1Raja-raja Uram 14

Yerobeam mi si Abia dibmou uram deyok

14:1-20

1Abia er nai si Yerobeam malyito kun dinyi aryi er mi Abia youn dobdobmou. 2Ura, Yerobeam biryi er ner asi ato ebmou, “Anabdobminci, Silo mutuk Er Imtamnyi uram ermurunanyi nabi Ahia atei birum. Ba, anyi bira nisi, ‘Kan aminda Israel atei sienyi kibkwandim,’ ebdeianounyi bisi birum. Bok, ninyi bikingnyei ati yuk ninyi kibdandoka binkwandum. 3Ba, roti kwaning takubaryi ab, kue kismis mikbaryi ab, moyok tentok madu me ab bobminyi ura, ersi binkwandum. Ba, erci a mi u yinmar dinyi ara, ‘Ato dinyi aryi u yinmar,’ ebkwamar,” ebmou. 4Ura, Yerobeam ner anabdobmouci, Silo atei bindoka nabi Ahia ai asi wengbinmou. Bok, nabi Ahia bira wisi aryi er asing ara oba liliamwe ba, ninyi eibman kum kuramwe. 5Bok, Er Iya Erebdobnyi biryi nabi Ahia bisi ato ebmou, “Yerobeam mi u yinmar deyok aryi, Yerobeam er ner ara kansi a yanganmar. Ati, kanci a ner asi ato ebkwandum,” ebkarebmou.

Ura, Yerobeam ner ara yuk nerabwe wengbaninto kuboka ai wengbinmou. 6Uca, nabi Ahia biryi a ner yan dorona kekebmouci, ato ebmou, “Kan yuk ninyi kiknirdana mem! Ni sirya bikmakin, kanda Yerobeam ner ati ur ai wengyarum. Ba, niryi kansi ilil tenen uram ebkwinkin,” ebmou. 7Ura, nabi Ahia biryi ato ebmou, “Kan anabdobminci Yerobeam bisi Er Iya Erebdobnyi biryi ebdeibmar to kuboka ebdum,” Ara, ato kuboka ebdeibmar, “Ni Imtamnyi biryi kansi Israel ninyi kankan dam aryi weik sienyi tikeiboka, ‘Ni mabwe nermabwe Israel ninyi asi sienyi kibkwandim,’ eboka tikeibkise. 8Niryi, Daud deibdoba Salomo talebwe atei nang asi bokokabsiryi, kanda atei takubaryi kareboka Yerobeam kansi weik sienyi kibdeibkise. Bok, kanda Ni ai wa inanyi Daud kuramwe to kum kurum. Daud bira Ni Imtamnyi biryi ebdeibmanyi to akwe kunuboka busul asa iramwe. Ani, Niryi, ‘Ur kubdum,’ ebmanyi to akwe kuramwe. 9Bok, Yerobeam kanda yu dinyi kunubmarim. Minob weik sien nang kibde yangaramnyi nang kuramnyi to kum kubmarim. Yerobeam kanci Ni Imtamnyi bisi deiblobmanirimci, yuk kwemdeina kat keil tembaga aryi lembu bisam mi atoanun kiknibmarimci, molobmarim deyok aryi Ni yu wekmanir. 10A deyok aryi Niryi Yerobeam kan yaldangna sal nang nirya ara kan yala nang wa dona kum ninyi aryi kuboka wa doamingnyi nang nirya asi obkwansin. Niryi kan yala nang nirya asi sungsunga kimnaming to kuboka nirya wibkabkwansin. 11Ba, Yerobeam kan ai ninyi weik atei dam keta dibmangnyi nang ara kam aryi yibkwande. Ba, baitam dibmangnyi nang ara maka aryi yibkwande. Ati, kan bikdum! Nira Er Iya Erebdobnyi biryi uram ebman. ‘Imtamnyi biryi ato kuboka ebdeibmakir,’ ebkwandum,” ebmou. 12Ura, Nabi Ahia biryi Yerobeam ner asi tubto ato ebmou, “Anabdobminci, kan atei ur birum. Kan banmaminyi ani, weik atei wengbinkwiminyi talak ara kan mi isin nebneb ena kum dariryi, dibkwamar. 13Ba, Yerobeam yaldangna asi Er Iya Erebdobnyi biryi teleb tenerur mabwe ara a mi tentok asi teneramwe. Ati, a mi dibmar ura, sun Israel ninyi nirya buluboka engebingiryi, tukwe dongobkwamang. Ba, Yerobeam yaldangna nirya ara a mi dongoamingnyi tukwe umbura akwe dongonkwaming. 14Ba, Er Iya Erebdobnyi biryi Israel ninyi kalingna ati yuk weik sienyi tikeibkwande. Ura, a tikeibmarinyi biryi Yerobeam ai ninyi nirya asi obkiribkwamar uki ara sirya dam kubmar. 15Tonda, Er Iya Erebdobnyi biryi Israel ninyi nirya asi me ai kurande sungsunga aryi borkengnande to kubdeibkwande. Er Iya Erebdobnyi biryi sun abwe yabwe dam asi, ‘Sul mutuk karebkwansin,’ eamwe mutuk dam aryi yakdonokwande. Er Imtamnyi biryi Israel ninyi asi bokwalwalabdeiboka Efrat me kouboka yaletam mutuk kubkwamang. Ara, sun Israel ninyi aryi kwemdeina si Asyera kiknibdeiboka molonung deyok aryi Er Iya Erebdobnyi yu kibdongobyi. 16Akiryi Er Iya Erebdobnyi biryi Israel ninyi asi dirlilina kumci deiblobkwande. Ara, weik sienyi Yerobeam kun deyok aryi sun Israel ninyi ababyi nirya malyi dinyi kununung.” Ato eboka nabi Ahia biryi Yerobeam ner asi uram ebdeibmou.

