1Raja-raja Uram 20

Er Imtamnyi biryi sun Samaria nang asi lebdobmou deyok

20:1-22

1Ura, Aram mutuk sienyi Benhadad biryi er yin doun nang nirya ab, yuk mutuk sien nang ninyi 32 baryi nang ab, ninyi ordan kereta ab, kuda ab bulubdeibmou. Bulubdeibmouci, sun Samaria atei ninyi asi mar bobinmaici, warikoka aknabdongobmai. 2Ura, Aram mutuk sienyi Benhadad biryi er arungni nang asi, “Israel mutuk sienyi Ahab bisi ato erbindarur,” eboka bokeibkwamou. 3Ara, “Kan emas ab, perak ab, kan nerabwe mer ab, kan mabwe nermabwe urasin teleb nermabwe nirya ara niti karebkwamanirim ebmar erbindarur,” eboka bokeibmou ba, erbinmai. 4Uca, Israel mutuk sienyi Ahab biryi er uram ato eboka sunsi dekeibmou. “Er talerur dinyi nirya karebkwanir ebmo to ara niryi, ‘Ur,’ ebman ati ersi erbindarur,” ebmou ba, tamuboka eryanmai. 5Ani, sun Benhadad arungni nang aryi tubto Israel sienyi Ahab dam lik bitinyi dinyi yandoka, Benhadad biryi ebdeibmou to ato ebmai. “Yuma ara ato ebmakise, ‘Kan emas ab, perak ab, kan nerabwe mer ab, kan mabwe nermabwe ab nirya ara niti karebkwanirim,’ ebmakise. 6Bok, ambutum ara a kiting asing kuabde uki aryi ni yin doun nang aryi yandoka kan kun ai ab, kan wa in nang kun ab ai ab kan talerum dinyi ab nirya asi, ‘Anda bona asi dobdobkwayeb,’ tenebmangnyi to yandoka dalubdobkwanking, ebmar,” ebmai.

7Ura, Israel mutuk sienyi Ahab biryi sun Israel mutuk wis yoka nang nirya si naboka bulubdeibmouci, ato ebmou. “Aram mutuk sienyi Benhadad biryi, ‘Nunsi malyi kubminiktinyi,’ tenen ati, ‘Nisi kan talerum dinyi nirya karebkwamanirim,’ ebmanir ba, ‘Karebkwamakin,’ ebman,” ebmou. 8Bok, sun Israel nang wis yoka nang aryi sun sienyi Ahab bisi ati ebmai. “Nai, kanci Aram mutuk sienyi Benhadad molona kekeboka, kan talerum dinyi karena mem,” ebmai. 9Ura, Israel sienyi Ahab biryi sun Aram mutuk sienyi arungni nang asi ato ebmou. “Sun sienyi Benhadad bisi tamuboka ato erbindarur! ‘Yuma molobmoumwe dinyi ara niryi ur ebmakise. Bok, a tum molobmarim dinyi ara niryi kan molobmarim dinyi ur kum ebkwamakin,’ ebmar ebkwandarur,” ebmou. Ura, sun Benhadad arungni nang ara sun sienyi Benhadad bisi tamurbinmaici, Israel mutuk sienyi Ahab ebdeibmou to kuboka ersi, “Ato-ato kuboka ebmakir,” ebmai. 10Ura, tubto Aram mutuk sienyi Benhadad biryi Israel mutuk sienyi Ahab bisi uram ato ebdeibmou. “Niryi diba ati ebkwinkin ara kan atei Samaria asi daluboka sici kibdeibkwamakin. Ba, akatei dalubdoba er sici ara ni yin doun nang sun taruk yangamna tentok aryi dobtalebkwaming. A ebman dinyi asi kum kunubnyi ura, ni molonun kwemdeina aryi obkwanir ebmar,” ebmai. 11Uca, Israel mutuk sienyi Ahab biryi Aram sienyi biti sunsi ato ebdeibmou. “Sun ninyi yin doun nang ara ninyi mar boboka muna kibdongobminyi ati, ‘A, ninyi sirya oboka muna kibdongobnarya,’ eboka ererdaraming. Ato kum kubmarim cok ara kanci minob talyi ererdana mem!” Ato kuboka ebmakir erbindarur ebmou. 12Ba, sun sienyi Benhadad ab, yuk mutuk sien nang ninyi 32 baryi nang ab ara sun keis ol ai ninyi walina talen me yinmai dam tamuryanmai. Tamuryanmai ura, Ahab ebdeibmou to kuboka sun sienyi Benhadad dam ebmai. A uram kekebmou ura, Samaria ninyi mar bobkwamouci, er yin doun nang anabminikmou.

