1Raja-raja Uram 17

Nabi Elia bira me Kerit duman bindoka kuramwe uram deyok

17:1-6

1Nabi Elia bira Gilead mutuk kuboka Tisbe ateinyi kuramwe. Ura, uki tentok tum aryi erci Israel sienyi si Ahab bisi binmouci, ato ebmou, “Er Iya Erebdobnyi, er Iya Kam Kururnyi bira nun Israel nang molonubnyi si deici aryi nira Er wa irmilinanyi biryi nai kansi diboka kunubkwande uram ton ebkun. Ara, kwalina winiryi a kuboka mabde binkwayeb talak aryi mo doum-douma babyi, mo babyi iya ton kum cebdenkwande. Eda, niryi, ‘Mo cebdur,’ ebnyi akwa mo cebkwande,” ebmou. 2Ura, Er Iya Erebdobnyi biryi Elia bisi ato ebmou, 3“A mutuk dam aryi taklobokabminci, yaletam, me Yordan kouboka otam me Kerit duman asi inirorbirum. 4Ba, kanda a me Kerit asi yibde kubkwandim. Tonda, maka wirimwe mer asi Niryi sirya arukeibman aryi, kansi kwaning boyandoka karenkwanking ba, yiboka a kubkwandim,” ebmou. 5Ura, Er Iya Erebdobnyi biryi ersi a ebdeibmou to kuboka, Elia me Kerit duman binmou. Ara, me Yordan kouboka yaletam kuboka me Kerit duman asi bindobmou. 6Ba, a kuramwe talak a nirya sintam babyi belekuna babyi nirya ara maka wirimwe mer aryi bisam tub ab, kwaning roti ab boyandoka kareramnyi. Ba, me ara a me Kerit aryi kweboka yibde kuramwe.

Elia ab, Sarfat atei sulyi ner ab uram deyok

17:7-24

7Bok, uki weik kuboka mabde bau talak ara a kuramwe me duman me ara cebdobmou. Ara, a mutuk mo ton iya cemdena kum aryi a me cebdobmou. 8Ura, Iya Erebdobnyi biryi Elia bisi ato ebdeibmou, 9“Ukuca anabdobminci Sidon mutuk dam Sarfat atei birum. Bindoka, akatei a kunkwandum.#17:9 Sarfat atei ara Er Iya Erebdobnyi bisi kum moloramnyi mutuk ninyi atei. Ba, tonda a mutuk ninyi ara Israel mutuk ninyi kuma, eda yuk atei ninyi. A bindoka kubkwandim atei ara sulyi ner tentok asi, Niryi sirya arukdeibman aryi kansi kwaning karenkwankir,” ebmou. 10Ebmou ba, Sarfat atei binkwamouci, anabdobmou. Banmou ani, Sarfat atei wengbinkwamouci, akatei bisik wengbana bini tiki dinmou uca, a sulyi ner ara co bobde kunmou asi eibmouci, er dam binmou. Ura, Elia biryi a ner asi bindoka ato ebmou, “Me yin moyok aryi, ni me ton kweboka karebnimimba, yibkwan,” eboka molobmou. 11Ba, a sulyi ner aryi a me molobmou ati me kwerbanmou bok, Elia biryi uram doboka, “Roti kwaning ab boyankwanurum!” eboka tubto molobtabakmou. 12Uca, a sulyi ner aryi ersi ato ebmou, “Nai, Er Iya Erebdobnyi kan molorumnyi, Iya kam kururnyi si deici aryi ebkun. Iya dib sirik niryi roti kwaning mitika ababyi ton kum deibman. Eda, nai ni mitikanun deibdobman dinyi ara roti kiknin keica tepung dongdong mitika ab, minyak zaitun lukarika ab asi deibman. Ara, ni ab, ni mi ab a deibman tepung dongdong asi kiknibdobnimnyi ura, nun yibdobkwamanim ati, co a bororyanman. Ba, a roti kwaning sirya yiboknimnyi ura, do talak ara nun dibkwanim,” ebmou. 13Uca, Elia biryi a sulyi ner asi ato ebmou, “Kan ilil kukina mem. Ur kan ai bindoka kan ebmarim to kuboka roti kwaning yurbirum. Bok, ni yibkun dinyi asi minob kikniboka boyaniminci, sun nang amse dinyi ara aminda kiknibdobdum. 14Ara, ato deyok ati ebman, ni Nai Iya Erebdobnyi, Israel nang molonungnyi biryi ato ebdeibsou, ‘Roti kikniraming keica tepung deirin moyok umbura ara kum danana kum kubkwande. Ani, minyak me deirin moyok ara cerona kum kubkwande. Eda, tuba unuranci tok asi, Er Iya Erebdobnyi biryi tukwetam asi mo karebkwande talak kurbinkwande,’” ebmou. 15Ura, a sulyi ner aryi er ai bindokaburyi, Elia biryi ebdeibmou to kunubmou. Ba, a nang amse ab, er ab a kunkwamnyi talak ara sun kwaning kum danana kum kunkwamwe. 16Ara, Er Iya Erebdobnyi biryi minob uca, Elia deici asi sirya ato ebdeiamwe, “Roti kiknin keica tepung ab, minyak ab kirdeirin moyok aryi ton kum danana kum kubkwande.”

17Ura, uki ton kubdalubde bai talak aryi, a sulyi ner mi youn dobdobmouci, u yiramwe ani, a youn tin mak aryi a ner er mi dibmou. 18Ba, a sulyi ner aryi Elia bisi ato ebmou, “Er Imtamnyi uram ermurunanyi, kanda yandoka una kubmanirim do? Kanci ni malyi kunun dinyi asi yandoka lak eranoumwe uca, ni mi dibmar do?” ebmou. 19Uca, Elia biryi a ner asi ato ebmou, “Kan mi dibmara tukwi ara nisi karebdum,” ebmou. Ura, a ner aryi er mi tukwi tomoboka, Elia bisi karebmou. Ba, a mi boboka im dub lamna ai bowelebinmouci, Elia er man sokon bindoka mabdeibmou. 20Ura, Elia biryi Er Iya Erebdobnyi bisi uram ibokaburyi, ato eboka molobmou, “Nai Iya Erebdobnyi, nun Israel nang aryi molokunubnyi, a sulyi ner aryi nisi kanya teleb asa aryi er ai du dongobdobnou. Bok, Nai Iya Erebdobnyi unato ati, a sulyi ner asi mambul dinyi karebmarim ba, er mi dibmar do?” eboka molobmou. 21Ura, a mi er nong deici asi liki winiryi Elia er kisok dumubdeiboka, Er Iya Erebdobnyi bisi ato eboka molobmou, “Nun Nai Iya Erebdobnyi! A mi er kanya tamubkarebdum,” eboka molobmou. 22Ba, Er Iya Erebdobnyi biryi Elia molona kekeboka, a mi er kanya tubto tamubkarebmou ba, a mi kam bukokmou. 23Ura, Elia biryi a mi boyuryandoka er kwin bisi karebmouci, a sulyi ner asi ato ebmou, “Kan mi sirya kam bukokmar, a dibderum,” ebmou. 24Ba, a sulyi ner aryi Elia bisi ato ebmou, “Nai, kanda diba ati, Er Imtamnyi uram ermurunanyi kurum. Akiryi, kanci yandoka ebmomwe uram ara Er Iya Erebdobnyi uram dib yandoka ebmomwe tenebman,” ebmou.

Currently Selected:

1Raja-raja Uram 17: MTG

Highlight

Copy

Compare