1Raja-raja Uram 16

Nabi Yehu biryi sun Israel nang taleramwe weik sienyi Baesa bisi wenen uram ebdeibmou deyok

16:1-7

1Ura, weik sienyi Baesa Er Iya Erebdobnyi bisi malyito kuramwe deyok aryi, Er Iya Erebdobnyi biryi Hanani mi nabi Yehu bisi uram ato ebdeibmou, “Kanci Baesa bisi Ni uram a ebdeibnyi to kuboka ebdum ara ato ebdum, 2‘Minob ura kanda outam kuramoumwe bok, Ni Imtamnyi biryi Israel atei ninyi weik sienyi tikeibkise. Bok, kanda Nebat mi Yerobeam kuramwe to akwe kurumci, Ni mabwe nermabwe asi malyi dinyi bordongorum. Ba, sun malyi kun dinyi akiryi Ni Imtamnyi kanyi u yirdeinunung. 3A deyok aryi Ni Imtamnyi biryi kan ab, kan mabwe nermabwe ab nirya kum dandeibkwansin. Ara, weik sienyi Yerobeam kubse to kuboka kubkwankin. 4Kan mabwe nermabwe ara atei keta dam dibmangnyi ninyi sun tub ara kam aryi yibkwande. Ba, baitam dibingnyi ninyi ara maka aryi sun tub yibkwande,’ kanci ato ebdum,” ebdeibmou.

5Ba, yuk dinyi ara Baesa er weik sienyi kiamuryi, ibde baramwe dinyi ab, ninyi oramwe dinyi ab ara, “Israel weik sien nang kerek sengna,” umbura dam sekdongobyi. 6Baesa sirya dibmou ura, weik sien nang tukwe dongoramnyi mutuk Tirza dongobmai. Ba, er mi si Ela biryi er nai Baesa weik sienyi kiamwe wa unubmou. 7Ba, Baesa er ai ninyi kum dankwaming ena ara Er Iya Erebdobnyi biryi Hanani mi nabi Yehu bisi minob uca, ato ebdeiamwe. Ara, Baesa er malyi kuna aryi Er Iya Erebdobnyi yu wekeiamwe. A deyok aryi, Baesa er ai ninyi nirya obkiriamwe. Ara, sienyi Yerobeam ai ninyi nirya obkiriamwe to kuboka Baesa ai ninyi ababyi neiktoto obkiribmou. Ani, Baesa biryi Yerobeam oamwe deyok aryi ato kubmou.

Ninyi si Ela bira Israel atei sienyi kibmou uram deyok

16:8-14

8Asa Yehuda mutuk sienyi kiamwe kwalina nungna 26 baryi kibmou ura, Baesa mi si Ela Israel atei weik sienyi kibmou. Ba, Ela bira Tirza atei kwalina bitinyi weik sienyi kiamwe. 9Ura, sienyi Ela er wa inanyi si Zimri bira mar boboka ordan kereta bon yin doun nang sienyi kuramwe. Uki tentok tum aryi Zimri ab sun mar ordan kereta bon nang ab aryi, “Sienyi Ela obkwayeb,” eboka mar moun yibmai. A talak ara Ela bira Tirza mutuk dam Arza ai bindoka walina talen me yibmouci, kunmou. 10Bok, Zimri yandoka weik sienyi Ela obmou. Ura, Zimri Israel atei weik sienyi kibmou. Ara, Yehuda mutuk sienyi Asa kiamwe kwalina nungna 27 baryi kimbinmou talak aryi Ela oboka Zimri weik sienyi kibmou. 11Zimri sirya Israel atei weik sienyi kibmou talak aryi weik sienyi Baesa er ai ninyi nirya obkiribmou. Ba, er yala nang ab, er ai ninyi ab, er kwit yabwe ab nirya ara kam ton kuna kum uca nirya obmou ba, dibsekmai. 12Zimri biryi Baesa yala ab, er ai ninyi ab nirya obmou to ara Er Iya Erebdobnyi biryi nabi Yehu dam asi ebdeiamwe to kuboka kunubmou. 13Ara, Baesa ab, er mi Ela ab aryi yuk kwemdeina moloboka sun Israel ninyi nirya asi malyi kursinirandei. Ato kurandei deyok aryi Er Iya Erebdobnyi yu borsinirandei. Ba, sun ab, sun ai ninyi ab nirya obmai.

14Ela er weik sienyi kiamwe dinyi ab, er wa ibde baramwe dinyi ab nirya ara, “Israel weik sien nang kuramingnyi to kuboka sengdongon kerek sengna,” umbura dam sekdongobyi.

Zimri Israel atei weik sienyi kibmou uram deyok

16:15-20

15Asa Yehuda mutuk weik sienyi kiamwe talak kwalina nungna 27 baryi kimbinmou ura, Zimri Israel mutuk Tirza atei dam weik sienyi kibmou. Er weik sienyi kibmou talak uki nungna ara uki tabaryi kibmou. A kibmou talak aryi Israel yin doun nang aryi Gibeton atei Filistin nang mutuk iyandoka warikmai. 16A yandoka warikmaci keis ol ai dobmai dam aryi kekeramnyi uca, “Zimri biryi, ‘Weik sienyi Ela obkwan,’ ebmarci mar moun yibmar,” ebmai asi kekebmai. Ura, a uki tum aryok sun keis ol ai dobmai dam aryi, “Israel yin doun sienyi Omri bisi Israel atei weik sienyi kibkur,” eboka si erebdeibmai. 17Ura, Omri ab er yin doun nang ab Gibeton mutuk aryi anabdobmaici, Tirza atei bindoka warikmai. 18Ura, Zimri biryi diramwe uca ninyi ilinto er atei bindoka warikmai. Ura, ilil kubmouci, weik sien nang kun atei wengbinmouci, er aitam kibdobwe ura, akai uk dongobmou. Ba, er ab er kun atei ab neika uk yibmou. 19Ara, Zimri biryi Er Iya Erebdobnyi urasin dam malyi kuramwe deyok aryi ato kubmou. Ani, Israel ninyi dam malyi kimdongoramwe aryi uk dongobdanmou. Yerobeam kuramwe to kuboka Zimri bibabyi neiktoto kuramwe.

