1Raja-raja Uram 19

Elia mutuk kon si Horeb welebinmou uram deyok

19:1-8

1Ba, sienyi Ahab biryi Elia kuramwe dinyi nirya ab, Elia biryi sun kwemdeina si Baal uram ermurun nang nirya asi erci ninyi on ya aryi nirya lukoka obminikmou to asi, Ahab ner Izebel dam asi lak eboka nukarebmou. 2Ani, Izebel biryi ninyi ton bokeibmouci, ato eboka arukmou, “Elia bisi uram ato erbirum, ‘Elia, kanci ni kwemdeina uram ermurun nang obkiribumwe. Ati, Elia, kansi kum obkinyi ura, ni kwemdeina aryi obnicei, ati ambutum lukunda ara bisina kum kubkwamar, yandoka obkwamakin,’ Elia bisi erbirum,” Izebel biryi eboka arukmou. 3Ba, er ilil kubmouci, bindoka lemdarorbinmou. Ani, Yehuda mutuk, Bersyeba atei sirya binmou ura, er wa inanyi kabirnyi bira akatei a kabdeibmou. 4Ba, Elia er yuk yini mutuk binmou. Sirya binmou ura, tiling ilila co si arar deyok bindoka bukmou. Ani, obkwamanir aryok se tenen kanya bobmouci, Er Imtamnyi bisi ato eboka molobmou, “Nai Iya Erebdobnyi, nira ni abwe yabwe aryi telebto kuramnyi to kum kununci malyito kunun ati ur dibkwan,” eboka molobmou. 5Imtamnyi bisi ato kuboka ebmouci, a co si arar deyok mabmou. Bok, lukdandoka Imtamnyi uram eryuryangananyi imtam aryi yandoka ersi bolibmou. Ura, ato ebmou, “Bukokabminci, kwaning yirorum!” ebmou. 6Ura, bukalabokaburyi, er mabmou ai anda dirderamwe uca, er kisok deibmou ai asi, moyok aryi me dingibmoua kibmaning ab, kwaning roti tokol ab kubmou asi asing eibmou. Ura, Elia bira a roti kwaning ab, me ab doyibmouci, tubto maryibinmou. 7Uca, Er Iya Erebdobnyi uram eryuryangananyi tubto, liki bitinyi dinyi er dam yanmouci, ersi bolibdongoboka ato ebmou, “Bukokminci, kwaning yirorum! Ato kum yibmaminyi ura, kan bisik bana mitang kubkicei,” ebmou. 8Ura, erci bukokaburyi, kwaning ab, me ab yibdobmou. Ba, a yibmou akiryok bisik noutam lukunda kitingtam baramwe tok asi nungna uki 40 baryi kibmou ura, mutuk kon si Horeb dam binmou.

Er Iya Erebdobnyi biryi Elia bisi Horeb mutuk kon dam aryi lak kibdanmou deyok

19:9-18

9Er Elia bira Horeb mutuk kon dam binmouci, keil deyok bindoka mabmou. Ba, Er Iya Erebdobnyi erti uram yanmouci, ato ebmou, “Elia, kan ara una kuryanmarim do?” ebmou. 10Uca, Elia biryi Er Iya Erebdobnyi bisi ato ebmou, “Nai Iya Erebdobnyi, nira Kan wa akwe bukman mabman il dokunun. Ara, Kan uram keken nang, Israel nang ara dib en uram deici aryi, ‘Kan uram kunubkwayeb,’ eamnyi dinyi ara taklobyi. Ara, Kanti dama deirin keil lamna ababyi nirya dalubkaboknin yibei. Ani, Kan uram ermurun nang ababyi nirya obkiribyi. Eda, ni tentok kam kunman. Uca, nibabyi obkwamaningci moun yinmaning,” ebmou. 11Ura, Er Iya Erebdobnyi biryi ersi ato ebmou, “Sakwetebokabminci, ei mutuk kon dub aryi Ni Imtamnyi urasin dam yarum,” ebmou.