17Ura, Yerobeam ner tikoka anabdobmouci, Tirza atei binmou. Sirya Tirza atei binmouci, er ai bisik bublan dam tingbau ura, er mi dibmou. 18Sirya dibmou ura, Er Iya Erebdobnyi biryi nabi Ahia dam ebdeibmou to kuboka Israel ninyi nirya bulubmaici a mi engeboka tukwe dongobmai.

19Yerobeam er Israel ninyi weik sienyi kiamuryi, wa ibde baramwe to ab, ninyi orbaramwe dinyi ab ara, “Raja-Raja Israel weik sien nang kerek sengna,” umbura dam sekdongobyi. 20Yerobeam weik sienyi kiamwe kwalina uki nungna ara kwalina 22 baryi kiamwe. Yerobeam sirya dibmou ba, er abwe yabwe dongoramnyi tukwe dam dongobmai. Ba, er mi si Nadab biryi unubmouci, Israel mutuk sienyi kiboka talebmou.

Rehabeam Yehuda atei weik sienyi kiamwe uram deyok

14:21-31

(2Taw. 11:5–12:15)

21Salomo mi si Rehabeam Yehuda atei weik sienyi kiboka taleamwe. Rehabeam deiamwe ba, kubde yangaramwe kwalina uki nungna ara 41 baryi kurbinmou talak aryi weik sienyi kibmou. Yerusalem atei weik sienyi kiamwe kwalina uki nungna ara kwalina 17 baryi kiamwe. Yerusalem atei ara Er Iya Erebdobnyi biryi, “Nisi molonkwanurum atei,” eboka wibdeiamwe. Rehabeam er kwin si ara Naama Amon atei ner kuramwe.

22Ba, Yehuda yala nang aryi Er Iya Erebdobnyi bisi matan kimni dinyi wekeibmai. Ara, sun abwe yabwe aryi kuramnyi to kuna kum uca, malyito kuramnyi dinyi ara bisibkaboka kuramnyi deyok aryi Er Iya Erebdobnyi yu wekeibmai. 23Ara, sun Yehuda yala ninyi ara sun Israel me utam mutuk ninyi aryi kwemdeina kikniboka moloramnyi to kuramnyi. Ara, mutuk konkon dam ab, ilila co burur dam ab asi kiknibdeiboka moloramnyi. 24Tonda, a kwemdeina kiknibdeiboka moloramnyi dam aryi nerabwe babyi sal babyi talya yortamdan ner sal kibdanamiryi sun wa iramnyi. Ara, Er Iya Erebdobnyi biryi sun Israel ninyi kankan wengbinkwamnyi ati yakdonokamwe nang duknasito kuramnyi to kuboka kunuramnyi.

25Bok, Rehabeam Yehuda mutuk sienyi kiamwe talak kwalina uki nungna amubaryi kibmou. A talak aryi Mesir mutuk sienyi si Sisak biryi Yerusalem atei iyanmou. 26Ura, Er Iya Erebdobnyi bisi molon ai deiramnyi dengna weik bona-bona ab, weik sienyi kun atei ab nirya dalubdobmou. Ani, Salomo biryi mar obdankwamangiryi mar lilirona deiramwe ababyi nirya dalubdobmou. A mar lilirona ara dengna weik keil si emas aryi co ab tonkwa deneboka wiamwe dinyi nirya asi arabdobmou. 27Nirya dalubdobmou ura, weik sienyi Rehabeam biryi emas keil ununinto ara tembaga keil unubmou. Ba, tembaga keil boban nang ara weik sienyi kun atei bisik bublan dam kalingnamnyi nang asi wa karebmou. 28Ba, a keil tembaga ara Rehabeam Er Iya Erebdobnyi molon ai wengbinkwamaci ura, weik sienyi Rehabeam atei bisik bublan dam kalingna nang aryi boboka wengbaramnyi. Ani, Er Imtamnyi bisi sirya si weik ebingnyi ura, tubto boboka sun sienyi wa irmilin nang kalingdaming ai um bobaramnyi. 29Weik sienyi Rehabeam ibde baramwe to ara, “Raja-Raja Yehuda weik sien nang kerek sengna,” umbura dam sekyi. 30Rehabeam Yehuda mutuk sienyi kiamwe talak ara ton teleb asa akwe kuna kum. Eda, Yerobeam ab mar iya bordarandei. 31Ani, Rehabeam dibwe ura, er abwe yabwe sien nang tukwe dongoramnyi dam Daud atei tukwe dongobmai. Ba, er kwin si ara Amon yala ner si Naama. Ba, er mi si Abiam Yehuda mutuk sienyi unubmou.

Currently Selected:

1Raja-raja Uram 14: MTG

Highlight

Copy

Compare