1Raja-raja Uram 13

Yehuda mutuk Er Imtamnyi uram ermurunanyi deyok

13:1-34

1Ura, uki tentok tum ara Israel mutuk sienyi si Yerobeam bira Betel atei dam aryi Er Imtamnyi biti dama deirin keil lamna dub bisam oboka uk danmouci, a keil dungna dam tikmou. Asi, Er Imtamnyi uram ermurunanyi, Er Iya Erebdobnyi biryi arukmou to Yehuda mutuk aryi kuboka Betel atei yanmou. 2Sirya yanmou ura, Er Iya Erebdobnyi biryi a dama deirin keil lamna ati ebdeibmou to kuboka, a nabi aryi ato eboka uram dobmou. “Er Iya Erebdobnyi biryi ato ebdeibmar, ‘A dama deirin keil lamna e, a dama deirin keil lamna e, Daud yala ninyi aryi mi tentok deibkwaming ba, a mi er si ara Yosia eboka dobkwaming. Ba, sun mutuk konkon kwemdeina molorkiringdaming imam-imam nirya ara kan dub asi oboka uk dabkwan. Ani, sun ninyi yok nirya ababyi kan deici asi uk dabkwan,’ ebmar,” ebmou 3Ebmouci, tubto ato ebmou, “A dama deirin keil lamna ara teleboka bitinyi kibkwande. Ani, keil dungna dub dama deiboka uk danung ba, burur sici ara daluboka baitam sakwande. Ato kubci ura, nira diba ati Er Iya Erebdobnyi biryi arukoka ebdeibmaci to yandoka enmaniryi,” ebmou. 4A Er Imtamnyi uram ermurunanyi biryi a Betel atei dam dama deirin keil lamna ati ebmou uram nirya sienyi Yerobeam kekebmouci, taruk ukdongoboka, “Anyi talebdarur!” erdongou aryok er a ukdongobmou taruk sirim birbir eboka tubto dobdobman kumto kubmou. 5Ba, a nabi aryi Er Iya Erebdobnyi biryi ebdeibmou ba, ebmou to kuboka a mezbah dalubmouci, bitinyi kibmou. Ba, a buramwe uk sici ara daluboka baitam sakmou. 6Ato kubmou ba, sienyi Yerobeam biryi a nabi asi ato ebmou, “Er Iya Erebdobnyi kan molonanyi bisi molobliknibnurum. Ba, ni taruk tubto murukdobkwan,” ebmou. Ba, a nabi aryi Er Iya Erebdobnyi bisi molobmou ba, sienyi Yerobeam taruk tubto murukdobmou. 7Ura, sienyi Yerobeam biryi a nabi asi ato ebmou. “Ni ai bindoka, kwaning me yibnimnyi ura, niryi kansi bona ton karebkwankin,” ebmou. 8Uca, a nabi aryi ersi ato ebmou, “Niryi kan karen bona dobdobniryi, nun tonkwa kan kwaning me kum yibkwamanim,” ebmou. 9Ara, Er Iya Erebdobnyi biryi, “Kanci akatei kwaning ab me ab yina mem! Ani, Yehuda aryi Betel binkwamarim bisik tubto neik bisik tamuryangana mem!” ebdeibmanou. 10Ebmouci, Yehuda aryi Betel yanmou bisik takdongoboka yuk bisik kuboka Yehuda mutuk tamuroryanmou.

11A tamuroryanganmou talak ara Betel atei ara sirya wisi Imtamnyi uram ermurunanyi kuramwe ura, a wisi nabi er mabwe aryi Yehuda mutuk nabi aryi Betel atei dam yandoka ukubmouci, ebmou uram ab, sienyi Yerobeam bisi ebmou uram ab asi sun nai dam bindoka ebmai. 12Ura, sun nai biryi sunsi ato eboka asibdenmou, “Ato kuboka sirya ebde ura, dantam bisik kuboka bindobmar do?” ebmou. Uca, er mabwe aryi sun nai bisi, “A bisik kuboka binmar,” ebmai. 13Ura, er mabwe asi ato eboka arukmou, “Bisam keledai deici ni bun sokon tabwe kouboka kiknibdeibnindarur!” ebmou ba, sirya kiknibdeibmai ura, a bisam keledai deici burbindoka a nabi binmou to ingkiringbinmou. 14A nabi binmou to kuboka ingkirikde binmou ani, ilila co deyok bindoka bukmou asi binmou. Ura, Betel atei wisi nabi aryi a Yehuda mutuk nabi asi ato eboka asibmou, “Kanda diba, Yehuda mutuk aryi yanmarim nabi do?” eboka asibmou uca, “Yo diba, ara nitiba,” ebmou. 15Ura, a nabi asi Betel atei kuramwe wisi nabi aryi ato ebmou. “Ni aitam ur bindoka kwaning me yibnimiryi,” ebmou. 16Bok, Yehuda mutuk nabi aryi ato ebmou, “Kan aitam ur bindoka, niryi akatei kwaning ab me ab tonkwa kum yibkwamanim.” 17Ara, Er Iya Erebdobnyi biryi, “Betel atei kwaning ab, me ab yina mem! Ani, tamuroryankwiminyi ura, Yehuda mutuk aryi Betel atei binkwamarim bisik kuboka tamuryangana mem! Eda, yuk bisik kuboka tamuroryankwandum ebdeibmanou,” ebmou. 18Uca, Betel atei nabi biryi ersi ato ebmou. “Nibabyi kan irum wa inunyi kunun.” Ani, tola ati ton ato ebmou, “Er Iya Erebdobnyi uram eryuryangananyi si malaikat biryi nisi, ‘Kan aitam ur yandoka kwaning ab, me ab ur yibdurum,’ ebmar,” ebmou. 19Ura, Yehuda mutuk nabi bira Betel atei nabi kwaning ab, me ab yibkwamareici, tamubmarei.

