1Raja-raja Uram 15

Yehuda mutuk sienyi Abiam uram deyok

15:1-8

(2Taw. 13:1–14:1)

1Nebat mi si Yerobeam biryi Israel mutuk sienyi kiamwe talak kwalina nungna ara 18 baryi kimbinmou. Ura, Abiam Yehuda mutuk weik sienyi kibmou. 2Abiam bira kwalina winiryi Yerusalem atei weik sienyi kiamwe. Abiam er kwin bira Abisalom nebnyi si Maakha kuramwe. 3Abiam bira er abwe Daud kuramwe to kum kuramuryi, er nai Rehabeam malyito dinyi kunuramwe to akwe kuramwe. Ara, Er Iya Erebdobnyi bisi iya kanyi deirina kum kuramwe. 4Bok, Er Iya Erebdobnyi biryi Daud bisi, “Niryi wibse atei, Yerusalem atei asi iya kalingnikwan,” ebdeiamwe. Ato ebdeiamwe deyok aryi Imtamnyi biryi Abiam bisi mi tentok karebmou. Ara, Yerusalem mutuk sienyi kiboka talebkwamwe ati karebmou. 5Ara, Daud er kam kuramwe talak aryi Er Iya Erebdobnyi teleb tenen dinyi ab, Er Iya Erebdobnyi ebdeiamwe uram ab asi ton dangbisina kum kuramuryi, Er ebdeibmanto akwe kunuramwe ati kubmou. Bok, Daud biryi malyi kun dinyi kuamwe ara Het atei ner si Uria bisi malyi kuamwe. 6Ba, Abiam weik sienyi kiamwe ababyi Rehabeam yin doun nang ab, Yerobeam yin doun nang ab ara iya mar bobdanamnyi.

7Yuk dinyi Abiam er wa doamuryi, ibde baramwe to ara, “Yehuda atei weik sien nang kerek sekyi,” umbura dam sekdongobyi. Ani, Abiam ab, Yerobeam ab ara sun mar bordarandei. 8Abiam dibwe ura er yala ninyi tukwe dongoramnyi mutuk Daud atei dongobmai. Ba, Abiam weik sienyi kiamwe wa ara er mi si Asa unubmou.

Asa Yehuda mutuk sienyi kibmou uram deyok

15:9-24

(2Taw. 14:1-5; 15:16–16:6)

9Yerobeam Israel atei weik sienyi kiamwe kwalina nungna 20 baryi kibmou. Ura, Abiam mi si Asa Yehuda mutuk weik sienyi kibmou. 10Asa bira kwalina 41 baryi Yerusalem atei weik sienyi kiboka taleamwe. Er tat si ara Abisalom nebnyi si Maakha kuramwe. 11Weik sienyi Asa er kuramwe to ara Er Iya Erebdobnyi teleb teneramwe to akwe kunuramwe. Ara, Er abwe Daud kunuramwe to akwe kuramwe. 12Ura, Asa biryi kwemdeina molon dam kalikoka talyi yortamdaramnyi ninyi nirya yakdonokmou. Ani, er weik sienyi kum kiamwe talak minob weik sien nang kiamnyi nang aryi kwemdeina kikniamnyi ara nirya dalubkabmou 13Tonda, weik sienyi Asa biryi er tat Maakha bira sien ner eramnyi wa ara si kilibmou. Ara, a ner aryi kwemdeina si Asyera kikniamwe ba, moloramnyi ati kubmou. Ura, Asa biryi a kwemdeina daluboka Kidron mutuk lu dam asi uk bobindoka dongobmou. 14Bok, mutuk konkon kwemdeina kikniboka moloramnyi kwemdeina ara kum daluamwe. Ato bok, Asa bira Er Iya Erebdobnyi bisi dib teneboka Er ebdeiamwe to akwe kunuramwe. 15Er nai Abiam biryi Er Iya Erebdobnyi biti teleb dama deiramwe bona-bona ara Er Iya Erebdobnyi ai bobinmou. Ani, Asa erbiramnyi biti Imtamnyi bisi dama deirin dinyi ara dengna weik keil si emas ab, perak ab boboka Er Iya Erebdobnyi bisi molon ai bobinmou.