20Zimri biryi mar moun yiboka ninyi oramwe dinyi ab, er kubde baramwe dinyi ab, nirya ara, “Israel weik sien nang kerek sengna,” umbura dam sekdongobyi.

Omri Israel atei weik sienyi kibmou uram deyok

16:21-28

21Israel ninyi a talak kuramnyi ara meica dukoka bitinyi kibmai. Ton ninyi ara, “Ginat mi Tibni bisi Israel atei weik sienyi kibkwande,” eboka Tibni tam makdobmai. Ba, tonda “Omri bisi Israel atei weik sienyi kibkwande,” eboka Omri tam makdobmai. 22Bok, Omri tam kibmai ninyi ara mikib ilinto aryi Ginat mi Tibni bisi obmai. Ura, Tibni dibmou ba, Omri Israel atei weik sienyi kibmou.

23Asa Yehuda mutuk weik sienyi kiamwe talak kwalina nungna 31 baryi kimbinmou ura, Omri Israel atei weik sienyi kibmou. Ba, Omri Israel atei weik sienyi kiamwe kwalina nungna ara 12 baryi kwaliamwe. Bok, kwalina nabaryi ara Tirza mutuk weik sienyi kiamwe. 24Israel atei weik sienyi kibmou ura, Samaria mutuk kon damnyi si Semer bisi dekmou. A dekmou co bok nungna ara keil uang 6.000 perak baryi dekmou. Sirya dekmou ura, weik atei dobmouci, a mutuk kon damnyi si makmaka si Semer eramnyi ati akatei si ara Samaria eboka si dobmou. 25Ura, Omri biryi Er Iya Erebdobnyi urasin dam asi iya malyito dinyi kunuramwe. Ara, minob weik sien nang kuramnyi to ara mitikto bok, Omri biryi kuramwe ara iya weik malyi dinyi kunuramwe. 26Ara, Nebat mi Yerobeam biryi kuramwe to asi Omri bibabyi neiktoto kuramwe. Ba, Omri kuna aryi Israel ninyi nirya malyi kuramnyi. Ara, Er Iya Erebdobnyi bisi molona kum uca eda kwemdeina asi moloramnyi deyok aryi Er Iya Erebdobnyi yu kibkareamnyi.

27Omri er weik sienyi kiamwe dinyi ab, er wa ibde baramwe dinyi ab nirya ara, “Israel weik sien nang kuramingnyi to kuboka sengdongon kerek sengna,” umbura dam sekdongobyi. 28Omri sirya dibmou ura, Samaria atei dam tukwe dongobmou. Ba, er mi si Ahab biryi Israel atei weik sienyi kiboka unubmou.

Israel atei weik sienyi Ahab biryi Baal kwemdeina moloramwe uram deyok

16:29-34

29Asa bira Yehuda atei weik sienyi kiamwe talak kwalina nungna 38 baryi kimbinmou ura, Omri mi si Ahab Israel atei weik sienyi kibmou. Ura, Ahab Israel mutuk Samaria atei weik sienyi kiamwe talak kwalina nungna ara kwalina 22 baryi kiamwe. 30Ura, Omri mi Ahab biryi Er Iya Erebdobnyi urasin dam asi iya malyito dinyi kunuramwe. Ara, yuk weik sien nang minob kuramnyi to ara mitikto bok, Ahab biryi kuramwe ara Er Imtamnyi dam asi iya weik malyi dinyi kunuramwe. 31Ahab biryi malyito dinyi kunuramwe ara Yerobeam kuramwe to akwe kunuramwe. Bok, ara mitik tenebmouci, Sidon atei weik sienyi Etbaal nebnyi si Izebel dobmou. Ura, Ahab bira kwemdeina si Baal moloramwe. 32Ura, Ahab biryi Samaria atei dam asi Baal kwemdeina molon ai dobmou. 33Atei sirya dobwe ura, kwemdeina si Asyera kiknibmouci, a kwemdeina ababyi molobmou. Ato kubmou deyok aryi Er Iya Erebdobnyi yu wekeibmou. Ahab kuramwe to ara minob Israel mutuk weik sien nang kuramnyi to kum uca erda iya malyi dinyi kunuramwe.

34Ahab Israel atei weik sienyi kiamwe talak aryi, Yerikho atei tubto dobmou. Ara, Betel ateinyi si Hiel biryi dobmou. Hiel biryi Yerikho atei dobkwamwe ati yuma keil deirinmou tum ara er mi yuma mi si Abiram dibmou. Ba, Yerikho atei sirya dobdongoboka bisik bublan kikninmou tum ara er mi sirya mi si Segub dibmou. A kubmou to ara minob Er Iya Erebdobnyi biryi ninyi si Nun mi Yosua dam ebdeiamwe to kuboka kunubmou.

Currently Selected:

1Raja-raja Uram 16: MTG

Highlight

Copy

Compare