13Ura, Er Imtamnyi uram ermurunanyi si nabi tentok aryi Israel sienyi Ahab dam yandoka ato ebmou. “Er Iya Erebdobnyi bira ato ebmakir, ‘Benhadad er yin doun nang sun mikib babyi sun ninyi ilinto ara sirya eibmarim do? Bok, arub tum aryi Ni Imtamnyi biryi sun Benhadad yin doun nang nirya asi, oboka muna kirdongon dinyi karebkwamakin ba, muna kibdongobkwamarim. Ba, kanci Ni Iya Erebdobnyi bira Ni tentok kunun aryi sunsi ato kuboka karesunun dinyi bikwandim,’ ebmar,” ebmou. 14Ura, sienyi Ahab biryi a nabi asi ato eboka asibmou. “Dan yin doun nang aryi miliboka ni mar ordana nang asi muna kibdongobkwaming do?” Ato eboka asibmou uca, a nabi aryi sienyi Ahab bisi ato ebmou, “Er iya Erebdobnyi biryi, ‘Sun akatei erebdob wa in nang kalingdaming kabir yin doun nang aryi oboka muna kibdongobkwaming,’ ebmar,” ebmou. Ura, sienyi Ahab biryi a nabi asi tubto ato eboka asibmou. “Unanyi biryi mar menekoka bobinkwande do?” ebmou uca, a nabi aryi, “Kanci menekoka mar bobinkwande,” ebmou. 15Ura, sienyi Ahab biryi sun akatei erebdob wa in nang kalingna kabir yin doun nang nungmou ara 232 baryi nukmou. Ba, sun Israel mutuk yin doun nang nukmou ara 7.000 baryi nukmou. Sun antaniboka a nirya nukmou ara ninyi 7.232 baryi nukoka kiknibdeibmou. 16Ura, Aram mutuk sienyi Benhadad ab, sun yuk mutuk sien nang bok, Benhadad tam kibmai nang ninyi 32 baryi nang ab ara kiting dukduk en aryi walina talen me sun keis ol ai yinmaici, walirdanmai. A talak aryi, sun Ahab yin doun nang aryi mar bobinmai. 17Sun Samaria atei erebdob wa in nang kalingna kabir yin doun nang aryi, minob menekoka Benhadad bisi mar bobinmai. Ba, sienyi Benhadad biryi er arungni nang asi, Samaria atei minob meimbindarur! eboka arukmou. Ba, meimbinmai nang aryi ersi ato ebmai. “Samaria atei yin doun nang aryi mar boyanganmasing,” ebmai. 18Ura, sun sienyi Benhadad biryi ato eboka arukmou. “Mar boboka obdankwamab ati yanganmang kum, teleb kurdana ati yanganmang kum ababyi sunsi nirya talebkwandarur,” ebmou. 19Bok, sun Samaria atei erebdob wa in nang kalingna kabir yin doun nang aryi mar boboka menekmai. Ba, sun Israel yin doun nang nirya ara sunti miliboka mar neik tum bobmai. 20Ato kuboka sun Samaria atei nang ab, Israel erebdob nang kalingna kabir nang ab aryi Aram nang asi mar boboka obukde banmai. Ba, sun Aram nang ara cukoka baronmai asi sun Israel yin doun nang aryi dobkirikoka obmai. Bok, Aram mutuk sienyi Benhadad ab, er yin doun nang ninyi ukubaryi nang ab ara bisam kuda deici bukoka binsekdobmai. 21Ani, sienyi Ahab bibabyi mar ordan ai er yin doun nang ab antanibmouci, sun Aram nang bisam kuda babyi kereta babyi nirya oboka dalubkabmai. Ato kuboka sun Samaria nang aryi, Aram nang asi mar boboka muna kibdongobmai. 22Ura, Er Imtamnyi uram ermurunanyi biryi sienyi Ahab dam yanmouci, ato ebmou. “Kwalina kwalibloboka ara Aram atei sienyi biryi tubto mar boboka iyankwankir. Ati, atei tam tamurbiminci, ‘Ato kuboka mar boboka obdankwanim,’ tenen ati diboka kan yin doun nang kiknirminingbirum,” ebmou.

