1Raja-raja Uram 18

Obaja ab, Ahab er wa in nang ab kuboka Elia ab ebdanmai uram deyok

18:1-15

1Ura, kwalina winiryi dinyi dobmou aryi, Er Iya Erebdobnyi biryi Elia bisi ato ebdeibmou, “Sienyi Ahab bisi biminci, ato ebdum, ‘Do talak ara Er Imtamnyi biryi tukwetam nirya asi mo karebkwamasir,’ erbirum,” ebmou. 2Ura, Elia biryi anabdobmou. Bok, a talak ara Israel mutuk Samaria atei ara ilila kwaning utana li doamwe ba, kwaning utana tuba buramnyi. Er Imtamnyi uram ebdeibmou to kuboka sienyi Ahab bisi erbinmou. 3A deyok aryi, Ahab biryi er ai dam kalingna sienyi kibdeiamunyi Obaja bisi nabmou. Anyi Obaja bira Iya Erebdobnyi bisi ilil kuboka dib teneramunyi kuramwe. 4A talak ara Izebel biryi Er Iya Erebdobnyi uram ermurun nang nirya asi oboka kum danabdeiriramwe. Ba, Obaja biryi Imtamnyi uram ermurun nang ninyi 100 baryi keil um inibdeiamwe. Ara, ninyi ton 50 nang-ton 50 nang meici kukoka keil umbura yuk-yuk dongobdeiamuryi, me ab, kwaning ab kareramwe. 5Ahab biryi Obaja bisi ato ebmou, “Nunci a mutuk niryi yibinkirikoka me yibaranci dikum ab, me anaranci dikum ab asi ingkirikwanim. Ba, sangkuna maning murmuta ton asing eibdobnimnyi ura, nun bisam kuda yabwe ab, bisam keledai yabwe ab ton ona kum kubkwanim,” ebmou. 6Ura, Ahab ab Obaja ab sunci bisik bokdobmareici, binton yuk bisik ingkirikde binmou. Ba, binton yuk bisik ingkirikde binmou.

7Ura, Obaja bisik noutam ingkirikde banmou uca, Elia ab ebdanmarei. Ura, ersi yan sunsunukeiboka kibdobmouci, ersi ato eboka asibmou, “Kanda Elia a kunum do?” eboka asibmou. 8Uca, Elia biryi ersi ato ebmou, “Yo, diba, nira Elia!” ebmou. Ura, er Obaja bisi ato ebdeibmou, “Ur, kan sienyi Ahab bisi ato ebdeibdum, ‘Elia o kurur,’ erbirum!” ebmou. 9Uca, Obaja biryi Elia bisi ato ebmou, “Niryi malyi kun dinyi ton kununa kum kubse bok, ‘Sienyi Ahab biryi obdur,’ tenen benenmanirim do? 10Nai Elia, Er Iya Erebdobnyi kan molorumnyi si deici aryi niryi diba ati ebman. Ara, ni sienyi Ahab biryi yuk atei-yuk atei nang nirya asi arukwe ba, a mutuk bukwe tok yibinkirikoka ingkiringkunung. Ba, sunci a yibindoka ingkiringkunung mutuk dam nirya aryi kansi kum eibkingnyi ura, ni sienyi Ahab biryi a yibindoka ingkiringkunungci, yibanung mutuk sien nang mer asi, sunci dib en uram aryi, ‘Diba ati Elia a mutuk ton kum kurur,’ ebkwanking. 11Ato kuboka sienyi Ahab biryi ingkiringkurur ati, niryi ersi bindoka, ‘Ni nai Elia bira o yanganmar,’ erbitinyi do? 12Sienyi Ahab bisi, ‘Elia bira o yanganmar,’ erbinmanyi talak Er Iya Erebdobnyi kanya aryi, ni kum bingnanyi mutuk da bobikicei. Ba, ato bindoka ebnyi ba, erci yandoka saklobkirirnyi, ‘Tola ati ebmanira,’ teneboka ni obnicei. Ani, nai, nira mitik talak aryi, kanci dib tenebumci molorumnyi Er Iya Erebdobnyi bisi dib teneboka molonunyi kunun ati ebman. 13Nai ura, ni ukuanse to ebkwan. Izebel biryi Imtamnyi uram ermurun nang asi orminingnamwe talak ara ninyi yubwa ton 50 baryi-ton 50 baryi kiboka keil siling um dongobdeiboka, sun yina borkiringnanse. Ba, niryi sun ninyi 100 baryi nang ab, ninyi yubwa olong nungna 50 baryi asi keil umbong dongobdeiansiryi, kwaning ab, me ab yirkareranse dinyi ara ni nai bisi sirya ebyi do? 14Tonda, unato ati, ‘Kan nai bisi, “Elia o bukmar,” erbirum,’ enmanirim do? A enmanirim ara ni obkwamanir to ati enmanirim,” ebmou. 15Uca, Elia biryi ato ebmou, “Er Iya Erebdobnyi kam tuba kururci, tukwe dangna nirya kiknibunyi, niryi Er wa inanyi kununci, Er Iya Erebdobnyi si deici aryi, arub tum aryi niryi sienyi Ahab dam asi bindoka lak kibdeibdankwaman,” ebmou.

