Nabot urasin dam bukeibkwandarur. Ba, a nang bitinyi aryi Nabot bisi tola ati ato ebkwandurung, ‘Nabot kanci Er Imtamnyi ab, a mutuk sienyi ab asi sirya submarim,’ eboka durukwandurung. Ato kuboka sirya kubmunyi ura, Nabot bisi dong baitam bobindokabmunci, weneboka keil aryi ersi malung-malung eboka obmunyi ba, dibkwandurur!” eboka sekeibmou.

11Ura, akatei kuramnyi wisi-wisi sien nang ab, akatei sien nang ab aryi Izebel biryi sunsi kerek sekoka ebdeibmou to kuboka kunubmai. 12Ara, “Sun akatei ninyi nirya aryi kwaning yina kumci, si teboka bukwayeb,” ebdeibdanmai. Tonda, kwaning si teboka bukmabya kankan dam aryi, “Nabot bira ersi yuma nunukoka bukeibkwamab,” ebdeibdanmai. 13Ura, sun malyi kun nang bitinyi boyandoka, sun urasin ara Nabot dam deiboka bukmareici, Nabot bisi ato ebmarei, “Kanci Imtamnyi ab, akatei sienyi ab, asi sirya malyi kibdeibumwe,” eboka durukmarei. Ato eboka sirya durukmarei ura, akatei ninyi aryi, ersi baitam bobindokabiryi, keil aryi molong-molong eboka obmai ba, dibmou. 14Ura, sun kankan dam aryi ninyi ton arukmai ba, Izebel bisi ato eryanmai, “Nabot bira sirya keil aryi molong-molong eboka obmang ba, dibmar,” ebmai. 15Ura, Izebel biryi Ahab bisi ato ebmou, “Bukokminci, Yizreel ateinyi Nabot anggur wa in tukwe doboka, kan wa kimdorbirum. Ara, Nabot anggur wa ati, ‘Co bok dekwankin,’ ebmoumwe bok asi, ‘Ni li,’ ebmakuci, ‘Ni anggur wa kum karebkwankin,’ ebmakunyi Nabot sirya obmang ba, dibmar,” ebmou. 16Ura, sienyi Ahab bukokmouci, Yizreel ateinyi Nabot anggur wa iramwe mutuk dam binmouci, er wa kibdobmou.

17Ura, Er Iya Erebdobnyi biryi Tisbe ateinyi Elia bisi ato ebdeibmou, 18“Bukokminci, Israel mutuk sienyi Ahab bisi Samaria atei birum. Ara, Ahab biryi Nabot anggur wa asi er wa kibdobmararyi, a wa dam tuba o kunmar!” ebmou. 19Ura, Iya Erebdobnyi biryi Elia bisi ato ebmou, “Ersi bindoka ato ebkwandum. ‘Kanci, Nabot bisi obokabdimci, tubto er wa aranmarim ara unati da? Er Iya Erebdobnyi biryi kansi ato eboka asibmakir,’ ebkwandum,” ebmou. Ura, Elia bira Ahab dam binmouci, ato ebmou, “Kanci Nabot obmarim ba, ining sakmo ara kam aryi ining mulakoka yibmar. A dikum akwe kanbabyi obkingnyi ba, kan ining ababyi kam aryi, mulakoka yibkwamakir,” ebmou.

20Ba, Ahab biryi Elia asing eibmouci, ato ebmou, “Se, ni mar ordananyi, kan ni dam a yarim darib?” ebmou. Uca, Elia biryi ersi ato ebmou, “Dib ebmarim, ni a yanman ara kandamnyi Er Iya Erebdobnyi urasin dam asi sirya malyi kubdongobdanmarim ati, kan dam yanman. 21A deyok aryi, dib sirik aryi ebkun ara Er Imtamnyi biryi kansi ato ebdeibmakir. ‘Niryi kansi ilila mambul don dinyi karebkwankin. Ara, kan mabwe nirya ab, kan ai ninyi asi, Israel mutuk ninyi kankan aryi, erebdob ninyi aryi kuboka, luknubdob ninyi ab, kan deibdoba sal nang nirya asi, kum dandeibkwankin,’ ebdeibmakir. 22Tonda, kanci malyi kun dinyi aryi, Ni kanya u yibminikokabnoumci, sun Israel nang ababyi malyi kun dinyi bobsinibumwe. A deyok aryi, ‘Niryi kan ai ninyi nirya asi, Nebat mi Yerobeam ab, Ahia mi Baesa ab asi, obminikokabsiryi kum dandeianse to kanbabyi kum dandeibkwankin,’ ebdeibmakir. 23Ba, Er Iya Erebdobnyi biryi Izebel biti ebdeibmar ara, ‘Izebel bira Yizreel mutuk lika diniboka baitam aryi kam oboka yibkwande,’ ebdeibmar. 24Ba, ‘Kan Ahab ai ninyi asi, atei keta tam a dibingnyi ninyi ara kam aryi doyibkwande. Ba, baitam o dirbingnyi ninyi ara imtam kuraming maka aryi tub likoka yibkwaming,’ ebdeibmakir.

25Tonda, Er Iya Erebdobnyi urasintam asi yuk ninyi ara Ahab biryi a malyi dinyi kubdongobdandobmar to kuna ara yuk nang ara ton kum kunung. A malyito kubmar dinyi ara er ner Izebel biryi, ‘Ato kubkwanim,’ ebmou deyok aryi, Er Iya Erebdobnyi urasintam asi iya malyito kubdongobwe. 26Tonda, erci iya malyito dinyi ara yuk-yuk kwemdeina moloboka milirur. Ara, sun Amori ninyi aryi moloraming to kuboka miliboka molorur. Sun Amori atei ninyi ara Israel mutuk ninyi wengyankwamnyi ati, Kanaan mutuk dam aryi, Er Iya Erebdobnyi biryi yakamwe atei nang.” Er Iya Erebdobnyi biryi nabi Elia deici asi er Ahab biti ato ebdeiamwe.

27Ura, Ahab biryi Elia ebmou uram sirya kekebmouci, er kanya, “Se, talya aryi a ebmar to kunubkwan,” teneboka er ongoron aling kwilik-kwilik eblobokmou. Ba, er ongon aling ara karung aling doboka ongobdobmou. Ba, kwaning ababyi ton yina kumci si teboka bukmou. Ani, erci baitam yibinkun ura, urasin malyi boboka yibaramwe. 28Ura, tubto Er Iya Erebdobnyi biryi Tisbe ateinyi Elia bisi ato ebmou, 29“Ni urasin dam aryi, er Ahab luknubdongoboka yibanmar ara sirya eibmarim do? Ni urasin dam sirya luknubdongobmar deyok aryi, Niryi ersi mambul kun dinyi a talak aryi kum karebkwan. Eda, er mabwe aryi deibdoba mabwe kubde binkwaming talak aryi karebkwan,” ebmou.

Currently Selected:

1Raja-raja Uram 21: MTG

Highlight

Copy

Compare