20Sirya tamuryandoka, “Kwaning ab me ab kiknibminikdeici, yibkwinim,” tenen kurei ura, Er Iya Erebdobnyi biryi Yehuda mutuk nabi bisi ato ebmou. 21“Kanda, Ni Iya Erebdobnyi kan molonanyi biryi ebdeibmakunwe uram asi talebnuruboka kununa kum kunubmarim. 22A uram kununa kum kubmarimci, akatei kwaning ab, me ab yibmarim deyok aryi kanda kan abwe yabwe dongoamnyi dikum tukwe kum dongobkwanking,” ebmou.

23Ura, “Yibkwanim,” tenen kiknibdeibmarei kwaning ab, me ab yibmareici, Yehuda mutuk nabi er keledai deici burbindoka anabdobmou. 24Anabdobmouci, bisik noutam banmou bok, yu kam si singa aryi bisik sekoka obmou ba, dibmou. A dibmou ba, er boyiban bisam si keledai aryi kalikoka tikmou. Ani, er obmou yu kam si singa ababyi a kalikoka tikmarei. 25Ba, er a dibmoua dam kalikoka tikmareia eirinmai ninyi aryi Betel atei yandoka, “Ato kubmar asi eirinmab,” enmai.

26Asi, Betel atei kuramwe wisi nabi aryi a enmai uram kekebmouci, ato ebmou. “Ara, Er Iya Erebdobnyi biryi ebdeibmou uram asi kekeboka kununa kum kubmou nabi asi, Er Iya Erebdobnyi biryi yu kam si singa ati dobkarebmar ba, obmar. Ani, Er Iya Erebdobnyi biryi a nabi asi minob uca, ‘Ato kubkwamakir,’ ebdeibmou to kuboka kunubmar,” tenebman ebmou. 27Ura, a wisi nabi aryi er mabwe asi ato ebmou, “Bisam keledai deici ni bun sokon tabwe kouboka tubto kiknibdeibnindarur!” ebmou ba, sirya kiknibdeibmai. 28Ura, binmou ani, Yehuda mutuk nabi bisik ai a oblobmou ba, er boyiban bisam si keledai ab, er obmou yu kam si singa ara a nabi dinatam a kalikoka tikmarei asi binmou. Ba, a yu kam singa aryi a nabi asi kum yibmouci, er boyiban bisam si keledai ababyi kum oboka yibmou. 29Asi bindokaburyi, Yehuda mutuk nabi tukwi doboka er boyiban bisam keledai dub deibmouci, engeboka tukwe dongobkwamou ati Betel atei boyanmou. 30Ura, Betel atei wisi nabi ab er mabwe aryi, “Ni kwit se, ni boukwe,” eboka engenmou. Ato kuboka sirya engebmou ura, a wisi nabi ara er abwe yabwe dongoramnyi tukwe dikum dongobmai. 31Sirya a nabi tukwe dongobyi ura, a wisi nabi aryi er mabwe asi ato ebmou. “Ni dibnyi ura, Yehuda mutuk nabi dongobmab bisik kuktaleboka er dinatam deibkwanindarur! 32Ato kubsumunyi ba, Er Iya Erebdobnyi biryi Betel atei dama deirin keil lamna ab, mutuk konkon asi yuk kwemdeina dama deiboka molon ai ab Samaria atei nirya ara diba ati a ebdeibwe tok kuboka diba ati kunubde binkwande,” ebmou.

33Er Imtamnyi biryi Yehuda mutuk nabi deici asi dama deirin keil lamna ati ebdeibmou ba, Betel atei yandoka ebmou to kuboka kunubde binmou. A kunubde binmou dinyi ara Israel sienyi Yerobeam biryi, “Ni ilil,” tenena kum kubmouci, tuba ati yu dinyi akwe kunubde binmou. Ara, sun Betel atei talyi nang asi imam wa kareboka tikeibnin yibinmou. Ani, unanyi biryi, “Ni imam wa tikwan,” ebdob nang nirya asi bisam oboka uk darkiringni imam tikeibnin yibinmou. 34Ba, a kubde yibinmou dinyi aryi sienyi Yerobeam er yala ninyi nirya malyi kun dinyi takubdobmai. Ani, a malyi kun dinyi aryi, sienyi Yerobeam er yala ninyi nirya asi obkabkwande.

Currently Selected:

1Raja-raja Uram 13: MTG

Highlight

Copy

Compare