Elia ab, Ahab ab ebdanmarei uram deyok

18:16-19

16Ura, Obaja bira sienyi Ahab bisi binmouci, Elia ebdeibmou uram asi Ahab dam bindoka lak ebmou. Ba, er Ahab biryi a uram kekebwe ura, Elia dam binmou. 17Ahab bindokaburyi, Elia minob eibmouci, Elia bisi ato ebmou, “Ara, kan do, Israel malyi kubminikumnyi do?” 18Uca, Elia biryi Ahab bisi ato ebmou, “Israel niryi kum malyi kubminikse eda, kan ab, kan ai ninyi ab aryi malyi kubminikdau. Ara, sunci Er Iya Erebdobnyi erdeirin dinyi asi sirya taklobdaua ab, kanci sun kwemdeina si Baal molonung nang asi sirya milirum. 19‘Ato ebmarim ura, Israel mutuk nang nirya mutuk Karmel kon asi bulubdarur,’ eboka arukdum! Ani, kwemdeina Baal wa in nang yubwa 450 baryi nang ab, kwemdeina si Asyera wa in nang yubwa 400 baryi nang Izebel biryi dengdur nang ab buluboka, nisi Karmel mutuk kon dam yandarur!” ebdum.

Elia Karmel mutuk kon dam binmou uram deyok

18:20-46

20Ura, Ahab biryi sun Israel nang ab, kwemdeina Baal uram ermurun nang ab asi, “Karmel kon akwe bulubdarur!” eboka arukmou. Ba, sun nirya Karmel mutuk kon akwe bulubmai. 21Ura, Elia bira sun Karmel kon bulubmai dam binmou. Binmouci, sunsi ato ebmou, “Sun kanya kankana kanya bona mem. Eda, Iya Erebdobnyi bikwe dib teneboka molonkwamunyi ura, Er Iya Erebdobnyi bikwe molobkwandarur. Ba, kwemdeina Baal bikwe molonkwamunyi ura, Baal molonkwandarur. Sun kanya bitinyi bona mem!” ebmou. Uca, a wekmai ninyi nirya aryi er uram ton dengdeirina kum kubmaici kilikmai. 22Ura, Elia biryi akatei ninyi asi ato ebmou, “Sun Baal kwemdeina uram ermurun nang molon nang ninyi yubwa ara 400 baryi kunung. A kununga kankan aryi, Ni tentok ara Imtamnyi uram ermurunanyi kunun,” ebmou. 23“Ura, bisam yim sapi bitinyi nun dam boyandarur. Ba, sun Baal kwemdeina molon nang aryi bisam sapi tentok wiboka obingiryi, touboka-touboka co deici deibkwaming ati ebman. Bok, sunci a bisam asi uk dabingnyei. Ara, nibabyi bisam lembu obokabniryi toubnyi ura, a co deici deiriryankwaman. Bok, niryi uk kum dinibdongobkwaman,” ebmou. 24“Ura, Ni kanya aryi dib tenebsiryi molonunyi Er si moloboka nabkwaman ati, sunbabyi sun dib teneboka molondarurnyi si naboka molobdarur,” ebmou. “Ba, erci uk karebsirinyi bira Imtamnyi diba,” ebmou. Ba, a ninyi nirya aryi er ebmou uram ara, “Yo, teleb!” ebmai.