Aram mutuk ninyi aryi sun Israel mutuk ninyi asi lik bitinyi dinyi mar bobmai deyok

20:23-34

23Ura, sun Aram nang ab, Samaria nang ab obdanamnya ara kwalina tentok sirya kwalibmai. A talak aryi Aram mutuk sienyi Benhadad bisi sun er amwetam kuboka er wa in nang aryi ato ebmai. “Sun Israel ninyi molonung kwemdeina ara mutuk konkon kwemdeina asi molonung. Akiryi, nunsi mitang kibsiniboka muna kibdongobsei. Bok, nunci sunsi mitang kibminikoka muna kibdongobokwamibyi ura, bakan mutuk tam asi bobindoka obdankwayeb. 24Ani, nun sienyi biryi ato kubdur, sun weik sien nang ninyi 32 baryi nang ara dobkwetebdiryi, yuk sien nang asi unubdur. 25Ani, nun sienyi biryi er yuk yin doun nang asi bulubdeibdur. Ara, yuma mar boboka sun Israel nang ab obdankwamiryi bulubdeiboka ordaramnyi uca, obsekamnyi yin doun nang bulubdeiamwe to kuboka bulubdeibdur. Ani, mar ordan kuda ab, kereta ababyi minob a buluamwe to kuboka bulubdeibdur. Nun sienyi biryi ato kubte ba, nunci mar boboka bakan mutuk asi bindoka obdatibyi. Ba, nunci sun Samaria nang asi oboka muna kibdongobtibyi.” Ato kuboka ebmai uram sun sienyi Benhadad kekebmouci, “Ukubtibyi,” ebmai to kuboka kunubmou.

26Ura, sun Aram nang ab, Israel nang ab obdanamnyi talak aryi kubde baramnyi asi kwalina tentok sirya kwalibmai. A talak aryi sun Aram nang aryi tubto sun Israel nang asi Afek mutuk mar bobinkwamaici, sienyi Benhadad biryi er yin doun nang kiknibminikmou. 27Ba, Israel mutuk sienyi Ahab bibabyi Aram mutuk sienyi biryi er yin doun nang kiknibminikmou to kuboka kiknibminikmou. Ani, er yin doun nang bobkwamai dinyi nirya kiknibminikmou. Ato kuboka sirya kikniboka bobmai ura, sun yin doun nang olong bitinyi bokmaici, bisik noutam bindoka sun Aram nang yankwamai bisik tam dibdeboka keis ol ai dobmaici, mabmai. Bok, sun Aram yin doun nang mar boyanmai ninyi mak ara a mutuk nirya libdobmou asi eibmai. 28Ura, nabi tentok aryi sienyi Ahab dam yanmouci, ato ebmou. “Er Iya Erebdobnyi bira ato ebdeibmou, ‘Aram yin doun nang aryi sun Israel nang molonung kwemdeina ara mutuk bakan kwemdeina asi molonunga kuma eda, mutuk konkon kwemdeina asi molonunga. Ebmasungwe ati, Ni Iya Erebdobnyi biryi sun Aram yin doun nang nirya sun taruk dam dobkarebkwamasin ba, muna kibdongobkwamarum. Ba, Ni Iya Erebdobnyi bira Ni a kunum kununci, ato kurdeirisunun dinyi sunci bikwandum,’ ebmar,” ebmou.

29Ura, sun Aram yin doun nang babyi, Israel yin doun nang babyi uki nabaryi nirya ara sun keis ol ai a kuamnyi. Bok, uki tabaryi tum ara mar boboka ordanmai. A ordaramnyi noutam ara sun Israel yin doun nang aryi Aram mutuk yin doun nang asi ninyi 100.000 baryi obmai. 30Ba, sun Aram yin doun nang, “Afek atei bisik kuboka bindobkwayeb,” tenen baronmai nang ara weik lika aryi daluboka siklibmou. Ara, sun ninyi 27.000 baryi akatei bindoka wekmai asi daluboka siklibmou.