16Ba, Asa er weik sienyi kiamwe talak uki nirya ara Israel atei weik sienyi si Baesa ab mar bobdanandei. 17Ura, uki tentoka tum ara Israel mutuk sienyi Baesa biryi Yehuda sienyi Asa bisi mar bobmou. Mar bobmouci, Asa bisi muna kibdongoboka Rama atei arabdobmou. Arabdobmouci, “Yuk atei nang wengyaningnyei,” tenen ati akatei weik lika doboka aknabdongobmouci, katabum eboka dobmou. 18Ato kubmai deyok aryi Asa biryi dengna weik keil si emas ab, perak ab Er Iya Erebdobnyi molon ai deiamnyi dinyi ab, weik sienyi kun atei deiamnyi dinyi ab er wa irmilin nang taruk dam karebmou. Ura, Aram weik sienyi si Benhadad bisi bokdonokmou. Benhadad er nai si ara Hezion mi Tabrimon Aram atei weik sienyi Damsyik mutuk kuramwe asi dobkarebmai. Ura, Asa biryi Aram atei weik sienyi Benhadad bisi uram ato kuboka ebdeibmou. 19“Ni nai ab, kan nai ab uram talak ebdeibdanandei to kuboka nunbabyi uram talak ebdeibdankwinim. Ati, niryi kansi dengna weik keil si emas ab perak ab deibmakin. Ati, kan Benhadad ab, weik sienyi Baesa ab uram talak ebdarurumwe dinyi ara deiblobdum. Ba, Israel atei weik sienyi nisi mar bona kum kubkwanir,” ebmou. 20Ura, Benhadad biryi Yehuda mutuk sienyi Asa molobmou uram kekebmou. Ura, Benhadad er yin doun nang asi, “Israel atei ibindarur,” eboka arukmou. Ba, ibinmaci Iyon atei ab, Dan atei ab, Abel-Bet-Maakha atei ab, Kinerot atei weik me kwan dingiamwe mutuk Galilea mutuk ab, Naftali mutuk nirya ab nirya oboka erebdobmai. 21Ato kubmai dinyi Baesa biryi kekebmou ura, Rama atei yin bindoka deibmai ara taklobmai. Ura, Baesa ab er yin doun nang ab, “Asa bisi mar bobkwan,” tenebmou ara takloboka Tirza atei tamurbinmai. 22Ura, Yehuda atei weik sienyi Asa biryi Yehuda ninyi nirya asi arukmou. Ara, “Baesa biryi, ‘Rama atei kataboka lika dobkwan,’ tenen bobmou co ab keil ab nirya dalubdarur,” ebmou. Ba, dalubmai ura, Yehuda atei weik sienyi Asa doboka a keil ab, co ab aryi Geba atei Benyamin mutuk ab, Mizpa atei ab dobmou.

23Ba, Asa er Yehuda mutuk weik sienyi kiamwe dinyi ab, weik-weik atei kat kibdeibnin yibinamwe dinyi ab, ninyi oboka erebdoamwe dinyi ab nirya ara, “Yehuda weik sien nang kerek sengna,” umbura sekdongobyi. Ura, Asa wisi danmou talak aryi er yan bitinyi nirya asi u weik yin dinyi eibmou. 24A kutam taleamwe dinyi aryi Asa isin nebneb ena dakdobmou. Ura, er abwe yabwe weik sien nang tukwe dongoramnyi dam Daud atei tukwe dongobmai. Ba, Asa er mi si Yosafat er nai iramwe wa Yehuda mutuk sienyi kibmou.

Nadab Israel atei sienyi kibmou uram deyok

15:25-32

25Asa bira Yehuda mutuk weik sienyi Asa kibmou talak kwalina nungna bitinyi kibmou ura, Yerobeam mi si Nadab Israel atei weik sienyi kibmou. Nadab Israel atei weik sienyi kiamwe kwalina nungna ara bitinyi kwaliamwe. 26Ba, Nadab er weik sienyi kiamwe talak ara Er Iya Erebdobnyi teleb tenena kum dinyi kunuramwe. Ara, er nai Yerobeam kuramwe malyito akwe kunuramwe. Ato kuramwe deyok aryi sun Israel ninyi nirya malyi kun dinyi borsiniramwe. 27Ura, Ahia mi Baesa Isakhar yala ninyi uram toubmaici, “Nadab obkwayeb,” ebmai. A talak ara Nadab ab, er yin doun nang ab ara Gibeton mutuk Filistin atei ibinmai. Asi Baesa ab, er yin doun nang ab aryi Nadab bisi obmai. 28Ba, Asa Yehuda mutuk weik sienyi kiamwe talak uki kwalina winiryi kibmou bok Nadab obmai. Ura, Baesa Israel atei weik sienyi kibmou. 29Sirya Baesa Israel atei weik sienyi kibmou ura, Yerobeam er yala ninyi nirya obmou, tentok ababyi kam kuna kum kubmai. Baesa a kubmou to ara, “Er Iya Erebdobnyi biryi Silo ateinyi nabi Ahia dam asi Yerobeam ab, er yala ab nirya kum dankwaming,” ebdeiamwe to aryi nirya obkiribmai. 30Ato kuboka obkiribmai ara Yerobeam biryi malyi kuramwe dinyi aryi sun Israel ninyi nirya ababyi malyi kibsiniamwe. A deyok aryi Er Iya Erebdobnyi bisi yu kibsiniamwe.

31Nadab er wa ibde baramwe dinyi nirya ara, “Israel weik sien nang kerek sengna,” umbura dam sekdongobyi. 32Ba, Yehuda atei weik sienyi Asa ab, Israel atei weik sienyi Baesa ab, sun weik sien nang kiboka taleandei talak nirya ara mar iya bobdanandei.

Baesa Israel atei weik sienyi kiamwe uram deyok

15:33-34

33Asa Yehuda mutuk weik sienyi kiamwe kwalina winiryi kimbinmou ura, Baesa mi si Ahia Israel mutuk bok, Tirza atei dam weik sienyi kibmou. Ahia Israel weik sienyi kiamwe kwalina nungna ara 24 baryi kwaliamwe. 34Er weik sienyi kiamwe talak ara Yerobeam biryi Er Iya Erebdobnyi bisi malyi kimnamwe to kuboka Ahia bibabyi neiktoto kuramwe. Ato kuramwe deyok aryi sun Israel ninyi nirya malyi kun dinyi borsiniramwe.

Currently Selected:

1Raja-raja Uram 15: MTG

Highlight

Copy

Compare