25Ura, Elia biryi Baal kwemdeina uram ermurun nang asi ato ebmou, “Sunda ninyi weik ati, bisam lembu wibokabmunci obmunyi ura, touboka kiknibminikmunci, sun molondarur kwemdeina asi molobdarur. Bok, sunci uk ara dinirdongona mem,” ebmou. 26Ura, ebmou to kuboka bisam lembu wiboka dobyi ura, toubokabiryi kiknibminikyi ura, sun kwemdeina Baal si sibokabiryi, belekuna aryi kuboka sintam a uki nirya ara ato eboka molonmai, “Nun molokunub kwemdeina, Baal kanci molonmakib to kuboka karebsurum!” Ato eboka a Baal moloramnya deyok dam asi mot seboka kingkaning kiringmaici molonmai bok, sun kwemdeina aryi, sun molonmai dinyi ton kum karebmouci, uram ababyi ton kum ebkarebmou. 27Ba, kiting dukduk en kibmou ura, Elia biryi sunsi ato kereboka ina ngilikmou, “Uram weikanun ibokabmunci sun kwemdeina asi nabdarur. Sun molondarur kwemdeina ara kam kum kururci, mikib kum kwemdeina kuma darib? Sun uram kum kekebmasir ara yuk dinyi ati da kanyi teneinmar kum, er tuba mabmar kum ati kamubdeibdarur!” ebmou. 28Ba, uram weikanun ibokabiryi, a kwemdeina namaici, minob ukuramnyi to kuboka sun nong bol lukoka sun mining dam nang ordeirdaronmai ba, ining ilinto kuboka lamdonmou. 29Ura, sintam ababyi sun nirya ara luba talen nang atoanun a kwemdanmai tok asi, sun kwemdeina ati dama deiboka molon talak sirya dobmou. Bok, sun kwemdeina aryi sun moloronmai dinyi ton kareboka, mitika uram ababyi sunsi ton kum ebdenmou.

30Ura, Elia biryi akatei ninyi nirya asi ato ebmou, “Ni dam yandarur!” ebmou ba, akatei ninyi nirya er dam bulurbinmai. Ura, Er Iya Erebdobnyi biti dama deiboka molon keil dungna dalubkweteamnya asi tubto kiknibmou. 31Ani, Elia biryi keil amolbaryi dobmou. A amolbaryi keil dobmou ara Israel nang sun abwe Yakub biryi deibdoba amolbaryi nang tenen dobmou. Ara, Yakub bisi Iya Erebdobnyi biryi ato kuboka ebdeiamwe, “Kan si ara Israel ebkwanking,” ebdeiamwe. 32Ba, erci a amolbaryi keil ara Iya Erebdobnyi si deici aryi, Iya Erebdobnyi biti dama deiboka molon keil dungna kiknibmouci, me ikin 15 liter baryi dongobmanto me tomol wekmou. 33Tonda, erci uk co sekoka kiknibminikokaburyi, a sekokeibmou bisam lembu a co dub dabmou. 34Ura, erci ato ebmou, “A dumbaryi me wangdona um asi me dikdongoboka langkarikeibmunci, bisam dabmab co dub asi dikdongobdarur!” ebmou. Tubto ato ebmou, “Tubto, liki bitinyi dinyi kubdarur!” Ebmou ba, liki bitinyi dinyi kubmai. Ani, tubto ato ebmou, “Neik kubmandau to akwe, liki winiryi dinyi kubdarur!” Ebmou ba, sunci liki winiryi dinyi er arukmou to kuboka kunubmai. 35Ba, a me tomol umbura nirya me langdibmouci, Imtamnyi biti dama deiboka molon keil dungna kubkub dina-dina nirya ara a dikdongobmai me aryi, a me tomol asi dingibmou.