Ba, sun sienyi Benhadad bira Afek atei ai tentok asi bindoka inibdobmou. 31Asi er yin doun sien nang aryi er dam yandoka ato ebmai. “Sun Israel mutuk sienyi kiboka talenung nang ara ninyi boukwe kimni nang enung. Ati nunci, Israel mutuk sienyi dam asi bindoka, ‘Nunsi sirya muna kibdongobmasirim,’ erbinkwayeb. Ara, kolo aling akubdobibyi ura, tabwe aryi nun ngang arikdandoka er dam binkwayeb ba, erci kansi lebdeibkwankurura,” ebmai. 32Ato ebmaici, sun a ebmai to kuboka kaluboka koubdanmai ura, sienyi Ahab dam binmaici, ato ebmai. “Nun sienyi Benhadad bira, ‘Oning kum,’ ebmar,” ebmai. Uca, sienyi Ahab biryi ato ebmou, “Ni kwit bira kum obyi darib?” ebmou. 33Ura, sun Benhadad yin doun nang ara sienyi Ahab bira, “Una ebkwamar do?” tenebmai. Asi sun sienyi Benhadad, “Ni kwit, bira kam tuba kunmar darib,” ebmou. Ba, sun a yin doun nang aryi ato ebmai. “Kan kwit nun sienyi Benhadad bira kum obyi,” ebmai. Ura, sienyi Ahab biryi sunsi ato ebmou. “Borbindarur!” ebmou ba, borbindoka yanmai ura, sienyi Ahab biryi, “Benhadad ni kereta dub weleboka buryarum!” ebmou ba, weleboka burbinmou. 34Ura, Aram mutuk sienyi Benhadad biryi Israel mutuk sienyi Ahab bisi ato ebmou. “Kan nai mutuk tukwe bok asi ni nai biryi arabdamwe mutuk tukwe nirya ara kandamnyi tamubkarebkwamakin. Ba, Damsyik atei ara ni nai biryi Samaria atei weik ukutotoa nirya dengni atei doamwe to kuboka dobdum,” ebmou. Ato ebmou ba, Israel mutuk sienyi Ahab biryi ato ersi ato ebmou. “Ato ebnirim ati, niryi kansi kum obkwamakin eda, ur bindobdum,” ebmou ba, bindobmou. Ato kuboka sun Israel mutuk sienyi ab Aram mutuk sienyi ab aryi, “Ukubdankwanim,” ebdeibdanmareici, bokdanmarei.

Er Imtamnyi uram ermurunanyi biryi sienyi Ahab bisi deyok deibmou deyok

20:35-43

35Ura, sun ato sirya kubdanmarei talak ara Er Iya Erebdobnyi biryi nabi tentok asi ato ebmou. “Kan kwit bisi, ‘Nisi kulabnindarur,’ ebkwandum ba, kulabkwankunung,” ebmou. Ura, a nabi aryi Er Imtamnyi biryi ebdeibmou to kuboka er kwit bisi ebmou uca, ersi kum obmou. 36Ura, erci a “Obnurum,” eboka arukdenmou nabi asi ato ebmou. “Er Iya Erebdobnyi biryi ebdeibmar to ati, ‘Ukubnurum,’ ebmakin bok asi, kanci kum kunubmarim. Ati, a kurabib dikum aryi sakweteboka yuk dikum baminyi ura, bai yu kam singa aryi oboka yibkwinkir,” ebmou. Ura, a ebdeiabwe to kuboka bai yu kam singa aryi, a nabi asi oboka yibmou. 37Ura, a nabi aryi tubto er kwit yuk nabi asi ato ebmou. “Nisi kulabnurum,” ebmou ba, ersi kulaboka dilaka sakeibmou. 38Ura, aling kolo aryi, “Ni urasin eibningnyob,” tenen ati er urasin libdandobmouci, Israel sienyi Ahab yankwamou bisik iririkna asi kalikoka tingbinmou. 39Ura, sienyi Ahab yangau asi a nabi aryi ato ebmou. “Nai, nira kan wa inanyi. Mar ordan ai bindoka ordanmab noutam aryi, a mutuk yin dounanyi tentok aryi sun tabwe deboka taleramingnyi ninyi tentok ni dam boyandoka ato ebmanou. ‘Anyi bisi diboka kalikwandum! Asi, kan dam aryi bindobci ura, kanci co bok 3.000 perak baryi dekwandim kum, kan nong unubdankwamarim kum,’ ebmanou. 40Bok, a talak ara niryi ninyi mar bobinabna ani, anyi kalingyanabna kimonwe uca, anyi bindobmo,” ebmou. Uca, Israel sienyi Ahab biryi a nabi asi ato ebmou, “Kanbiramnyi malyi kubmomwe deyok aryi, ‘A karebmakou ikin,’ takubdobkwamarim,” ebmou. 41Ura, a nabi er a urasin libdanmou aling kolo langakaboka er urasin lak kibdanmou ba, Israel sienyi biryi eibmou. Ara, sun nabi nang bok ninyi bintentoknyi biryi ato bindoka ebmou asi eibmou. 42Ura, a nabi aryi sienyi Ahab bisi ato ebmou. “Er Iya Erebdobnyi biryi, ‘Obdum,’ ebdeibmakounyi bisi kum obmarimci, lobdongobmarim ba, bindobmar. Ati, er kisok ara kan kisok unubkwamarim. Ani, er yin doun nang kisok ara kan yin doun kisok aryi unubkwamang,” ebmou. 43Er Imtamnyi uram ermurunanyi nabi biryi sienyi Ahab bisi ato ebmou. Ba, er kanya, “Se,” tenen kanya bobmouci, li asa Samaria atei bindobmou.

Currently Selected:

1Raja-raja Uram 20: MTG

Highlight

Copy

Compare