Ura, Er Iya Erebdobnyi biryi mikib kumwe biriman yibindokaburyi, weik mutuk kon babyi, mitik mutuk kon babyi coboka telebmou. Bok, Er Iya Erebdobnyi bira a kumwe umbura aryi lak kum eibmou. Ba, a mikib ilila kumwe sirya dobmou talak ara mutuk eimna dobmou. Bok, a mutuk eimna biriman ababyi Iya Erebdobnyi kum lak kibmou. 12Ba, eimna sirya dobmou talak ara uk donokmou. Bok, a uk umbura ara Er Iya Erebdobnyi lak kum eibmou. A uk sirya ura, uram dingdang eblobwe talak ara mitik kumwe lilim namina nun ubling eryibinmou. 13A kumwe aryi ubling-ubling ebmou uram asi Elia biryi sirya kekebmou ura, tikoka er ongoron aling aryi urasin libdanmou. Ura, mabmou keil umbura ai bisik bublan dam tingbindoka kekiu uca, Er Iya Erebdobnyi biryi Elia bisi ato ebmou, “Elia, kan a dikum ara una kuryanmarim do?” 14Ebmou uca, Elia biryi Er Iya Erebdobnyi bisi ato ebmou, “Nai Iya Erebdobnyi, imtam yin doun nang sienyi nira Kan wa akwe bukman mabman il dokunun. Ara, Kan uram keken nang, Israel nang ara dib en uram deici aryi, ‘Kan uram kunubkwayeb,’ eamnyi dinyi ara taklobyi. Ara, Kanti dama deirin keil lamna ababyi nirya dalubkaboknin yibei. Ani, Kan uram ermurun nang ababyi nirya obkiribyi. Eda, ni tentok kam kunman. Uca, nibabyi obkwamaningci moun yinmaning,” ebmou.

15Uca, Er Iya Erebdobnyi biryi ersi ato ebmou, “Yini mutuk bisik kuboka Damsyik atei tamurorbiminci, ninyi si Hazael bisi Aram mutuk sienyi bindoka tikeibdum. 16Tonda, Nimsi mi Yehu bisi kanci me asok likeibokabminci, Israel sienyi tikeibdum. Ba, Abel-Mehola ateinyi si Safat mi Elisa bira kan unubkwankiranyi Ni Iya Erebdobnyi uram ermurunanyi kanci ersi me asok likeibokabminci tikeibdum. 17Sunsi ato kubminyi ura, Aram sienyi Hazael er ninyi on ya aryi obkwande. Ba, erci kum obmaci ninyi ara Israel sienyi Yehu biryi obkwande. Ba, Yehu biryi kum obmaci ninyi ara Nabi Elisa biryi obkwande,” ebmou. 18“Bok, Niryi Israel mutuk ninyi yubwa 7.000 baryi nang ara lebdeibkwan. A lebdeibkwan nang ara sunci Baal kwemdeina asi luknubdongoboka molona kum nang ab, sun si bambul aryi Baal kwemdeina asi kunkunumna kum deyok aryi sunsi lebdeibkwan,” ebmou.

Er Iya Erebdobnyi biryi Elisa bisi nabmou deyok

19:19-21

19Ura, Elia Horeb kon aryi sirya atei tam yanmou ura, Safat mi Elisa wa inmoua dam binmou. Bindoka diramwe uca, bisam lembu aryi wa inmai ara 22 baryi bok, ton bitinyi-ton bitinyi kiboka wa inmai. Ba, Elisa bira aminda bisam bitinyi asi bobmouci, wa ibde banmou asi asing eibmou. Ura, Elia bira Elisa dam tingbinmou. Tingbinmouci, Elia er alib ongon aling kwiriboka Elisa takonya labdeiboka bindobmou. 20Ura, Elisa er bisam lembu sapi mer deibloboka, Elia bisi dombinmouci, ato ebmou, “Nai, ni nai ab, ni kwin ab asi minob moloboka yaniryi, kansi milibkwankin,” ebmou. Uca, Elia biryi ersi ato ebmou, “Yo teleb, ur kan nai ab, kan kwin ab asi ebminci yarum,” ebmou. 21Ura, Elisa tamuryanmouci, a deiblobinmou bisam dobokaburyi, obmouci, touboka kiknibdeibwe ura, bisam biriboka wa iramwe co aryi uk dabmou. Ura, a bisam daboka er ai ninyi ab, er kwit yabwe ab asi yibkarebmou. A sirya ura, anaboka Elia bisi milibmouci, Elia wa irmilinanyi kibmou.

Currently Selected:

1Raja-raja Uram 19: MTG

Highlight

Copy

Compare