36Ura, Er Iya Erebdobnyi biti dama deiboka moloramnyi talak sintam sirya kubmou ura, nabi Elia biryi Imtamnyi biti dama deiboka molon keil dungna dam tingbinmouci, ato ebmou, “Nai Iya Erebdobnyi, Ni abwe yabwe Abraham ab, Ishak ab, Yakub ab aryi molorankeinyi. Arub aryi kan ibarya lak kibdeibdum. Ba, yuk nang aryi, ‘Elia molorur Imtamnyi bira dib kurur,’ tenebkwanking. Nira kanci, ‘Ukubdum,’ eboka arukmanirim to nirya kunubkwaman. 37Nai Iya Erebdobnyi, ni molobmanto kunubdeibnurum. Ba, akatei ninyi nirya aryi Kansi, ‘Er Iya Erebdobnyi, dib kurur,’ tenebkwanking. Ani, Nai kanci sun kanya dangubdeibminyi ba, yuk kwemdeina molona kumci, Kan Imtamnyi bikwe kanya deibkwanking,” eboka molobmou. 38Ato eboka molobmou ba, Er Iya Erebdobnyi biryi imtam aryi kuboka uk dobkwetebmou ba, a keil ab, co ab, bisam lembu ab, me wakoka me dikmai dikum nirya ababyi uk lengkerekoka yibkabokmou. Ani, a me tomol um dingibmou me nirya ara Er Imtamnyi uk tin mak aryi cebdeibmou. 39Ba, sun akatei ninyi nirya aryi ato kubmoua asi asing eibmaici, sun yan kutam tukwe ai ikdongoboka ato ebmai, “Elia kan molorumnyi, Imtamnyi Iya Erebdobnyi dib kurur! Er Imtamnyi Iya Erebdobnyi dib kurur!” ebmai. 40Ba, Elia biryi sunsi ato ebmou, “Sun kwemdeina si Baal asi molonung nabi-nabi nirya talebdarur! Ninyi tentok ababyi ton barona kum uca, a nang nirya talebdarur,” ebmou. Sirya talebmai ura, Elia biryi sunsi me Kison dam bobindoka a nang nirya obmou.

41Ura, Elia biryi sienyi Ahab bisi ato ebmou, “Mo cebde yanganmar lilim kekebman ati, kwaning ab, me ab ola yirbirum,” ebmou. 42Ahab kwaning ab, me ab yirbiu talak ara Elia Karmel kon welebinmou. Ura, er yan sunsunubdeibmouci, er kisok ara kutam deici deibdongoboka molobmou. 43A sirya molobmou ura, er milibmou sal kabirnyi bisi ato ebmou, “Mutuk kon welebindokabminci, mekintam asi dirdonongderbirum,” ebmou. Ura, a kabirnyi mutuk kon dub welebindokaburyi, mekintam dibdonokdenmou. Uca, utotoa ton kuna kum eibmou. Ura, ato ebmou, “Ukutotoa ton kum eibman,” ebmou. Uca, er Elia biryi a kabir mi asi ato ebmou, “Tubto tamuboka dibderum!” Ato kuboka dirkiringmou asi liki tabaryi, dirbinmou. 44Ani, sirya kobdob liki tabaryi dinyi ara a kabirnyi biryi yandoka ato ebmou, “Se nai, mitik duwa bum asi, ilila me kwan deici aryi anaboka, tingweleyanmar asi asing eibman,” ebmou. Uca, Elia biryi ersi ato ebmou, “Ahab bisi bindokabminci, ato ebdum, ‘Kan kongkong eboka boyibarandim keica si kereta dub aryi sakweteboka anarminingdorum, mo aryi sekminikicei,’ ebdum,” ebmou. 45Ba, a asing kublabum ena aryok im sukubokaburyi, kumwe ilila dobokaburyi, ilila mo cemyanganmou. Ba, Ahab bira kongkong eboka ninyi bon keica er kereta dub welebdakaburyi, Yizreel atei bindobmou. 46Bok, Er Iya Erebdobnyi biryi Elia bisi a yukto mikib karebmou. Ba, Elia biryi er ongon aling kisibweleboka sabya arikdobmouci, cukoka sienyi Ahab bisik noutam banmou asi menekbisibkaboka, minob Yizreel atei wengban bisik dandanya bindoka tikmou.

Currently Selected:

1Raja-raja Uram 18: MTG

Highlight

Copy

Compare